Më shumë se 30 milionë njerëz në Sudanin e shkatërruar nga lufta kanë nevojë për ndihmë urgjente mes përkeqësimit të kushteve të jetesës, tha sot Organizata Ndërkombëtare e Migrimit (IOM).

“Mbi 30 milionë njerëz në Sudan kanë nevojë kritike për ndihmë humanitare“, tha Mohamed Refaat, kreu i Misionit të IOM-it në Sudan, në një deklaratë në X.

Ai paralajmëroi se “epidemitë e kolerës dhe urgjencat e tjera shëndetësore po përkeqësojnë krizën” në vend.

Refaat nënvizoi rëndësinë e sigurimit të fondeve për reagimin humanitar në Sudan për të siguruar qasjen deri te njerëzit në nevojë.

Sudani është shkatërruar nga lufta midis ushtrisë dhe grupit paraushtarak rival Forcat e Mbështetjes së Shpejtë (RSF) që nga prilli 2023, duke rezultuar në më shumë se 20.000 vdekje dhe 15 milionë të zhvendosur, sipas OKB-së dhe autoriteteve lokale.

Një studim nga universitetet amerikane ka vlerësuar numrin e të vdekurve në rreth 130.000.

Presidenti i Ukrainës, Volodymyr Zelenskyy ka deklaruar se vendi i tij “nuk do të luajë” me narrativat mbi atë se Kievi gjoja nuk dëshiron t’i japë fund luftës së vazhdueshme Rusi-Ukrainë.

“E kam theksuar vazhdimisht se askush nga ne nuk i beson rusët. Ne e kemi kaluar këtë, por ne nuk do të luajmë me narrativat se nuk duam që lufta të përfundojë“, tha Zelenskyy për mediat ukrainase.

Lidhur me propozimin e SHBA-së për një armëpushim 30-ditor me Rusinë nëse Moska gjithashtu i përmbahet atij, Zelenskyy tha se është e rëndësishme për të që partnerët e Kievit në NATO të shohin se ai është serioz për përfundimin e luftës.

“Prandaj, reagimi im ishte se ne jemi gati për formatin e heshtjes për 30 ditë në atë format që na ofroi pala amerikane“, shtoi ai. Zelenskyy tha se është shumë herët të flitet për sanksione të mëtejshme ndaj Rusisë nëse ajo shkel armëpushimin, duke shtuar se gjërat do të varen nga SHBA-ja përmes dialogut me Moskën.

“Nëse rusët demonstrojnë se janë të gatshëm për ofertën e SHBA-së, atëherë mendoj se do të ketë zgjidhje të përshtatshme dhe nëse nuk janë gati, ne vërtet shpresojmë që pala amerikane të tregojë saktësisht atë që tha“, tha ai.

Presidenti ukrainas tha se tema e garancive të sigurisë për Ukrainën u diskutua midis delegacioneve amerikane dhe ruse në Arabinë Saudite dhe se gjithçka në deklaratën e përbashkët të lëshuar pas negociatave ai e konsideroi si “sinjal pozitiv”.

Ai shtoi se për garancitë e sigurisë do të bisedohet më në detaje nëse zbatohet një armëpushim.

Shtetet e Bashkuara kanë rifilluar dërgimin e ndihmave ushtarake në Ukrainë përgjatë kufirit me Poloninë, pas arritjes së një marrëveshjeje mes zyrtarëve amerikanë dhe ukrainas në Arabinë Saudite, tha të mërkurën ministri i Jashtëm i Polonisë, Radoslaw Sikorski.

Sikorski e bëri këtë njoftim duke folur për gazetarë përkrah homologut të vet ukrainas, Andriy Sybiha, në Varshavë, pasi ky i fundit u kthye nga bisedimet në Xhedah, të mërkurën.

“Mund të konfirmoj se dërgimi i armëve përmes Jasionkas është kthyer në nivelin e mëparshëm”, tha Sikorski, duke iu referuar qendrës logjistike në juglindje të Polonisë.

Uashingtoni kishte njoftuar javën e kaluar se po pezullonte furnizimin e Ukrainës me ndihma, pas një përplasjeje publike në Shtëpinë e Bardhë mes presidentit amerikan, Donald Trump, dhe homologut të tij ukrainas, Volodymyr Zelensky.

Përplasja kishte shkaktuar shqetësime të mëdha në Ukrainë, të cilat u dëshmuan nga intervistat e Current Time me ushtarë në vijën e frontit.

“Na jepni më shumë armë dhe ne do ta garantojmë sigurinë tonë”, tha një ushtar, i identifikuar me nofkën Sokol, i cili shërben në njësitin e artilerisë në rajonin Donjeck në lindje të Ukrainës.

“Mendoj se gjërat do të qartësohen së shpejti dhe ne do të vazhdojmë të marrim armë dhe ndihma të tjera“, kishte thënë ai.

NASA ka bërë të ditur se ka asgjësuar zyrën e saj kryesore të shkencëtarëve dhe dy departamente të tjera në kuadër të masave për uljen e kostove në përputhje me përpjekjet federale të efikasitetit të adminstratës së presidentit Donald Trump.

Një mesazh i regjistruar nga administratorja në detyrë, Janet Petro, tha se agjencia hapësinore po bën reduktime në faza në kuadër të përpjekjeve të ardhshme të ri-organizimit në koordinim me Zyrën e Menaxhimit të Personelit të SHBA-së (OPM).

“Ne do të mbyllim Zyrën e Teknologjisë, Politikës dhe Strategjisë së NASA-s, Zyrën e Kryeshkencëtarit dhe degën e Diversitetit, Barazisë, Përfshirjes dhe Aksesueshmërisë në Zyrën e Diversitetit dhe Shanseve të Barabarta, së bashku me reduktimin e fuqisë së tyre punëtore”, tha Petro.

Nga shkurtimet janë prekur rreth 20 punonjës të NASA-s, përfshirë kryeshkencëtaren dhe eksperten e klimës, Katherine Calvin, e cila u emërua nga ish-presidenti Joe Biden për të udhëhequr përpjekjet për klimën, me ditën e tyre të fundit të punës më 10 prill.

Detyra e kryeshkencëtarit të NASA-s, që këshillon zyrtarët e lartë për planifikimin strategjik, ekziston që nga viti 1982, edhe pse u asgjësua në vitin 2005 dhe u rivendos në vitin 2011. Calvin, e 11-ta që mban këtë pozicion, nuk ka autoritet buxhetor dhe roli është i ndarë nga administratorja e asociuar për Drejtorinë e Misionit të Shkencës, Nicola Fox.

“E di që ky lajm është i vështirë dhe mund të na prekë të gjithëve në mënyrë të ndryshme. Ndryshimi i kësaj përmase nuk është kurrë i lehtë, por forca jonë vjen nga angazhimi ynë i përbashkët ndaj misionit tonë dhe njëri-tjetrit. Unë mbetem mirënjohëse për profesionalizmin dhe qëndrueshmërinë tuaj dhe ju inkurajoj të mbështesni njëri-tjetrin derisa ecim përpara. Përqafojeni sfidën”, tha Petro.