Gjykata Supreme e Kosovës ka shpallur të paligjshëm dhe shfuqizuar nenin 14.A të Udhëzimit Administrativ që kërkonte vërtetim nga ATK se aplikuesi nuk është në marrëdhënie pune si kusht për realizimin e pensionit të veteranit-luftëtar.

Lidhur me këtë vendim kanë reaguar nga Organizata e Veteranëve të Luftës së Ushtrisë Çlirimtare të Kosovës.

Nga OVL e kanë mirëpritur këtë duke thënë se rikthehet në vend padrejtësia që iu është bërë veteranëve.

“Organizata e Veteranëve të Luftës së Ushtrisë Çlirimtare të Kosovës e përshëndet vendimin e Gjykatës Supreme të Republikës së Kosovës, e cila ka shfuqizuar nenin diskriminues të Udhëzimit Administrativ Nr.01/2025, që kufizonte të drejtën e veteranëve për kompensim financiar”, thuhet në njoftim.

Sipas tyre ky vendim është një fitore e drejtësisë dhe e ligjit, sepse rikthen në vend një padrejtësi të bërë ndaj shumë veteranëve që, pavarësisht se janë të punësuar në sektorin privat, u ishin mohuar të drejtat ligjore të përfitimit nga skema e kompensimeve.

Gjykata Supreme ka konstatuar saktë se e drejta e veteranëve nuk mund të varet nga fakti nëse janë apo jo në marrëdhënie pune, por nga natyra e punëdhënësit, duke përjashtuar vetëm ata që paguhen nga buxheti i shtetit, ndërsa duke garantuar të drejtën për të gjithë ata që punojnë në sektorin privat.

OVL-UÇK falënderoi Gjykatën Supreme për vendimmarrjen e drejtë dhe të guximshme, e cila sipas tyre kontribuon në forcimin e shtetit ligjor dhe në mbrojtjen e të drejtave të atyre që sakrifikuan për lirinë e Kosovës./S.K/EO/

Agjencia për Informim dhe Privatësi (AIP) ka deklaruar se Policia e Kosovës ka bazë ligjore për të përdorur kamerat e sigurisë publike në shqiptimin e gjobave për kundërvajtje në trafik, ku sipas tyre, kjo praktikë nuk bie ndesh me Ligjin për Mbrojtjen e të Dhënave Personale, pasi është e paraparë në Ligjin për Rregullat e Trafikut Rrugor

AIP sqaroi se neni 75 i Ligjit për Mbrojtjen e të Dhënave Personale zbaton rregulla të përgjithshme për përdorimin e kamerave për qëllime të sigurisë publike, por lejon përjashtime në rastet kur ekziston një ligj specifik që autorizon përdorimin e tyre për funksione të tjera.

“Ligji specifik në këtë rast është Ligji Nr. 08/L-186 për Rregullat e Trafikut Rrugor, i cili në nenin 254 parasheh përdorimin e pajisjeve elektronike për identifikimin e kundërvajtjeve dhe shqiptimin e gjobave elektronike. Kjo dispozitë përcakton se, në rastet kur kundërvajtja konstatohet me pajisje elektronike, gjoba i dërgohet në adresë pronarit të mjetit, ndërsa parashikon edhe detyrimin e pronarit për të dhënë të dhënat e personit që e ka drejtuar automjetin në momentin e shkeljes. Në këtë kuptim, kamerat e trafikut përbëjnë pajisje elektronike, sepse përmes incizimeve të tyre identifikohet automjeti, koha dhe vendi i shkeljes, gjë që mundëson shqiptimin e gjobës në mënyrë të automatizuar dhe të dokumentuar”, thuhet në përgjigjen e AIP për Metro.

Tutje bëhet e ditur se neni 242 i Ligjit për Trafikun Rrugor parashikon se shpejtësia e lëvizjes së automjeteve mund të konstatohet përmes video-incizimeve, të cilat vlejnë si provë ligjore.

“Neni 242 i Ligjit Nr. 08/L-186 për Rregullat e Trafikut Rrugor parashikon se shpejtësia e lëvizjes së mjetit mund të konstatohet edhe me video incizime, me pajisje mobile ose statike, ndërsa vetë incizimi me të dhëna për shpejtësinë e konstatuar shërben si provë ligjore. Kjo dispozitë e forcon më tej kuptimin se video incizimet, pra kamerat, janë mjete të ligjshme që përdoren për evidentimin e kundërvajtjeve në trafik. Gjithashtu neni 254, paragrafi 1 i Ligjit Nr. 08/L-186 për Rregullat e Trafikut Rrugor përcakton se në rastet kur identifikimi i kundërvajtjes është bërë me pajisje elektronike, pala njoftohet përmes kontakteve të dhëna ndërsa gjoba i dërgohet në adresë pronarit të mjetit”, thuhet ndër të tjera në njoftim.

Ndërkaq, sipas AIP , Policia e Kosovës ka bazë ligjore për të përdorur kamerat e vendosura me qëllim të shqiptimit të gjobave kundërvajtëse dhe nuk bie në kundërshtim me dispozitat e Ligjit për Mbrojtjen e të Dhënave Personale”, ka theksuar Agjencia për Informim dhe Privatësi.

“Duke u mbështetur në këto dispozita, vlerësojmë se përdorimi i kamerave nga Policia e Kosovës për shqiptimin e gjobave elektronike është i bazuar në Ligjin Nr. 08/L-186 për Rregullat e Trafikut Rrugor dhe përbën përjashtim të lejuar me ligj nga rregullat e nenit 75 të Ligjit Nr. 06/L-082 për Mbrojtjen e të Dhënave Personale. Përpunimi i të dhënave personale në këtë rast zhvillohet për ushtrimin e një detyrimi ligjor që buron nga Ligji për Rregullat e Trafikut Rrugor, si dhe për ushtrimin e autoritetit zyrtar të përcaktuar në nenin 5 paragrafi 1.5 të LMDhP-së”, thuhet në përgjigje.

Ndëra gjatë javës së kaluar Rrjeti i Organizatave Joqeveritare AVONET kishte ngritur dyshime për kundërligjshmëri dhe cenim të privatësisë në përdorimin e kamerave të sigurisë publike për gjoba në trafik, duke theksuar se ato janë të destinuara për siguri publike dhe hetim penal, jo për ndëshkime administrative./S.K/AIP/PK/

Këshilli Prokurorial i Kosovës (KPK),ka pezulluar nga detyra prokurorin Beqë Shala, i cili u arrestuar dje në Prizren nën dyshimin për ryshfet.

“Këshilli Prokurorial i Kosovës (KPK), njofton se, në përputhje me kompetencat e tij kushtetuese dhe ligjore, pas pranimit të njoftimit zyrtar nga Prokuroria Speciale e Republikës së Kosovës (PSRK), përmes të cilit është konfirmuar se është iniciuar hetim penal ndaj të pandehurit Beqë Shala, prokuror në Departamentin e Përgjithshëm të Prokurorisë Themelore në Prizren, ka vendosur unanimisht që të pezullojë përkohësisht nga detyra zyrtare prokurorin Beqë Shala, deri në një vendim tjetër të Këshillit, përkatësisht deri në përfundimin e procedurës penale që është në zhvillim e sipër”, thuhet në njoftimin e KPK-së.

Gjithashtu, KPK njofton se ky vendim është marrë me qëllim të sigurimit të paanshmërisë, integritetit dhe efikasitetit të procedurës penale hetimore, si dhe për të garantuar zhvillimin e pandikuar të procedurës si dhe ruajtjen e besimit të publikut në sistemin prokurorial të Republikës së Kosovës./S.K/EO/PK/

Një mjek është arrestuar sot në Vushtrri, nën dyshimin për marrje të ryshfetit, ku bëhet e ditur se i dyshuari është Avdullah Vojvoda, e që po i njëjti ishte denoncuar vitin e kaluar edhe për sulm seksual ndaj një pacienteje. 

Për këtë kanë njoftuar edhe nga Prokuroria Themelore e Mitrovicës.

“Prokuroria Themelore në Mitrovicë në koordinim me Policinë e Kosovës, respektivisht Drejtorinë për Hetimin e  Krimeve Ekonomike dhe Korrupsionit, pas hetimeve disa mujore dhe pas zbatimit të masave të veçanta hetimore, ka arrestuar një (1) mjek në Vushtrri me iniciale A.V., me dyshimin e bazuar se ka kryer veprën penale “Marrja e ryshfetit”. I njëjti akuzohet se në këmbim të mjeteve monetare ka lëshuar vërtetime të ndryshme mjekësore për qytetarët”, thuhet në njoftim të prokurorisë.

Me vendim të prokurorit personit të arrestuar i është caktuar masa e ndalimit prej 48 orë./S.K/EO/