Lajmet

Solidariteti impresionues i gjermanëve me refugjatët nga Ukraina

Me gatishmëri të madhe ata po i mirëpret si popullsia, ashtu edhe strukturat shtetërore, landet dhe komunat.

Published

3 years ago

on

Refugjatët e luftës nga Ukraina po priten në Gjermani me një solidaritet impresionues. Me gatishmëri të madhe ata po i mirëpret si popullsia, ashtu edhe strukturat shtetërore, landet dhe komunat.

Persona privatë me tabela në duar ofrojnë në stacionet e trenit apartamente banimi për të ardhurit; komunat hapin sallat e bashkive për të strehuar refugjatët; punonjës bashkiakë aktivizojnë qendrat e para të pranimit të refugjatëve, të vitit 2015; gjermanë të thjeshtë organizojnë fqinjët dhe mbledhin rroba e sende të jetës së përditshme për refugjatët; pensionistë që ofrohen për të ndihmuar në qendrat e mbledhjes së refugjatëve. Një pamje e zakonshme këto ditë në shumë qytete gjermane.

Sipas ministrisë së Brendshme të Gjermanisë, deri sot në Gjermani kanë ardhur mbi 283.000 refugjatë lufte nga Ukraina. Numri i të ardhurve mund të jetë faktikisht edhe më i madh, pasi ukrainasit kanë të drejtë të vijnë pa vizë në Gjermani. Si të tillë ata nuk janë të detyruar të regjistrohen. Por tani shumica po regjistrohen që të marrin ndihma nga shteti gjerman.

Në Gjermani, refugjatët e luftës nga Ukraina mbërrijnë kryesisht në Berlin dhe në Hamburg, prej andej shpërndahen në pjesë të tjera të Gjermanisë. Për një periudhë kohe, në Berlin mbërrinin deri 10.000 refugjatë lufte në ditë.

Mbështetje e strukturuar për refugjatët nga Ukraina

Shteti gjerman ka vënë në dispozicion të të ardhurve strehime, oferta për kualifikim, ushqim, ndihma sociale. Federata dhe landet diskutuan të premten (01.04.) me kancelarin Olaf Scholz për ndarjen e shpenzimeve të konsiderueshme. Për refugjatët e traumatizuar ka oferta për trajtim psikologjik. Shumë ndihmës për refugjatët janë sensibilizuar që të dallojnë refugjatët me shenja traume nga lufta, për t’u ofruar atyre pastaj trajtim të veçantë.

Shumica e të ardhurve janë gra me fëmijë. Ekspertët e arsimit vlerësojnë se të paktën një e treta e refugjatëve nga Ukraina në Gjermani janë fëmijë ose adoleshentë. Ata do të kenë nevojë për shkollë ose për kopshte ditore.

Shkollat në lande të ndryshme të Gjermanisë po ngrejnë klasa mikpritjeje për fëmijët nga Ukraina. Në këto klasa bëhen përpjekje që refugjatët ta mësojnë gjermanishten sa më shpejt që të jetë e mundur, që më pas të integrohen në klasa të rregullta. Në Berlin, p.sh. në shkollat publike të këtij landi ka tashmë 50 klasa të tilla. Në Bavari janë ngritur “grupe edukative të mirëseardhjes”.

Edhe në kopshtet ditore po punohet që të zgjerohet oferta. Ka qytete, ku përkujdesjen për fëmijët e marrin përsipër vetë gra refugjate nga Ukraina. Shumë të rëndësishme për qëndrimin në Gjermani janë njohuritë e gjermanishtes. Autoritetet shohin një nga detyrat kryesore për integrimin, zgjerimin e ofertës me kurse të gjermanishtes, për të ardhurit.

Ukrainasit marrin leje pune

Në dallim nga refugjatët e viteve 2015/2016, ukrainasit kanë të drejtë të punojnë menjëherë. Për herë të parë, në rastin e Ukrainës Bashkimi Evropian aktivizoi të ashtuquajturën „direktivë të fluksit masiv”. Si rrjedhim, refugjatët nga Ukraina mund të qëndrojnë në BE deri në tre vjet, pa shtruar kërkesë për azil. Ata marrin menjëherë edhe një leje pune.

Kompanitë gjermane kanë postuar mijëra oferta pune, në portalet e ndërmjetësimit të punës në internet. Ofrojnë punë dhe praktika për refugjatët nga Ukraina. Kërkohen punonjës me kualifikime të ndryshme, si zhvillues të programeve kompjuterike Java dhe Cloud, ashtu edhe infermierë, luleshitës, kuzhinierë e shoferë kamioni.

Integrim më i shpejtë i ukrainasve

Sa do të qëndrojnë refugjatët nga Ukraina në Gjermani, kjo nuk dihet.

Për ata që do të qëndrojnë, sipas Institutit kërkimor Empirica, integrimi do të jetë më i shpejtë si i emigrantëve të tjerë. Në një studim në mes të marsit, ky institut përshkroi nivelin e lartë arsimor të të ardhurve, “veçanërisht të femrave.” Edhe ministri gjerman i Punës, Hubertus Heil tha se gjysma e të ardhurve kanë mbaruar shkollat e larta, sjellin kualifikim akademik.

Për këtë arsye Agjencia Federale e Punës dhe Dhomat e Tregtisë po përpiqen së bashku që këta njerëz të mos përfundojnë në punë të nivelit të dytë, p.sh. duke lehtësuar njohjen e diplomave të të ardhurve. Diplomat e refugjatëve shpesh nuk janë të barazvlershme me diplomat gjermane. Vështirësi paraqet edhe fakti që një pjesë e të ikurve nuk kanë marrë dot me vete dokumenta.

Ritmet e ardhjes janë ngadalësuar

Sipas Organizatës së refugjatëve të OKB-së, UNHCR, deri sot nga Ukraina janë larguar katër milionë vetë. Shumica e të larguarve kanë qëndruar në shtete pranë Ukrainës. Rreth 1 milion prej tyre kanë vazhduar rrugën drejt Perëndimit, njoftoi Komisioni Evropian. Por ndërkohë, nga Ukraina po largohen më pak refugjatë. Aktualisht, Ukrainën e braktisin rreth 40.000 vetë në ditë. Shifra më e lartë e largimit ka qenë 200.000 vetë në ditë. Në disa zona kanë filluar edhe kthimet e para të të ikurve.

Dallime me valën e refugjatëve të 2015-ës

Në vitin 2015, mikpritja në Gjermani për refugjatët fillimisht ishte e madhe. Pastaj atmosfera ndryshoi. Prandaj vëzhguesit shtrojnë pyetjen a mund të përsëritet edhe me refugjatët e luftës nga Ukraina një fenomen i tillë.

Ka disa dallime nga situata e vitit 2015. Në vjeshtën e vitit 2015 refugjatët u pritën me duartrokitje kur mbërritën në Gjermani. Por vërshimi i refugjatëve vazhdoi pa u ndalur, duke kaluar shifrën e 850.000 vetëve. Goditje të fortë, entuziazmi mori veçanërisht pas sulmeve seksuale në stacionin kryesor të trenit të Këlnit, natën e vitit të ri 2015/2016. Edhe debati politik në Gjermani, deklaratat e disa politikanëve, ndikuan atëherë në pakësimin e mbështetjes për refugjatët. Prandaj rol vendimtar në kulturën aktuale të mikpritjes do të luajë qëndrimi i mëtejshëm i politikës.

Refugjatët e luftës nga Ukraina dallohen nga refugjatët e viteve 2015/2016. Ukrainasit janë evropianë. Në pikëpamje kulturore ata janë më të afërt me popullsinë e vendeve të BE, edhe të Gjermanisë, ku vijnë. Një nga elementët ku vërehet dallimi kulturor me refugjatët e viteve 2015/2016 është p.sh. edhe ndarja tipike e roleve në familje. Shumica e femrave ukrainase që vijnë tani e kanë të natyrshme të punojnë. Në këtë mënyrë edhe bashkëjetesa është më e lehtë.

Ukrainaisit nuk janë të panjohur në Gjermani. Sidomos prej vitit 2014, në Gjermani kanë ardhur shumë prej tyre. Ata kanë krijuar në Gjermani një komunitet prej rreth 300.000 ukrainaisish.

Edhe autoritetet gjermane kanë mësuar nga përvoja e vitit 2015. Koncepti i trajtimit të të ardhurve është përmirësuar. Të ardhurit trajtohen tani në mënyrë integrative. Në vitin 2022 nuk pritet sa refugjatët të kenë mësuar njëherë gjermanishten dhe pastaj të nisin hapat e tjerë. Por në Jobcenters, në qendrat e punësimit, punohet me ritëm dhe punohet paralelisht: për gjetje strehimi, për situatën familjare dhe për integrimin kulturor njëkohësisht./DW

Related Topics:
Continue Reading

Lajmet

Studentët e UBT-së, një 8 Mars plot aktivitet dhe solidaritet në “Shtëpinë e të Moshuarve”

Published

2 days ago

on

March 8, 2025

By

Me rastin e Ditës Ndërkombëtare të Gruas, më 8 mars, një grup studentësh të Fakultetit të Psikologjisë në UBT, të udhëhequr nga Shqipe Shala dhe Kosovare Hamiti, së bashku me studentin e aktrimit Denis Arifi dhe dekanen e Fakultetit të Psikologjisë, Denis Celcima, organizuan një vizitë në Shtëpinë e të Moshuarve, një akt i mbushur me solidaritet dhe ndjeshmëri.

 

Aktiviteti i cili ka për qëllim nderimin dhe mbështetjen e individëve të moshuar që kanë dhënë një kontribut të çmuar në shoqëri, ishte një ngjarje që bashkoi energjinë rinore me përvojën dhe mençurinë e brezit të kaluar.

Pjesëmarrësit në këtë aktivitet sollën momente të bukura, duke realizuar aktivitete artistike, këngë dhe poezi, por mbi të gjitha, biseda të ngrohta që krijuan një lidhje të veçantë me ata që kishin kaluar një jetë plot mundime dhe përpjekje.

Ndërkohë, studentët e Gjimnazit në UBT kontribuan në këtë atmosferë me një program të pasur aktivitetesh dhe performancash, që përfshinte shfaqje teatrale, muzikë dhe lojëra ndërvepruese, duke e pasuruar kështu këtë ditë me ngjyra dhe emocione të veçanta.

Eventi përveç se ishte një mundësi për të shprehur mirënjohjen ndaj kontributit të gruas në shoqëri, ishte gjithashtu një shembull i bukur i solidaritetit ndërgjeneracional, ku brezat e rinj dhe ata të moshuar u bashkuan për të ndarë momente të paharrueshme. Kjo ngjarje, më shumë se një vizitë për të moshuarit, ishte një thirrje e fuqishme për të reflektuar mbi vlerat e bashkëjetesës, respektit dhe dashurisë për njëri-tjetrin.

Në këtë ditë të veçantë, u nderua jo vetëm gruaja, por gjithashtu edhe fuqia e saj për të formuar dhe shëndoshur shoqërinë nëpërmjet mundësive që ofron dashuria dhe angazhimi./UBTNews/

Continue Reading

Lajmet

Kosova pa asnjë kontratë lobimi në SHBA

Published

3 days ago

on

March 7, 2025

By

Si rrallëherë në historinë e pasluftës së Kosovës, institucionet shtetërore, aktualisht, nuk kanë asnjë kontratë aktive lobimi në Shtetet e Bashkuara. Njohësit e politikave vendore dhe ndërkombëtare paralajmërojnë se kjo rrezikon ta lërë Kosovën nën hije dhe “pa një vend në tavolinë”.

Që nga viti 1992, Kosova ka pasur pothuajse vazhdimisht kompani lobimi, të kontraktuara për të shtyrë përpara agjendën dhe interesat e saj në SHBA, shkruan REL.

Për momentin, asnjë kontratë e tillë nuk listohet si aktive në ueb-faqen e Aktit të Regjistrimit të Agjentëve të Huaj (FARA) të Departamentit amerikan të Drejtësisë.

Deri vitin e kaluar, Ministria e Punëve të Jashtme dhe Diasporës (MPJD) e Kosovës i ka pasur dy marrëveshje të tilla, por ato tani kanë skaduar.

Edhe pse ministrja e Jashtme, Donika Gërvalla, ka thënë se do të shqyrtohet vazhdimi i atyre kontratave njëvjeçare, një gjë e tillë nuk është bërë.

Analistja politike, Donika Emini, paralajmëron se institucionet e Kosovës nuk duhet të mbështeten vetëm në diplomacinë konvencionale – pra përmes ambasadave e konsullatave – veçanërisht në kohën kur, siç thotë, “tensionet gjeopolitike po përshkallëzohen dhe përçarjet transatlantike po thellohen”.

“Kosova kërkon e pret mbështetje politike nga SHBA-ja pa ofruar asgjë në këmbim. Uashingtoni nuk është një vend ku vlerësohesh vetëm për vullnetin e mirë; është një fushëbetejë e influencës, ku lobimi, partneritetet strategjike dhe aftësia diplomatike përcaktojnë se kush zë vend në tavolinë”, thotë për Radion Evropa e Lirë Emini, nga Grupi Këshillëdhënës në Evropë për Politika të Ballkanit.

Dhe, kush po zë vend në tavolinë? Serbia, thotë Emini.

Ajo argumenton se, përderisa Kosova nuk po arrin ta prezantojë veten si “kontribuuese e vlefshme në rendin e ri global”, Serbia “është pozicionuar si një aktore transaksionale, duke ofruar bashkëpunim ekonomik dhe duke shfrytëzuar burimet e saj natyrore”.

“Nëse Kosova nuk modernizon qasjen e saj diplomatike, rrezikon të bëhet një lojtare dytësore në politikën rajonale, me fatin e saj të diktuar gjithnjë e më shumë nga të tjerët, jo vetëm nga SHBA-ja, por edhe nga rivalët e saj rajonalë, të cilët janë shumë më agresivë, strategjikë dhe transaksionalë në angazhimin e tyre me Uashingtonin”, shton Emini.

Aktualisht, institucionet shtetërore të Serbisë kanë pesë kontrata lobimi aktive në SHBA. Institucionet e Kosovës s’kanë treguar nëse do të nënshkruhen kontrata të tilla tani, pas ndërrimit të administratës në SHBA./REL/

Continue Reading

Lajmet

GAP: 57 për qind e bizneseve në pronësi të grave kanë prezencë online

Published

3 days ago

on

March 7, 2025

By

Sot, Instituti GAP publikoi raportin e titulluar “Fuqizimi i bizneseve në pronësi të grave dhe pakicave etnike në Kosovë përmes tregtisë elektronike”. Ky raport ofron një analizë të përdorimit të e-tregtisë nga bizneset mikro, të vogla dhe të mesme në pronësi të grave dhe pakicave etnike në Kosovë.

Sipas GAP-it, gjetjet janë bazuar në të dhëna të mbledhura përmes një ankete gjithëpërfshirëse me 757 biznese, si dhe informacione nga fokus grupe dhe intervista individuale të mbajtura me pronarë/e të këtyre bizneseve.

“Gjetjet tregojnë se 57% e bizneseve në pronësi të grave dhe 56% e bizneseve në pronësi të pakicave etnike në Kosovë kanë prezencë online. Megjithatë, jo të gjitha prej tyre e shfrytëzojnë këtë mundësi për tregti elektronike (e-tregti), me vetëm 28% të bizneseve në pronësi të grave dhe 49% të bizneseve në pronësi të pakicave etnike që përfshihen në shitje online. Platformat e rrjeteve sociale mbeten mjetet kryesore për promovim dhe ndërveprim me klientët”, thuhet në raport.

GAP njofton po ashtu se shumica e bizneseve në pronësi të grave dhe pakicave etnike të cilat përdorin tregtinë elektronike operojnë në sektorin e tregtisë me shumicë dhe pakicë.

“Sa i përket gjenerimit të të ardhurave, gjetjet e anketës tregojnë se këto biznese gjenerojnë më pak se 25% të gjithsej të ardhurave të tyre përmes e-tregtisë. Megjithëse pjesëmarrja e tyre në e-tregti po rritet gjithnjë e më shumë, përfitimi përmes e-tregtisë mbetet relativisht i ulët”, thuhet në raport.

Më tej thuhet se raporti gjithashtu thekson se pandemia e COVID-19 ka përshpejtuar ndjeshëm përdorimin e e-tregtisë, me platforma të integruara që ndihmuan në përmirësimin prezencën dhe rritjen e shitjeve për një numër të konsiderueshëm biznesesh.

“Raporti thekson nevojën e vazhdueshme për mbështetje në fusha të tilla si marketingu digjital, zhvillimi i faqeve të internetit dhe përmirësimi i aftësive për menaxhimin e rrjeteve sociale”, thuhet në komunikatë.

Instituti GAP i bën thirrje institucioneve lokale dhe ndërkombëtare për të mbështetur këto biznese përmes programeve të personalizuara të trajnimeve, subvencioneve për shërbime profesionale marketingu dhe lehtësimin e partneriteteve me platforma të e-tregtisë.

“Këto masa do të ndihmojnë në fuqizimin ekonomik të bizneseve të grave dhe pakicave etnike, duke kontribuar në një ekonomi më gjithëpërfshirëse dhe më të qëndrueshme në Kosovë”, thuhet në komunikatë.

Continue Reading

Lajmet

Osmani: Mësuesit mbeten shtylla e shoqërisë dhe ata që formësojnë mendjet dhe zemrat e kombit

Published

3 days ago

on

March 7, 2025

By

Presidentja Vjosa Osmani ka uruar mësuesit për ditën e tyre 7 Marsin.

“Më 7 Mars kujtojmë themelimin e shkollës së parë shqipe në Korçë më 1887, një akt i guximshëm i patriotëve tanë, që e kuptuan se pa gjuhë dhe dije, nuk ka as komb të suksesshëm. Sot, shkolla është më shumë se një institucion mësimor – është fortesa ku ndërtohet e ardhmja. Mësuesit mbeten shtylla e shoqërisë dhe ata që formësojnë mendjet dhe zemrat e kombit”, ka thënë Osmani.

Osmani ka thënë se në këtë ditë do të nderojmë të gjithë mësuesit,  ata që na mësuan shkronjat e para dhe ata që ende mësojnë brezat e rinj.

“Respekt, mirënjohje dhe përulësi para misionit të tyre fisnik”, ka thënë presidentja në urimin e saj.

Continue Reading

Të kërkuara