Gjykata e Lartë Federale e Irakut ka pezulluar përkohësisht zbatimin e tre ligjeve të miratuara nga parlamenti muajin e kaluar, përfshirë një ligj që ndryshon ligjin e statusit personal dhe që aktivistët thonë se kërcënon të drejtat e grave. Vendimi i Gjykatës, shpallur të martën, ndalon zbatimin e këtyre ligjeve deri në shqyrtimin e një sfide ligjore që ka të bëjë me procesin e miratimit të tyre. Grupi i ligjvënësve kundërshtoi mënyrën e miratimit të ligjeve, duke argumentuar se ato u votuan së bashku, pa u diskutuar individualisht.

Një nga ligjet e pezulluara është ndryshimi në ligjin e statusit personal, që do t’i jepte më shumë fuqi gjykatave islamike mbi çështjet familjare si martesa, divorci dhe trashëgimia. Aktivistët e drejtat e grave shprehen shqetësim se ky ndryshim mund të rrezikojë reformat ligjore të mëparshme dhe mund të çojë në legalizimin e martesës së fëmijëve.

Ligji i dytë i pezulluar është një projekt-ligj për amnistinë e përgjithshme, që mund të çojë në lirimin e të burgosurve sunitë, por kritikët shprehin shqetësim se mund të lejojë lirimin e të dënuarve për krime të rënda si korrupsioni dhe krimet e luftës.

Ligji i tretë i pezulluar ka të bëjë me kthimin e tokës së konfiskuar nga kurdët gjatë regjimit të Sadam Huseinit, i cili është mbështetur nga kurdët, por ka kundërshtime nga disa grupe arabe.

Ky vendim reflekton përplasjet politike në Irak dhe mund të nxisë debate të mëtejshme mbi të drejtat civile, barazinë gjinore dhe ekuilibrin e pushtetit në mes të grupeve etnike dhe fetare të vendit.

Deklaratat e presidentit amerikan Donald Trump për një propozim për marrjen e Rripit të Gazës nga SHBA dhe zhvendosjen e palestinezëve që jetojnë atje janë “të rrezikshme për stabilitetin dhe procesin e paqes”, tha sot një zëdhënëse e qeverisë franceze.

“Franca është plotësisht kundër transferimeve të popullsisë”, tha Sophie Primas duke shtuar se Franca po i qëndron politikës së saj – nuk ka transferime të popullsisë, duke kërkuar një armëpushim të përkohshëm, ndërsa shkon drejt një procesi paqeje dhe një zgjidhje me dy shtete, izraelite dhe palestineze.

Sekretari i Jashtëm britanik, David Lammy, riafirmoi sot se palestinezët duhet të jenë në gjendje të “jetojnë dhe të lulëzojnë në Rripin e Gazës dhe Bregun Perëndimor”, duke iu përgjigjur deklaratave të presidentit amerikan Trump për një kontroll të mundshëm të Gazës nga SHBA dhe zhvendosjen e palestinezëve.

Ministrja e Jashtme gjermane Annalena Baerbock tha sot se Rripi i Gazës “i përket palestinezëve, ashtu si Bregu Perëndimor dhe Jerusalemi Lindor, dhe duhet të jetë pjesë e një shteti të ardhshëm palestinez”.

“Popullsia civile e Gazës nuk duhet të dëbohet dhe Gaza nuk duhet të pushtohet ose rikolonizohet përgjithmonë,” tha Burbock në një deklaratë.

Trump deklaroi mbrëmë se ai dëshiron të marrë kontrollin e Gazës së shkatërruar nga lufta, të zhvendosë banorët e saj dhe ta kthejë atë në “Côte d’Azur të Lindjes së Mesme”.

Presidenti palestinez Mahmoud Abbas ka hedhur poshtë me vendosmëri planin që Shtetet e Bashkuara (SHBA) të marrin Rripin e Gazës, si dhe thirrjet për transferimin me forcë të palestinezëve që jetojnë atje.

Ministri i Jashtëm turk Hakan Fidan tha gjithashtu sot se plani i presidentit amerikan Donald Trump për zhvendosjen e popullsisë nga Rripi i Gazës është i papranueshëm “Deklarata e Trump për Gazën është e papranueshme”, tha ministri në një intervistë për agjencinë turke të lajmeve Anadolu.

Ministri i Jashtëm egjiptian Badr Abdelati bëri thirrje sot për rindërtimin e shpejtë të Rripit të Gazës, pa zhvendosur banorët e tij dhe tha se Autoriteti Palestinez duhet të marrë përgjegjësinë në territor.

Hamasi e quajti qesharake dhe absurde deklaratën e Trump për Gazën.

Në një incident të pazakontë në Pensilvani, Shtetet e Bashkuara të Amerikës, janë vjedhur mbi 100,000 vezë me vlerë rreth 40,000 dollarë. Vjedhja ka ndodhur më 1 shkurt në kamionin e kompanisë “Pete & Gerry’s Organics” në Greencastle. Ky akt vjedhjeje ndodh në një periudhë kur çmimi i vezëve është rritur ndjeshëm për shkak të një epidemie masive të gripit të shpendëve që ka goditur SHBA-në.

Gripi i shpendëve, i cili ka filluar në vitin 2022, ka shkaktuar shpërthime të shumta, duke ndikuar në furnizimin me vezë dhe duke rritur çmimin e tyre. Çmimi i vezëve është rritur me 65% në vitin 2023 dhe pritet të vazhdojë të rritet edhe gjatë vitit 2025. Sipas të dhënave të qeverisë amerikane, çmimi i vezëve ka kaluar nga 2.51 dollarë për një paketim në vitin 2023 në 4.15 dollarë tani.

Kjo rritje e çmimeve ka ndikuar edhe në industrinë e restoranteve, siç është rasti me Waffle House, një zinxhir i njohur restorantesh, i cili ka qenë i detyruar të rrisë çmimet e vezëve për shkak të ndryshimeve në treg. Gripi i shpendëve ka prekur zogjtë, bagëtitë dhe gjitarët në tërë territorin e SHBA-së, duke shkaktuar pasiguri të mëtejshme në tregun e vezëve dhe produktet e lidhura me to.

Komisionarja për Zgjerim në Bashkimin Evropian, Marta Kos, ka apeluar për një dialog gjithëpërfshirës në Serbi për të adresuar shqetësimet e shfaqura gjatë protestave, si dhe për hetime të pavarura mbi sulmet ndaj protestuesve. Ajo theksoi rëndësinë e respektimit të vlerave themelore të Bashkimit Evropian, siç janë liria e tubimit dhe siguria për qytetarët, duke kërkuar hetime të plota për dhunën e ushtruar ndaj studentëve dhe qytetarëve gjatë demonstratave.

Kos theksoi se rruga e Serbisë drejt BE-së është e lidhur me realizimin e reformave që promovojnë lirinë e mediave, pavarësinë e gjyqësorit dhe luftën kundër korrupsionit.

Protestat e studentëve në Serbi, që kanë nisur pas aksidentit tragjik në Stacionin Hekurudhor të Novi Sadit më 1 nëntor 2024, vazhdojnë dhe janë shoqëruar me sulme ndaj protestuesve, përfshirë përplasje me makina dhe goditje me shkopinj. Qendra për Gazetari Hulumtuese (CINS) ka raportuar se janë regjistruar mbi 50 sulme ndaj studentëve. Kos theksoi se procesi i integrimit të Serbisë në BE duhet të jetë gjithëpërfshirës dhe i mbështetur nga shoqëria civile dhe faktori politik.

Protestuesit kanë kërkuar, ndër të tjera, ndalimin e bllokadave dhe publikimin e dokumentacionit mbi rindërtimin e Stacionit të Novi Sadit, si dhe përgjegjësinë për aksidentin. Ata gjithashtu kërkojnë që sulmuesit e protestuesve të identifikohen dhe të përballen me përgjegjësi penale, lirimin e aktivistëve të arrestuar dhe rritjen e financimeve për universitetet. Kërkesat e studentëve janë bërë pjesë e një lëvizjeje më të gjerë që sfidon politikën dhe qeverinë aktuale të Serbisë, duke kërkuar reforma dhe përmirësime në sektorin e arsimit dhe të drejtave civile.