Ministria e Mbrojtjes e Turqisë kishte deklaruar se një raketë balistike e lëshuar nga Irani drejt hapësirës ajrore turke u shkatërrua nga sistemet e mbrojtjes ajrore dhe raketore të NATO-s mbi Mesdheun Lindor.

Forcat e Armatosura të Iranit kanë mohuar lëshimin e ndonjë rakete drejt territorit turk, duke këmbëngulur se Irani respekton sovranitetin e Turqisë, thuhet në një deklaratë të përcjellë nga mediat shtetërore.

Deklarata iraniane e të enjtes vjen pasi Ministria e Mbrojtjes Kombëtare e Turqisë tha të mërkurën se një raketë balistike e lëshuar nga Irani drejt hapësirës ajrore turke, pasi kaloi përmes Sirisë dhe Irakut, u shkatërrua nga sistemet e mbrojtjes ajrore të NATO-s mbi Mesdheun Lindor. Nuk ishte e qartë se cili ishte synimi i saktë i raketës.

“Një mjet balistik i lëshuar nga Irani, i cili u diktua duke kaluar nëpër hapësirën ajrore irakiane dhe siriane me drejtim drejt hapësirës ajrore turke, u godit në kohë nga asetet e mbrojtjes ajrore dhe raketore të NATO-s të stacionuara në Mesdheun Lindor dhe u bë jofunksional,” tha ministria në një deklaratë të mërkurën.

Aty thuhej se nuk pati viktima apo të lënduar, duke shtuar se Ankara rezervon të drejtën për t’iu përgjigjur çdo veprimi armiqësor kundër saj, ndërsa paralajmëroi palët që të abstenojnë nga përshkallëzimi i konfliktit.

Në një adresim mbrëmjen e kaluar drejtuar kombit, Presidenti i Turqisë, Recep Tayyip Erdogan, tha se vendi po “merr të gjitha masat e nevojshme” në konsultim me aleatët e tij të NATO-s dhe po lëshon “paralajmërime në termat më të qartë për të parandaluar përsëritjen e incidenteve të ngjashme”.

“Nëse ne, si komb, duam të jetojmë në paqe dhe qetësi… duhet të rrisim vazhdimisht aftësitë tona parandaluese. Në këto kohë të vështira… nuk po i lemë absolutisht asgjë rastësisë sa i përket sigurisë së kufijve dhe hapësirës sonë ajrore,” tha ai.

Ministri i Jashtëm turk, Hakan Fidan, të mërkurën i përcolli homologut të tij iranian protestën e Ankarasë përmes një telefonate, raportoi agjencia e lajmeve Reuters.

NATO dënoi shënjestrimin e Turqisë nga Irani, tha zëdhënësja Allison Hart, duke shtuar se organizata “qëndron e palëkundur pranë të gjithë aleatëve, përfshirë Turqinë”.

“Qëndrimi ynë parandalues dhe mbrojtës mbetet i fortë në të gjitha domenet, përfshirë mbrojtjen ajrore dhe raketore,” tha Hart.

Sekretari i Mbrojtjes i Shteteve të Bashkuara, Pete Hegseth, tha se “nuk ka asnjë shenjë” që shkatërrimi i raketës balistike do të aktivizonte Nenin 5 të NATO-s, i cili përcakton se një sulm ndaj një anëtari të NATO-s është sulm ndaj të gjithë anëtarëve.

Baza ajrore Incirlik në Turqi përdoret nga forcat ushtarake të huaja, kryesisht nga SHBA-ja dhe aleatët e tjerë të NATO-s. Baza është nën kontrollin e forcave ajrore turke, por operon si një bazë e përbashkët turko-amerikane.

Incirlik ishte një lokacion kritik logjistik dhe i mbështetjes ajrore për operacionet e udhëhequra nga SHBA në Irak gjatë Luftës së Gjirit në vitin 1991, dhe më vonë si një qendër ngarkesash për operacionet në Irak dhe Afganistan.

Turqia ia mohoi SHBA-së lejen për ta përdorur atë gjatë pushtimit të Irakut në vitin 2003, por ajo u përdor gjerësisht për sulmet kundër ISIL (ISIS) që nga viti 2014. /AlJazeera/

Një anije e madhe transporti me kontejnerë, e quajtur “Safeen Prestige” dhe që lundronte nën flamurin e Maltës, është dëmtuar nga një predhë ndërsa po udhëtonte drejt Ngushticës së Hormuzit të mërkurën. Sipas burimeve nga industria e lundrimit, dëmtimi ka qenë i rëndë, gjë që ka detyruar ekuipazhin ta braktisë anijen për të shpëtuar jetën.

Kompania britanike e sigurisë detare, “Vanguard”, njoftoi se anija u godit rreth dy milje detare në veri të Omanit, teksa po kalonte përmes ngushticës. Goditja ka ndodhur nga një objekt i panjohur (predhë ose raketë) pak mbi vijën e ujit, duke shkaktuar menjëherë një zjarr masiv në dhomën e motorit.

Për momentin nuk raportohet për dëme në mjedis apo derdhje lëndësh të rrezikshme në det. Agjencia e marinës britanike, UKMTO, konfirmoi se ka marrë njoftimin për sulmin ndaj anijes së kontejnerëve, duke shtuar se i gjithë ekuipazhi ka mundur të evakuohet pa pësuar lëndime fizike. /Reuters/

Një anije cisternë ruse për transportin e gazit natyror të lëngshëm (LNG) është fundosur në Detin Mesdhe, midis Libisë dhe Maltës, pasi u përfshi nga shpërthime dhe zjarr, sipas njoftimeve nga zyrtarët portualë libianë.

Rusia ka akuzuar menjëherë Ukrainën se ka shënjestruar anijen “Arctic Metagaz” me anë të dronëve detarë të telekomanduar, të cilët pretendohet se u lëshuan nga bregdeti libian. Ndërkohë që shërbimi shtetëror i sigurisë i Ukrainës (SBU) nuk ka pranuar të komentojë mbi këto akuza, autoritetet portuale libiane sqaruan se shkaku i saktë i zjarrit mbetet ende i paqartë.

Sipas të dhënave nga pala libiane, anija transportuese po mbante rreth 62,000 tonë gaz para shpërthimeve dhe u mbyt rreth 240 kilometra në veri të portit libian të Sirtes. Ministria e Transportit e Rusisë konfirmoi se në bord ndodheshin 30 shtetats rusë, të cilët fatmirësisht u shpëtuan.

Ministri i Brendshëm i Maltës, Byron Camilleri, bëri të ditur se të gjithë anëtarët e ekuipazhit u gjetën shëndoshë e mirë në një varkë shpëtimi gjatë një operacioni kërkim-shpëtimi të ndërmarrë nga forcat e armatosura malteze.

Në rrjetet sociale kanë qarkulluar pamje të paverifikuara që tregojnë anijen të përfshirë nga flakët gjatë natës, ndërsa Serhii Sternenko, një këshilltar i ministrit të mbrojtjes të Ukrainës, publikoi foto të anijes me dëmtime të rënda në dhomën e motorit, duke e cilësuar atë si të pariparueshme.

Presidenti rus Vladimir Putin e quajti ngjarjen një “sulm terrorist” në televizionin shtetëror, ndërsa ministria e tij e transportit e cilësoi si një akt piraterie ndërkombëtare, duke akuzuar madje edhe Bashkimin Evropian si bashkëpunëtor në këtë incident.

Anija “Arctic Metagaz” ishte nisur nga porti rus i Murmanskut drejt Port Saidit në Egjipt dhe konsiderohet pjesë e së ashtuquajturës “flotë hije” e Rusisë, e cila përdoret për të anashkaluar sanksionet perëndimore që synojnë të pakësojnë të ardhurat që financojnë luftën në Ukrainë.

Megjithëse Ukraina ka përdorur edhe më parë dronë detarë për të goditur mjetet lundruese ruse, pothuajse të gjitha ato sulme kanë ndodhur brenda Detit të Zi. Ky incident në Mesdhe shënon një zhvillim të papritur, duke pasur parasysh distancën e madhe nga zona kryesore e luftimeve. /BBC/

Ndërsa konflikti në Lindjen e Mesme hyn në ditën e tij të pestë këtë të mërkurë, zyrtarët amerikanë dhe izraelitë po përdorin një retorikë që sugjeron se fushata kundër Iranit është një luftë fetare. Raportohet se trupave amerikane u është thënë se lufta me Iranin ka për qëllim të sjellë “fundin biblik të botës” ose Armagedonin.

Organizata për të drejtat civile të myslimanëve, Këshilli për Marrëdhëniet Amerikano-Islame (CAIR), dënoi të martën përdorimin e kësaj retorike nga Pentagoni, duke e cilësuar atë si “të rrezikshme” dhe “anti-myslimane”. Shtetet e Bashkuara dhe Izraeli nisën sulmin e tyre ndaj Iranit të shtunën dhe që atëherë kanë vazhduar goditjet. Si hakmarrje, Irani ka goditur objektiva në Izrael dhe asete ushtarake të SHBA-së në Bahrein, Arabi Saudite, Katar, Emiratet e Bashkuara Arabe, Irak dhe Qipro.

Një organizatë mbikëqyrëse amerikane raportoi se ushtarëve të SHBA-së u është thënë se lufta synon të “shkaktojë fundin biblik të kohërave”. Gjithashtu, Sekretari amerikan i Shtetit, Marco Rubio, deklaroi së fundmi se Irani drejtohet nga “të çmendur fanatikë fetarë”.

Çfarë po thonë udhëheqësit amerikanë dhe izraelitë?

Fondacioni për Lirinë Fetare Ushtarake (MRFF), një organizatë jofitimprurëse në SHBA, bëri të ditur se ka marrë ankesa përmes email-eve ku thuhet se pjesëtarëve të shërbimit ushtarak u është thënë se lufta me Iranin ka për qëllim “të shkaktojë Armagedonin”.

Një nënoficer anonim i shkroi MRFF-së se një komandant i kishte nxitur oficerët “t’u thonë trupave tona se kjo ishte ‘pjesë e planit hyjnor të Zotit'”, duke iu referuar specifikisht citimeve nga Libri i Zbulesës për Armagedonin dhe rikthimin e pashmangshëm të Jezus Krishtit. /AlJazeera/