Sulmuesi i Kosovës, Edon Zhegrova ishte njëri nga lojtarët më të mirë në fitoren 3-0 ndaj Qipros në stadiumin “Fadil Vokrri”, por nuk arriti të gjejë rrugën e golit. Por, pas ndeshjes, ai ka thënë se është shumë i lumtur që bashkëlojtarët tjerë kanë shënuar gol.

“Besoj që ekipi ka bërë një ndeshje mjaftë të mirë, të gjithë u angazhuan dhe e kemi pritur këtë fitore edhe tani duhet të shkojmë në ndeshjen e radhës që e kemi shumë me rëndësi kundër Rumanisë edhe besoj që gjithë publiku ka qenë i lumtur, po ashtu edhe në, kështu që vazhdojmë përpara”, tha fillimisht Zhegrova.

Ai ka shtuar se në fillim të ndeshjes pati shumë provokime nga lojtarët kundërshtarë, por që tani po mendon vetëm për ndeshjen ndaj Rumanisë të cilën e ka konsideruar si një finale.

“Me rëndësi bashkëlojtarët kanë shënuar gol, ndihem mirë kur ata shënojnë gola, kjo i ndihmon ekipit shumë, po ashtu ndihem mirë sepse ata do të marrin më shumë vetëbesim për ndeshjen e ardhshme dhe kjo është në të mirë të ekipit për ndeshjet e radhës. Gjatë gjithë ndeshjes e pata mendimin pas kartonit të verdhë sepse pata shumë provokime në fillim, gjatë gjithë kohës e kisha mendjen tek ndeshja me Rumaninë dhe besoj që ndeshja ndaj Rumanisë do të jetë një finale dhe do të shkojmë për fitore”, theksoi Zhegrova.

Kosova ka nënë pikë në grup, tri më pak se Rumania që është në vendin e parë.

Kryeministri Albin Kurti ishte prezent mbrëmë në stadiumin “Fadil Vokrri” në Prishtinë për ta mbështetur Kombëtaren e Kosovës, e cila e mposhti Qipron me rezultat të pastër, 3:0 në ndeshjen e vlefshme për Ligën e Kombeve.

Amir Rrahmani, Ermal Krasniqi e Emir Sahiti i shënuan golat e fitores për Dardanët, të cilët kështu e regjistruan fitoren e tretë radhazi për ta “gozhduar” pozitën e dytë në tabelë, me gjasat hapur për ta mbyllur grupin si liderë.

E kreu i Qeverisë së Republikës së Kosovës e ka bërë një postim në rrjetet sociale përmes së cilave e lartësoi Kombëtaren, ndërsa beson se djelmoshat e Franco Fodës do të dalin mirë edhe nga përballja e nëntorit ndaj Rumanisë, e cila do të jetë edhe vendimtare për fatin e tyre në këtë edicion të Ligës së Kombeve.

“Nëntë gola, nëntë pikë në tre ndeshjet e fundit. Formë jashtëzakonisht e mirë e ekipit tonë, që sonte luajti me plot vetëbesim teksa na mbushi plot besim për ndeshjen e radhës kundër Rumanisë. Faleminderit për këtë mbrëmje të mrekullueshme e gëzuar fitoren!”, shkroi Kurti.

Presidentja Vjosa Osmani priti në takim ambasadorin e Mbretërisë së Bashkuar, Jonathan Hargreave

Presidentja e Republikës së Kosovës, Vjosa Osmani, ka pritur dje në takim ambasadorin e Mbretërisë së Bashkuar në Kosovë, Jonathan Hargreaves, me të cilin ka diskutuar për zhvillimet e fundit në vend.

Në takim, u diskutua edhe rëndësia e intensifikimit të bashkëpunimit bilateral midis Kosovës dhe Mbretërisë së Bashkuar, me fokus në fushat e politikës së jashtme, mbrojtjes, mbrojtjes dhe ekonomisë.

Policia e Kosovës ka kontrolluar autobusin urban në Ferizaj i cili qarkullon në drejtim të fshatrave Doganaj-Greme dhe Gaçkë dhe aty janë gjetur mjete të rrezikshme që dyshohet se janë të nxënësve.

Policia ka njoftuar se kjo kontroll është realizuar nën dyshimin se nxënësit e shkollave të mesme të larta bartin me vete mjete të dyshimta, të rrezikshme, si mjete të mprehta-thika, boksa hekuri e të tjera.

“Me datën 15.10.2024 nga ora 20:00 në rrugën ‘Enver Topalli’, policia e stacionit në Ferizaj ka bërë kontrollimin e autobusit që qarkullon nga Ferizaj në drejtim të fshatrave Doganaj- Greme dhe Gaçkë. Zyrtarët policor me uniformë dhe ata me rroba civile kanë kontrolluar udhëtarët, me dyshimin se nxënësit e shkollave të mesme të larta bartin me vete mjete të dyshimta, të rrezikshme, si mjete të mprehta-thika, boksa hekuri e të tjera’, thuhet në njoftimin e policisë.

Sipas policisë gjatë kontrollimit të udhëtarëve, të cilët kanë qenë kryesisht me nxënës, në dyshemenë e autobusit janë gjetur: një armë zjarri, dy thika dhe një ‘’Box hekuri’’, të cilat nuk dihen se kujt i përkasin.

“Për të gjitha këto veprime është njoftuar prokurori i shtetit dhe me vendim të tij është iniciuar një rast për hetim ‘Mbajtje në pronësi, kontroll, ose posedim të paautorizuar të armës’. Kontrollimi i autobusëve urban do të vazhdojë edhe në ditët në vijim me qëllim parandalimin dhe luftimin e dukurive negative tek nxënësit”, thuhet në njoftim.