Shefi i ri i Zyrës së BE-së në Kosovë, Aivo Orav, në samitin e Kosovës për Paqe dhe Demokraci ka lënë një mesazh për Kosovën e shtetet që nuk janë pjesë e Bashkimit Evropian, duke thënë se “detyrat e shtëpisë” të Qeverisë duhet të realizohen për të hyrë në BE. Orav është shprehur se Qeveritë duhet ta vërtetojnë se këto detyra janë për të mirën e shtetit e jo vetëm për t’u bashkuar. Ai ka thënë se BE e ka marrë seriozisht punën e zgjerimit.

Sipas tij, nuk duhet të humben shpresat sepse askush nuk tregon data se kur do të ndodhë ky proces.

“Bashkimi Evropian po e konsideron sërish më seriozisht zgjerimin, pas gjithë atyre viteve. Para vitit 2022, vendet e Ballkanit Perëndimor dëgjuan shumë që vendi juaj është në Bashkimin Evropian, por nuk po ndodhte shumë sepse nga një raport progresi në tjetrin raport progresi. Ju nuk dëgjoni më nga Brukseli se nuk do të ketë zgjerim pesë vitet e ardhshme apo gjashtë vitet e ardhshme, në vend të kësaj, keni dëgjuar shumë shifra të ndryshme vjetore që ndoshta këtë vit duhet të ndodhë zgjerimi”, ka thënë Orav.

Për anëtarësim është i rëndësishëm edhe roli i shoqërisë civile, sepse, sipas tij, duhet të shtyjnë qeveritë dhe t’i udhëheqin në drejtimin e duhur.

“Momenti i së vërtetës vjen më 1 janar 2027, kur shohim nëse ka para në buxhetin e BE-së apo jo, sepse shumë shpejt do të fillojnë negociatat për buxhetin e ri të BE-së. Tani detyrat e shtëpisë, kjo është ajo që keni dëgjuar shumë gjithashtu. Detyrat e shtëpisë duhet të bëhen. Ky është mesazhi ynë për qeveritë, sepse është punë e vështirë të bëhen të gjitha ato reforma, sepse ato reforma nuk janë aspak popullore. Dhe qeveritë duhet të shpjegojnë se, jo, kjo nuk është për Bashkimin Evropian, por ne vetë besojmë se kjo është e mirë. Dhe roli i shoqërisë civile është jashtëzakonisht i rëndësishëm këtu, sepse ju duhet t’i shtyni qeveritë, duhet t’i udhëhiqni në drejtimin e duhur dhe kjo kritikë që po bëni është jashtëzakonisht e rëndësishme për qeveritë, për shoqëritë, dhe gjithashtu për ne”, ka shtuar ai.

Çelës për anëtarësimin sipas tij është edhe dialogu ndërmjet Prishtinës dhe Beogradit.

“Tani jemi këtu në Kosovë, ju vini nga vende të ndryshme, më duhet të theksoj, natyrisht, procesin e normalizimit ndërmjet Prishtinës dhe Beogradit përmes dialogut sepse është absolutisht një çelës. Dhe unë i di edhe pritshmëritë për komisionin e ri, përbërjen e re, por thjesht do të doja të kisha një citat tjetër nga mandati që më dhanë nga 27 shtete anëtare, dhe ai thotë ‘Duhet të promovoj një Kosovë të qëndrueshme, të zbatueshme, paqësore, demokratike dhe multietnike, e cila angazhohet në bashkëpunim rajonal’ dhe do ta bëj”, ka theksuar ai.

Ndërkaq ky është edicioni i tretë i Samitit të Kosovës për Paqe dhe Demokraci, (KPDS) të titulluar: “Realitete radikale: Dinamika etno-politike dhe integrimi euro-atlantik i Ballkanit Perëndimor”.

India ka konfirmuar rastin e saj të parë me një lloj të virusit më vdekjeprurës të mpox-it, i cili ka ngritur alarmin te zyrtarët shëndetësorë në mbarë botën për ritmin e shpejtë të përhapjes.

Lloji clade Ib i virusit u konfirmua nga autoritetet shëndetësore në shtetin jugor të Keralas, pasi u zbulua javën e kaluar te një burrë 38-vjeçar, i cili kohët e fundit kishte udhëtuar në Dubai.

Të mërkurën, Ministri i Shëndetësisë, Veena George përshëndeti “sistemin e fortë të kujdesit shëndetësor” të Keralas për zbulimin e rastit.

Ky lloj i virusit, i cili fillimisht u identifikua në Republikën Demokratike të Kongos, u shpall emergjencë globale shëndetësore nga Organizata Botërore e Shëndetësisë (OBSH) muajin e kaluar pasi u përhap në katër vende.

Lloji është zbuluar që atëherë në disa vende jashtë Afrikës, sikurse Suedia dhe Tajlanda.

Mpox, i njohur më parë si lija e majmunit, është një sëmundje virale që mund të përhapet lehtësisht midis njerëzve dhe nga kafshët e infektuara./UBTNews/

Presidenti i Serbisë, Aleksandar Vuçiq është takuar me emisarin special të BE-së për dialogun Kosovë – Serbi, Mirsolav Lajçak gjatë sesionit të 79-të të Asamblesë së Përgjithshme të OKB-së.

Vuçiq tha se me Lajçakun folën për Kosovën dhe mbijetesën e popullit serb, e po ashtu edhe për situatën në terren, për të cilën Vuçiq tha se Lajçaku e njeh shumë.

“Folëm jo vetëm për situatën në terren, të cilin ai e njeh shumë, por edhe për atë që BE-ja dhe bashkësia ndërkombëtare nuk po e bëjnë, e të cilat janë të obliguara për ta bërë, si dhe për atë që Serbia, brenda mundësive të saj, synon ta bëjë për t’i mbrojtur njerëzit e saj dhe të drejtën e tyre për jetë dhe liri”, tha Vuçiq.

Më tej, Vuçiq tha se Lajçakun e informoi për masat e miratuara nga Serbia për siç tha, mbrojtjen e serbëve, teksa tha se “nuk do ta lejojmë pogromin dhe persekutimin e popullatës sonë”.

“Edhe një herë i kam bërë thirrje bashkësisë ndërkombëtare që të angazhohet konkretisht dhe me vendosmëri në çështjet thelbësore për mbijetesën e popullit serb në Kosovë dhe stabilitetin rajonal”, tha Vuçiq.

Bashkimi Europian do të vazhdojë të ofrojë mbështetje të fortë për Ukrainën në përballjen e saj me agresionin rus, dhe ky angazhim nuk do të ndikojë nga rezultati i zgjedhjeve presidenciale në Shtetet e Bashkuara. Kështu deklaroi kreu i diplomacisë së BE-së, Josep Borrell, gjatë një konference për shtyp në Nju Jork.

Në përgjigje të pyetjeve mbi politikën e mundshme të Bashkimit Europian nëse Donald Trump, kandidati republikan, zgjidhet president në zgjedhjet e nëntorit, Borrell theksoi se nuk është në dijeni të planit të administratës amerikane, por nënvizoi se mbështetja e BE-së për Ukrainën është më e madhe se ndihma që ofrohet nga SHBA-ja në këtë moment.

“Mbështetja jonë për Ukrainën është e qëndrueshme dhe nuk varet nga faktorë të jashtëm. Ne kemi ndarë më shumë se 100 miliardë euro në ndihma për Ukrainën, nga të cilat 45 miliardë janë për ndihmën ushtarake”, tha Borrell, duke theksuar përkushtimin e vazhdueshëm të Bashkimit Europian për të mbështetur vendin në luftën e tij për mbijetesë.

Borrell po ashtu theksoi rëndësinë e këtij angazhimi në kontekstin e sigurimit të stabilitetit në Evropë dhe theksoi se është e nevojshme që BE-ja të qëndrojë e bashkuar në përballjen me kërcënimet që vijnë nga Rusia. Ai e quajti këtë moment kritik për stabilitetin e kontinentit dhe për vlerat demokratike që të dyja palët ndajnë.

Deklaratat e Borrell vijnë në një kohë të tensionuar në politikën ndërkombëtare, ku mbështetja për Ukrainën është bërë një nga çështjet kryesore në diskutimet globale. Bashkimi Europian, duke vazhduar angazhimin e tij për mbështetje, kërkon të dërgojë një mesazh të qartë se do të qëndrojë në anën e Ukrainës, pavarësisht ndryshimeve të mundshme në administratën amerikane./UBTNews/