Fundjava solli emocione të mëdha në Premier League dhe La Liga, me ndeshje spektakolare dhe gola të shumtë, ndërsa paraqitje të mira pati edhe nga futbollistët shqiptarë në arenën ndërkombëtare.

Në derbin londinez, Arsenal mposhti Chelsea me rezultat 2-1, duke marrë tri pikë të rëndësishme në garën për kreun.

Manchester City fitoi minimalisht 1-0 në transfertë ndaj Leeds United, ndërsa Manchester United triumfoi 2-1 kundër Crystal Palace.

Fitore të rëndësishme arriti edhe Wolverhampton Wanderers që mposhti 2-0 Aston Villa.

Spektakli i javës erdhi nga Liverpool që shënoi plot pesë gola në fitoren 5-2 ndaj West Ham United.

Ndërkohë, në përballjen mes AFC Bournemouth dhe Sunderland, skuadrat barazuan 1-1 pas 90 minutave lojë. . Te Sunderland aktivizohet mesfushori shqiptar Granit Xhaka, i cili është një nga lojtarët kryesorë të ekipit.

Në Spanjë, Barcelona ishte bindëse me fitoren 4-1 ndaj Villarreal, duke konfirmuar formën e mirë.

Real Madrid fitoi 2-1 ndaj Benfica, ndërsa Atlético Madrid fitoi 1-0 në transfertë ndaj Real Oviedo.

Derbi andaluz mes Real Betis dhe Sevilla përfundoi baras 2-2.

Në ndeshjet tjera, Celta Vigo fitoi 2-1 ndaj Girona, ndërsa Real Sociedad triumfoi 1-0 kundër Mallorca. Te Mallorca aktivizohet sulmuesi kosovar Vedat Muriqi, por skuadra e tij po kalon një periudhë jo të mirë sa i përket rezultateve dhe formës në kampionat.

Sot, Kombëtarja e Kosovës në basketboll luan ndeshjen e dytë parakualifikuese për FIBA EuroBasket 2029.

Kosova do të përballet me Sllovakinë dhe pritet një atmosferë e zjarrtë.

Ndeshja zhvillohet në Palestrën sportive “Sezai Surroi” në Prizren, me fillim nga ora 19:00.

Tifozët do të kenë mundësinë të mbështesin nga afër lojtarët që mbajnë mbi supe më shumë se një fanellë, duke përfaqësuar ëndrrën e një kombi, sakrificën dhe besimin e çdo tifozi. Forca Dardanë!

Real Madrid përballet me Manchester City, shorti i Champions premton spektakël

Në Nyon është tërhequr shorti për raundin e 16-të të Champions League, ku sfida më e pritur është ajo mes Real Madrid dhe Manchester City.

Tetë skuadrat që u kualifikuan direkt do të përballen me fituesit e play-offit, duke ofruar përballje interesante dhe të forta. Ndeshjet kryesore të raundit janë:

• Real Madrid – Manchester City

• Bodo/Glimt – Sporting Lisbon

• Chelsea – PSG

• Barcelona – Newcastle

• Liverpool – Galatasaray

• Tottenham – Atletico Madrid

• Bayern Munich – Atalanta

• Arsenal – Bayer Leverkusen

Shorti premton duela spektakolare, ndërsa përballja Real – City pritet të jetë një nga më të ndjekurat të këtij raundi.

Rrugëtimi evropian i FC Drita ka marrë fund, por krenaria për paraqitjen historike mbetet e madhe. Pas një gare dinjitoze dhe me karakter deri në minutat e fundit, skuadra gjilanase u eliminua në plejofin e fazës nokaut të UEFA Europa Conference League, duke mbyllur një kapitull të rëndësishëm në skenën ndërkombëtare.

Drita shënoi dy gola edhe në ndeshjen kthyese ndaj NK Celje, por humbja 3:2 në Slloveni, e njëjta si në Prishtinë një javë më parë, nuk i mjaftoi për të siguruar kualifikimin në një të tetën e finales.

Skuadra vendase kaloi në epërsi në minutën e 18-të me golin e Svit Seshlar, ndërsa vetëm pesë minuta më vonë Darko Hrka realizoi për 2:0. Drita reagoi shpejt: Blerim Krasniqi ngushtoi shifrat në 2:1 në minutën e 26-të, duke rikthyer shpresat për mysafirët. Megjithatë, në momentet më të mira të tyre, gjilanasit pësuan sërish, me Seshlar që realizoi nga penalltia për 3:1.

Në pjesën e dytë, Drita u hodh në sulm dhe Albert Dabiqaj shënoi për 3:2 në minutën e 52-të. Pavarësisht përpjekjeve dhe rasteve të krijuara, rezultati mbeti i pandryshuar deri në fund.

Ky eliminim i jep fund një rruge të gjatë evropiane për Dritën, e cila u bë skuadra e parë nga Kosova që arriti në fazën e plejofit të kësaj gare. Në fazën e ligës, Drita përfundoi e 20-ta me tetë pikë, duke siguruar fitore të rëndësishme dhe barazime që i mundësuan avancimin historik.

Ramadani: “Jam krenar për këta futbollistë”

Trajneri i Dritës, Zekirija Ramadani, pas ndeshjes e cilësoi takimin si “të çmendur” dhe shprehu krenarinë për skuadrën e tij.

“Jam krenar që jam trajner i Dritës dhe i këtyre futbollistëve me karakter kampioni. Me punë, angazhim dhe besim kemi arritur deri këtu. Futbollistët janë më meritorët për historinë që kemi shkruar në futbollin kosovar”, deklaroi Ramadani.

Ai theksoi se rrugëtimi që nisi në korrik ka qenë maratonik, me pak pushim dhe shumë emocione, ndërsa përvojën e kundërshtarit e cilësoi si faktor vendimtar në eliminim. Sipas tij, elementet e forta të Celjes, veçanërisht goditjet standarde, u shfrytëzuan maksimalisht në të dyja ndeshjet.

Ramadani e bëri të qartë se ambicia e klubit mbetet e madhe: synimi është rikthimi në këtë fazë, por në UEFA Europa League.

“Ky sukses nuk duhet të mbahet mend gjatë, por të na shërbejë si motiv për të arritur edhe më shumë. Nëse vijmë sërish deri këtu, synimi është të jemi në Ligën e Evropës”, theksoi ai.

Tashmë, fokusi i Dritës rikthehet në garat vendore, me synimin për titullin kampion. Evropa mbyllet për këtë edicion, por emri i Dritës tashmë është shkruar me respekt në arenën ndërkombëtare.