Aktualitet

Projektbuxheti për 2022 kritikohet nga opozita, Hoti: RTK-ja mund të falimentojë

Murati gjatë prezantimit të projektbuxhetit, ka treguar për mënyrën e mbushjes dhe ndarjes së buxhetit.

Published

5 years ago

on

Ndonëse pati kritika dhe kundërshtime nga deputetët e opozitës, Komisioni për Buxhet, Punë dhe Transfere më shumicë votash të mërkurën ka miratuar në lexim të parë projektbuxhetin për vitin 2022.

Ministri i Financave, Punës dhe Transfereve, Hekuran Murati gjatë prezantimit të projektbuxhetit për 2022, i cili parashihet të jetë 2 miliardë 748 milionë euro, ka treguar për mënyrën e mbushjes dhe ndarjes së buxhetit.

Derisa ka thënë se përveç rritjes së buxhetit për disa dikastere, është paraparë vazhdimi i programit të Ringjalljes Ekonomike meqenëse ekonomia e vendit ende ka nevojë për mbështetje.

“Projektligji i buxhetit për vitin 2022 parash një buxhet të përgjithshëm në vlerën prej 2 miliardë e 748 milionë euro si shpenzime, kurse projeksioni për të hyrat është 2 miliardë e 364 milionë, ku shumica janë të hyra tatimore 2 miliardë e 103 milionë… Sa I përket deficitit dhe borxhit publik kemi një ngadalësim të ritmit për sa i përket deficitit… Sa I përket risive që parashihen me këtë projektligj, përveç rritjes pothuajse në të gjitha kategoritë për shumicën e dikastereve qeveritare, ka edhe disa risi të tjera është paraparë vazhdimi i Programit të Ringjalljes Ekonomike, meqenëse konsiderojmë që ekonomia e vendit ende ka nevojë për mbështetje”, theksoi Murati.

Në anën tjetër opozita ka pasur kritika për projektbuxhetin 2022, për çka kanë thënë se nuk është zhvillimor. Nënkryetari i Komisionit, Mërgim Lushtaku ka pasur vërejtje për projektbuxhetin, të cilin e quajti jo zhvillimor dhe pa vizion.

Deputeti Lushtaku po ashtu ngriti edhe çështjen e rritjes së borxhit publik dhe manipulimi siç tha ai me shifra për rritje ekonomike.

“Një projektbuxhet pa vizion e me borxhe të larta publike nuk garanton zhvillim, ministër për më shumë do të jep dëshpërim për fatin e keq të gjithëve. Si opozitë do të abstenojmë për me vazhduar tutje në mes dy leximeve ku do të japim kontributin tonë”, theksoi ai.

Deputeti Avdullah Hoti nga LDK-ja ngriti çështjen e shkurtimit të buxhetit për Ministrinë e Shëndetësisë, dhe ka pyetur ministrin Murati se a është buxhetuar Ligji për pagat.

“Tek pagat në sektorin publik, cili është projeksioni dhe kur pritni që të miratohet Ligji I pagave, edhe a është buxhetuar rritja e pagave që buron nga ky ligj… Tek ndërmarrjet publike ka pasur nga ana juaj akuza bukur të rënda vazhdimisht për rrjedhje financiare, tash i keni ndal ato rrjedhje apo? I keni ndërruar krejt bordet dhe tash i keni nën kontroll të plotë. Tash kemi prapë një 12 milionë euro subvencione për NP-të. Jeni para për ndërmarrje publike… E keni shkurtuar buxhetin për RTK-në rreth 2 milionë euro. Cili është plan nga do të kompensohet këtë 2 milionë? Dhe nëse e zvogëlojmë këtë ne praktikisht e falimentojmë mediumin publik”, pyet Hoti.

Për këtë ai mori përgjigje nga ministri Murati, se nëse miratohet ky ligj do të mbulojnë me anë të mjeteve nga siç tha ai kontigjenca me 55 milionë euro.

“Sa i përket Ligjit të Pagave, është një kontigjencë që e parasheh, në rast se ka miratim të ligjeve të reja, që mund të kenë kosto buxhetore, kemi paraparë një kontigjencë. Sa i përket suprimimeve nëpër Ministri, por nëse thoni 56 milionë euro shkurtim në buxhetin e Ministrisë së Shëndetësisë, ju siguroj që është gabim, për shkak se diku 60 milionë euro është I tërë buxheti I Ministrisë së Shëndetësisë”, tha Murati.

Derisa Murati për shkurtimin e buxhetit të RTK-së tha se rreth 100 punonjës në këtë medium publik marrin paga më të larta se paga e një ministri. Një buxhet i tillë për RTK, ai tha se është i mjaftueshëm.

“Ndoshta edhe e dini që në RTK janë rreth 100 paga të cilat janë më të larta se paga e një ministri. Kemi kursime rreth 2 milionë euro nga AKP nga ulja e pagave, që e kemi shfrytëzuar për rekrutime në FSK nga AKP. E njëjta gjë mund të bëhet edhe nga RTK. Nëse RTK i ka 100 persona që marrin me shumë se paga e ministrit, kjo për mua nuk është në rregull. Konsideroj që një buxhet i tillë është më se i mjaftueshëm për RTK-në duke marrë parasysh nivelin e pagave që kemi në vend”, tha ai.

Deputeti Pal Lekaj nga AAK kritikoi ministrin Murati për mos përfshirjen e Ligjit të pagave dhe shkurtimin e buxhetit disa dikastere siç tha ai me rëndësi.

Deputeti Lekaj po ashtu shprehi dyshimin e tij për keqpërdorimin e fondit nga kontigjenca prej 50 milionë euro, i cili nuk përjashtoi mundësinë që viti 2022 të jetë vit zgjedhor.

Derisa plasën të qeshurat nga anëtarë e Komisionit për konstatimin e Lekajt për zgjedhjet.

“Më bëri përshtypja çështja për kontigjencën prej 50 milionë euro që me mbetur si rezervë. Ne praktikat e deritashme nuk kemi pasur diçka të tillë. Unë pajtoj për me mbetur një shumë në kuptimin që ndoshta dikush ka shpenzime më të mëdha, dikush më pak, dhe për mos me mbetur në suficit mirë keni menduar. Por, me ligj në praktikë nuk është kjo, sepse mund ta keqpërdorni. Edhe pse ndoshta nuk do të jetë vit zgjedhor, por nëse ka vit zgjedhor kjo mund të keqpërdoret. Nëse, s’e nuk i dihet. Nëse ka, por nuk e di, nuk po e themi as për shaka. Kjo është diçka që ia vlen të diskutohet në thelb”, tha Lekaj.

Deputeti nga radhët e VV Eman Rrahmani ka thënë se e kupton që pritjet e opozitës janë të mëdha, por shtoi se me anë të këtij buxheti do të ketë trende të rritjes ekonomike dhe zhvillim ekonomik.

“Është një fillim i mirë e i mbarë e që do të vazhdohet edhe për vitet e ardhshme. E di që pritjet janë shumë të mëdha sidomos nga opozita që po mundohen që brenda vitit, mirëpo realiteti është ky që të ecim me hapa të sigurt dhe të mos ketë kthim mbrapa. Për zhvillim ekonomik besoj që janë faktet që po tregojnë, rritja ekonomike dhe këtij fakti duhet ti gëzohemi të gjithë”, theksoi Rrahmani.

Ish-ministri i Financave, Hoti ka kërkuar përgjegjësi edhe për shkurtimin e buxhetit projektet kapitale rrugore, atë për Podujevë, Gjilan, derisa kërkoj përgjigje edhe rritjen e pagës minimale.

Related Topics:
Continue Reading

Vendi

Mbyllet shqyrtimi gjyqësor për rastin e Gllogjanit, vendimi shpallet më 24 gusht

Published

6 minutes ago

on

August 19, 2026

By

Gjykata Themelore në Pejë ka shpallur të mbyllur shqyrtimin gjyqësor në rastin e vrasjes së trefishtë në Gllogjan.

Pas përfundimit të seancës, gjykata ka njoftuar se vendimi për këtë rast do të shpallet më 24 gusht, në ora 14:30.

Ky vendim vjen pas zhvillimit të rigjykimit, gjatë të cilit gjykata ka shqyrtuar provat e administruara në proces.

Në kuadër të seancës së sotme, Gjykata Themelore në Pejë kishte vendosur gjithashtu që si provë të administrohej video-incizimi ku shihet Kreshnik Mehmetaj duke gjuajtur me armë në një bjeshkë të Deçanit./Ekonomia online/

Continue Reading

Vendi

Haxhiu e Hargreaves diskutojnë për ngërçin politik në vend

Published

2 hours ago

on

August 19, 2026

By

Ushtruesja e detyrës së presidentes së Kosovës, Albulena Haxhiu, ka pritur në takim ambasadorin e Mbretërisë së Bashkuar në Kosovë, Jonathan Hargreaves, me të cilin ka biseduar për zhvillimet e fundit politike dhe situatën institucionale në vend.

Përmes një njoftimi për medie, bëhet e ditur se fokus kryesor i takimit ishte nevoja për dialog politik dhe gjetja e një rrugëdaljeje nga ngërçi aktual, me qëllim formimin e parakohshëm të institucioneve në përputhje me rendin kushtetues.

Gjatë këtij takimi, u.d. presidentja Haxhiu lartësoi mbështetjen e vazhdueshme të Mbretërisë së Bashkuar për Kosovën, duke e cilësuar Londrën si një ndër partnerët më të rëndësishëm strategjikë të vendit. /E.A/

Continue Reading

Aktualitet

Ditari: Lajmet kryesore që shënuan datën 19 gusht 1993-1998?

Published

2 hours ago

on

August 19, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Disa shqiptarë të vrarë në përpjekje për të kaluar kufirin me Malin e Zi (Kallugjerski llaz, vendi ku u ekzekutuan civilët)

19 gusht 1993

Refugjatët shqiptarë janë refugjatë të dhunës

Në Ministrinë zvicerane të Punëve të Jashtme në Bernë, siç shkruan gazeta e sotme “Bujku”, u mbajt një takim pune me Velti Filin, i ngarkuar në Ministrinë zvicerane të Punëve të Jashtme për çështje të Evropës Lindore dhe përfaqësueses të Lidhjes Demokratike të Kosovës, Edita Tahiri. Me këtë rast, zyrtari zviceran u njoh me situatën e rëndë dhe shpërthyese në Kosovë, veçmas pas përzënies së vëzhguesve të KSBE-së. Pastaj u kërkua nga qeveria zvicerane që të japë kontributin e saj për parandalimin e mundshëm të konfliktit, konflikt ky që do të godiste tërë rajonin e Ballkanit. Po ashtu u kërkua angazhimi i Zvicrës që në Kosovë të vendosen forcat e NATO-s ose të OKB-së si dhe vënia e Kosovës nën kontrollin e Këshillit të Sigurimit të OKB-së.

Gjatë këtij takimi u përmend fakti se 90 për qind e popullit shumicë, pra shqiptarët, është e rrezikuar nga pakica serbe, e cila është armatosur me armët më moderne dhe po ndihmohet nga regjimi serb i Beogradit, ndërsa njësitë e Arkanit dhe të Sheshelit po shëtisin për të provokuar shqiptarët. Prandaj, u kërkua nga pala zvicerane që të ketë mirëkuptim ndaj refugjatëve shqiptarë dhe ata t’i konsiderojë refugjatë të dhunës, pasi popullit shqiptar i është rrezikuar siguria kolektive. U kërkua gjithashtu që Kosova të ndihmohet në planin humanitar, si dhe të bëhen përpjekje për hapjen e një korridori ajror për dërgimin e këtyre ndihmave.

Gjatë kësaj bisede pala zvicerane theksoi se gjendja në Kosovë ndiqet për së afërmi dhe ajo insistoi për bashkëpunim të dyanshëm si dhe vazhdimin e opsionit paqësor.

 

19 gusht 1994

Në Suharekë edhe dy familje shqiptare u nxorën me dhunë nga banesa

Më 13 gusht, pushteti serb me vendim gjyqësor theu banesën e Hafir Gashit në Suharekë, në të cilën u vendos familja serbe Stanisavleviq, njofton Komisioni për Informim i Degës së LDK-së në Suharekë.

Hafir Gashi ka disa muaj që ka shkuar në Holandë për të siguruar bukën e gojës.

Ndërkaq, pardje, po ashtu me vendim gjyqësor, policia serbe urdhëroi edhe Sinan Hajdarin që ta lirojë banesën. Të nesërmen në banesën e tij u vendos po ashtu një familje serbe.

Sinan Hajdarit banesa i qe ndarë para 12 vitesh nga Kuvendi komunal i Suharekës, ku edhe punonte.

 

19 gusht 1995

Në Kosovë janë vendosur 2.350 refugjatë serbë

Në Kosovë deri më tash, sipas Kryqit të Kuq të kontrolluar nga serbët, kanë arritur 2.350 refugjatë nga Kroacia, njofton agjencia beogradase “Beta”.

Mirëpo, shtypi serb shkruan se në Kosovë gjenden 3.000 refugjatë. Shumica e këtyre refugjatëve është vendosur nëpër hallat sportive, konviktet e nxënësve e studentëve dhe një numër i vogël nëpër hotele e nëpër shtëpi private.

 

 

19 gusht 1997

Vriten 6 vetë afër Kuçovës

Gjashtë vetë anëtarë të një bande kanë vdekur dje nga përleshja me një bandë tjetër në qendër të komunës së Perondisë, 3 kilometra larg nga qyteti i Kuçovës.

Burime të komisariatit të policisë të Kuçovës, bëjnë të ditur për ATSH-në se 6 persona, shumë të kërkuar nga policia për krimet e tyre të njëpasnjëshme, kanë mbetur të vrarë dje nga një mori e madhe plumbash.

Ngjarja ka ndodhur rreth orës 5. 00 të mëngjesit, të 6 banditët kishin dalë nga Kuçova me automjetin e tyre dhe në Perondi u ndodhen nën zjarrin e papritur të automatikëve, mitrolozëve dhe granathedhësve.

Prita, thekson burimi, duhet të ketë qenë tepër e organizuar, e si pasojë, personat në autoveturë, nuk kanë arritur të reagojnë”.

Sipas të dhënave të deritanishme, rezulton se janë vrarë vëllezërit Ilir dhe Vladimir Spahiu, 33 dhe 35 vjeç, të dy të dënuar më parë për kryerjen e marrëdhënieve seksuale me dhunë. Gjithashtu, është vrarë Ilir Tahiri, 29 vjeç, i dënuar më parë për vrasje me dashje dhe i larguar nga burgu, vëllai i tij, Edmond Tahiri, 26 vjeç i dënuar për vjedhje. Bashkë me ta janë gjetur të vrarë edhe Gentian Kosova, 27 vjeç dhe Klodian Rizaj, 21 vjeç.

Vrasja e tyre mendohet të jetë bërë për hakmarrje, ose larje hesapesh midis bandave rivale që veprojnë në këtë qytet. Me emrin e kësaj bande mendohet të jetë e lidhur edhe vrasja e para 3 ditëve e shtetasit Flamur Mielli dhe plagosja dje e shtestasti Edmond Lezo.

Policia ka nisur menjëherë hetimet. Në automjetin ku ishin viktimat u gjendën arëm automatikë dhe pistoleta, njofton “Bujku”.

 

19 gusht 1998

Deçan: Disa shqiptarë të vrarë në përpjekje për të kaluar kufirin me Malin e Zi

Forcat serbe vranë gjatë ditëve të fundit mbi dhjetë shqiptarë, që u përpoqën të ikin nga zonat e luftës dhe të shkojnë në drejtim të Malit të Zi, njofton KI i Degës së LDK-së në Deçan.

Njoftohet se në drejtim të Malit të Zi edhe sot është nisur një numër i madh i shqiptarëve.

Gjendja humanitare në komunën e Deçanit është shumë e rëndë dhe banorët rrezikohen seriozisht nga katastrofa humanitare. Bëhet e ditur se aktualisht në Bjeshkët e Strellcit po qëndrojnë mbi 10 mijë civilë shqiptarë pa ushqime, ilaçe e gjësende më elementare për jetë.

 

 

Continue Reading

Lajmet

UBT, institucioni i parë në Kosovë që merr Quality Recognition nga AESOP në fushën e planifikimit hapësinor dhe urban

Published

3 hours ago

on

August 19, 2026

By

UBT tashmë është bërë pjesë e rrjetit evropian të institucioneve të njohura nga AESOP – Association of European Schools of Planning, organizata evropiane që promovon cilësinë në edukimin dhe kërkimin në fushën e planifikimit hapësinor dhe urban.

Kjo arritje është pjesë e një rrugëtimi 20-vjeçar të Fakultetit të Arkitekturës dhe Planifikimit Hapësinor në UBT, i cili gjatë këtyre viteve është zhvilluar në shkollën më të madhe të arkitekturës në vend, duke krijuar mundësi për gjenerata të reja të arkitektëve dhe profesionistëve të planifikimit hapësinor.

Në këtë kuadër, programi Master në Planifikim Urban dhe Zhvillim të Qëndrueshëm është vlerësuar me Quality Recognition nga AESOP, duke e bërë UBT-në institucionin e parë në Kosovë që merr këtë njohje.

Ndër komponentet kyçe të vlerësimit është edhe konteksti global i temave të adresuara nga programi, si dhe bashkëpunimi ndërkombëtar duke u mundësuar studentëve të shkëmbejnë përvoja dhe të marrin njohuri edhe nga universitetet tjera partnere.

Përmes një procesi të detajuar të evaluimit nga “Excellence in Education Board”, programet pjesëmarrëse analizohen në aspektin e pedagogjisë, përmbajtjes akademike, praktikave profesionale dhe ndikimit në zhvillimin e qëndrueshëm urban dhe rajonal.

Continue Reading

Të kërkuara