Reperi legjendar Eminem pritet të bëhet gjysh për herë të dytë. Vajza e tij e adoptuar, Alaina Scott, ka njoftuar se është në pritje të fëmijës së saj të parë me bashkëshortin Matt Moeller.

Lajmin e gëzueshëm, Alaina e ndau me ndjekësit e saj në Instagram, ku publikoi disa fotografi të ëmbla me partnerin. Në njërën prej tyre, ajo mban një bluzë me mbishkrimin: “Baby Moeller, coming 2026” (“Bebi Moeller, vjen në vitin 2026”).

Në përshkrimin e postimit, ajo shkroi plot emocion: “Bebi M, mezi presim të të takojmë.”

Ndër të parat që reaguan ishte Hailie Jade, vajza biologjike e Eminem, e cila u bë nënë në mars, duke sjellë në jetë djalin e saj, Elliot.

“Shumë e lumtur për ju të dy,” shkroi Hailie në koment. “Mezi pres të jem tezja e bebit, dhe Elliot është shumë i emocionuar ta takojë.”

Alaina Marie Scott, 32 vjeçe, dhe bashkëshorti i saj Matt Moeller, u martuan në vitin 2023.

Ajo është vajza e motrës së ish-bashkëshortes së Eminem, Kim Scott, të cilën reperi e adoptoi ligjërisht në fillim të viteve 2000.

Ky do të jetë nipi i dytë për artistin, i cili prej vitesh është shprehur krenar për rolin e tij si baba dhe si gjysh. /A.Z/UBT News/

Unioni Evropian i Transmetimeve (EBU) ka vendosur të shtyjë marrjen e vendimit për pjesëmarrjen e Izraelit në Eurovision 2026, për shkak të tensioneve të vazhdueshme në Lindjen e Mesme.

Takimi virtual i planifikuar për nëntor është anuluar, dhe çështja do të diskutohet gjatë Asamblesë së Përgjithshme të EBU-së në dhjetor.

Shtyrja vjen pas presionit në rritje nga disa vende pjesëmarrëse, përfshirë Spanjën, Irlandën, Slloveninë, Islandën dhe Hollandën, që kanë paralajmëruar se mund të bojkotojnë konkursin nëse Izraeli merr pjesë.

Sipas tyre, pjesëmarrja e Izraelit konsiderohet problematike për shkak të situatës së tensionuar në Rripin e Gazës.

Transmetuesi austriak ORF, nikoqir i edicionit të ardhshëm, e ka mirëpritur vendimin e EBU-së dhe thekson se muzika dhe artet nuk duhet të përdoren si mjet për sanksione politike, duke shtuar se konkursi duhet të mbetet një platformë për unitet kulturor.

Nga ana tjetër, transmetuesi izraelit Kan konfirmoi se Izraeli mbetet i vendosur për të marrë pjesë, duke kujtuar suksesin e fundit të përfaqësuesit Yuval Raphael, i cili fitoi më së shumti vota nga publiku, megjithëse fituese u shpall Austria për shkak të votave të jurisë.

EBU thekson se shtyrja e vendimit ka për qëllim të mundësojë një diskutim të hapur mes anëtarëve për pjesëmarrjen e mundshme të Izraelit dhe të ardhmen e konkursit. /A.Z/UBT News/

Modelja e njohur Bella Hadid ka ndarë me ndjekësit e saj një mesazh të ndjerë në rrjetet sociale, duke folur hapur për betejën e gjatë me ankthin dhe depresionin.

Me shumë sinqeritet e ndjeshmëri, ajo iu drejtua atyre që përballen me sfida të ngjashme emocionale, duke ndarë reflektime personale dhe fjalë motivuese për forcën dhe shpresën.

“Kur barra bëhet shumë e rëndë dhe e ardhmja duket e zymtë, është në rregull të pushosh për një moment… Ndonjëherë, mbijetesa është prioritet,” – shkroi Bella.

Mesazhi i saj nënvizon rëndësinë e pranimit të emocioneve dhe kujdesit ndaj vetes në periudha të vështira. Hadid pranoi se është ndjerë e paralizuar nga ankthi dhe depresioni, edhe pse nga jashtë gjithçka dukej në rregull.

“E kam mbajtur këtë barrë për vite me radhë. Ndonjëherë bëhet aq e rëndë, sa më mbërthen edhe pse askush nuk e vëren,” – rrëfeu ajo.

Modelja i inkurajoi ndjekësit të ndalen, të marrin frymë dhe të fokusohen te momenti i tanishëm: “Mos u humbni duke menduar për të ardhmen… momenti i tanishëm është e tëra që keni.”

Në fund të postimit, Bella dha një mesazh ngushëllues dhe mbështetës për të gjithë ata që ndihen të vetëm në këtë betejë të brendshme:

“Për të gjithë ju që përballeni me të njëjtat ndjenja çdo ditë – nuk jeni vetëm. Dhe ju dua shumë.” /A.Z/UBT News/

Netflix ka konfirmuar zyrtarisht rikthimin e serialit të suksesshëm “Bridgerton” me sezonin e katërt, i cili do të fokusohet në historinë e dashurisë së Benedict Bridgerton (interpretuar nga Luke Thompson).

Ashtu si sezonet e kaluara, edhe ky sezon do të ndahet në dy pjesë:

Pjesa e parë do të publikohet më 29 janar 2026,

ndërsa pjesa e dytë do të vijë më 26 shkurt 2026.

Netflix ka vendosur ta ndajë sezonin në dy faza për të ruajtur emocionin dhe pritshmëritë e larta të fansave.

Ngjarjet e sezonit të katërt do të bazohen në librin e tretë të Julia Quinn, “An Offer from a Gentleman”, ku rrëfehet historia romantike mes Benedict Bridgerton dhe Sophie Baek (të interpretuar nga aktorja Yerin Ha).

Në trailer-in e ri, Netflix ka zbuluar momentin e parë të takimit mes Benedict dhe Sophie në një ballo madhështore të familjes Bridgerton, skenë që ngjan me përrallën e Hirushes – ku Sophie lë pas një dorezë mëndafshi, të cilën më pas e gjen Benedict.

Në kastën e sezonit do të rikthehen: Nicola Coughlan, Hannah Dodd, Ruth Gemmell, Claudia Jessie, Luke Newton, Golda Rosheuvel dhe Adjoa Andoh, ndërsa protagonistët kryesorë do të jenë Luke Thompson dhe Yerin Ha.

Lajmi është bërë menjëherë viral në rrjetet sociale, teksa fansat po presin me padurim vitin 2026 për të ndjekur një tjetër kapitull plot dramë, romancë dhe intriga që e kanë bërë “Bridgerton” një nga serialet më të dashura të Netflix-it. /A.Z/UBT News/