Në një njoftim të rëndësishëm, Komiteti i Nobelit shpalli se Çmimi Nobel i Paqes për vitin 2024 i është dhënë Nihon Hidankyo, një organizatë japoneze që përfaqëson të mbijetuarit e bombës atomike. Ky çmim i jepet në njohje të përpjekjeve të kësaj organizate për të arritur një botë pa armë bërthamore, duke theksuar rëndësinë e kujtesës dhe edukatës në lidhje me pasojat e përdorimit të këtyre armëve.

Nihon Hidankyo, e njohur gjithashtu si Hibakusha, është formuar nga ata që kanë mbijetuar pas sulmeve bërthamore në Hiroshima dhe Nagasaki më 1945. Komiteti vlerësoi organizatën për angazhimin e saj në mbrojtjen e paqes dhe për përpjekjet për të edukuar brezat e ardhshëm mbi pasojat shkatërruese të armëve bërthamore. “Një ditë, të mbijetuarit e bombës atomike nga Hiroshima dhe Nagasaki nuk do të jenë më mes nesh si dëshmitarë të historisë,” u shpreh komiteti gjatë njoftimit në Oslo.

Ata theksuan se, megjithatë, me një kulturë të fortë kujtimi dhe një angazhim të vazhdueshëm, brezat e rinj në Japoni janë duke përcjellë përvojën dhe mesazhin e këtyre dëshmitarëve. Kjo tregon se kujtesa dhe përpjekjet për paqe nuk do të ndalen, edhe nëse ata që kanë përjetuar këto tragjedi nuk janë më të pranishëm.

Nihon Hidankyo ka bërë një punë të madhe për të rritur ndërgjegjësimin për rreziqet e armëve bërthamore, duke organizuar ngjarje, seminare dhe aktivitete edukative për të arritur në shoqërinë japoneze dhe ndërkombëtare. Kjo organizatë ka luajtur një rol të rëndësishëm në lëvizjen globale për demilitarizimin dhe për heqjen e armëve bërthamore.

Ky çmim vjen në një kohë kur bota është më e ndjeshme se kurrë ndaj kërcënimeve bërthamore, dhe angazhimi i Nihon Hidankyo për paqe dhe kujtesë historike është një mesazh i fortë për të gjithë. Çmimi Nobel për Paqe është një njohje e jashtëzakonshme për punën e tyre dhe një thirrje për veprim për të gjithë ata që besojnë se një botë pa armë bërthamore është e mundur./UBTNews/

Një grup studentësh nga Shqipëria dhe Maqedonia e Veriut ka qëndruar në UBT për një vizitë në Parkun Shkencor Inovativ në Lipjan, si pjesë e projektit ndërkombëtar “VIRTUAL”. Ky projekt ka për qëllim përmirësimin e nivelit të kompetencave, aftësive dhe potencialit të punësimit të studentëve të arsimit profesional.

“VIRTUAL” është një iniciativë që synon përgatitjen e studentëve në sektorin e Arsimit dhe Formimit Profesional (AFP) përmes metodave inovative dhe teknologjive të fundit. Në veçanti, projekti përfshin përdorimin e Realitetit Virtual (VR), Realitetit të Shtuar (AR) dhe simulatorëve modernë për të ofruar një përvojë më të mirë edukative dhe praktike.

Vizita në Parkun Shkencor Inovativ të UBT-së ofroi studentëve një mundësi të shkëlqyer për t’u njohur me teknologjitë më të avancuara të përdorura në fushën e turizmit, mikpritjes dhe shërbimeve të tjera.

Drejtoresha e kampusit, Lirigzona Morina, njoftoi studentët në njohjen e tyre me mundësitë e shumta që ofron UBT. Ajo i njoftoi studentët për të gjitha aspektet e arsimit në UBT, duke theksuar rëndësinë e infrastrukturës moderne, laboratorëve të avancuar dhe teknikave inovative që mbështesin procesin mësimor.

Morina shprehu gjithashtu gatishmërinë për të bashkëpunuar në projekte të ndryshme të përbashkëta me studentët nga rajoni dhe trevat shqiptare. Ajo theksoi se UBT është e angazhuar për të krijuar mundësi të reja për zhvillim profesional dhe për të ndihmuar studentët të përmirësojnë aftësitë e tyre për t’u përgatitur për tregun e punës.

Kjo përvojë ndihmoi studentët të kuptojnë se si teknologjitë e realitetit virtual dhe të shtuar mund të kontribuojnë në përmirësimin e cilësisë së shërbimeve dhe edukimit në industrinë e turizmit, një sektor kyç për ekonomitë e Ballkanit Perëndimor.

Bekim Marmullaku, profesor në UBT, theksoi rëndësinë e këtij projekti dhe bashkëpunimin mes universiteteve partnere të rajonit për të sjellë së bashku të rinjtë në fushën e arsimit.

“Sot, në kuadër të projektit ‘VIRTUAL’, të financuar nga ERASMUS+ dhe Bashkimi Evropian, UBT-ja, së bashku me partnerët e saj rajonalë dhe evropianë, po zhvillon trajnime për realitetin e shtuar dhe virtual. Trajnimi udhëhiqet nga profesorët e UBT-së, të cilët janë ekspertë në fushën e tyre, dhe në përfundim të trajnimit, studentët do të marrin një certifikatë për arritjet e tyre”, u shpreh profesori Marmullaku.

Një nga studentët, Erion Mazreku nga Universiteti Europian i Tiranës, ndau përvojën e tij me mediat duke nënvizuar rëndësinë e bashkëpunimit ndërkufitar në fushën e arsimit dhe zhvillimit profesional.

“Në kuadër të projektit kemi vizituar Prishtinën dhe kampusin e UBT-së, dhe shpresojmë që projekte të tilla të vazhdojnë në arsim dhe në fusha të tjera mes trojeve tona shqiptare. Kjo vizitë shënon një hap të rëndësishëm për avancimin e bashkëpunimit ndërkombëtar në edukim dhe zhvillimin e aftësive profesionale të studentëve në rajon”, tha Mazreku.

Studentët do të qëndrojnë në Kosovë për tri ditë, gjatë të cilave do të kenë mundësi të tjera për të eksploruar vendin, të njohin kulturën lokale dhe të angazhohen në aktivitete të ndryshme që promovojnë bashkëpunimin dhe shkëmbimin e përvojave mes brezave të rinj./UBTNews/D.E.

Një person ka humbur jetën si pasojë e një shpërthimi të në një cisterne që ka ndodhur sot (e premte) në një pompë të derivateve në rrugën “Tahir Zemaj” në Pejë.

Lajmin e ka konfirmuar zëdhënësi i Policisë për Rajonin e Pejës, Fadil Gashi.

“Në ora 09:14 policia është njoftu se në rrugën ‘Tahir Zemaj’, në Pejë dyshohet se ka ndodhur një shpërthim i një cisterne. Ende nuk kemi informacione, jemi në vendin e ngjarjes po presim me na konfirmu hetuesit prokurori mjeku. Mjeku kujdestar ka kofirmuar vdekjen e një personi”, tha Gashi.

Identifikimi dhe zbutja e rreziqeve të pastrimit të parave kërkon një qasje gjithëpërfshirëse ku kombinohen kapacitetet e avancuara teknologjike, pajtueshmëria rregullatore si pa dyshim bashkëpunimi midis sektorëve publik dhe privat. Kështu ka theksuar guvernatori i Bankës Qendrore të Kosovës (BQK), Ahmet Ismaili në panelin me temë “Rëndësia e bashkëpunimit ndër-institucional dhe partneritet publiko-privat për të trajtuar financat e paligjshme” me rastin e lansimit të Rrjetit të Përbashkët të Inteligjencës kundër Pastrimit të Parave në Republikën e Kosovës (JMLIN-K).

Guvernatori Ismaili gjatë këtij paneli ka potencuar se pastrimi i parave nuk prek vetëm institucionet financiare individuale, por gjithashtu paraqet një rrezik më të gjerë për stabilitetin dhe integritetin e sistemit financiar. Ai ka shtuar se luftimi efektiv ndaj tij është thelbësor për ruajtjen e besimit dhe sigurimin e stabilitetit ekonomik të vendit.

Sipas Guvernatorit Ismaili, lufta kundër financimit të paligjshëm, duke përfshirë pastrimin e parave, financimin e terrorizmit si dhe format tjera të krimit financiar, kërkon një përpjekje gjithëpërfshirëse dhe të koordinuar ku bashkëpunimi dhe shkëmbimi i informacionit përmes partneriteve publiko-private është vendimtar në ruajtjen e sigurisë dhe integritetit të sistemit financiar.

“Kompleksiteti në rritje dhe sofistikimi i krimeve financiare i nxitur edhe nga zhvillimet e hovshme teknologjike kërkon qasje të reja të bazuara në rrezik për parandalimin dhe luftimin e PP/FT. Prandaj një partneritet i fortë i tillë ofron një kornizë gjithëpërfshirëse ku organet e zbatimit të ligjit, rregullatorët dhe institucionet financiare mund të ndajnë informacionet, ekspertizën si dhe burimet në luftën e përbashkët“, citohet guvernatori Ismaili në komunikatë.

I pari i BQK-së theksoi se krijimi i këtij rrjeti do të rrisë fuqishëm shanset e vendit tonë për t’iu bashkuar organizatave ndërkombëtare si MONEYVAL dhe Task Forca e Veprimit Financiar (FATF), si pjesë e rëndësishme e proceseve tona integruese në institucionet dhe mekanizmat e Bashkimit Evropian.

Guvernatori Ismaili tutje ka shtuar se përmes themelimit të këtij mekanizmi do të realizohen procese të rëndësishme në aspekt të sigurimit të pajtueshmërisë me standardet e parandalimit pastrimit parave dhe financimit. Këto aspekte, përveç avancimit të kornizës ligjore dhe rregullative që BQK-ja ka realizuar dhe po vazhdon në proces, bashkë me ligjet që së fundi janë proceduar, patjetër që e përafroi vendin tonë me kërkesat relevante të Bashkimit Evropian. Madje, kjo do ta ndihmojë edhe procesin e para-aplikimit për anëtarësim në SEPA si një ndër prioritetet tona, në të cila BQK po punon intensivisht me mbështetje të tjerë ndërinstitucionale.

Në fund të fjalës së tij në panel, Guvernatori Ismaili u shpreh se identifikimi efektiv dhe zbutja e rreziqeve të pastrimit të parave kërkon një qasje dinamike, me shumë shtresa që integron teknologjinë, pajtueshmërinë, bashkëpunimin dhe përmirësimin e vazhdueshëm. BQK me instrumentet e saj rregullatore dhe veprimet e ndërmarra të fokusuara në aspekt të integritetit dhe stabilitetit të sektorit financiar ka dëshmuar edhe praktikisht këtë zotim dhe qasje të saj.

“Duke miratuar strategji të bazuara në rrezik, duke përdorur analitikë të avancuar dhe duke nxitur partneritete të forta, institucionet financiare dhe rregullatorët e Kosovës mund të ndërtojnë një mbrojtje të fortë kundër pastrimit të parave dhe të ndihmojnë në mbrojtjen e integritetit të sistemit financiar“, ka përfunduar Guvernatori Ismaili.

Rrjeti i Përbashkët të Inteligjencës kundër Pastrimit të Parave në Kosovë përbëhet nga autoritetet ligjzbatuese të vendit, mbështetur nga Njësia për Inteligjencë Financiare dhe Ambasada e Britanisë së Madhe në Kosovë, ku edhe BQK ka pasur kontributin e saj përmes ekipeve profesionale dhe do të vazhdoj të mbetet e përkushtuar dhe angazhuar në të.