Sipas politikanit gjerman Friedrich Merz, sirianët nuk kanë më arsye për t’u dhënë azil në Gjermani pas përfundimit të luftës civile në vendin e tyre. Sipas tij, ata duhet të inkurajohen të kthehen për të ndihmuar në rindërtimin e atdheut të tyre.

“Tani nuk ka më arsye për azil në Gjermani, dhe për këtë arsye mund të fillojmë gjithashtu me rivendosjet”, tha ai.

Gjatë luftës 14-vjeçare civile në Siri, Gjermania pranoi më shumë refugjatë se çdo vend tjetër në BE, por kancelari dhe të tjerët në kabinetin e tij të koalicionit argumentojnë se situata ka ndryshuar që nga rënia e qeverisë së Bashar al-Assad 11 muaj më parë.

Sipas The Guardian, Merz tha se priste që shumë nga më shumë se 1 milion sirianë që jetojnë në Gjermani do të ktheheshin vullnetarisht në atdhe.

Ai duket se kundërshtoi ministrin e tij të Jashtëm, Johann Wadephul, i cili pas një vizite në Damask javën e kaluar shprehu dyshime se shumë sirianë do të zgjidhnin të ktheheshin duke marrë parasysh shkatërrimin dhe pasigurinë e vazhdueshme, që sipas tij e bëjnë të vështirë një jetë dinjitoze.

Wadephul më parë kishte marrë një qëndrim më të ashpër, duke mbështetur linjën e qeverisë ndërsa synon të parandalojë rritjen e partisë ekstremiste dhe anti-emigruese Alternativa për Gjermaninë (AfD).

Rivlerësimi i tij i dukshëm tërhoqi kritika nga disa kolegë të tij në Unionin Kristian Demokratik, disa prej të cilëve thanë se ai po pengonte kthimin e atyre që do të nevojiteshin për të rindërtuar vendin e tyre.

Pak politikanë duan të prekin efektin që mund të kenë deportimet në Gjermani, ku qindra mijëra sirianë janë integruar me sukses, duke mësuar gjuhën dhe duke u bashkuar me fuqinë punëtore e cila ka nevojë të madhe për punonjës në një kohë kur popullsia gjermane po plaket shpejt.

Më shumë se 7,000 mjekë sirianë punojnë në sektorin e shëndetësisë, shpesh në rajone rurale që kanë qenë të pakshërbyera në dekadat e fundit.

Shumë nga 1.3 milion sirianët që jetojnë në Gjermani, pothuajse një e katërta e të cilëve kanë lindur në vendin e tyre të adoptuar, kanë marrë shtetësi, megjithëse shumica mbajnë vetëm leje qëndrimi të përkohshme. Vetëm rreth 1,000 sirianë u kthyen në atdhe me ndihmën e shtetit federal në gjysmën e parë të këtij viti.

Çështja ka marrë rëndësi në rritje duke pasur parasysh se pesë zgjedhje shtetërore janë planifikuar për vitin e ardhshëm, ku AfD është në garë të fortë me Kristian Demokratët dhe mund të sigurojë poste udhëheqëse shtetërore për herë të parë./S.K/KP/

Zëdhënësi i koalicionit “VLEN” në Qeverinë e Maqedonisë së Veriut, Driton Sulejmani, konfirmoi sot se Bekim Sali do të pasojë Izet Mexhitin si zëvendëskryeministër i parë, pasi Mexhiti u zgjodh Kryetar i Komunës së Çairit.

“Siç ka njoftuar Mexhiti, pasardhësi i tij për pozicionin e zëvendëskryeministrit të parë do të jetë Bekim Sali, ndërsa një person tjetër do të emërohet Ministër i Mjedisit dhe Planifikimit Hapësinor, dhe kjo është ende duke u vendosur. Ende nuk ka një emër specifik”, tha Sali.

Mexhiti, i cili ishte zëvendëskryeministër i parë, fitoi në rrethin e parë për kryetar të komunës së Çairit dhe sot edhe zyrtarisht mori përsipër postin./S.K/KP/

Kryeministri i Shqipërisë, Edi Rama ka thënë se Shqipëria synon që brenda vitit 2027 prokurimet publike të kryhen me Inteligjencë Artificiale.

Gjatë pjesëmarrjes online në “Euronews EU Enlargement Summit”, një platformë dialogu mes BE dhe vendeve të Ballkanit Perëndimor, Rama tha se kjo do të lejojë shpejtësi, transparencë e saktësi në nivele të papara më parë.

“Kur bëhet fjala për Diellën, është produkt i një lufte sistemore, që nuk ka të bëjë në luftën kundër rasteve apo luftën në gjykata, por me luftën për modernizmin, dhe brenda 2027-ës synojmë të kemi sistemin e plotë bazuar në Inteligjencën Artificiale të prokurimeve publike që do të lejojë shpejtësi, transparencë e saktësi në nivele të papara më parë”, tha Rama.

Kreu i qeverisë nënvizoi edhe rëndësinë e përdorimit të Inteligjencës Artificiale për të ndihmuar Shqipërinë në procesin teknik për transpozimin e ligjeve.

“Jam e sigurt që keni dëgjuar se Diella është “shtatzënë”, me 83 foshnja, kësisoj na duhet të presim që të “lindë” këta 83 bebe. Dhe ndërkohë dua të them diçka, që jemi i vetmi vend në këtë proces që kemi përdorur Inteligjencën Artificiale në transferimin e Acquis communautaire në korpusin tonë ligjor, duke e bërë procesin më të shpejtë ndonjëherë, jo vetëm sa i takon përkthimit, por edhe analizimit të ndikimit e hartimit e përgatitjes së gjithë paketave ligjore për t’u miratuar në parlament”, tha Rama.

Gjithashtu, ai potencoi se po përpiqen të hedhin hapa të mëdhenj duke përdorur Inteligjencën Artificiale./S.K/KP/Atsh/Awesmai/

Presidentja e Kosovës, Vjosa Osmani, ka thënë se Lëvizja Vetëvendosje e ka bindur se ka gjasa për formimin e qeverisë së re. Sipas saj, në Kushtetutë dhe aktgjykimet e saj nuk kërkohet garanci se janë numrat nga mandatari i dytë për kryeministër, por gjasa për ta formuar qeverinë e re.

Osmani të martën ka mandatuar Glauk Konjufcën për kryeministër nga radhët e LVV-së, pas dështimit të liderit të kësaj partie, Albin Kurti, për ta formuar qeverinë në tentimin e parë më 26 tetor.

“Sa i përket garancive, siç e thashë, askund në Kushtetutë dhe askund në aktgjykimet e Gjykatës Kushtetuese nuk kërkohen garanci, kërkohen gjasa dhe ka dallim shumë të madh mes garancës dhe gjasave. Garanca jepet në Kuvend, prandaj edhe kërkohen vota aty, kurse gjasat ofrohen në zyrën time. Sikur të ishin dy apo më tepër kandidatë, atëherë detyrimi im është të shoh kush i ka nga ata gjasat më të mëdha. LVV me kandidatin Konjufca, me të cilin sapo përfundova takimin, kanë besim të plotë që mund të arrijnë votat e nevojshme, por kjo iu takon atyre. Ju takon atyre që t’i bëjnë votat. Mua më takon që të bindem se kanë gjasa, dhe mua më kanë bindur që kanë gjasa”, tha ajo në konferencë për media.

Në anën tjetër, Osmani tha se mandatimi i Konjufcës për kryeministër s’ka të bëjë me asnjë taktikë për shtyrje të datës së zgjedhjeve të parakohshme.

“Nuk ka të bëjë kjo me asnjë taktizim vonesash dhe s’ka të bëjë me ndonjë preferencë për datën nga ana ime. Unë e kryej detyrimin kushtetues, sepse neni 95 pika 4 thotë se presidentja mandaton. Aktgjykimi i gjykatës thotë se duhet të ketë kandidat tjetër dhe s’mund të nxirret dekret për refuzim të kandidatit kur e ke propozimin mbi tavolinë. Pra, nuk ka asnjë preferencë të vetme nga ana ime për datën. Preferenca ime është që partitë politike të merren vesh rreth Planit të Rritjes, rreth buxhetit ose potencialisht zgjatjes buxhetore. Këto preferenca i kam, sepse këto janë në interes të Republikës së Kosovës dhe pastaj marrëveshjet e tilla mendoj se mund të përcaktojnë deri diku proceset që vijnë më pas, mirëpo kjo u takon partive politike në Kuvend”, shtoi ajo.

Osmani u pyet edhe mbi mundësinë nëse ajo do të japë dorëheqje nga posti i presidentes dhe të përfshihet në listën zgjedhore të LVV-së, por ajo tha se i siguron qytetarët se do ta përfundojë mandatin pesëvjeçar deri në prill të vitit 2026.

“Unë i garantoj qytetarët se do ta përfundoj mandatin. Më kanë zgjedhur për mandat pesëvjeçar dhe do të jem deri në ditën e fundit… Për rikandidim të kemi një Kuvend dhe një qeveri, pastaj i vjen radha presidentit ose presidentes”, përfundoi ajo./S.K/KP/