Qindra mijëra iranianë u mblodhën të premten në Teheran në një tubim të organizuar nga qeveria, duke shprehur gatishmërinë për të marrë armët pas muajsh lufte. Kjo është demonstrata më e madhe e këtij lloji që nga sulmet e SHBA-së dhe Izraelit në shkurt, ndërsa Teherani zyrtar po kërkon të mobilizojë qytetarët përballë bllokadës detare dhe sanksioneve të reja amerikane.

Tubimi u mbajt në kuadër të fushatës “Janfaday-e Iran” (Ata që sakrifikojnë jetën për Iranin), ku vullnetarë të veshur me uniforma ushtarake marshuan në qendër të kryeqytetit. Sipas zyrtarëve ushtarakë, këta vullnetarë do të marrin trajnim me pushkë sulmi dhe do të shërbejnë si shtresë shtesë sigurie krahas Gardës Revolucionare dhe Basijit.

Gjenerali i Gardës Revolucionare, Hassan Hassanzadeh, deklaroi se mbi 600 mijë persona janë regjistruar tashmë dhe pritet që numri i tyre të kalojë 1 milion. Ndërkohë, kreu i Basijit, Hossein Taeb, në prani të presidentit Masoud Pezeshkian dhe krerëve ushtarakë, tha se ky mobilizim do të jetë një “makth” për armiqtë e vendit.

“Jam këtu për t’i thënë Trumpit se ne iranianët nuk kemi frikë nga kërcënimet e tij ndaj atdheut tonë. Askush në histori nuk ka mundur ta pushtojë Iranin dhe të qëndrojë atje,” tha një nga pjesëmarrëset në tubim. CNN

“Bassam al-Assaf” ka vendosur një gardh të gjatë me tela me gjemba rreth kompleksit dhe ka përforcuar portat e shkollës, në përpjekje për t’u ofruar qetësi prindërve. Tashmë, ekipet e ambulancave janë vendosur në rrugën jashtë shkollës, ndërsa disa prindër vullnetarisht po qëndrojnë jashtë shkollës gjatë gjithë ditës, si një veprim shtesë mbrojtjeje, raporton BBC.

Në ditën e parë të vitit të ri shkollor palestinez, drejtori i shkollës së djemve në al-Mughayyir, “Bassam al-Assaf”, mbërriti në punë para agimit, duke kaluar pranë rrethimit të sapovendosur me tela me gjemba dhe portave të përforcuara të shkollës, ndërsa dielli fillonte të depërtonte mes ullinjve përreth fshatit, thellë në Bregun Perëndimor të pushtuar.

“Jemi të frikësuar”, tha al-Assaf. “Nxënësit kanë frikë dhe prindërit e tyre kanë frikë”.

Gjashtë persona, përfshirë tre nxënës të kësaj shkolle, janë vrarë në al-Mughayyir këtë vit, në një valë dhune të lidhur me kolonët kundër palestinezëve. Njëri prej tyre, 14-vjeçari Aws al-Naasan, u qëllua për vdekje nga një kolon jashtë portave të shkollës në prill.

“Isha brenda klasës sime dhe dy nxënës të vegjël erdhën me vrap për të më thënë se kishte kolonë pranë murit të shkollës”, kujton mësuesi i anglishtes, Waheed Abu Naem, vëllai i të cilit, Jihad, u vra gjithashtu nga një ushtar izraelit në të njëjtin sulm.

Waheed tha se po përpiqej t’i zhvendoste nxënësit në një vend të sigurt brenda portës së shkollës, kur koloni qëlloi në drejtim të tyre. Pamjet e regjistruara me telefon tregojnë momentin kur Aws u qëllua.

“Kur e ktheva pashë shumë gjak që i dilte nga hunda dhe goja dhe plumbin në kokë”, tha Waheed. “E humbëm”.

Ai tha se plumbat vazhduan të godisnin ndërtesën e shkollës, ndërsa nxënësit fshiheshin pas mureve të klasave ose shtriheshin përtokë.

Ushtria izraelite në një deklaratë në atë kohë tha se ishin hedhur gurë ndaj një veture që transportonte “civilë, përfshirë një ushtar rezervist”, dhe se rezervisti kishte dalë nga automjeti dhe kishte qëlluar ndaj personave të dyshuar.

Mediat izraelite raportuan se rezervisti u pezullua më vonë nga detyra dhe se nisi një hetim.

Që nga ajo ditë, numri i viktimave është rritur, bashkë me frikën e prindërve.

Hezitimi për t’i çuar fëmijët në shkollë

Gjatë verës, edhe dy nxënës të tjerë u qëlluan për vdekje nga forcat izraelite gjatë sulmeve dhe inkursioneve të kolonëve në fshat, së bashku me një 19-vjeçar që sapo kishte përfunduar shkollën.

Në të dyja rastet, ushtria izraelite tha se forcat e saj iu përgjigjën personave që nxitën “një trazirë të dhunshme”.

Me tri banka bosh në klasat e tyre, disa prindër hezitonin t’i dërgonin fëmijët në shkollë për vitin e ri shkollor.

Shkolla ndodhet pikërisht në skajin e al-Mughayyir, një fshat i izoluar në verilindje të Ramallahut, i rrethuar gjithnjë e më shumë nga postblloqe të kolonëve hebrenj dhe që shpesh bllokohet nga forcat izraelite, të cilat rregullisht vendosin një pikë kontrolli të improvizuar në hyrje.

“Bassam al-Assaf” ka vendosur një gardh të gjatë me tela me gjemba rreth kompleksit dhe ka përforcuar portat e shkollës, në përpjekje për t’u ofruar qetësi prindërve. Tashmë, ekipet e ambulancave janë vendosur në rrugën jashtë shkollës, ndërsa disa prindër vullnetarisht po qëndrojnë jashtë shkollës gjatë gjithë ditës, si një veprim shtesë mbrojtjeje.

“Erdha sepse kjo i bën fëmijët të ndiejnë se prindërit e tyre janë me ta, se janë të sigurt, kjo u jep një lloj sigurie”, tha Haroon Bishara, i cili ka një djalë në klasën e parë dhe një në të dytën.

“Këtë vit kemi më shumë frikë për fëmijët tanë. E dimë se në shkollë nuk ka siguri”, shtoi ai.

Por Bishara tha se kjo frikë ishte e përzier me vendosmërinë për të mos lejuar që kërcënimi nga sulmet e kolonëve t’i detyronte të largoheshin.

Të rreshtuar në oborr, nxënësit dëgjuan gjatë gjithë ditës udhëzimet që mësuesit përsëritën vazhdimisht: nëse ushtarët ose kolonët afrohen pranë shkollës, mos bërtisni, mos u afroni dhe mos reagoni.

Pak më shumë se një orë pasi nisën mësimet, kolonët u panë përmes dritareve të shkollës: dy burra që çonin delet përmes fushave palestineze, disa qindra metra larg shkollës, ndërsa ushtarët izraelitë qëndronin aty pranë.

Pak minuta më vonë, u shfaq një tjetër kolon me një tufë delesh.

“Që nga prilli ata janë afruar më shumë me fshatin”, tha Abu Naem. “Më parë i mbanin delet pas kësaj kodre, por tani ushtarët i sjellin kolonët deri te fshati”.

BBC-ja i ka kërkuar ushtrisë izraelite një përgjigje ndaj të gjitha akuzave të përfshira në këtë raport, por ajo nuk ka dhënë një përgjigje përpara publikimit të tekstit.

“Shënjestrimi i qëllimshëm”

Të gjitha vendbanimet izraelite në Bregun Perëndimor të pushtuar janë të paligjshme sipas të drejtës ndërkombëtare. Shumë prej postblloqeve të vogla dhe të improvizuara të kolonëve që janë shtuar përreth al-Mughayyrit janë gjithashtu të paligjshme sipas ligjit izraelit.

Por një prej ekipeve të ambulancës të vendosura jashtë shkollës tha se, në vend që t’i largonin vendbanimet e paligjshme, ushtarët izraelitë kishin filluar të mbështesnin dhe lehtësonin inkursionet e kolonëve në fshat.

Hadi al-Naasan, shofer ambulance në fshat, tha se gjatë vitit të fundit kishte pasur një ndryshim në sjelljen e forcave izraelite. Sipas tij, rritja e numrit të palestinezëve të vrarë dhe të plagosur në al-Mughayyir këtë vit e pasqyronte këtë ndryshim.

“Në fillim të vitit 2025, sulmet e kolonëve ishin të pakta, për shkak të ndërhyrjeve të ushtrisë”, tha ai. “Në vitin 2026, situata ndryshoi plotësisht: kolonët u bënë plotësisht të mbrojtur nga ushtarët pushtues. Këtë vit, numri i dëshmorëve është më i lartë, numri i të plagosurve është gjithashtu shumë më i madh, dhe numri i fëmijëve të plagosur është rritur gjithashtu”.

Hadi, së bashku me banorë të tjerë të al-Mughayyrit, beson se disa kolonë izraelitë tashmë po i shënjestrojnë qëllimisht fëmijët, me qëllim që të ushtrojnë presion mbi të rriturit e fshatit që të largohen nga shtëpitë e tyre.

Një Komision Hetimor i OKB-së, në një raport të publikuar në qershor, konstatoi se sulmet e kolonëve “kanë përdorur fëmijët si mjet në kuadër të një strategjie më të gjerë shtrënguese për t’i dëbuar palestinezët nga toka e tyre”.

Ai përshkroi gjithashtu “një model të kolonëve që shënjestronin qëllimisht fëmijët palestinezë” teksa ata luanin pranë shtëpive të tyre, shkonin ose ktheheshin nga shkolla, kujdeseshin për fermat apo kullosnin bagëtitë, “duke i kthyer hapësirat e përditshme në vende frike”.

Izraeli e ka hedhur poshtë raportin, duke e cilësuar atë si një “mashtrim shpifës”.

Fermeri, Sami Abu Rahma, beson fort se disa kolonë të dhunshëm po i shënjestrojnë fëmijët.

Në fund të korrikut, djali i tij nëntëvjeçar, Salim, u qëllua dhe u plagos teksa luante me vëllezërit dhe motrat e tij në fermën familjare të deleve jashtë al-Mughayyrit. Plumbi ende ndodhet në krahun e tij.

Pamjet e kamerave të sigurisë në fermë tregojnë Salimin duke treguar me gisht dhe duke u bërtitur prindërve të tij se kolonët po afroheshin, përpara se të vraponte për t’u strehuar me vëllezërit, motrat dhe nënën e tij, ndërsa dëgjohen dy të shtëna. Salimi shihet duke kapur shpatullën.

“Në atë moment, nuk mendon më; thjesht ndien frikë”, tha Sami. “Frikë se, Zoti na ruajt, sulmuesi po qëllonte për të vrarë. Gjëja e parë që të shkon në mendje është humbja e gjësë më të çmuar që ke”, shtoi Sami.

Ai tha se burri që qëlloi djalin e tij jetonte në një postbllok të paligjshëm të kolonëve, i cili ishte shfaqur pranë fermës në qershor, dhe se më parë kishte qëlluar ndaj Salimit në të njëjtën zonë, një javë më herët.

“Ti nuk ndihesh më se mund t’i mbash të sigurt në rrugë, madje as në shkollë”, tha ai.

“Kolonët nuk duan që ne të qëndrojmë këtu; duan të na bëjnë të ndihemi sikur nuk kemi të ardhme këtu”.

Sami tha se ishte fermeri i fundit që mban dele që kishte mbetur në atë zonë, pasi të tjerët ishin larguar me forcë nga sulmet e kolonëve. Sipas tij, koloni që qëlloi djalin i kishte thënë vazhdimisht familjes të largohej nga toka e tyre.

“Pavarësisht se sa i vendosur mund të jesh për të qëndruar”, shtoi ai, “çfarë bën kur kolonët fillojnë të qëllojnë mbi fëmijët e tu?”

Këshilli rajonal i kolonëve tha se një ushtar jashtë detyrës ishte arrestuar nën dyshimin se kishte lidhje me të shtënat.

“Na vjen keq për çdo dëm ndaj njerëzve të pafajshëm, qofshin hebrenj apo arabë, dhe kundërshtojmë çdo akt dhune që shkel ligjin”, thuhej në një deklaratë të tij, duke shtuar se kundërshtonte “përpjekjen për t’ia atribuuar të gjithë komunitetit të kolonëve në Jude dhe Samari aktet që ende nuk janë përcaktuar nga një hetim, si dhe pretendimin e pabazë se kullotja e ligjshme e deleve apo prania hebraike në zonë janë pjesë e një plani të qëllimshëm për të dëmtuar fëmijët ose për t’i dëbuar banorët nga shtëpitë e tyre”.

Al-Mughayyri është pjesë e një modeli që po shfaqet në të gjithë Bregun Perëndimor të pushtuar, ku gjithnjë e më shumë postblloqe të paligjshme të kolonëve po rrethojnë fshatrat palestineze, kolonët po marrin më shumë mbrojtje nga forcat izraelite dhe sulmet po zhvendosen nga fermat dhe tokat e kullotave drejt zonave të banuara, ku gratë dhe fëmijët janë më të rrezikuar.

“Fëmijët, kur shohin ushtrinë duke hyrë, nuk e kuptojnë rëndësinë e situatës”, tha Hadi al-Naasan, pjesëtar i ekipit lokal të ambulancës. “Të rriturit janë më të vetëdijshëm se si mund të zhvillohen ngjarjet”.

Statistikat e OKB-së

Shifrat e OKB-së sugjerojnë se numri i palestinezëve të plagosur gjatë sulmeve të kolonëve nga ushtarët izraelitë ose vetë kolonët është rritur ndjeshëm këtë vit, në një mesatare prej tre të plagosurish në ditë, ndërsa edhe numri i plagosjeve të shkaktuara drejtpërdrejt nga kolonët është më i lartë.

Kjo rritje është shoqëruar me zgjerimin e vendbanimeve izraelite dhe postblloqeve të kolonëve në Bregun Perëndimor.

Të gjitha vendbanimet izraelite në Bregun Perëndimor janë të paligjshme sipas të drejtës ndërkombëtare dhe qeveria izraelite, e cila mbështet fuqishëm zgjerimin e vendbanimeve, po përballet me presion në rritje ndërkombëtar.

Arrestimi i disa kolonëve të dhunshëm dhe një plan i raportuar i kryeministrit izraelit për të çmontuar postblloqet e paligjshme në Bregun Perëndimor, nuk i kanë ndalur deri tani sulmet dhe as nuk i kanë qetësuar palestinezët, të cilët thonë se postblloqet e shkatërruara më parë nga autoritetet izraelite janë rindërtuar shpejt.

Teksa zgjedhjet izraelite janë më pak se dy muaj larg, ministria izraelite e Financave çoi përpara këtë javë planet për të marrë nën kontroll regjistrimin e tokave në Bregun Perëndimor dhe Jerusalemin Lindor, një masë që organizata izraelite monitoruese e vendbanimeve “Peace Now” e përshkroi si “një hap të qartë drejt aneksimit”.

Kryeministri izraelit, Benjamin Netanyahu, ia ka atribuuar dhunën e kolonëve një pakice të vogël ekstremiste, duke i përshkruar ata në një intervistë të fundit televizive si “150 delinkuentë të rinj”.

Që nga fillimi i vitit 2025, OKB-ja ka regjistruar 316 palestinezë të vrarë nga forcat izraelite ose kolonët dhe më shumë se 5,600 të plagosur, deri në fund të korrikut 2026. Sipas OKB-së, gjatë së njëjtës periudhë janë vrarë 20 izraelitë, përfshirë një fëmijë dhe tetë pjesëtarë të forcave të sigurisë, ndërsa 123 izraelitë janë plagosur.

Prindërit palestinezë që kanë qëndruar në fshatra si al-Mughayyri, pavarësisht përshkallëzimit të dhunës së kolonëve, tani po përballen me një frikë gjithnjë e më të madhe se mund t’i humbasin fëmijët e tyre nëse qëndrojnë në tokën e tyre.

Presidentja e Komisionit Evropian, Ursula von der Leyen, i ka bërë një ofertë historike Kanadasë për t’u bërë “anëtarja e parë e asociuar” e Bashkimit Evropian, duke kërkuar ngritjen e marrëdhënieve dypalëshe në nivelin më të lartë të mundshëm.

Gjatë fjalës së saj në Parlamentin Evropian në Strasburg pranë kryeministrit kanadez, Mark Carney, Von der Leyen theksoi se të dyja palët ndajnë të njëjtat vlera demokratike dhe qasje për sfidat globale si inteligjenca artificiale, ndryshimet klimatike, lufta në Ukrainë dhe gjeopolitika. Oferta përfshin thellimin e bashkëpunimit përmes përmirësimit të marrëveshjes tregtare, krijimin e një aleance teknologjike, integrimin e industrive të mbrojtjes, si dhe investime të përbashkëta në energji, minerale kritike, siguri kibernetike dhe rajonin e Arktikut.

Kjo lëvizje vjen si përgjigje ndaj ndryshimeve gjeopolitike pas rikthimit të Donald Trump në Shtëpinë e Bardhë, i cili ka vendosur tarifa ndaj aleatëve dhe ka sugjeruar mundësinë e anëtarësimit të Kanadasë si shteti i 51-të i SHBA-së. Në këtë kuadër, Kanadaja po kërkon të ulë varësinë tregtare nga Uashingtoni përmes kësaj aleance unike me bllokun evropian, ndonëse mbeten për t’u definuar detajet se si do të funksionojë ky status i ri me tregun e përbashkët të BE-së. /Reuters/

Arabia Saudite ka njoftuar se ka rrëzuar një dron të rebelëve Houthi në periferi të Mekës, duke shënuar herën e parë në pothuajse një dekadë që shënjestrohet qyteti më i shenjtë i Islamit. Ndonëse rebelët jemenas të mbështetur nga Irani e kanë mohuar sulmin, ngjarja ka nxitur reagime dhe dënime të ashpra rajonale.

Zëdhënësi i Koalicionit Saudit, Turki al-Maliki, e quajti ngjarjen një provokim ndaj ndjenjave të miliona myslimanëve dhe u zotua për masa parandaluese. Gjithashtu, Organizata e Bashkëpunimit Islamik (OIC) e dënoi ashpër veprimin, duke e cilësuar si shkelje të shenjtërisë së vendeve të shenjta. Ky incident rrit tensionet dhe rrezikon ta përfshijë Arabinë Saudite më thellë në një konflikt të gjerë rajonal.

Meka mbetet qendra më e rëndësishme shpirtërore për botën islame si vendlindja e Profetit Muhamed, ku miliona pelegrinë udhëtojnë çdo vit për të kryer obligimet fetare. Shënjestrimi i një zone me një peshë të tillë simbole administrative dhe fetare konsiderohet një vijë e kuqe e kapërcyer, gjë që shton presionin mbi Riadin për të reaguar ushtarakisht dhe rrit gjasat për një përshkallëzim të ri në luftën mes SHBA-së dhe Iranit.