Mbi 400 persona janë vrarë dhe 250 të tjerë janë lënduar nga një sulm ajror i Pakistanit mbi një spital të rehabilitimit nga droga në Kabul, ka deklaruar të martën një zëdhënës i qeverisë së Talibanëve afganë. Siç raporton Reuters, kjo ngjarje shënon një eskalim të ashpër të konfliktit mes dy vendeve fqinje.

Pakistani e ka hedhur poshtë këtë pretendim si të rremë dhe mashtrues, duke deklaruar se mbrëmjen e së hënës ka “shënjestruar me precizitet instalimet ushtarake dhe infrastrukturën mbështetëse të terroristëve”. Ministri i Informacionit i Pakistanit, Attaullah Tarar, përmes një postimi në rrjetin social X, tha se shpërthimet dytësore pas sulmeve “tregojnë qartë praninë e depove të mëdha të municionit”.

Ky sulm erdhi vetëm pak orë pasi Kina u shpreh e gatshme të vazhdonte përpjekjet për uljen e tensioneve, duke u bërë thirrje të dyja palëve të shmangin zgjerimin e luftës dhe t’i kthehen tryezës së bisedimeve. Konflikti, i cili nisi muajin e kaluar, vlerësohet si më i rëndi i ndodhur ndonjëherë mes këtyre dy vendeve që ndajnë një kufi prej 2,600 kilometrash.

Dëshmitë e të mbijetuarve: “Ishte si dita e kiametit”

Në vendngjarje, pamjet tregojnë ndërtesa të shkatërruara dhe të mbuluara nga flakët. Zëdhënësi i Ministrisë së Brendshme afgane, Abdul Mateen Qanie, specifikoi se numri i të vdekurve ka arritur në 408, ndërsa 265 janë plagosur. Ndonëse autoritetet afgane thanë se viktimat janë dërguar në spitalet e Kabulit, ato nuk dhanë detaje se si është bërë numërimi i saktë i tyre.

Dëshmitarët rrëfyen se tri bomba shpërthyen sapo njerëzit në spital po përfundonin lutjet e mbrëmjes. “I gjithë vendi u përfshi nga zjarri. Ishte si dita e kiametit,” tha Ahmad, 50-vjeçar, i cili po trajtohej në këtë qendër. “Shokët e mi po digjeshin në zjarr dhe ne nuk mundëm t’i shpëtonim të gjithë.”

Shoferi i ambulancës, Haji Fahim, i tha Reuters-it se kur kishte arritur në vendngjarje çdo gjë ishte në flakë. “Në mëngjes më thirrën sërish të kthehem, sepse ka ende trupa nën rrënoja,” u shpreh ai.

Policia e Kosovës ka njoftuar për dy raste të dhunës në familje që kanë ndodhur gjatë 24 orëve të fundit.

Rastet janë regjistruar në Prishtinë dhe Pejë, ku janë përfshirë disa persona.

Në Prishtinë janë arrestuar dy gra, pasi të njëjtat, pas një mosmarrëveshjeje, janë përleshur në mes vete.

Pas intervistimit me vendim të prokurorit, të dyshuarat janë liruar dhe rasti po vazhdon në procedurë të rregullt.

Ndërkaq, në Pejë është raportuar një rast i dhunës psikike.

Një grua ka denoncuar bashkëshortin e saj për keqtrajtim, me ç’rast i dyshuari është shoqëruar në stacionin policor.

Sipas policisë, pas intervistimit, rasti ndaj tij po procedohet në procedurë të rregullt me vendim të prokurorit.

Policia e Kosovës ka njoftuar për sekuestrimin e tri armëve në tri raste të ndara gjatë 24 orëve të fundit.

Sipas raportit zyrtar, kontrollet kanë rezultuar me shoqërimin e të dyshuarve dhe sekuestrimin e armatimit në lokacione të ndryshme.

Në fshatin Tërstenik të Drenasit është shoqëruar një i mitur, pasi “gjatë kontrollit tek i njëjti është gjetur dhe sekuestruar një armë me gaz”.

Ndërkaq, në Podujevë, policia ka sekuestruar një pushkë gjuetie me leje të skaduar pas kontrollit në shtëpinë e një të dyshuari.

Rasti i tretë u regjistrua në rrugën “Xheladin Rekaliu” në Prishtinë, ku është arrestuar një person pasi “gjatë kontrollit tek i njëjti është gjetur dhe sekuestruar një armë zjarri me një karikator me 16 fishekë”.

Të gjithë të dyshuarit, me vendim të prokurorit, janë proceduar në procedurë të rregullt.

Dy prindër nga Lipjani janë arrestuar nga Policia e Kosovës nën dyshimin për “shkelje të detyrimeve familjare”.

Sipas raportit 24-orësh të policisë, rasti u zbulua pasi fëmija i tyre i mitur u dërgua në gjendje të rëndë shëndetësore në QKUK për trajtim mjekësor.

Hetimet e para tregojnë se gjendja e rënduar e të miturit ka ardhur si pasojë e mospërkujdesjes dhe mos-trajtimit të duhur nga ana e prindërve.

Me vendim të prokurorit, të dyshuarit janë dërguar në mbajtje, ndërsa rasti po vazhdon të trajtohet nga organet e drejtësisë.

“Është raportuar se është sjellë në QKUK- Prishtinë viktima mashkull kosovar i mitur, për shkak të gjendjes së tij jo të mirë, për shkak të mos trajtimit nga ana  e prindërve të tij. Të dyshuarit janë arrestuar dhe pas intervistimit me vendim të prokurorit janë dërguar në mbajtje”, thuhet në raport.