Komisioni Evropian ka ofruar Moldavisë deri në 250 milionë euro për të ndihmuar vendin të reduktojë varësinë energjetike nga Rusia dhe për të mbështetur popullsinë e prekur nga kriza energjetike.

Komisionerja e Zgjerimit të BE-së, Marta Kos, tha se ndihma është e nevojshme për të lehtësuar pasojat e rritjes së kostove të energjisë për moldavët, veçanërisht për familjet, shkollat, spitalet dhe bizneset më të prekura nga kriza. Ajo njoftoi se një shumë prej 100 milionë eurosh do të disbursohet deri në mes të prillit të këtij viti për të ndihmuar në mbulimin e kostove të larta të energjisë.

Për më tepër, Komisioni ka vendosur të ofrojë 60 milionë euro shtesë për rajonin e shkëputur të Transdnistrisë, një zonë pro-ruse, me kushte që variojnë sipas përparimit të drejtpërdrejtë të lirisë dhe të drejtave të njeriut në atë rajon.

Kjo masë vjen pas ndërprerjes së furnizimeve me gaz nga Rusia për Moldavinë dhe Transdnistrinë, pas një mosmarrëveshje mbi borxhin e papaguar të Moldavisë prej 700 milionë eurosh. Si rezultat, vendi përballet me një krizë të rëndë energjetike, e cila ka shkaktuar pasoja të rënda ekonomike dhe sociale për popullsinë.

Komisioni Evropian ka shprehur angazhimin e tij për një mbështetje afatgjatë për Moldavinë, duke e ndihmuar atë të kalojë në burime të energjisë së rinovueshme dhe të heqë plotësisht importet e energjisë nga Rusia.

Kjo masë e re vjen pas ndihmës urgjente që Komisioni ofroi javën e kaluar, me një shumë prej 30 milionë eurosh, për të adresuar nevojat e menjëhershme të vendit. Ursula von der Leyen, presidentja e Komisionit Evropian, kishte theksuar atëherë se më shumë se 350,000 banorë në Transdnistria kishin mbetur pa energji elektrike dhe ngrohje për shkak të ndërprerjes së dërgesave të gazit nga Rusia./UBTNews/

Presidentja e Komisionit Evropian, Ursula von der Leyen, ka deklaruar se Bashkimi Evropian është i gatshëm të hyjë në “negociata të ashpra” me Shtetet e Bashkuara të Amerikës, ndërsa ka theksuar se blloku evropian është i angazhuar për të mbrojtur interesat e tij.

Në një fjalim të mbajtur gjatë një konference të ambasadorëve të BE-së në Bruksel, von der Leyen theksoi se Evropa do të jetë gjithmonë e hapur dhe pragmatike për bisedime me SHBA-në, por gjithashtu do të ruajë të drejtën për të mbrojtur interesat e saj. “Ne do ta bëjmë po aq të qartë, se ne gjithmonë do të mbrojmë interesat tona, gjithmonë dhe kudo që të jetë e nevojshme. Kjo do të jetë gjithmonë mënyra evropiane”, tha ajo.

Në të njëjtën kohë, presidentja e Komisionit Evropian pranoi se marrëdhëniet BE-SHBA janë thelbësore dhe se ato janë “partneritetet më të forta transatlantike”, duke i quajtur ato një “gur themeli të paqes dhe prosperitetit për pjesën më të madhe të shekullit”. Ajo po ashtu theksoi lidhjet e ngushta ekonomike midis dy palëve, të cilat përbëjnë gati 30% të tregtisë globale të mallrave dhe shërbimeve, me një vëllim tregtar që arrin në rreth 1.5 trilion dollarë.

Von der Leyen theksoi rëndësinë e gjetjes së ekuilibrit të duhur për të ruajtur sigurinë ekonomike dhe kombëtare të Evropës, duke u shprehur se kompanitë me bazë në BE që operojnë në SHBA punësojnë rreth 3.5 milionë amerikanë, me një milion të tjerë që varen drejtpërdrejt nga tregtia me Evropën. Kjo lidhje e fortë tregtare është një faktor kyç për të dyja palët dhe për ruajtjen e një marrëdhënieje të qëndrueshme.

Më tej, von der Leyen diskutoi edhe marrëdhëniet e BE-së me Kinën, duke theksuar se ky vit është vendimtar për lidhjet diplomatike midis BE-së dhe Kinës, të cilat po shënojnë një gjysmë shekulli. Sipas saj, BE-ja është e hapur për “angazhim konstruktiv” me Kinën dhe kërkon të gjejë zgjidhje që do të mundësojnë një marrëdhënie më të drejtë dhe të balancuar me një nga gjigantët ekonomikë të botës.

Pesë persona janë qëlluar në një qendër edukimi për të rritur në Suedi, tha policia më 4 shkurt.

Agjencia suedeze e lajmeve, TT, raportoi, pa specifikuar burimet, se sulmuesi ka bërë vetëvrasje. Policia nuk ka konfirmuar këto raportime, por pritet të mbajë një konferencë për media.

Qendra e edukimit për të rritur gjendet në qytetin Orebro, rreth 200 kilometra në perëndim të Stokholmit.

Ende nuk është e qartë nëse policia e ka përfshirë edhe keqbërësin në mesin e pesë personave të qëlluar.

Videot nga vendi i ngjarjes kanë shfaqur prani të madhe policore dhe të autoambulancave. Shkalla e lëndimeve që kanë pësuar viktimat po ashtu ende nuk është e qartë.

Studentët po strehohen në ndërtesat afër. Pjesë të tjera të shkollës janë evakuuar pas dhunës.

“Raportimet për dhunë në Orebro janë shumë serioze. Policia gjendet në vendin e ngjarjes dhe operacioni është duke u zhvilluar. Qeveria është në kontakt të ngushtë me policinë dhe po përcjell nga afër zhvillimet”, tha për agjencinë e lajmeve TT ministri i Drejtësisë, Gunnar Stormmer./REL/