Koalicioni botëror i punonjësve shëndetësorë “Mjekët Kundër Gjenocidit” (Doctors Against Genocide) i ka bërë thirrje Senatit amerikan që të ndërmarrë veprime për t’i dhënë fund gjenocidit në Rripin e Gazës.

“Ne jemi këtu në Senat për të kërkuar që ata të bëjnë punën e tyre“, tha për Anadolu dr. Nidal Jboor, bashkëthemelues i asociacionit DAG.

Koalicioni global i punonjësve shëndetësorë ka mobilizuar mbi 100 mjekë dhe profesionistë të tjerë shëndetësorë në Capitol, duke bërë thirrje edhe për rikthimin e financimit të Agjencisë së OKB-së për Refugjatët Palestinezë (UNRWA).

Jboor tha se DAG i bën thirrje Senatit që të pranojë dhe miratojë dy rezoluta.

“Rezoluta nr. 68 e Senatit paralajmëron kundër përfshirjes së SHBA-së, kundër vendosjes së forcave amerikane në Gaza, duke e konsideruar si joligjore zhvendosjen me forcë të palestinezëve. SHBA nuk duhet të përfshihet në këtë. Rezoluta gjithashtu thekson të drejtën e popullit palestinez, si të gjithë popujt në botë, për vetëvendosje. Pra, ne u bëjmë thirrje senatorëve që të nënshkruajnë bashkë këtë rezolutë“, shtoi ai.

Jboor shtoi se rezoluta tjetër synon të rikthejë financimin për UNRWA-në.

“Ne e dimë se për këtë do të ketë një votim në Senat dhe u bëjmë thirrje të gjithë senatorëve të punojnë për të rivendosur fondet për UNRWA-në, sepse UNRWA ofron 70 për qind të kujdesit parësor shëndetësor në Gaza“, tha ai, duke shtuar se roli i agjencisë është “shumë vendimtar”.

UNRWA, e themeluar në vitin 1949, ofron shërbime shëndetësore, arsimore dhe sociale për refugjatët palestinezë në Bregun Perëndimor të pushtuar, Kudsin Lindor, Liban, Jordani dhe Gaza.

Megjithatë, Izraeli muajin e kaluar urdhëroi agjencinë të mbyllte të gjitha operacionet e saj në Kudsin Lindor.

Shefi i UNRWA-së, Philippe Lazzarini, ka theksuar vazhdimisht se agjencia është “shtylla kurrizore” e reagimit humanitar në Gaza.

Në nëntor, Gjykata Ndërkombëtare Penale lëshoi ​​urdhrarreste për kryeministrin izraelit Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.

Izraeli po përballet gjithashtu me padi për gjenocid në Gjykatën Ndërkombëtare të Drejtësisë për luftën e tij në enklavë.

Pas kritikave të ashpra të Presidentit amerikan Donald Trump ndaj udhëheqësit të Ukrainës të mërkurën, ky i fundit tha se po përgatitej për një takim të enjten me të dërguarin e zotit Trump në Kiev, për të punuar drejt “një paqeje të qëndrueshme” me Rusinë.

“Për ne është thelbësore që takimi dhe bashkëpunimi ynë në përgjithësi me Shtetet e Bashkuara të jetë konstruktiv”, tha zoti Zelenskyy në fjalimin e mbrëmjes drejtuar kombit.

“Së bashku me Shtetet e Bashkuara dhe Evropën, paqja mund të jetë më e sigurt dhe ky është qëllimi ynë”, shtoi ai më tej.

Të mërkurën Presidenti Trump dhe Presidenti Zelenskyy shkëmbyen akuza në distancë. Presidenti amerikan e quajti zotin Zelenskyy një “diktator të pazgjedhur” ndërsa udhëheqësi i Ukrainës akuzoi zotin Trump se jeton në një “hapësirë dezinformimi” të ndikuar nga Rusia.

Ndërsa fati i luftës trevjeçare Rusi-Ukrainë mbetet i paqartë, zoti Zelesky druhet se udhëheqësi amerikan po përpiqet t’i japë fund sulmit rus, me kushte më të favorshme për Moskën sesa Kievin.

Presidenti Trump akuzoi gjithashtu zotin Zelensky për refuzim të zhvillimit të zgjedhjeve në Ukrainë, të cilat ishin planifikuar të mbaheshin në prill të vitit 2024, por që u shtynë për shkak të sulmit rus ndaj Ukrainës në vitin 2022.

Presidenti Trump e quajti zotin Zelensky një “një komedian me sukses modest”, që arriti të bindë Shtetet e Bashkuara të Amerikës për të shpenzuar 350 miliardë dollarë, për t’u futur, siç tha ai ‘në një luftë që nuk mund të fitohej, e cila nuk duhej të kishte filluar kurrë në radhë të parë, e që tashmë nuk mund të fitohej pa Shtetet e Bashkuara dhe Donald Trump-in”.

Udhëheqësi amerikan, i cili refuzoi vitin e kaluar gjatë një debati politik të thoshte nëse donte që Ukraina ta fitonte luftën, tha se “e vetmja gjë për të cilën Zelesky ishte i mirë, ishte manipulimi i ish-Presidentin amerikan Joe Biden, për më shumë ndihma ushtarake’.

“Unë e dua Ukrainën”, tha Presidenti Trump, “por Zelensky ka bërë një punë të tmerrshme, vendi i tij është shkatërruar dhe miliona kanë vdekur pa qenë e nevojshme – dhe kështu do të vazhdojë…”.

Kritikat e Presidentit Trump ndaj zotit Zelensky erdhën pasi udhëheqësi ukrainas shprehu zemërimin e tij për mospërfshirjen e Kievit në bisedimet diplomatike të nivelit të lartë SHBA-Rusi, që u mbajtën të martën në Arabinë Saudite.

Pas më shumë se katër orë bisedimesh Uashingtoni dhe Moska thanë se kishin rënë dakord të takoheshin sërish së shpejti, për të përcaktuar se si t’i jepnin fund luftës.

Po kështu u ra dakord për rikthimin e funksionimit normal të misioneve të ndërsjella diplomatike, si dhe për rritje të bashkëpunimit në fusha me interes të përbashkët, përfshi ekonominë.

Sekretari britanik i Mbrojtjes, John Healey, gjatë një vizite zyrtare në Norvegji këtë të enjte, ka nënshkruar një marrëveshje të re bashkëpunimi në fushën e mbrojtjes mes dy vendeve.

Gjatë deklaratës për mediat, Healey u ndal dhe te konflikti në Ukrainë dhe mundësia e arritjes së marrëveshjes së paqes.

“Kjo luftë filloi sepse Rusia pushtoi territorin e një shteti sovran. Lufta mund të përfundojë sot, nëse Presidenti Putin tërheq trupat e tij nga Ukraina,” tha ai.

Healey reagoi gjithashtu ndaj deklaratave të fundit të presidentit amerikan Donald Trump, i cili e cilësoi presidentin ukrainas Volodymyr Zelensky si një “diktator”. Healey e kundërshtoi këtë qëndrim, duke e konsideruar Zelenskyn si një lider të ligjshëm dhe të zgjedhur në mënyrë demokratike nga populli i tij.

“Presidenti Zelensky është lideri i zgjedhur i Ukrainës dhe ka treguar përkushtim të jashtëzakonshëm ndaj vendit të tij,” u shpreh ai.

Healey e krahasoi situatën në Ukrainë me periudhën e Luftës së Dytë Botërore në Britani, duke theksuar se “ashtu si Ëinston Churchill, Zelensky ka pezulluar zgjedhjet për shkak të gjendjes së luftës.”

Duke folur për mbështetjen e vazhdueshme të Perëndimit ndaj Ukrainës, ai tha se aleatët duhet të qëndrojnë të bashkuar.

“Detyra jonë është të mbështesim Ukrainën në luftën e saj dhe, nëse ata zgjedhin të negociojnë, t’i mbështesim edhe në atë proces,” tha Healey.

Në përfundim, ai nënvizoi se edhe për SHBA-në është jetike të arrihet një paqe e qëndrueshme.

“Është në interesin e Presidentit Trump dhe të Amerikës që konflikti të përfundojë me një paqe të drejtë dhe të qëndrueshme,” përfundoi ai.

Ministri i Jashtëm i Ukrainës, Andrii Sybiha, ka biseduar me të dërguarin amerikan, Keith Kellogg, për mënyrat se si të arrihet një paqe e drejtë dhe e qëndrueshme në konfliktin me Rusinë.

Vizita e Kelloggut në Kiev po zhvillohet në kohën e rritjes së tensioneve mes Ukrainës dhe Shteteve të Bashkuara, pasi presidenti amerikan, Donald Trump, ka kritikuar ashpër homologun e tij ukrainas, Volodymyr Zelensky.

Po ashtu, SHBA-ja dhe Rusia kanë mbajtur bisedime për përmirësimin e raporteve, por edhe për përfundimin e luftës në Ukrainë. Por, në takimin e mbajtur në Riad më 18 shkurt nuk ishte e pranishme Ukraina.

“I afirmova gatishmërinë e Ukrainës për të arritur paqe përmes forcës dhe vizionit tonë për hapat e nevojshme”, shkroi Sybiha në X.

Ai ia përsëriti Kelloggut, i cili po qëndron në Kiev që nga e mërkura, se do të “ulem dhe do të dëgjoj” si pjesë e misionit të tij, duke theksuar se siguria e Ukrainës dhe ajo transatlantike janë “të pandara”.

Presidenti ukrainas, Volodymyr Zelensky, do të takohet me Kelloggun sot. I dërguari i posaçëm amerikan veçse është takuar me komandantin e ushtrisë ukrainase dhe me udhëheqësit e shërbimeve të posaçme dhe të inteligjencës.

Në dy ditët e fundit, Trump ka sugjeruar se e fajëson Ukrainën për nisjen e luftës me Rusinë më 2022 dhe e ka quajtur Zelenskyn “diktator pa zgjedhje”. Ai po ashtu ka thënë se mbështetja e publikut për Zelenskyn është e ulët.

Zelensky i është përgjigjur akuzave të Trumpit duke thënë se ai ka ngecur “në hapësirën e dezinformimit” që vjen nga Rusia, por një ditë më vonë ka deklaruar se ai shpreson në pragmatizmin amerikan./REL/