BridgeBros, Ducato di Mantova, Spaghettineers dhe Juniorat 05, janë katër grupet fituese të edicionit të dytë të garës “UBT Spaghetti Bridge Building Competition 2025”, e cila përfundoi me sukses në ambientet e UBT-së, duke sjellë një ndërlidhje në mes kreativitetit, bashkëpunimit dhe inovacionit ndërdisiplinor.

Me një atmosferë dinamike, krijuese dhe plot energji rinore, gara u zhvillua nën moton simbolike “Ura që na bashkon”, duke mbledhur dhjetëra studentë, profesorë, dekanë dhe përfaqësues nga institucione të ndryshme vendore e ndërkombëtare.

Dekani i Fakultetit të Inxhinierisë së Ndërtimit dhe Infrastrukturës në UBT, Prof. Visar Krelani, theksoi se kjo garë është një mundësi e veçantë që studentët të përballen me sfida reale të inxhinierisë dhe të aplikojnë njohuritë e tyre në praktikë përmes zgjidhjeve kreative dhe bashkëpunuese.

Profesorët Driton Kryeziu dhe Blendian Nela vlerësuan angazhimin dhe përkushtimin e lartë të studentëve, duke shtuar se aktivitete të tilla janë thelbësore për zhvillimin e mendimit kritik, aftësive praktike dhe përgatitjen e profesionistëve të rinj në fushat teknike dhe krijuese.

Në garë morën pjesë grupe të ndryshme studentësh nga Fakulteti i Inxhinierisë së Ndërtimit, Dizajnit të Integruar dhe Arkitekturës, të cilët ndërtuan ura funksionale duke përdorur spageti – një sfidë që kërkonte kombinimin e dijes strukturore me kreativitetin dhe punën ekipore.

Fituesit e garës janë:

Vendi i Parë – Grupi BridgeBros

• Butrint Kryeziu
• Ermal Qafleshi
• Shqipron Morina
• Joni Kryeziu

Vendi i Dytë – Grupi Ducato di Mantova

• Luis Prela
• Kosovare Elshani
• Margon Matiqi

Vendi i Tretë – Grupi Spaghettineers

• Eliza Gjoshi
• Zjarrta Gjonbalaj
• Etnik Doda
• Leuron Gerguri
• Lorik Gerguri

Vendi i Katërt – Grupi Juniorat 05 (Nxënës të Shkollës Teknike nga Ferizaj)

• Bardh Asllani
• Anes Uksmajli
• Ersan Shabani
• Luan Uka
• Ali Neziri

Kjo garë tashmë është shndërruar në një traditë të re në UBT, që promovon vlerat e arsimit cilësor dhe të ndërveprimit mes studentëve nga fusha të ndryshme, duke krijuar një urë reale dhe simbolike mes njohurive dhe krijimtarisë.

UBT falënderon sponsorët për mbështetjen e vazhdueshme: Vëllezërit e Bashkuar – Prizren, Toni Company – Ferizaj, Inon – Prishtinë, Liridoni dhe Daci.

Universitete dhe institucionet arsimore janë gjithmonë një burim i rëndësishëm për debat dhe zhvillim të ideve. Në këtë kuadër, UBT organizoi një ligjëratë të veçantë, të titulluar “Aspektet ideologjike të sistemit arsimor nga perspektiva historike në Suedi”, e mbajtur nga Dr. Nuhi Bajçinca, ligjërues i lartë dhe hulumtues në Universitetin e Borås në Suedi.

Në një atmosferë akademike frymëzuese, Dr. Bajçinca theksoi rolin e ideologjive në formësimin e politikave arsimore në Suedi dhe ndikimin e tyre në zhvillimin e një shoqërie të integruar dhe të qëndrueshme. Ai shpjegoi sesi ideologjitë, si ato sociale dhe liberale, kanë ndikuar në mënyrën e organizimit të arsimit dhe kanë kontribuar në krijimin e një shoqërie më të barabartë dhe më të zhvilluar.

Pjesëmarrës në këtë ligjëratë ishin studentë të fushës së edukimit dhe psikologjisë, si dhe profesionistë të ndryshëm nga fusha e arsimit dhe kërkimit shkencor. Gjatë prezantimit të tij, Dr. Bajçinca përshkroi disa aspekte kyçe të sistemit arsimor suedez, përfshirë politikat e arsimit të lartë dhe rolin që Suedia ka luajtur në promovimin e barazisë dhe mundësive për të gjithë grupet shoqërore, përfshirë ata që janë të prekur nga migracioni dhe etniteti.

“Arsimi suedez është ndërtuar mbi një sistem të balancuar që integron të gjitha grupet e interesit dhe nivelet shoqërore, duke krijuar një shoqëri të harmonizuar dhe të qëndrueshme”, tha Dr. Bajçinca. Ai e theksoi rëndësinë e një shoqërie që promovon të drejtat e njeriut dhe barazinë, duke i referuar sistemit edukativ suedez si një model që mund të ofrojë shumë mësime për vendet e tjera, përfshirë edhe ato të Ballkanit.

Në hapje të ngjarjes, Rektori i UBT-së, Prof. Dr. Edmond Hajrizi, shprehu kënaqësinë e tij për mundësinë që UBT ofron për studentët dhe akademikët të shprehin interes dhe të reflektojnë mbi modelet arsimore nga perspektiva ndërkombëtare. Ai theksoi se për UBT-në, zhvillimi i mundësive për avancim profesional dhe akademik është i rëndësishëm për t’i mundësuar studentëve të arsimohen në një mjedis që stimulon të menduarit kritik dhe inovativ.

“Ne kemi zgjedhur të flasim për aspektet ideologjike të sistemit arsimor në Suedi, për shkak të rëndësisë që ka ky model për zhvillimin e shoqërive që kërkojnë një balancë sociale dhe integrim të të gjitha grupeve”, tha Rektori Hajrizi. “Në Suedi, arsimi është i lidhur ngushtë me barazinë sociale dhe integrimin e të gjithë individëve, dhe kjo është një nga arsyet pse ky sistem është një model i suksesshëm për shumë vende të tjera”, potencoi Rektori Hajrizi.

Një pjesë e rëndësishme e ligjëratës ishte diskutimi mbi mundësitë e aftësimit profesional që UBT ofron për studentët e saj në bashkëpunim me partnerë ndërkombëtarë. Dr. Bajçinca, i cili gjithashtu është anëtar i grupit kërkimor MERGU, i angazhuar në studime mbi politikat arsimore dhe migracionin, u shpreh se bashkëpunimi i vazhdueshëm ndërmjet UBT-së dhe universiteteve suedeze mund të sjellë përfitime të mëdha për studentët kosovarë, duke i ndihmuar ata të zhvillohen profesionalisht dhe të integrohen në një kontekst global.

Ai gjithashtu nënvizoi nevojën për më shumë projekte dhe bashkëpunime ndërkombëtare që do të mundësojnë ndarjen e njohurive dhe përvojave për të përmirësuar sistemet arsimore dhe profesionale në të dy vendet. “Ne kemi shumë mundësi për të kontribuar dhe për të shkëmbyer përvoja, dhe këtu në Kosovë mund të shohim mundësi të mëdha për zhvillimin e arsimit dhe kulturës shkencore”, theksoi Dr. Bajçinca.

Ky takim është një tjetër hap përpara për UBT-në, duke ofruar mundësi për studentët dhe profesionistët që të thellojnë njohuritë e tyre mbi sistemet arsimore ndërkombëtare dhe të zhvillojnë mundësi të reja për bashkëpunim dhe rritje profesionale. Kjo ligjëratë e veçantë është një nga shumë aktivitetet që UBT vazhdon të ofrojë për t’i përgatitur studentët për sfidat e edukimit global.

Në një atmosferë frymëzuese bashkëpunimi dhe përkushtimi ndaj zhvillimit profesional të të rinjve, përfaqësueset nga Qendra “Ri-Jeta” u mirëpriten nga Departamenti i Psikologjisë në UBT.

Takimi u zhvillua në prani të studentëve të psikologjisë, të cilët shfaqën një interes të lartë për avancimin e tyre profesional, duke dëshmuar përkushtimin dhe motivimin që i karakterizon si psikologë të ardhshëm.

Gjatë këtij takimi, psikologia dhe trajnerja, Naile Elezi, prezantoi mundësitë që Qendra “Ri-Jeta” ofron për aftësim profesional përmes trajnimeve të avancuara ndërkombëtare, të cilat pritet të realizohen në ambientet e qendrës. Këto trajnime synojnë të pajisin studentët me njohuri dhe aftësi bashkëkohore që do t’i ndihmojnë të jenë sa më të përgatitur për sfidat e profesionit.