Përfaqësuesja e lartë e BE-së për politikën e jashtme dhe sigurinë, Kaja Kallas, deklaroi se vendet anëtare të Bashkimit Evropian janë afër arritjes së një marrëveshjeje mbi paketn e 18-të të sanksioneve kundër Rusisë.

“Shpresojmë të arrijmë një marrëveshje politike mbi paketën e 18-të të sanksioneve. Jemi shumë, shumë afër. Shpresoj që kjo të ndodhë sot“, u tha Kallas gazetarëve përpara një takimi të ministrave të jashtëm të BE-së në Bruksel.

Ajo tha gjithashtu se tema e diskutimit do të jetë Lindja e Mesme. Shefja e politikës së jashtme të bllokut, Kaja Kallas, ka paraqitur 10 hapa të mundshëm pasi Izraeli u zbulua se kishte shkelur një marrëveshje bashkëpunimi midis dy palëve për arsye të të drejtave të njeriut.

Sanksionet e propozuara variojnë nga pezullimi i të gjithë marrëveshjes së bashkëpunimit ose kufizimi i lidhjeve tregtare, deri te sanksionimi i ministrave izraelitë, vendosja e një embargoje armësh dhe ndalimi i udhëtimit pa viza.

“Më kërkuan të jap një inventar të opsioneve që mund të merren në konsideratë dhe u takon shteteve anëtare të diskutojnë se çfarë do të bëjmë me këto opsione”, tha Kallas.

Ministrat e Jashtëm të Bashkimit Evropian do të takohen këtë të martë (15 korrik) në Bruksel për të diskutuar agresionin e vazhdueshëm rus kundër Ukrainës, situatën në Lindjen e Mesme dhe zhvillimet në Gjeorgji.

Lidhur me Lindjen e Mesme, diskutimi do të përqendrohet në situatën në Gaza dhe Bregun Perëndimor, si dhe në vazhdimësinë e shqyrtimit të pajtueshmërisë së Izraelit me Nenin 2 të Marrëveshjes së Asociimit BE-Izrael, transmeton rtsh.

Lidhur me luftën në Ukrainë, Ministrat e BE-së do të diskutojnë reagimin dhe mbështetjen e BE-së për Ukrainën, në dritën e zhvillimeve të fundit.

Ministria e Shëndetësisë ka bërë të ditur se ka siguruar një sasi të mjaftueshme serumi kundër helmimeve nga pickimi i gjarprit dhe ka furnizuar me to të gjitha qendrat e Kujdesit Parësor Shëndetësor që kanë paraqitur kërkesë për furnizim.

Rritja e temperaturave gjatë verës ndikon drejtpërdrejt në rritjen e aktivitetit të gjarpërinjve, të cilët mund të shfaqen në hapësira të ndryshme, veçanërisht në zonat rurale, fusha, pyje, e madje edhe pranë shtëpive apo banesave. E, kjo situatë ka shkaktuar shqetësim mes qytetarëve, të cilët shpesh ndihen të pasigurt dhe të frikësuar për mundësinë e një kontakti të papritur me këto zvarranikë, sidomos gjatë lëvizjeve në natyrë apo në ambientet përreth shtëpisë.

“Ju njoftojmë se Ministria e Shëndetësisë ka siguruar sasi të mjaftueshme të serumit kundër helmimeve nga kafshimi i gjarprit dhe IKSHPK ka furnizuar me to të gjitha qendrat e Kujdesit Parësor Shëndetësor që kanë bërë kërkesë për furnizim. Gjithashtu, IKSHPK ka njoftuar të gjitha qendrat në nivel vendi dhe u ka bërë thirrje të përsëritur që të furnizohen me serum, duke qenë se ka sasi të mjaftueshme dhe të siguruara me kohë”, thuhet në njoftim.

Gjithashtu, Ministria e Shëndetësisë shtoi më tej se serumet janë siguruar edhe nga Shërbimi Spitalor dhe Klinik Universitar i Kosovës (SHSKUK), përfshirë Klinikën Infektive, ndërsa ato janë në dispozicion edhe për repartet infektive të spitaleve të përgjithshme (rajonale).

Nëse shihni një gjarpër:

– MOS u përpiqni ta vrisni ose të afroheni shumë!
– Qëndroni të qetë dhe largohuni ngadalë
– Edukojini fëmijët të shmangin gjarpërinjtë dhe të njoftonjnë një të rritur nëse hasin në një gjarpër

Nëse kafshoheni nga një gjarpër (sidomos një nepërkë):

– Qëndroni të qetë – paniku rrit rrahjet e zemrës dhe përhap helmin më shpejt
– Imobilizoni gjymtyrën e kafshuar
– MOS thithni helmin dhe mos e preni plagën
– Telefononi menjëherë Shërbimet e Urgjencës (112) ose shkoni në spitalin më të afërt
– Nëse mundeni, kini parasysh pamjen e gjarprit (për trajtim), por mos rrezikoni sigurinë tuaj duke u përpjekur ta kapni ose fotografoni atë

Gjithashtu, Fondacioni për të Drejtat e Kafshëve ka njoftuar se shumica e gjarpërinjve në Kosovë nuk janë helmues, madje nepërkat kafshojnë vetëm nëse kërcënohen. Ata luajnë një rol të rëndësishëm në ekosistem – duke kontrolluar brejtësit dhe dëmtuesit. /Telegrafi

Presidenti amerikan Donald Trump ka thënë se është i zhgënjyer, por nuk ka mbaruar punë me presidentin rus Vladimir Putinin, në një telefonatë ekskluzive me BBC-në.

Presidenti Trump u pyet nëse i beson udhëheqësit rus dhe u përgjigj: “Nuk i besoj pothuajse askujt”, kështu duke folur disa orë pasi njoftoi planet për të dërguar armë në Ukrainë dhe paralajmëroi për tarifa të ashpra ndaj Rusisë nëse nuk do të kishte marrëveshje armëpushimi brenda 50 ditësh.

Në një intervistë të gjerë nga Zyra Ovale, presidenti amerikan gjithashtu mbështeti NATO-n, pasi e kishte përshkruar dikur si të vjetëruar, dhe pohoi mbështetjen e tij për parimin e mbrojtjes së përbashkët të organizatës.

Pasi u takua me shefin e NATO-s, Mark Rutte, në Shtëpinë e Bardhë, presidenti kaloi një pjesë të konsiderueshme të intervistës duke folur gjerësisht për zhgënjimin e tij me udhëheqësin rus duke thënë se kishte menduar se një marrëveshje ishte në plan me Rusinë katër herë të ndryshme./Telegrafi

Deputetët mblidhen sërish sot, më 15 korrik, për vazhdimin e seancës konstituive dhe kjo është hera e 47-të që e bëjnë një gjë të tillë.

Lëvizja Vetëvendosje, Guxo e Alternativa nuk kanë arritur të sigurojnë votat e mjaftueshme për Albulena Haxhiun, të cilën e kanë propozuar për kryetare të Kuvendit. Në mungesë të numrave në votim të hapur, ata kanë propozuar që votimi të bëhet në mënyrë të fshehtë.

Komisioni që mundëson votimin e fshehtë nuk po mbështetet nga Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës. Kjo çështje madje është dërguar në Gjykatën Kushtetuese, e cila ka dhënë aktgjykimin e saj, por i njëjti po interpretohet në mënyra të ndryshme nga subjektet politike.

Kushtetuesja ka sjellë aktvendim sipas të cilit deputetët kanë afat deri më 26 korrik që ta konstituojnë legjislaturën e nëntë. PDK dhe AAK i kanë kërkuar LVV-së që ta ndërrojë kandidaten për kryetare të Kuvendit me arsyetimin se ka punuar në dëm të interesave të shtetit. Kurse, LDK ka deklaruar se nuk do ta votojë asnjë kandidatë.

Këto parti kanë thënë se Lëvizja Vetëvendosje nuk i ka as votat për formimin e Qeverisë, gjë të cilën e mohon LVV-ja.

Ndërkohë, PDK dhe LDK iu ka drejtuar sërish Gjykatës Kushtetuese që të sqarojë nëse seancat e fundit kanë shkelur Kushtetutën. Gjithashtu, edhe presidentja Vjosa Osmani ka paralajmëruar se së shpejti do t’i drejtohet Kushtetueses se cilat janë masat që duhet të merren nëse nuk konstituohet Kuvendi deri në afatin e paraparë prej një muajsh.

Zgjedhjet parlamentare janë mbajtur më 9 shkurt ndërkaq mbledhja e parë për konstituimin e Kuvendit të ri është mbajtur më 15 prill dhe që nga ajo datë çdo 48 orë po mbahen vazhdime të seancës konstituive pa arritur ndonjë rezultat. /Kosovapress