Gjykata Speciale e Kosovës ka refuzuar kërkesën e mbrojtjes së Isni Kilajt për ndryshimin e kushteve të lirimit të tij. Këto kushte janë vendosur në muajin maj të këtij viti, por gjyqtarja Marjorie Masselot ka refuzuar këtë kërkesë të Kilajt që t’i mundësohet lejimi i udhëtimit në Shqipëri, sipas saj, propozimi i ndryshimeve të propozuara nuk trajtojnë mjaftueshëm rreziqet e përshkruara në nenin 41 (6) (b) të Ligjit për Gjykatën Speciale.

“Në një version publik të vendimit të saj, të depozituar më 24 shtator 2024, gjyqtarja e vetme në rastin e Isni Kilajt refuzoi kërkesën e Mbrojtjes për ndryshimin e kushteve për lirimin e Isni Kilajt, të cilat ishin vendosur në maj të këtij viti. Mbrojtja kërkoi ndryshime të përkohshme të kushteve aktuale për ta lejuar atë të udhëtonte në Shqipëri, por gjyqtarja Marjorie Masselot vendosi se ndryshimet e propozuara nuk do të trajtonin mjaftueshëm rreziqet ekzistuese të përshkruara në nenin 41(6)(b) të ligjit”, njofton Specialja.

Aktorja e njohur Meryl Streep ka shokuar audiencën gjatë një fjalimi në Asamblenë e Përgjithshme të Kombeve të Bashkuara, ku ajo kritikoi ashpër trajtimin e grave në Afganistan. Streep, një avokate e njohur për të drejtat e njeriut, theksoi se “edhe macet kanë më shumë liri sesa gratë në Afganistan”, duke i bërë thirrje komunitetit ndërkombëtar të ndalojë shtypjen nga regjimi taliban.

Gjatë fjalimit të saj, Streep përshkroi situatën e vështirë me të cilën përballen gratë afgane pas vendosjes së një serie të re ligjesh kufizuese nga qeveria talibane muajin e kaluar. Ajo theksoi se masat e reja kanë reduktuar ndjeshëm liritë dhe të drejtat e grave, duke krijuar një atmosferë frike dhe pasigurie.

“Përveç nënshtrimit të grave, tani është e qartë se kafshët kanë më shumë të drejta sesa ato,” tha Streep. “Mendoni për këtë: macet janë të mbrojtura nga ligjet, ndërsa gratë vazhdojnë të përballen me diskriminim sistematik.”

Reagimi nga ana e talibanëve nuk ka munguar. Një zëdhënës i grupit tha se ata “respektojnë shumë” gratë dhe se “kurrë nuk do t’i krahasonin ato me macet”, duke e bërë situatën edhe më kontradiktore.

Këto komente të Streep pasojnë shqetësime në rritje për të drejtat e grave në Afganistan, pasi shumë organizata ndërkombëtare dhe aktivistë kanë dënuar rregullat e reja të cilat u ndalojnë grave aksesin në arsim, punësim dhe liri personale. Streep, me ndikimin e saj të madh në Hollywood, ka thirrur të gjithë që të angazhohen për mbrojtjen e të drejtave të grave, duke theksuar rëndësinë e ndërgjegjësimit dhe veprimit të menjëhershëm për të ndryshuar këtë situatë alarmante./UBTNews/

Barcelona po eksploron mundësinë e nënshkrimit të portierit polak Wojciech Szczesny, si zëvendësues për të dëmtuarin Marc-André ter Stegen. Edhe pse Szczesny kishte njoftuar tërheqjen nga futbolli në verë, ai është i gatshëm të rikthehet mes portave dhe është në dijeni të faktit se është zgjedhja kryesore për “Blaugranat”.

Sidoqoftë, negociatat mes palëve ende nuk kanë arritur një marrëveshje përfundimtare. Sipas raportimeve të mediave spanjolle, një nga pengesat kryesore është një klauzolë në kontratën e tij me Juventusin, e cila e obligon atë të kthejë paratë që ka marrë para daljes në pension, nëse vendos të nënshkruajë me një klub tjetër brenda një periudhe të caktuar.

Barcelona është duke kërkuar një zgjidhje të favorshme për të dyja palët. Klubi spanjoll ka 80% të pagës së Ter Stegen si një shumë që mund ta përdorë për një nënshkrim zëvendësues, e cila arrin në 7 milionë euro. Megjithatë, kjo shifër do të ndikojë në kufirin e pagave për sezonin e ardhshëm, duke e bërë procesin më të komplikuar.

Szczesny është i hapur për një marrëveshje, por situata e tij e kontratës dhe detyrimet financiare ndaj Juventusit do të kërkojnë një zgjidhje të shpejtë dhe të qartë përpara se ai të mund të firmosë me Barcelonën. Tani për tani, të dy palët po punojnë për të gjetur një rrugë të mesme që do t’i lejojë portierit të rikthehet në fushë dhe klubit të përforcojë radhët e saj në një moment të vështirë./UBTNews/

Shefi i ri i Zyrës së BE-së në Kosovë, Aivo Orav, në samitin e Kosovës për Paqe dhe Demokraci ka lënë një mesazh për Kosovën e shtetet që nuk janë pjesë e Bashkimit Evropian, duke thënë se “detyrat e shtëpisë” të Qeverisë duhet të realizohen për të hyrë në BE. Orav është shprehur se Qeveritë duhet ta vërtetojnë se këto detyra janë për të mirën e shtetit e jo vetëm për t’u bashkuar. Ai ka thënë se BE e ka marrë seriozisht punën e zgjerimit.

Sipas tij, nuk duhet të humben shpresat sepse askush nuk tregon data se kur do të ndodhë ky proces.

“Bashkimi Evropian po e konsideron sërish më seriozisht zgjerimin, pas gjithë atyre viteve. Para vitit 2022, vendet e Ballkanit Perëndimor dëgjuan shumë që vendi juaj është në Bashkimin Evropian, por nuk po ndodhte shumë sepse nga një raport progresi në tjetrin raport progresi. Ju nuk dëgjoni më nga Brukseli se nuk do të ketë zgjerim pesë vitet e ardhshme apo gjashtë vitet e ardhshme, në vend të kësaj, keni dëgjuar shumë shifra të ndryshme vjetore që ndoshta këtë vit duhet të ndodhë zgjerimi”, ka thënë Orav.

Për anëtarësim është i rëndësishëm edhe roli i shoqërisë civile, sepse, sipas tij, duhet të shtyjnë qeveritë dhe t’i udhëheqin në drejtimin e duhur.

“Momenti i së vërtetës vjen më 1 janar 2027, kur shohim nëse ka para në buxhetin e BE-së apo jo, sepse shumë shpejt do të fillojnë negociatat për buxhetin e ri të BE-së. Tani detyrat e shtëpisë, kjo është ajo që keni dëgjuar shumë gjithashtu. Detyrat e shtëpisë duhet të bëhen. Ky është mesazhi ynë për qeveritë, sepse është punë e vështirë të bëhen të gjitha ato reforma, sepse ato reforma nuk janë aspak popullore. Dhe qeveritë duhet të shpjegojnë se, jo, kjo nuk është për Bashkimin Evropian, por ne vetë besojmë se kjo është e mirë. Dhe roli i shoqërisë civile është jashtëzakonisht i rëndësishëm këtu, sepse ju duhet t’i shtyni qeveritë, duhet t’i udhëhiqni në drejtimin e duhur dhe kjo kritikë që po bëni është jashtëzakonisht e rëndësishme për qeveritë, për shoqëritë, dhe gjithashtu për ne”, ka shtuar ai.

Çelës për anëtarësimin sipas tij është edhe dialogu ndërmjet Prishtinës dhe Beogradit.

“Tani jemi këtu në Kosovë, ju vini nga vende të ndryshme, më duhet të theksoj, natyrisht, procesin e normalizimit ndërmjet Prishtinës dhe Beogradit përmes dialogut sepse është absolutisht një çelës. Dhe unë i di edhe pritshmëritë për komisionin e ri, përbërjen e re, por thjesht do të doja të kisha një citat tjetër nga mandati që më dhanë nga 27 shtete anëtare, dhe ai thotë ‘Duhet të promovoj një Kosovë të qëndrueshme, të zbatueshme, paqësore, demokratike dhe multietnike, e cila angazhohet në bashkëpunim rajonal’ dhe do ta bëj”, ka theksuar ai.

Ndërkaq ky është edicioni i tretë i Samitit të Kosovës për Paqe dhe Demokraci, (KPDS) të titulluar: “Realitete radikale: Dinamika etno-politike dhe integrimi euro-atlantik i Ballkanit Perëndimor”.