Një takim i rëndësishëm i nivelit të lartë i Grupit Ramstein, i njohur si Grupi i Kontaktit për Mbrojtjen e Ukrainës, është anuluar për shkak të një situate emergjente në Shtetet e Bashkuara. Presidenti Joe Biden, i cili ishte planifikuar të merrte pjesë në këtë takim gjatë vizitës së tij në Gjermani nga 10 deri më 13 tetor, e anuloi udhëtimin për të mbikëqyrur përgjigjen ndaj uraganit Milton që po afron në Florida.

Sipas dy burimeve nga NATO, takimi, i cili do të kishte sjellë së bashku përfaqësues të lartë të vendeve donatore për të diskutuar mbështetje ushtarake për Ukrainën, do të ishte një mundësi e rëndësishme për të theksuar nevojën për vazhdimin e ndihmës ndaj Ukrainës në kontekstin e vazhdimit të luftës me Rusinë.

Presidenti Biden e mori vendimin për të anuluar udhëtimin më 8 tetor, duke theksuar se ishte e nevojshme të përqendrohej në menaxhimin e pasojave nga uraganin Helene, i cili tashmë kishte shkaktuar dëme të konsiderueshme në Florida. Parashikuesit kanë njoftuar se uragani Milton, që është stuhia e dytë në dy javë, mund të shkaktojë pasoja të rënda dhe të konsiderueshme për shtetin.

Presidenti dhe kryetarja e qytetit të Tampas, Jane Castor, kanë bërë thirrje për evakuim në zonat e rrezikuara, duke theksuar se ata që qëndrojnë në këto zona rrezikojnë jetën e tyre. Sipas parashikimeve, uragani Milton pritet të godasë Floridën më vonë sot, ndërsa rajonet e perëndimit të Floridës po përballen ende me pasojat e uraganit Helene, i cili la të paktën 230 të vdekur në jug të Shteteve të Bashkuara.

Presidenti ukrainas, Volodymyr Zelensky, kishte shprehur nevojën për përparime në fushën e betejës para takimit, duke kërkuar që aleatët perëndimorë të rikonfirmonin mbështetje dhe besim në aftësitë ushtarake të Ukrainës. Megjithatë, me anulimin e këtij takimi, përpjekjet për koordinimin e mbështetjes ushtarake për Ukrainën do të kalojnë në një fazë të pasigurt./UBTNews/

Çmimet e naftës u rritën të mërkurën për shkak të përshkallëzimit të tensioneve në Lindjen e Mesme dhe treguesve pozitivë ekonomikë në SHBA.

Standardi ndërkombëtar i naftës së papërpunuar Brent u rrit me 0.70% për të arritur në 77.72 dollarë për fuçi në orën 10:48 të mëngjesit sipas orës lokale (0748 GMT), nga mbyllja e sesionit të mëparshëm prej 77.18 dollarësh.

Standardi i SHBA, West Texas Intermediate (WTI), u rrit me 0.56% në 73.98 dollarë për fuçi, nga mbyllja e sesionit të mëparshëm prej 73.57 dollarësh.

Konflikti i vazhdueshëm në Lindjen e Mesme, shtëpia e një pjese të konsiderueshme të rezervave të hidrokarbureve në botë, e ka mbështetur këtë rritje të çmimeve.

Luftimet midis ushtrisë izraelite dhe Hezbollahut kanë vazhduar që nga tetori i vitit 2023.

Të mërkurën, Hezbollahu libanez njoftoi se kishte zmbrapsur dy tentativa për inkursione nga forcat izraelite në Libanin jugor, duke përdorur artileri dhe raketa, të cilat thuhet se plagosën ushtarë izraelitë. Një deklaratë e mëvonshme nga Hezbollah përshkruan një përplasje të ngjashme në qytetin Blida.

Pavarësisht paralajmërimeve nga vëzhguesit ndërkombëtarë për rrezikun e një konflikti më të gjerë rajonal, Izraeli zgjeroi operacionet e tij më 1 tetor, duke nisur një pushtim tokësor në Libanin jugor, ndërsa vazhdon ofensivën e tij kundër Hezbollahut dhe Gazës.

Çmimet e naftës kishin rënë me mbi 4% të martën pasi raportet treguan se Hezbollahu po bënte thirrje për një armëpushim me Izraelin, megjithëse disa analistë kanë vënë në pikëpyetje kohën e kësaj thirrjeje.

Zëdhënësi i Departamentit të Shtetit të SHBA, Matthew Miller, reagoi ndaj këtyre përpjekjeve për armëpushim të martën, duke thënë: “Ku kanë qenë për një vit? Për një vit, bota i ka bërë thirrje Hezbollahut që të ndalojë sulmet përtej kufirit në Izrael.”

Përveç shqetësimeve gjeopolitike, në rritjen e çmimit të naftës ndikuan edhe të dhënat pozitive ekonomike nga SHBA. Optimizmi mbetet i lartë në SHBA se inflacioni mund të reduktohet në nivelet e synuara pa shkaktuar një recesion, pasi rritja ekonomike mbetet e qëndrueshme dhe normat e papunësisë të ulëta. Ekspertët po vëzhgojnë nga afër të dhënat e inflacionit, të planifikuara të publikohen të enjten, për njohuri të mëtejshme mbi aktivitetin ekonomik.

Analistët besojnë se këto të dhëna mund të sinjalizojnë nëse ekonomia amerikane është në rrugën e duhur për një “ulje të butë”. Për më tepër, minutat nga takimi i ardhshëm i Komitetit Federal të Tregut të Hapur (FOMC) pritet të ofrojnë njohuri për drejtimet e politikave të ardhshme.

Analistët parashikojnë që Rezerva Federale e SHBA (Fed) do të ulë normat e interesit me 25 pikë bazë në secilën nga dy mbledhjet e saj të mbetura këtë vit.

Zëvendëskryeministri i Kosovës, Besnik Bislimi, pas mbledhjes së Qeverisë ka folur për miratimin e Agjendës së Reformave të Kosovës në kuadër të Instrumentit të BE-së për Reforma dhe Rritje Ekonomike në Ballkanin Perëndimor, është lajm i mirë dhe përfitues për Kosovën.

Ai tha se Kosova përfiton 882 milionë e 600 mijë euro, ndërsa 30% e kësaj shume janë grante ndërsa rreth 70 janë hua afatgjate.

“Nga muaji maj, ky instrument tashmë ka hyrë në fuqi. Për të përfituar nga këto fonde si ndihmesë për arritjen e reformave, është kërkuar përgatitje e një agjende të reformave nga të gjitha gjashtë shtetet. Kosova ka negociuar me Komisionin Evropian dhe ka përgatitur një agjendë serioze të reformave për katër vitet e ardhshme, që fillon sivjet e vazhdon deri në vitin 2027. Negocimi i agjendës së reformave dhe planit të rritjes ka filluar qysh nga nëntori i vitit të kaluar. Ekipi ynë negociator i udhëhequr nga zëvendëskryeministri Besnik Bislimi ka bërë një punë të shkëlqyeshme”, tha ai.

“Nga kjo agjendë e reformave, brenda katër viteve të ardhshme do të jemi dëshmitarë të shumë ndryshimeve të nevojshme, gjithsesi pozitive, të cilat do të ndodhin në Republikën e Kosovës”, u shpreh Bislimi.

Arianit Koci, avokat i familjes së rreshterit, Afrim Bunjaku tha se ka informacione që edhe shumë persona të tjerë janë të përfshirë në rastin e sulmit terrorist në Banjskë, ndërsa shtoi se ekziston mundësia për ngritje të ndonjë aktakuze të re apo do të zgjerohet kjo aktualja për këtë rast.

Këto komente avokati Koci i bëri pas përfundimit të seancës së shqyrtimit fillestar për rastin e sulmit terrorist në Banjskë, me ç’rast tre të akuzuarit nuk e pranuan fajësinë për veprat që i ngarkon aktakuza.

“Pres që do të dënohen të gjithë për shkak se ka prova të pakundërshtueshme. Është çdo gjë e qartë që në fillim kam informacione që janë edhe shumë persona të tjerë të përfshirë a do të ngritët edhe ndonjë aktakuzë e re, apo do të zgjerohet kjo mbetet në strategjinë e Prokurorisë, sidoqoftë hetimet për këtë rast në mënyrë të vrullshme dhe intensive po vazhdojnë”, theksoi ai.

Duke u shprehur optimist që kërkesën e Themelores për mendimin juridik Gjykata Supreme do ta trajtoj me prioritet, avokati i familjes së rreshterit të vrarë, Afrim Bunjaku tha se Serbia do t’i dorëzoj të akuzuarit tjerë që janë të përfshirë në arrati.

“Për ta më jetë nuk ka, të gjithë janë në kërkesën e kuqe të Interpol-it, por ata jo që nuk mund të dalin nga Serbia, pres që çdo moment Serbia ose kur t’i vije koha që t’i dorëzoj në Kosovë realisht ky do të jetë një prej kushteve bazike për Serbinë të vazhdoj më tutje ose në organizata ndërkombëtare apo Bashkimin Evropian”, deklaroi Koci.

Ljubomir Pantoviq, mbrojtësi i të akuzuarit Blagoje Spasojeviq u shpreh se nuk dëshiron t’i theksoj arsyet se pse të akuzuarit Spasojeviq dhe Toliq zgjodhën të mos deklarohen rreth fajësisë sot.

“Dy të pandehurit e parë kanë shfrytëzuar të drejtën e tyre ligjore që të mos deklarohen për fajësinë, kjo e drejtë garantohet nga Kodi i Procedurës Penale, dhe nuk do të komentoja, nuk do të theksoja veçanërisht arsyet pse ata zgjodhën këtë mënyrë të deklarimit sot”, theksoi ai.

Ndërsa, avokati i Vladimir Toliq, Milos Deleviq tha se nuk mund ta pranojnë këtë aktakuzë.

“Vladimir Toliq nuk ka dashur të deklaroj fajësinë në këtë fazë të procedurës, ne nuk mund ta pranojmë këtë aktakuzë, përmbajtjen e saj, dhe veçanërisht kualifikimet e veprës. Natyrisht, nuk e kontestojmë se ai ka qenë pjesëtar i grupit të armatosur që ka ndodhur në Banjskë atë ditë, mirëpo, siç e thashë, tani për tani nuk mund ta pranojmë këtë përmbajtje të aktakuzës, do të shfrytëzojmë të drejtën e kundërshtimit në aktakuzë, do ta shohim mendimin e kryetarit të kolegjit, nëse është e nevojshme, dhe të Gjykatës së Apelit por edhe Supremes”, theksoi ai.

Jovana Filipoviq, mbrojtëse e të akuzuarit, Dusan Maksimoviq tha se do të paraqesin kërkesë për hedhjen e aktakuzës dhe kundërshtimin e provave.

“Maksimoviq Dushan sot është deklaruar se nuk është fajtor për veprat që i ngarkohen me këtë aktakuzë, ai pretendon se nuk ka asnjë përfshirje të tij në këto vepra penale, kështu që në përputhje me këtë ne do të paraqesim kërkesë për hedhjen e aktakuzës dhe kundërshtimin e provave dhe shpresojmë se gjykata në shqyrtimin e provave do të jetë e të njëjtit mendim si ne”, u shpreh avokatja e Maksimoviq.

Seanca e kaluar më 25 shtator ishte shtyrë pasi mbrojtja e të akuzuarve nuk kishte arritur të përgatitej.

Ndërsa, po në seancën e kaluar trupi gjykues vendosi ta veçoj rastin për gjykim ndaj tre të akuzuarve Blagoje Spasojeviq, Vladimir Toliq dhe Dushan Maksimoviq që janë në paraburgim, ndërsa nga Gjykata Supreme ka kërkuar mendim juridik nëse 42 të akuzuarit tjerë mund të gjykohen në mungesë apo jo.

Prokuroria Speciale e Kosovës më 11 shtator të këtij viti ka ngritur aktakuzë ndaj 45 të akuzuarve për sulmin terrorist të 24 shtatorit 2023 në Banjskë të Zveçanit./UBTNews/