Administrata amerikane vijon ofensivën ndaj emigrantëve ilegalë, e nisur që kur Donald Trump u kthye në Shtëpinë e Bardhë muajin e kaluar.

Grupi i parë i haitianëve të dëbuar mbërriti në vendin e Karaibeve ditën e martë.

Njëri prej tyre, Mario Montès ka sqaruar se si u arrestua pasi kishte qëndruar në Amerikë për thuajse një vit.

“Po shkoja në punë kur agjentët e emigracionit më ndaluan dhe më kërkuan të shkoja me ta pasi me ardhjen e presidentit të ri duheshin plotësuar disa dokumente të reja. Shkova në zyrën e tyre, por ata më vunë prangat dhe më thanë se do të më rikthenin në vendin tim”, deklaroi ai.

Ndërkohë, El Salvadori është vetofruar për të marrë të dëbuarit dhe kriminelët e dhunshëm, edhe nëse ata janë shtetas amerikanë, në burgun e madh ku ndodhen 40 mijë të dënuar e ku flitet se shkelen vazhdimisht të drejtat e njeriut.

Sekretari i Shtetit, Marco Rubio e cilësoi lëvizjen “marrëveshjen më të jashtëzakonshme dhe më të paprecedent në botë”.

Po të martën u realizua dhe fluturimi i parë për dëbimin e emigrantëve në gjirin e Guantanamos, në Kubë – bëri të ditur sekretari i Mbrojtjes, Pete Hegseth.

Në javën e parë të presidencës së dytë të Trump, autoritetet dëbuan rreth 7 mijë e 300 persona të kombësive të ndryshme.

Flamujt e Bashkimit Evropian u ulën në gjysmështizë sot në shenjë solidariteti me popullin suedez pas të shtënave masive në Örebro, njoftoi sot presidentja e Komisionit Evropian Ursula von der Leyen.

“Zemrat dhe mendimet tona janë me familjet e viktimave”, tha Von der Leyen në llogarinë e saj në rrjetet sociale X.

Të paktën 11 persona u vranë dje nga të shtënat në një qendër arsimore për të rritur në qytetin e Orebro, Suedi, tha policia.

Autori i dyshuar është një nga të vrarët, por ende nuk dihet saktësisht se sa persona kanë mbetur të plagosur nga të shtënat.

Pas thuajse 3 vitesh luftë, Ukraina dhe Rusia shprehen gati për paqe. Kremlini ka ndryshuar qëndrim lidhur me negociatat dhe konfirmon gatishmërinë e presidentit Vladimir Putin për t’u ulur në një tryezë me homologun Volodymyr Zelenski për të biseduar për uljen e armëve.

“Gatishmëria duhet të bazohet në diçka, normalisht në dëshirë dhe vullnet. Nuk mund të bazohet në një ndalesë legjislative nga Zelenski për negociata të tilla. Prandaj, për momentin, është e pamundur për ta kuptuar këtë ndryshe përveç se fjalë boshe. Ai ka probleme të mëdha sa i përket legjitimiteti, megjithatë pala ruse mbetet e hapur për negociata”, tha Dmitry Peskov, zëdhënës i Kremlinit

Zëdhënësi i Kremlinit, pasi u pyet lidhur me kontaktet me administratën Amerikane të presidentit Donald Trump për Ukrainën, konfirmoi se ato janë në nivel ministrash dhe se janë shtuar së fundmi. Lideri i Kievit u shpreh gati për bisedime për të mbyllur luftën, pavarësisht se pati fjalë të rënda për udhëheqësin rus.

“Për të qenë të drejtë, Putin është një vrasës dhe një terrorist. Ky është një fakt. Nëse aleatët tanë besojnë se ne duhet të lëvizim në fushën diplomatike, atëherë edhe ne jemi gati për të kaluar në atë fushë diplomatike. Por në tryezë duhet të jenë Shtetet e Bashkuara të Amerikës, Europa, Ukraina dhe Rusia. A nuk është ky një kompromis më vete? Ne do të bisedojmë me Putinin. Një bisedë me të është një kompromis për të”, tha Zelensky.

Zelenski pranoi se në këtë luftë gati 3 vjeçare, Ukraina ka humbur 45 mijë ushtarë. Sakaq, beteja e dronëve nuk ka ndalur. Një shpërthim është raportuar në një rafineri nafte në Krasnodar të Rusisë, ndërsa Kievi konfirmoi rrëzimin e 57 dronëve të lëshuar nga ushtria e Putinit.