Provat e përbashkëta në Otto-Braun-Saal për koncertin e 31 marsit 2026 në Filharmoninë e Berlinit tashmë kanë filluar, duke sjellë së bashku një bashkëpunim të jashtëzakonshëm artistik.

Kori i Filharmonisë së Kosovës, Choralspace Festival Choir dhe Konzertchor Münster po përgatisin një mbrëmje të veçantë muzikore, nën drejtimin e dirigjentes Marion Wood. Në këtë koncert, Kori dhe Orkestra e Filharmonisë së Kosovës do të prezantojnë një program të pasur vokalo-instrumental.

Në pjesën e parë të koncertit do të interpretohen:
Valton Beqiri – “Ballin lartë!”
Robert Schumann – “Requiem für Mignon”, op. 98b

Solistë:
Kaltrina Miftari -soprano
Elona Sadiku – soprano
Flaka Goranci – alto
Simon Robinson – bas

Në pjesën e dytë, në një përvojë unike korale në format 360°, do t’i bashkohet edhe Choralspace Festival Choir, duke sjellë në skenë rreth 400 këngëtarë që do të interpretojnë veprën monumentale:
Antonín Dvořák – “Stabat Mater”, op. 58

Solistë:
Kaltrina Miftari – soprano
Flaka Goranci – alto
André Khamasmie – tenor
Simon Robinson – bariton

Ky koncert shënon debutimin e Filharmonisë së Kosovës në Berlin – një moment i rëndësishëm për skenën muzikore kosovare në arenën ndërkombëtare.

Orkestra e fëmijëve dhe të rinjve “Amadeus” ka arritur një sukses të jashtëzakonshëm në arenën ndërkombëtare, duke u shpërblyer me çmimin kryesor “Grand Prix” dhe vendin e parë në Festivalin Ndërkombëtar “Spring Symphonies 2026”, të mbajtur në Spanjë.

Nën dirigjimin e Vehbi Shoshollit, përballë dhjetëra orkestrave nga vende të ndryshme, të rinjtë nga Kosova përfaqësuan denjësisht vendin, duke dëshmuar talent, përkushtim dhe pasion të rrallë për muzikën.

Ky sukses i madh nuk përfaqëson vetëm një çmim, por është dëshmi e punës së palodhshme, sakrificës dhe ëndrrave të mëdha që i bashkojnë të gjithë anëtarët e orkestrës.

Nën udhëheqjen vizionare të drejtoreshës Hana Petrovci, Orkestra “Amadeus” po vazhdon të korrë suksese dhe të bëjë krenar gjithë Kosovën me talentët e saj të rinj.

Nga ekipi i orkestrës është shprehur mirënjohje për të gjithë ata që kanë kontribuar dhe i kanë mbështetur në këtë rrugëtim të suksesshëm.

Ndahet nga jeta kultivuesi i anekdotave, gojëdhënave dhe i trashëgimisë burimore shqiptare, Salih Zogiani.

Ai nuk ishte vetëm një autor, por një ruajtës i fjalës së urtë, i humorit dhe i mençurisë popullore, i cili me pasion të jashtëzakonshëm mblodhi dhe botoi thesaret më të çmuara të kulturës sonë.

Librat e tij, të pasur me anekdota dhe gojëdhëna të mrekullueshme, do të mbeten një dëshmi e përjetshme e përkushtimit ndaj traditës shqiptare, duke sjellë buzëqeshje dhe reflektim te lexuesit.

Trashëgimia që la pas nuk do të shuhet kurrë; në çdo faqe të veprave të tij do të jetojë zëri i ngrohtë dhe i dashur i Salih Zogianit, që na kujton kush jemi dhe nga vijmë. Kujtimi i tij i përjetshëm dhe fjala e tij e ëmbël do të mbeten burim frymëzimi për brezat që do të vijnë.

Kanë filluar xhirimet e filmit artistik me metrazh të gjatë “Për sa t’ketë det”, me skenar dhe regji nga Sovran Nrecaj dhe producente Aurela Kadriu. Ky është projekti i parë i gjatë artistik i regjisorit, i cili po realizohet nga Can and Cam në partneritet me Degjenerata, me mbështetjen e Qendrës Kinematografike të Kosovës.

Filmi trajton tema të thella njerëzore, duke u fokusuar në dhimbjet e pafolura dhe jetët që mbeten pezull në pritje. I vendosur në një shoqëri që përpiqet të rindërtohet pas luftës, rrëfimi nuk kërkon heronj apo fitimtarë, por eksploron brishtësinë e një familjeje të prekur nga humbja.

Në qendër të historisë është Sadetja, e interpretuar nga Ilire Vinca, e cila jeton një jetë modeste me bashkëshortin e saj Burimin (Alban Ukaj), fotograf, dhe djalin e tyre Lumin (Yzeir Meha). Kur Burimi i bashkohet rezistencës së armatosur dhe zhduket pa lënë gjurmë, Sadetja mbetet vetëm me të birin, duke u përballur me një humbje të hapur dhe pa përgjigje. Mes së tashmes së rëndë dhe kujtimeve që nuk e lënë të qetë, ajo përpiqet të gjejë mënyra për të mbijetuar në një realitet të vështirë shoqëror.

Xhirimet e filmit po zhvillohen aktualisht në Kosovë.