Presidentja e Kosovës, Vjosa Osmani e quajti propagandë pretendimin e Serbisë se nënshkrimi i marrëveshjes për mbrojtje midis Kroacisë, Shqipërisë dhe Kosovës, është veprim kërcënues për ata.

E para e vendit foli rreth kësaj teme pas një ngjarje të organizuar nga Banka Qendrore e Republikës së Kosovës (BQK) dhe Banka Evropiane për Rindërtim dhe Zhvillim (BERZH), së bashku me iniciativën WE për Gratë Sipërmarrëse në Kosovë.

“Marrëveshja trilaterale midis Kosovës, Shqipërisë dhe Kroacisë synon pikërisht këtë që t’i ndihmojmë njëra tjetrës për t’i ngritur kapacitetet e mbrojtjes. Pra, për ta mbrojtur vetën dhe asnjëherë për ta sulmuar dikë dhe në të një kohë bashkëpunimin ndërmjet shteteve aleate që e kanë dëshmuar që janë besnike ndaj vlerave të lirisë, demokracisë dhe parimit të fqinjësisë së mirë, në të drejtën ndërkombëtare, por po ashtu në praktikën e NATO-s. Ka shumë shtete që janë anëtare të NATO-s, por nënshkruajnë marrëveshje bilaterale ose traktate me shtetet e tjera. Është një praktikë që ndodhë tërë kohën brenda shteteve të NATO-s që besojë në vlerat e njëjta. Serbia si shtet që nuk beson në ato vlera, por që i sulmon vazhdimisht, del me propagandë se kinse qenka shkelur një marrëveshje e vitit 1996. Por, kushdo që e lexon atë marrëveshje, e vëren një gjë, që Serbia po e bënë të njëjtën që e ka bërë gjithmonë, pra po gënjen, sepse nuk ka asnjë të vërtetë në atë që e kanë thënë dhe s’ka asnjë rrezik për ta. Ekziston veç një burim destabiliteti në rajon, e ajo është Serbia”, tha Osmani.

Ndër të tjera, Osmani tha se historikisht shtetet agresore siç është Serbia dhe Rusia, vazhdimisht tentojnë të paraqiten si viktima.

“Është interesante që historikisht shtetet agresore siç janë Serbia dhe Rusia vazhdimisht tentojnë të paraqiten si viktima. Nëse i shini deklarimet e tyre qesharake përkundër faktit që kanë një histori sulmesh, pushtimesh, histori gjenocidi, luftërash që i kanë shkaktuar vetë, shtete agresore si Serbia e Rusia paraqiten se kinse dikush po i sulmon ata. Në historinë e ekzistimit tonë, ne nuk e kemi sulmuar kurrë askënd. Në historinë e kombit tonë, shqiptarët dhe Kosova në veçanti gjithmonë e kanë mbrojtur vetën”, tha Osmani.

Të martën e 18 marsit, në kuadër të forcimit të bashkëpunimit në fushën e mbrojtjes, u nënshkrua deklarata e përbashkët trepalëshe midis Shqipërisë, Kroacisë dhe Kosovës.

Kjo marrëveshje synon të forcojë aftësitë mbrojtëse të tri vendeve, të rrisë bashkëpunimin në industrinë e mbrojtjes dhe të përmirësojë ndërveprimin ushtarak përmes edukimit, trajnimeve dhe stërvitjeve të përbashkëta.

Presidentja e Kosovës, Vjosa Osmani tha se vetëm në fillim të vitit të ardhshëm do të mund të diskutohet lidhur me synimin e saj për një mandat të dytë.

E pyetur nëse po synon ta vazhdojë mandatin dhe për katër vjet të tjera, Osmani tha se asnjë vendim i saj politik nuk është bazuar në kalkulimet se ku do të jetë ajo, por si janë interesat e qytetarëve të Kosovës.

“Në fillim të vitit të ardhshëm ne do të diskutojmë për këtë çështje. Përgjatë gjithë karrierës sime politike kam punuar duke pasur parasysh vetëm interesin e Republikës së Kosovës dhe të gjithë qytetarëve të saj. Asnjëherë, asnjë vendim i imi politik nuk është bazuar në kalkulime se ku do të jem unë, por vetëm ku do të jetë Kosova dhe qytetarët e saj. Edhe kësaj radhe ky vlerësim rreth asaj se ku mund të kontribuoj, do të përcaktohet vetëm e vetëm duke pasur parasysh interesin e Kosovës dhe të qytetarëve të saj. Asnjëherë në jetën time nuk jam varur nga politika, nuk varem as tash”, tha ai.

Këtë deklarim Osmani e tha pas ngjarjes të organizuar nga Banka Qendrore e Republikës së Kosovës (BQK) dhe Banka Evropiane për Rindërtim dhe Zhvillim (BERZH), së bashku me iniciativën ËE për Gratë Sipërmarrëse në Kosovë.

Zyrtarët kryesorë të Republikës Srpska kanë thënë se Bosnja dhe Hercegovina është në krizën më të madhe politike që nga nënshkrimi i Marrëveshjes së Dejtonit dhe se zgjidhja e vetme është një marrëveshje e re ose shkëputje paqësore.

Ata theksuan se krizën më të madhe e ka shkaktuar Christian Schmidt, duke marrë vendime antikushtetuese. Presidenti i Republika Srpska Milorad Dodik tha se BiH është në një gjendje krize të përhershme dhe tha se e vetmja zgjidhje është “për një marrëveshje të re ose për t’u ndarë”.

“Në skenën e BiH, ka abuzim tipik të gjyqësorit, Gjykata dhe Prokuroria e BiH nuk janë kategori kushtetuese. Kjo është një përpjekje për të dëbuar liderët politikë të Republika Srpska nga Srpska dhe për të prerë kokat e qeverisë së saj. Pavarësisht nga kjo, situata e sigurisë është e qëndrueshme dhe aktualisht nuk ka sfida të veçanta”, theksoi Dodik për RTD.

Kryetari i Asamblesë Kombëtare Nenad Stevandiç tha se të gjitha vendimet e marra nga Republika Srpska ishin në përputhje me Kushtetutën.

Zyrtarët e Republika Srpska thanë se gjëja kryesore që duhet të futet në Kushtetutën e re të Republika Srpska është se BiH nuk do të jetë në gjendje të zbatojë asgjë derisa të miratohet nga Asambleja Kombëtare e Republika Srpska.

Autoritetet policore janë duke zhvilluar një operacion me urdhër të Prokurorisë Themelore Publike të Koçanit lidhur me procedurën për zjarrin që shpërtheu në lokalin e natës në Koçan, ku humbën jetën 59 persona.

Sipas informacioneve të para, autoritetet policore kanë ndaluar kryetarin e dorëhequr të Komunës së Koçanit, Ljupço Papazov, si dhe dy ish-kryetarët e kësaj komune, Nikollço Iliev dhe Ratko Dimitrovski.

Prokuroria Publike njoftoi se operacioni për ndalimin e personave të dyshuar për përfshirje në rastin tragjik do të vazhdojë gjatë gjithë natës.

Nga atje njoftuan se kreu i komunës në dorëheqje, Papazov, është marrë në pyetje më 17 mars dhe ka dhënë disa sqarime dhe informacione.

“Një deklaratë e tillë po krahasohet me materialin dëshmues dhe kompetencat e komunës, pas së cilës do të vendoset për statusin e tij të mëtutjeshëm në procedurë”, theksuan nga Prokuroria Publike.

Dimitrovski ishte kryetar i Komunës së Koçanit në vitet 2009-2017, Iliev në vitet 2017-2021, pas çka këtë post e ka mbajtur Papazov deri në njoftimin e tij për dorëheqje.

Deri më tani, sipas autoriteteve, duke përjashtuar tre të fundit, hetimet e nisura të organeve gjyqësore përfshijnë 26 persona.

Në orët e para të 16 marsit, në një lokal nate në Koçan në një ngjarje argëtimi nga një grup muzikor shpërtheu një zjarr nga shkëndijat e mjeteve piroteknike, duke çuar në vdekjen e 59 personave dhe rreth 178 të tjerë mbetën të plagosur.

Sipas autoriteteve të vendit, lokali që u përfshi nga zjarri së fundmi ka vepruar me një “licencë të falsifikuar”, megjithëse edhe më herët me vite ka vepruar pa i plotësuar dhe pa i zbatuar kushtet dhe rregulloret e kërkuara sipas standardeve për klub nate.

Duke filluar nga e hëna, Maqedonia e Veriut ka shpallur shtatë ditë zie për tragjedinë në Koçan.