Ministria e Punëve të Brendshme lansoi fushatën e re ndërgjegjësuese kundër të shtënave festive, me slloganin “Festo me zemër, jo me armë”.

Gjatë prezantimit, u publikuan të dhëna nga fushata e vitit 2024, ku u evidentua një rritje prej 40% e raportimeve nga qytetarët për të shtënat festive.

Sipas statistikave zyrtare, janë konfiskuar 121 armë, janë arrestuar 177 persona dhe janë pranuar gjithsej 133 raportime nga qytetarët për raste të të shtënave festive.

Zyrtarët potencuan se këto rezultate dëshmojnë vetëdijesimin në rritje të qytetarëve, por edhe nevojën për vazhdim të fushatave të tilla.

Zyrtarët e MPB-së ritheksuan se qëllimi kryesor i kësaj fushate është që “gëzimi i qytetarëve të mos shndërrohet në tragjedi”, duke i ftuar të gjithë të kontribuojnë për një mjedis më të sigurt dhe pa armë.

Presidentja e Kosovës, Vjosa Osmani, në vazhdën e takimeve konsultative me liderët e partive politike, ka pritur sot në takim edhe kryetarin e partisë “Për Liri, Drejtësi dhe Mbijetesë”, Nenad Rashiq.

Takimet janë duke u zhvilluar në kuadër të përpjekjeve për tejkalimin e ngërçit politik që ka bllokuar konstituimin e Kuvendit të ri të Kosovës, si dhe për të krijuar hapësirë për dialog politik mes subjekteve parlamentare.

Presidentja Osmani ka filluar këtë raund të ri të konsultimeve pas vendimit të fundit të Gjykatës Kushtetuese, që ka sjellë më shumë qartësi për rrjedhën e procesit të konstituimit. Takimet po mbahen në mënyrë të ndarë me secilin lider politik, me qëllim gjetjen e një zgjidhjeje të dakorduar dhe funksionale.

Në vijim të agjendës së saj, Presidentja sot pritet të takohet edhe me përfaqësues të komuniteteve.

Presidentja e Kosovës, Vjosa Osmani, në vazhdën e takimeve konsultative me liderët e partive politike, ka pritur sot në takim kryetarin e partisë “Guxo”, Faton Peci, në kuadër të përpjekjeve për tejkalimin e ngërçit politik dhe konstituimin e Kuvendit të ri, raporton Ekonomia Online.

Para takimit, Peci deklaroi se këto konsultime përbëjnë një përpjekje të rëndësishme për përmirësimin e situatës aktuale dhe theksoi gatishmërinë e subjektit që ai përfaqëson për të dhënë kontributin e vet.

“Përpjekja e radhës për përmirësim të situatës. Besoj se këto takime janë në funksion të daljes nga kjo bllokadë. Ne jemi për të kontribuar brenda mundësive,” u shpreh Peci.

Policia e Kosovës ka përsëritur sot thirrjet për drejtuesit e automjeteve që të jenë të kujdesshëm në trafik, duke theksuar se ngasja e përqendruar është çelësi për një jetë më të sigurt.

“Çdo sekondë mungesë përqendrimi mund të rrezikojë jetën tënde dhe të të tjerëve”, thuhet në apelin e Policisë, duke i rikujtuar shoferëve se pakujdesia në timon mund të ketë pasoja fatale.

Policia ka kërkuar me ngulm që përdorimi i telefonit gjatë ngasjes të shmanget plotësisht, pasi shpërqendrimi nga pajisjet teknologjike është një nga shkaqet më të zakonshme të aksidenteve në vend.

Gjithashtu, qytetarët janë paralajmëruar të mos drejtojnë automjetet kur janë të lodhur apo nën ndikimin e substancave, pasi në këto raste rreziku në trafik shumëfishohet.

Në mënyrë të veçantë, shoferët janë ftuar të respektojnë kufizimet e shpejtësisë, duke kujtuar se tejkalimi i shpejtësisë shpesh shndërrohet në tragjedi rrugore.

“Ruaj veten! Ruaj të tjerët!”, është mesazhi që Policia e Kosovës ua ka drejtuar të gjithë pjesëmarrësve në trafik, duke theksuar rëndësinë e vetëdijes individuale.

Në fund, Policia ka apeluar për ngasje me kujdes, qetësi dhe vëmendje, si mënyra më e sigurt për të shpëtuar jetë dhe për të mbrojtur familjet.

“Jeto më gjatë, për ty dhe familjen tënde”, thuhet në thirrjen e Policisë së Kosovës./betimipërdrejtësi