Lajmet

Irani fajëson një vend të huaj për sulmet kibernetike në pompat e benzinës

Presidenti Raisi tha se sulmi kishte të bënte me “ngjalljen e zemërimit publik”.

Published

5 years ago

on

Irani ka thënë se një vend i huaj qëndron pas sulmit kibernetik që paralizoi rrjetin e tij të shpërndarjes së benzinës të martën, transmeton UBT News.

Një grup i ashtuquajtur Predatory Sparrow pretendoi se kishte kryer sulmin, por organi më i lartë i politikëbërjes në internet i Iranit fajësoi një “aktor shtetëror” ende të paidentifikuar.

Presidenti Ebrahim Raisi tha se sulmi kishte të bënte me “ngjalljen e zemërimit publik”.

Sulmi goditi një sistem të bazuar në intranet që lejon shoferët të blejnë karburant të subvencionuar me karta të lëshuara nga qeveria, kështu duke shkaktuar radhë të gjata në pompat e benzinës.

Hakerët morën kontrollin e tabelave dixhitale në autostradat e kryqytetit dhe gjetkë, duke i bërë ato të shfaqin një mesazh që thoshte: “[Udhëheqësi Suprem, Ali] Khamenei, ku është karburanti ynë?”

Vetëm 5% e 4,300 pompave të karburantit të vendit ishin rilidhur deri të mërkurën në mëngjes, tha një zëdhënëse e Kompanisë Kombëtare të Shpërndarjes së Produkteve të Naftës iraniane për mediat shtetërore.

Megjithatë, “pothuajse 3,000 ishin në gjendje të shesin karburant “offline” me çmimin e pa subvencionuar”, shtoi ajo.

Shumica e njerëzve varen nga karburanti i subvencionuar në Iran, ekonomia e të cilit është dëmtuar rëndë nga vitet e sanksioneve të SHBA-së, si dhe nga keqmenaxhimi dhe korrupsioni i qeverisë.

“Disa po synojnë të nxisin zemërimin e publikut duke krijuar kaos dhe duke prishur jetën e njerëzve”, tha zoti Raisi gjatë së mërkures.

Presidenti pohoi gjithashtu se “vigjilenca” nga autoritetet iraniane i kishte penguar hakerët të përfitonin nga situata.

Sekretari i Këshillit Suprem të Hapësirës Kibernetike, Abolhassan Firuzabadi, tha se sulmi u krye nga një vend i huaj, por se është “shumë herët për të njoftuar nga cili vend dhe në cilën mënyrë është kryer”.

Ndërkohë, agjencia e lajmeve Fars e lidhi këtë sulm kibernetik me përvjetorin e dytë të protestave masive që shpërthyen në të gjithë Iranin pasi qeveria ngriti çmimin e benzinës me 50%. Trazirat kishin shkaktuar një goditje të përgjakshme nga forcat e sigurisë. Amnesty International tha se më shumë se 300 njerëz u vranë, por zyrtarët iranianë e mohuan shifrën.

Në një postim në Telegram, Predatory Sparrow tha se hakimi ishte një “përgjigje ndaj veprimeve kibernetike të regjimit terrorist të Teheranit kundër njerëzve në rajon dhe në mbarë botën”.

Grupi shtoi se kishte paralajmëruar paraprakisht personelin e shërbimeve të urgjencës iraniane dhe kishte zgjedhur të mos shfrytëzonte një cenueshmëri që do të shkaktonte “dëm afatgjatë”./UBTNews/

Related Topics:
Continue Reading

Lajmet

Izraeli: Vramë komandantin e inxhinierisë së Hezbollahut gjatë sulmeve në jug të Libanit

Published

23 minutes ago

on

June 5, 2026

By

Ushtria e Izraelit ka pretenduar se ka eliminuar një komandant të njësisë së inxhinierisë së Hezbollahut.

Në një postim në platformën “X”, Forcat Mbrojtëse të Izraelit (IDF) kanë bërë të ditur se javën e kaluar kanë goditur dhe kanë vrarë Abed Harb, të cilin e cilësojnë si pjesëtar të lartë të grupit.

Sipas IDF-së, Harb ka udhëhequr njësinë e inxhinierisë përgjegjëse për montimin dhe vendosjen e eksplozivëve, të cilët, sipas pretendimeve të ushtrisë izraelite, janë përdorur për të synuar ushtarët izraelitë në jug të Libanit.

“Harb ka qenë përgjegjës për disa sulme që nga viti 2006”, thuhet në deklaratën e IDF-së.

Po ashtu, ushtria izraelite ka njoftuar se Forcat Ajrore të saj kanë shkatërruar edhe një lëshues raketash që, sipas tyre, është përdorur nga Hezbollahu për sulme ndaj forcave izraelite që veprojnë në jug të Libanit.

Ngjarja vjen në një kohë kur raportimet ndërkombëtare bëjnë të ditur për tensione të vazhdueshme në rajon, ndërsa Hezbollahu së fundi ka refuzuar një propozim për armëpushim të mbështetur nga Shtetet e Bashkuara të Amerikës mes Libanit dhe Izraelit.

Continue Reading

Lajmet

Studentët e UBT-së sjellin shfaqjen muzikale “DREAM” në kuadër të Javës së Dizajnit

Published

39 minutes ago

on

June 5, 2026

By

Studentët e Fakultetit të Muzikës Moderne në UBT kanë prezantuar me sukses shfaqjen muzikale “DREAM”, e cila u realizua në kuadër të aktiviteteve të Javës së Dizajnit në këtë institucion.

Performanca artistike u zhvillua si pjesë e lëndës “Performance në Skenë” dhe u interpretua nga studentët e grupit të Vokalit të vitit të parë dhe të dytë, nën mentorimin dhe udhëheqjen e profesoreshës Fatlume Bunjaku.

Shfaqja solli para publikut një program të pasur muzikor dhe artistik, ku studentët patën mundësinë të shfaqin talentin e tyre, kreativitetin dhe aftësitë skenike të fituara gjatë procesit të studimeve. Përmes interpretimit live, ata demonstruan jo vetëm përgatitjen akademike, por edhe zhvillimin e tyre artistik në skenë.

Në këtë aktivitet morën pjesë studentë, profesorë dhe dashamirës të artit, të cilët patën mundësi të ndjekin një performancë që ndërthurte muzikën, interpretimin vokal dhe shprehjen artistike, duke krijuar një atmosferë të veçantë kulturore në kuadër të Javës së Dizajnit.

Shfaqja “DREAM” shërbeu gjithashtu si një projekt përmbyllës për studentët e përfshirë, duke shënuar finalizimin e një etape të rëndësishme të vitit akademik dhe duke u ofruar atyre eksperiencën e drejtpërdrejtë të performancës para publikut.

Përmes këtij aktiviteti, studentët patën mundësinë të përjetojnë nga afër dinamikën e skenës profesionale, duke forcuar aftësitë e tyre artistike dhe vetëbesimin në interpretim.

UBT, përmes aktiviteteve të tilla, vazhdon të promovojë zhvillimin kreativ dhe profesional të studentëve, duke krijuar hapësira ku ata mund të shfaqin potencialin e tyre në fusha të ndryshme artistike dhe kulturore.

Continue Reading

Lajmet

Oda Ekonomike Amerikane: Gazi amerikan duhet të bëhet prioritet strategjik për Kosovën

Published

1 hour ago

on

June 5, 2026

By

Oda Ekonomike Amerikane në Kosovë i ka bërë thirrje Qeverisë së Kosovës që qasjen në gazin e lëngshëm natyror (LNG) nga Shtetet e Bashkuara të Amerikës dhe zhvillimin e infrastrukturës përkatëse ta trajtojë si prioritet strategjik kombëtar.

Sipas Odës, një orientim i tillë do të kontribuonte në forcimin e sigurisë energjetike të vendit, por edhe në thellimin e bashkëpunimit strategjik me SHBA-në.

Në reagim theksohet se sistemi energjetik i Kosovës vazhdon të mbështetet kryesisht në termocentralet me linjit dhe në importin e energjisë elektrike, çka sipas tyre paraqet barrë për ekonominë dhe rrit ndjeshmërinë ndaj luhatjeve të tregut.

Oda Amerikane vlerëson se zhvillimi i infrastrukturës së gazit dhe integrimi në rrjetet rajonale të LNG-së do të ndihmonte në diversifikimin e burimeve energjetike, uljen e kostove të importit dhe rritjen e konkurrueshmërisë së ekonomisë së Kosovës.

Po ashtu, theksohet se vendet e rajonit tashmë po pozicionohen në korridoret e reja energjetike, ndërsa Kosova rrezikon të mbetet jashtë këtyre zhvillimeve nëse nuk vepron me kohë.

Në fund, Oda Amerikane i bën thirrje institucioneve që të ndërmarrin hapa konkretë drejt integrimit në infrastrukturën rajonale të gazit, duke paralajmëruar se mosveprimi mund të rrisë cenueshmërinë energjetike të vendit.

Continue Reading

Lajmet

“Dardanet” luajnë sot ndaj Kroacisë në “Fadil Vokrri”

Published

1 hour ago

on

June 5, 2026

By

Përfaqësuesja e Kosovës në futboll të femrave, “Dardanet”, do të zhvillojnë sot ndeshje miqësore ndaj Kroacisë.

Takimi nis nga ora 19:00 në stadiumin “Fadil Vokrri” në Prishtinë dhe pritet të sjellë atmosferë sportive në kryeqytet.

Ndeshja do të transmetohet drejtpërdrejt në Art Sport, ndërsa hyrja në stadium është falas.

Organizatorët kanë bërë thirrje për mbështetje nga tifozët, duke theksuar rëndësinë e përkrahjes së përfaqësueses së Kosovës në futboll të femrave.

Continue Reading

Të kërkuara