Ambasadorja amerikane në Shkup, Angela Aggeler, deklaroi të martën se Uashingtoni është i interesuar që ta shohë Maqedoninë e Veriut në Bashkimin Evropian (BE).

Aggeler shprehu shpresën për zhvillime pozitive në bisedimet mes Maqedonisë së Veriut dhe Bullgarisë, duke theksuar rëndësinë e suksesit të këtyre negociatave, për të ardhmen e vendit.

“Do të them atë që kemi thënë më parë në Uashington dhe në Shkup… Ne do të donim shumë ta shihnim Maqedoninë e Veriut brenda Bashkimit Evropian dhe shpresojmë që diskutimet të jenë të suksesshme dhe të frytshme, sepse e ardhmja e begatë, e suksesshme dhe e sigurt e këtij vendi është brenda BE-së, është në zemër të Evropës, aty ku përket”, tha Aggeler.

Këto komente, ambasadorja Aggeler i bëri pak para fillimit të një ligjërate me studentët e Universitetit të Evropës Juglindore (UEJL) në Tetovë.

Ndërkohë, kryeministri i Maqedonisë së Veriut, Hristijan Mickoski, i cili aktualisht ndodhet në Bruksel, në samitin BE-Ballkani Perëndimor, ka thënë se “shkon për të prezantuar pozicionet e njëjta që ka qeveria e vendit”, sa i përket kontestit me Bullgarinë, përkatësisht për zhbllokimin e procesit të anëtarësimit në familjen evropiane.

Megjithatë, ai pret që përbërja e re e Komisionit Evropian (KE), të ketë informata shtesë nga vizita e tij e fundit në Bruksel.

Mickoski shtoi se, zgjidhja aktuale është vetëm për të zhbllokuar hapin e parë, ndërsa qeveria e tij kërkon zgjidhje afatgjatë.

I pyetur se çfarë mund të pritet në drejtim të arritjes së një marrëveshje me Bullgarinë, duke pasur parasysh se atje ende nuk është formuar qeveria e re, Mickoski tha se duhet të punohet me të gjithë partnerët për shkak se nuk dihet se kur mund të ketë qeveri politike në Sofje.

“Nëse ky është problem bilateral me BE-në, sepse ashtu na u tha një periudhë, ne jemi të gatshëm të bisedojmë me BE-në dhe ne do të bisedojmë me të gjithë në BE dhe do t’i argumentojmë pozicionet tona, do të luftojmë, sepse kjo është betejë për gjeneratat e ardhshme, nuk është betejë për mbijetesën politike të kësaj qeverie, duhet ta fitojmë këtë betejë, do të japim gjithçka që ta fitojmë, por nuk e di a do ta fitojmë”, tha të hënën Mickoski.

Nga Qeveria në Shkup, si kusht kryesor kërkohet ndryshimi i Kushtetës, për zhbllokimin e negociatave me BE-në.

Deri më tani, ky proces është anashkaluar.

Pala maqedonase kërkon garaci nga Sofja të mos e bllokojë më tej Maqedoninë e Veriut.

Ndërkaq, në prag të tekimit në Bruksel, kryeministri bullgar në detyrë, Dimitër Gllavçev, ka konfirmuar qëndrimin e Sofjes zyrtare lidhur me anëtarësimin e Republikës së Maqedonisë së Veriut në BE.

Radioja e Jashtme e Bullgarisë njoftoi se kjo çështje është diskutuar në një bisedë telefonike mes Gllavçevit dhe Presidentit të Këshillit Evropian, Antonio Koshta.

“Me sjellje jo evropiane nuk mund të arrihen rezultate evropiane”, theksoi Gllavçev.

Ai tha se Bullgaria mbështet integrimin evropian të Maqedonisë së Veriut, por në përputhje me Marrëveshjen për Fqinjësi të Mirë, Miqësi dhe Bashkëpunim mes dy vendeve nga viti 2017. Shumica parlamentare në Maqedoninë e Veriut aktualisht përbëhet nga 78 deputetë nga gjithsej 120 sa numëron Parlamenti.

Ndryshimi i Kushtetutës kërkon shumicë prej dy të tretash./REL/

Transmetuesi zviceran SRG SSR prezantoi skenën e Eurovizionit të këtij viti. Pas fitores së Nemo, gara do të mbahet në Basel më 13, 15 dhe 17 maj.

Disenjimi i skenës u ndërmor për të nëntin vit radhazi nga Florian Wieder, duke sjellë në konkurs gjetje moderne teknologjike. Ai përfshin elementë që pasqyrojnë traditën zvicerane, pasi peizazhi malor dominon. Gjithashtu, korniza katrore rreth saj simbolizon katër gjuhët zyrtare të Zvicrës.

Skena është krijuar për t’i ofruar audiencës mundësinë për t’u ndjerë më afër artistëve që do të konkurrojnë në Eurovizionin e këtij viti. Në këtë mënyrë shtohet atmosfera festive e garës dhe dërgohet një mesazh i fortë bashkimi. Biletat për shfaqjen do të shiten pas shortit të gjysmëfinaleve, i cili do të zhvillohet, më 28 janar.

Vendet që do të marrin pjesë:

Gjithsej 38 vende do të marrin pjesë në Festivalin e 69-të të Këngës në Eurovizion, i cili do të mbahet në Bazel të Zvicrës më 13, 15 dhe 17 maj 2025. 37 prej tyre kthehen nga gara e mëparshme në Malmö, ndërsa shtohet edhe Mali i Zi.

Të 32 vendet do të garojnë në dy gjysmëfinale, me 10 nga secila gjysmëfinale që kualifikohen për në finalen e madhe përmes votimit publik. “Big Five” (Franca, Gjermania, Mbretëria e Bashkuar, Spanja, Italia) dhe Zvicra si vendi pritës kualifikohen drejtpërdrejt në finale.

Shorti për gjysmëfinalet do të hidhet më 28 janar 2025.

38 vendet pjesëmarrëse dhe transmetuesit që marrin pjesë në Eurovisionin 2025 janë si më poshtë:

Agios Marinos – SMRTV
Azerbajxhani – Publik
Shqipëri – RTSH
Armenia – AMPTV
Australi – SBS
Austri – ORF
Belgjika – VRT
Francë – FT
Gjermani – ARD/NDR
Gjeorgji – GPB
Danimarka – DR
Zvicër – SRG SSR
Greqi – ERT
Estonia – ERR
Mbretëria e Bashkuar – BBC
Irlandë – RTÉ
Islanda – RÚV
Spanja – RTVE
Izrael – KAN
Itali – RAI
Kroacia – HRT
Qipro – RIC
Letonia – LTV
Lituani – LRT
Luksemburg – RTL
Maltë – PBS
Mali i Zi – RTCG
Moldavia – TRM
Norvegjia – NRK
Holandë – AVROTROS
Ukrainë – Suspilne
Polonia – TVP
Portugali – RTP
Serbia – RTS
Slloveni – RTVSLO
Suedi – SVT
Republika Çeke – ČT
Finlanda – YLE

Ambasadori i Bashkimit Evropian në Kosovë, Aivo Orav, ka thënë se për synim kanë ofrimin e Kosovës sa më shpejt drejt BE-së. Këtë zotim e ka bërë pas takimit me kryetarin e Komunës së Prishtinës, Përparim Rama.

Ambasadori Orav, ka shtuar se janë takuar me kryetarin Rama për të diskutuar për problemet dhe sfidat e kryeqytetit.

“Ishte e mirëpritur të bisedoja me Kryetarin e Komunës dhe gjithashtu me ekipin e tij, për të mësuar më shumë rreth Prishtinës, rreth problemeve, rreth sfidave dhe për të mësuar gjithashtu se si BE-ja dhe komuna mund të punojnë më ngushtë së bashku. Sepse synimi është ta afrojmë Kosovën më pranë Bashkimit Evropian sa më shpejt të jetë e mundur. Dhe nuk është vetëm qeveria me të cilën po punojmë, por po punojmë edhe me të gjitha komunat. BE-ja është donatori më i madh këtu në Kosovë. Ka shumë projekte të BE-së që janë duke u zhvilluar. Ka shumë projekte edhe në plan dhe shpresoj shumë që të mund të vazhdojmë punën tonë në fusha si arsimi, shëndetësia, menaxhimi i mbeturinave, bashkëpunimi me të rinjtë, me ndihmën e BE-së”, ka thënë ai.

Kryetari Rama ka thënë se komuna ka bërë hapa në përmirësimin e infrastrukturës, arsimit shëndetësi e sektorë e tjerë në kryeqytet.

Ai ka shtuar se kanë bërë hapa për ti përmbushur të gjitha detyrat të cilat na janë dhenë nga komuniteti Evropian.

“Diskutuam mbi sfidat që i kemi si kryeqytet dhe mundësit për bashkëpunim dhe investime tash ne muzeun, sallën koncentrale, pra mënyra se si mund ti tejkalojmë problemet e tanishme. Në mënyrë që të krijojmë hapësira të mirëfillta edhe të komunitete të artit, kulturës, për arsim, shëndetësi edhe për sfera të ndryshme në kryeqytet. I tregova se kemi bërë hapa të mëdhenj në arsim, shëndetësi, infrastrukturë e po ashtu edhe në investime në qytetin e mençur. Ne kemi bërë hapa për t’i përmbushur të gjitha detyrat të cilat na janë dhënë nga komuniteti evropian”, ka thënë ai.

Ndonëse Kosova po konsiderohet si shembull për luftimin e terrorizmit, ende e pret shumë punë për luftimin e kësaj dukurie sidomos në këtë periudhë kur është e sfiduar nga ekstremi i djathtë. Kështu u tha me rastin e publikimit të raportit që paraqet angazhimin e Kosovës në parandalimin dhe luftimin e terrorizmit, i realizuar nga Rrjeti Ballkanik për Gazetari Hulumtuese (BIRN).

Ministri i Punëve të Brendshme, Xhelal Sveçla u shpreh se për dallim prej ekstremizmit të dhunshëm dhe terrorizmit religjioz tashmë po ballafaqohemi edhe me ekstremizma të djathta.

Duke i përmendur sulmin terrorist në Banjskë dhe atë në kanalin e Iber-Lepencit, Sveçla u shpreh se si qeveri ka reaguar me kohë karshi kësaj dukurie.

“Ne kemi pas në vazhdimësi sulme të ndryshme ndaj institucioneve tona, zyrtarëve tanë, personelin ndërkombëtarë, gazetarëve dhe qytetarëve në katër komunat veriore të Kosovës….Për dallim prej ekstremizmit të dhunshëm dhe terrorizmit religjioz tashmë po ballafaqohemi edhe me ekstremizma të djathta dhe entonacionalizma. Si qeveri kemi ndërmarrë masa në kohë në identifikimin dhe shpalljen e dy formacioneve ilegale si organizata terroriste pra Mbrojtjes Civile dhe Brigadës së Veriut dhe të gjithë ju e dini që në vazhdimësi dhe me mjete ligjore i kemi luftuar dhe po i luftojmë ato, siç e monitorojmë dhe po punojmë në parandalimin e të gjitha aktiviteteve të tyre. Këto dy sulme kanë vë në pah nevojën që zhvillimi i ekstremizmit të djathtë të elaburohet dhe të trajtohet me prioritet nga të gjithë jo vetëm në vendin tonë, por edhe në rajon dhe globalisht”, u shpreh ministri Sveçla.

Ministri i Punëve të Brendshme, Xhelal Sveçla u shpreh se si institucionet kanë punuar seriozisht në aspektin strategjik dhe operativ në luftimin e terrorizmit.

Ai thotë se Kosova në këtë aspekt është storie suksesi.

“Ne kemi punuar seriozisht dhe me përkushtim si në aspektin strategjik ashtu edhe atë operativ në luftimin e terrorizmit….Duke qenë të vetëdijshëm mbi rreziqet që mund të sjell ekstremizmi i dhunshëm dhe terrorizmi Republika jonë menjëherë dhe në kohë është bërë pjesë e koalicioneve globale në luftim të këtij fenomeni të rrezikshëm. Nga ajo kohë vendi ynë ka dëshmuar se është palë aktive e këtij koalicioni duke marrë përsipër si rikthimin e personave nga zonat e luftës në Siri, ashtu edhe procesin e rehabilitimit dhe riintegrimit në shoqëri. Kudo në botë që flitet për përpjekje në luftën ndaj këtij fenomeni qëndron në radhët e para si storie suksesi Republika jonë”, thotë Sveçla.

Drejtori i përgjithshëm i Fondit të Angazhimit dhe Ripërtëritjes së Komunitetit Global, Khalid Koser u shpreh se luftimi i terrorizmit duhet të bëhet në mënyrë të zhdërvjelltë.

Sipas tij duhet të identifikohen nxitësit e radikalizmit të cilët janë kryesisht lokal.

“Këto sfida po përballemi me to në baza të ndryshme dhe ne duhet t’i monitorojmë dhe të merremi me to në mënyrë të zhdërvjelltë. Raporti me sa duket ka rekomandime shumë specifike të cilat duhet t’i arri shumë seriozisht këtu në Kosovë. Së pari tregon nevojën për studime empirike që duhet të bëhen, identifikim të grupeve, nxitësve të radikalizimit dhe të cilët janë kryesisht lokal. Duket të kuptojmë se çka ndodh, si ndodh në nivelin lokal dhe zgjidhjet t’i gjejmë në nivel lokal”, u shpreh ai.

Ndërsa, të gjeturat e raportit i shpalosi, Labinot Leposhtica i cili tha se ka mangësi në komunikimin në mes nivelit qendror dhe lokal.

Gjetja tjetër sipas tij thotë se institucionet janë në fazën fillestare në hartimin e dokumenteve në bazë shkencore për luftimin e terrorizmit.

Analiza monitoruese “Sfidat e mekanizmave të parandalimit të terrorizmit në Kosovë” është financuar nga GCERF, dhe implementuar nga organizatat ATRC, BIRN, CBN dhe Rin’On.