Presidenti amerikan Donald Trump përsëriti dëshirën e tij për të aneksuar Kanadanë në SHBA si shtetin e saj të 51-të, teksa deklaroi gjithashtu vendosmërinë e tij për të rimarrë Kanalin e Panamasë.

“Unë mendoj se Kanadaja, ju e dini, ata do të duhet të paguajnë tarifa për makinat, lëndët e para të drurit, naftën dhe gazin, etj., teksa ata marrin 95 për qind të produkteve të tyre nga SHBA-ja“, tha Trump në darkën e mbrëmshme të Takimit të Shoqatës së Guvernatorëve Republikanë në Washington.

“Unë mendoj se ata duhet të bëhen shteti i 51-të“, shtoi ai.

Duke folur për një ndeshje ndërkombëtare të hokejit në Montreal, ku kanadezët nuk respektuan himnin kombëtar të SHBA-së përpara ndeshjes, Trump tha se “në fund të fundit” ata do të lavdërojnë himnin kombëtar amerikan.

“Ne do të duhet të arrijmë një marrëveshje, sepse mua më pëlqen ‘O Canada‘”, tha ai, duke iu referuar himnit kombëtar kanadez.

“Është një gjë e bukur. Unë mendoj se ne do të duhet ta mbajmë atë si shteti i 51-të”, shtoi Trump. Duke e quajtur kryeministrin kanadez Justin Trudeau një “guvernator“, Trump tha se ai po bën një “punë të mrekullueshme”.

“Unë mendoj se në fakt kjo ka rezultuar në zgjedhjen e tij, nëse doni ta dini këtë, por ne do të shohim për këtë“, tha Trump, duke shtuar: “Ne po shikojmë Grenlandën dhe duhet të rimarrim Kanalin e Panamasë“.

Ai tha se Panamaja është një nga mrekullitë e mëdha të botës. “Ne e ndërtuam atë, e për shkak se Kina në thelb e ka marrë atë, ne nuk do të lejojmë kjo të ndodhë. Kina e di dhe Panamaja po ashtu”, tha Trump.

Presidenti amerikan pretendon se shtetet e grupit BRICS “u ndanë” vetëm disa ditë pasi i paralajmëroi për tarifa të mundshme nëse përpiqeshin të gjenin një zëvendësim për dollarin amerikan.

“Shtetet e BRICS-it po përpiqeshin të shkatërronin dollarin tonë. Ata donin të krijonin një monedhë të re. Kështu, kur hyra, gjëja e parë që thashë ishte se çdo shtet i grupit BRICS që vetëm përmend shkatërrimin e dollarit, do të përballet me një tarifë 150 për qind, dhe se ne nuk duam mallrat tuaja, kështu që shtetet e grupit BRICS u ndanë“, tha ai.

CIA nën udhëheqjen e presidentit Donald Trump ka kryer mbikëqyrje të fshehta me dronë mbi territorin e Meksikës.

Lajmin e ka bërë të ditur CNN, duke cituar zyrtarë dhe ish-zyrtarë në dijeni të operacioneve, që shënojnë orientimin e aseteve të sigurisë kombëtare të administratës së re amerikane drejt kufirit jugor të Shteteve të Bashkuara.

Misionet, të cilat nuk janë raportuar më herët, vijnë në një kohë kur administrata Trump po i konsideron kartelet e drogës si organizata terroriste, edhe pse përcaktimi si të tilla duhet ende të bëhet.

Dronët e përdorur, të llojit “MQ-9”, nuk janë të armatosur, por mund të pajisen me mjete për të kryer sulme me precizion të lartë. Shtetet e Bashkuara zakonisht i përdorin ato për të goditur grupet terroriste në Siri, Irak dhe Somali.

Zyrtarët dhe ish-zyrtarët e cituar nga rrjeti informativ amerikan thonë se përcaktimi i karteleve si grupe terroriste mund të shtrojë terrenin për sulme direkte ndaj anëtarëve të tyre dhe laboratorëve të drogës në Meksikë.

CIA ka kryer operacione mbikëqyrjeje me dronë në Meksikë edhe më parë, thonë burimet, por gjithçka është realizuar në kuadër të një programi të hartuar në partneritet me autoritetet meksikane.

Por fluturimet e fundit, për të cilat Kongresi amerikan u vu në dijeni nga administrata Trump me një lloj notifikimi të rezervuar për programet sekrete, tregon se këtë herë CIA ka ndërmend ose t’i fshehë, ose t’i mohojë operacionet e saj.

Zëdhënësi i qeverisë palestineze në Rripin e Gazës, Ismail al-Sawabite, ka bërë të ditur se Izraeli ka shkelur mbi 350 herë armëpushimin e nënshkruar më 19 janar.

“Izraeli pushtues e ka shkelur marrëveshjen e armëpushimit më shumë se 350 herë që nga nënshkrimi i saj. Kjo situatë dëshmon qartë se Izraeli vazhdon të shkelë përgjegjësitë e tij dhe se ai sfidon komunitetin ndërkombëtar“, njoftoi Sawabite në llogarinë e tij në platformën e mediave sociale X,

Pavarësisht marrëveshjes së armëpushimit dhe shkëmbimit të pengjeve të arritur me Hamasin, Izraeli vazhdon të shkelë shpesh armëpushimin në Gaza.

Më 11 shkurt, drejtori i përgjithshëm i Ministrisë së Shëndetësisë në Gaza, Munir al-Bursh, njoftoi se 92 palestinezë kanë humbur jetën në sulmet e drejtpërdrejta të Izraelit në Rripin e Gazës që nga marrëveshja e armëpushimit.

Komisioneri Evropian për Mbrojtjen, Andrius Kubilius, ka folur këtë të premte për veprimet që Bashkimi Evropian mund të marrë në mbrojtje të Ukrainës.

Kubilius tha se pozicioni i Bashkimit Evropian është “shumë i qartë”. Sipas tij unioni është i angazhuar për “paqe përmes forcës”.

Kubilius la të kuptohet se një paketë e re ndihme për Ukrainën mund të prezantohet të hënën.

“Ne po diskutojmë të gjitha mundësitë që do të na lejojnë, në një mënyrë shumë urgjente, të dërgojmë një mesazh shumë të fortë për ukrainasit dhe për botën se ne jemi së bashku me Ukrainën,” tha ai.

Ai shtoi gjithashtu se shpreson që një mundësi e mirë për të dërguar një mesazh të tillë mund të jetë përvjetori i tretë i luftës, që do të bie të hënën e ardhshme. Kubilius pranoi se ka “thashetheme” rreth numrave të ndihmës, por nuk pranoi të spekulonte për to.

Mediat kanë raportuar se BE mund të japë një paketë ndihme prej 700 mld euro për Ukrainën, por shifrat nuk janë konfirmuar ende.