Policia e Austinit në Teksas ka identifikuar të dyshuarin për vrasjet në Target, një nga rrjetet më të mëdha të supermarketeve në Shtetet e Bashkuara, ku të shtënat në veri të qytetit lanë tre persona të vdekur, shkruan Economic Times.

Sipas Departamentit të Policisë së Austinit (APD), i dyshuari “ka një dosje kriminale”, megjithatë detajet e shkeljeve të tij të mëparshme nuk janë publikuar. Emri i tij mbahet i fshehtë deri në përfundimin e hetimeve, sipas Economic Times.

APD tha se i dyshuari iku nga dyqani me një automjet të vjedhur, të cilin më pas e përplas, para se të grabiste një automjet tjetër dhe të udhëtonte drejt jugut të Austinit. Ai u arrestua pa ndonjë incident tjetër.

Kryeministri i Australisë, Anthony Albanese, e ka akuzuar homologun e tij izraelit, Benjamin Netanyahu, se është “në mohim” për pasojat e luftës në Gazë, raporton BBC.

“Ndalesa e ndihmave që kemi parë dhe më pas humbja e jetëve që po shohim në ato pika shpërndarjeje të ndihmave, ku njerëzit që presin për ushqim dhe ujë po humbasin jetën, është krejtësisht e papranueshme. Dhe ne e kemi thënë këtë”, tha ai.

“Kam biseduar me kryeministrin Netanyahu. Ai më përsëriti atë që ka thënë publikisht gjithashtu, që është të mohojë pasojat që po ndodhin për njerëzit e pafajshëm”.

Albanese të hënën njoftoi se vendi i tij do të njohë një shtet palestinez në Asamblenë e Përgjithshme të OKB-së në shtator, pas veprimeve të ngjashme nga Mbretëria e Bashkuar, Franca dhe Kanadaja.

Albanese tha se pakënaqësia me qeverinë izraelite ka luajtur një rol në këtë veprim, duke thënë se australianët “duan të shohin ndalimin e vrasjeve dhe ciklit të dhunës”.

Izraeli, nën presion në rritje për të përfunduar luftën në Gazë, ka thënë se njohja e një shteti palestinez “nxit terrorizmin”, dhe Netanyahu e quajti vendimin e Australisë dhe aleatëve të tjerë “turpërues”.

Netanyahu dhe qeveria e tij kanë përballur kritika në rritje për shkak të raporteve mbi urinë në Gaza.

Pesë persona kanë vdekur nga kequshqyerja gjatë 24 orëve të fundit, përfshirë një fëmijë, sipas Ministrisë së Shëndetësisë të administruar nga Hamasi, duke çuar në 222 numrin total të vdekjeve nga kequshqyerja – përfshirë 101 fëmijë.

Në fillim të këtij muaji, një protestë pro-palestineze tërhoqi të paktën 90.000 mbështetës që marshuan përmes Urës së Portit të Sydney, një ditë pasi një vendim gjyqësor lejoi zhvillimin e demonstratës.

Presidenti i SHBA-së, Donald Trump njoftoi se po e vendos Departamentin e Policisë Metropolitane të Uashington D.C. nën kontrollin federal dhe po dërgon Gardën Kombëtare në qytet, duke thënë se ky veprim synon rivendosjen e rendit në kryeqytetin e vendit.

“Po e aktivizoj zyrtarisht nenin 740 të Aktit të Rregullave të Brendshme të Distriktit të Kolumbias, e dini se çfarë është ai, dhe po e vendos Departamentin e Policisë Metropolitane të DC nën kontroll të drejtpërdrejtë federal”, tha Trump gjatë një konference për shtyp në Shtëpinë e Bardhë.

Presidenti u tha një turme gazetarësh se veprimet e tij vijnë ndërsa diçka ka dalë jashtë kontrollit, por ne do ta vendosim nën kontroll shumë shpejt, siç bëmë në kufirin jugor.

Trump njoftoi gjithashtu vendosjen e trupave të Gardës Kombëtare për të ndihmuar forcat lokale të rendit.

“Po e dërgoj Gardën Kombëtare për të ndihmuar në rivendosjen e ligjit, rendit dhe sigurisë publike në Uashington, DC, dhe atyre do t’u lejohet ta bëjnë punën e tyre siç duhet”, shtoi Trump.

Akti i Rregullave të Brendshme i vitit 1973 i lejon presidentit të marrë kontrollin e policisë së qytetit për 48 orë nëse ai “përcakton se ekzistojnë kushte të veçanta me natyrë emergjente”, gjë që kërkon përdorimin e departamentit për qëllime federale. Presidenti mund ta mbajë kontrollin e departamentit për një periudhë më të gjatë nëse njofton kryetarët dhe anëtarët e lartë të komiteteve të kongresit që merren me çështjet legjislative që kanë të bëjnë me Uashingtonin. Çdo kërkesë për kontroll mbi departamentin e policisë së qytetit për më shumë se 30 ditë duhet të miratohet në ligj.

Presidenti tregoi se synon ta zgjasë marrjen e kontrollit federal përtej afatit fillestar 48-orësh dhe do t’i njoftojë zyrtarisht palët përkatëse.

I shoqëruar nga zyrtarë të lartë të administratës, Trump u zotua gjithashtu të ndërmarrë veprime agresive për të adresuar mungesën e strehimit dhe varfërinë në kryeqytet.

“Kemi lagje të varfra këtu. Po i heqim qafe. E di që nuk është politikisht korrekte”, tha Trump.

Rreth 800 ushtarë të Gardës Kombëtare të Uashington DC do të ofrojnë mbështetje administrative dhe logjistike, si dhe mbështetje fizike për forcat e rendit, gjatë mobilizimit të tyre në Uashington DC, thuhet në një deklaratë të sotme nga Ushtria.

Sekretari i Mbrojtjes Pete Hegseth tha në një konferencë shtypi së bashku me Trump tha se Garda do të fillojë të vërshojë në Uashington këtë javë.

Trupat do të jenë në statusin e Titullit 32, që do të thotë se janë nën autoritetin lokal, por financohen nga qeveria federale. Trupat në statusin e Titullit 32 gjithashtu nuk i nënshtrohen Aktit Posse Comitatus, i cili u ndalon anëtarëve të shërbimit amerikan të marrin pjesë në aktivitete të zbatimit të ligjit.

Një rrezik shumë i madh zjarri, i kategorisë IV, parashikohet në 10 rajone greke, sipas një njoftimi publik që kanë bërë autoritetet lokale greke.

Rrezik shumë i madh zjarri parashikohet për rajoni e Atikës, të Greqisë Perëndimore, Peloponezit, Thesalisë, Greqisë Qendrore, Maqedonisë Lindore dhe Thrakisë, Egjeut të Veriut, Prevezës dhe Ishujve Jonianë, shkruan ANA.

Sekretariati i Përgjithshëm i Mbrojtjes Civile ka informuar shërbimet shtetërore të përfshira, si dhe autoritetet rajonale dhe lokale në zonat e mësipërme, që të jenë në gatishmëri të shtuar për t’u përballur menjëherë me çdo shpërthim zjarri.

Gjithashtu ka paralajmëruar publikun të shmangë çdo aktivitet në natyrë që mund të shkaktojë aksidentalisht një zjarr, siç janë zjarret e mëdha, përdorimin e makinerive që krijojnë shkëndija, barbekjutë, trajtimin e koshereve të bletëve ose hedhjen e cigareve të ndezura.