Lajmet

SHBA i sheh si kërcënim aktivitetet raketore të Koresë Veriore

Published

5 years ago

on

Ushtria e Shteteve të Bashkuara ka thënë se testimet raketore të kryera nga Koreja Veriore gjatë fundjavës, përbëjnë “kërcënime” për fqinjët e këtij shteti, por edhe më tej.

“Ky aktivitet vë në pah fokusin e vazhdueshëm të Koresë Veriore në zhvillimin e programit të saj ushtarak dhe për kërcënimet që vijnë nga këto sulme, si për fqinjët, ashtu edhe për komunitetin ndërkombëtar”, ka thënë komanda amerikane për Indo-Paqësor përmes një deklarate.

Koreja Veriore ka thënë më herët se, përgjatë fundjavës ka kryer testime të sukeseshme të raketave me rreze të gjatë veprimi.

Ky njëherësh është aktiviteti i parë i tillë që është raportuar nga verikoreanët në muajt e fundit.

Agjencia Qendrore e Lajmeve Koreane, ka thënë më 13 shtator se raketat kanë goditur me sukses shënjestrat në largësi prej 1,500 kilometrash, në testimet e kryera më 11 dhe 12 shtator, dhe më pas raketat është raportuar të kenë rënë në ujërat territorialë të shtetit.

Ushtria e Koresë së Jugut nuk ka konfirmuar menjëherë testimet verikoreane.

Phenjani ka përshkruar raketat e reja si “armë strategjike me ndikim të madh”, që lidhen me thirrjet e mëhershme të liderit verikorean, Kim Jong Un, për të forcuar kapacitetet ushtarake të këtij shteti.

Ai po ashtu ka thënë se raketat kanë qenë duke u zhvilluar në dy vjetët e fundit.

Ky ka qenë lansimi i parë i raketave nga Koreja Veriore, prej kur kjo e fundit ka testuar raketa me rreze të shkurtër veprimi në muajin mars.

Koreja Veriore ka kryer edhe testime të raketave vetëm disa orë pasi presidenti amerikan, Joe Biden ka marrë pozitën në Shtëpi të Bardhë, në muajin janar.

Këto testime tregojnë se si Koreja Veriore vazhdon të rrisë kapacitetet ushtarake ndërkohë që negociatat bërthamore me Shtetet e Bashkuara vazhdojnë të jenë të bllokuara.

Bisedimet janë bllokuar prej dështimit të samitit në mes të ish-presidentit amerikan, Donald Trump dhe liderit verikoren, Kim, më 2019.

Administrata Trump ka kundërshtuar kërkesën e Koresë Veriore për heqje të sanksioneve në këmbim të dorëzimit të një pjesë të kapacitetit bërthamor.

Qeveria e Kimit ka refuzuar ofertat e administratës Biden për të rinisur dialogun.

Administrata e Bidenit ka thënë se është e hapur për diplomaci, me qëllim të çarmatosjes së Gadishullit Korean, mirëpo nuk ka treguar gatishmëri për të hequr sanksionet.

Sung Kim, i dërguari amerikan për Korenë Veriore, ka thënë në muajin gusht se është i gatshëm të takohet me zyrtarë verikoreanë, “kudo dhe në çdo kohë”.

Testimet raketore janë kryer një ditë përpara se të realizohet një takim në Tokio në mes të negociatorëve nga Shtetet e Bashkuara, Koreja Jugore dhe Japonia, për të diskutuar mënyra si mund të thyhet bllokada.

Ministri i Jashtëm kinez, Wang Yi, pritet që të vizitojë Seulin më 14 shtator për të diskutuar me homologun e tij.

Lansimet e fundit kanë ardhur vetëm disa ditë pas mbajtjes së paradës ushtarake në Phenjan, për të shënuar përvjetorin e 73-të të krijimit të shtetit komunist.

Përgjatë paradës nuk janë prezantuar raketa balistike, megjithatë, disa punëtorë janë parë me veshje speciale, çka ka lënë të kuptohet se mund të jetë krijuar forcë speciale për të luftuar pandeminë e koronavirusit.

Organizata Botërore e Shëndetësisë ka thënë se nga 19 gushti, Koreja Veriore nuk ka regjistruar asnjë rast të infektimit me koronavirus, ndonëse kritikët besojnë se diçka e tillë është pak e mundshme.

Ky shtet ka mbyllur kufijtë në janar të vitit 2020 për ta luftuar pandeminë, duke i shkaktuar tregtisë me Kinën dëm të konsiderueshëm.

Prej atëherë, Kim e ka pranuar se shteti përballet me mungesë të ushqimeve./REL/

Related Topics:
Continue Reading

Lajmet

Justina Shiroka-Pula merr zyrtarisht detyrën e presidentes

Published

4 hours ago

on

October 7, 2026

By

Justina Shiroka-Pula ka marrë zyrtarisht detyrën e presidentes së Republikës së Kosovës.

Në ceremoninë e inaugurimit, ushtruesja e detyrës së presidentes, Albulena Haxhiu, ia ka dorëzuar Kushtetutën presidentes së re.

Justina Shiroka-Pula mori 81 vota në Kuvend, në votimin që u zhvillua në mesnatën mes të martës dhe të mërkurës, në fund të afatit kushtetues që e caktoi 6 tetorin si datë të fundit për zgjedhjen e presidentit. Detyrën e siguroi pas dakordimit të Vetëvendosjes dhe Partisë Demokratike të Kosovës./A.K/

Continue Reading

Lajmet

BE-ja shqetësohet për ndryshimet në Ligjin për Dhomat e Specializuara

Published

4 hours ago

on

October 7, 2026

By

Bashkimi Evropian ka shprehur shqetësim të thellë për miratimin nga Kuvendi i Kosovës të Projektligjit për ndryshimin dhe plotësimin e Ligjit për Dhomat e Specializuara të Kosovës.

Në një përgjigje për KOHËN, një zëdhënës i BE-së ka thënë se ndryshimet e miratuara janë në kundërshtim me obligimet ndërkombëtare të Kosovës ndaj Bashkimit Evropian.

“Partneriteti ynë nënkupton jo vetëm interesa të përbashkëta, por edhe përgjegjësi të përbashkëta”, thuhet në përgjigje.

BE-ja ka theksuar se vazhdimisht ka mbështetur punën e Dhomave të Specializuara të Kosovës si institucion të pavarur gjyqësor, të themeluar përmes vendimeve të Kuvendit në vitet 2014–2015 dhe të përcaktuar në Kushtetutën e Kosovës.

Sipas BE-së, mandati dhe pavarësia e Dhomave të Specializuara duhet të respektohen plotësisht, ndërsa drejtësia duhet të vazhdojë të bazohet në parimin e përgjegjësisë penale individuale.

BE-ja i ka bërë thirrje Kosovës që t’u përmbahet obligimeve të saj ndërkombëtare dhe të garantojë pavarësinë gjyqësore të Dhomave të Specializuara, si dhe llogaridhënien dhe drejtësinë për viktimat dhe familjet e tyre nga të gjitha komunitetet në Kosovë.

Projektligji u miratua në Kuvend të martën, pak para përfundimit të afatit për zgjedhjen e Presidentit, pas një marrëveshjeje mes Lëvizjes Vetëvendosje dhe Partisë Demokratike të Kosovës.

Miratimi i tij u shoqërua me protesta në Kosovë, ndërsa kundërshtimi ndaj Dhomave të Specializuara është rritur pas aktgjykimit të 16 shtatorit ndaj Hashim Thaçit, Kadri Veselit, Jakup Krasniqit dhe Rexhep Selimit./A.K/

Continue Reading

Lajmet

Schuebel uron presidenten e re, mbështetja e BE-së do të mbetet e palëkundur

Published

7 hours ago

on

October 7, 2026

By

Ambasadori i Bashkimit Evropian në Kosovë, Dirk Schuebel, ka uruar Justina Shiroka-Pulën për zgjedhjen e saj në postin e Presidentes së Republikës së Kosovës.

Schuebel ka shprehur shpresën për rikthimin e stabilitetit politik dhe institucional në vend, duke theksuar gatishmërinë për të bashkëpunuar me presidenten e re, institucionet e Kosovës dhe spektrin politik.

“Me shpresën për ripërtëritjen e stabilitetit politik dhe institucional, pres me kënaqësi të punoj me Presidenten Shiroka-Pula, institucionet e Kosovës dhe spektrin e gjerë politik për ta afruar vendin më pranë Bashkimit Evropian”, ka deklaruar Schuebel.

Ai ka theksuar gjithashtu se mbështetja e Bashkimit Evropian për Kosovën do të vazhdojë të jetë e palëkundur.

Justina Shiroka-Pula u zgjodh Presidente e Kosovës në raundin e parë të votimit, duke marrë 81 vota në seancën e Kuvendit që kishte nisur më 6 tetor. Votimi përfundoi pak pas mesnate, ndërsa numërimi i votave përfundoi rreth 15 minuta më vonë.

Me zgjedhjen e Shiroka-Pulës, Kosova tashmë ka presidenten e re, ndërsa mesazhi i BE-së vjen me theks të veçantë te stabiliteti institucional dhe vazhdimi i rrugëtimit të vendit drejt Bashkimit Evropian.

D.L

Continue Reading

Lajmet

15 milionë euro për subvencionimin e faturave të energjisë për familjet në nevojë

Published

7 hours ago

on

October 7, 2026

By

Ministri për Punë, Familje dhe Vlerat e Luftës Çlirimtare, Andin Hoti, ka bërë të ditur se janë ndarë 15 milionë euro për mbështetjen e familjeve për faturat e energjisë elektrike, përmes Programit për Mbrojtjen e Konsumatorëve të Cenueshëm të Energjisë Elektrike 2026–2027.

Hoti ka njoftuar se programi është miratuar në mbledhjen e pestë të Qeverisë dhe synon subvencionimin e faturave për familjet që plotësojnë kriteret për përfitim.

Ai ka thënë se në ditët në vijim do të nënshkruajë vendimin që përcakton kushtet dhe kriteret për përfituesit, pas së cilës pritet të hapet thirrja për aplikim.

Sipas Hotit, programi lidhet edhe me obligimet e Kosovës në kuadër të procesit të integrimit evropian dhe zbatimit të Planit të Rritjes për Ballkanin Perëndimor, veçanërisht për identifikimin dhe mbështetjen e konsumatorëve të cenueshëm.

“15 milionë euro mbështetje. Drejtpërdrejt në faturat e familjeve”, ka shkruar Hoti./A.K/

Continue Reading

Të kërkuara