Ushtruesja e detyrës së presidentit, Albulena Haxhiu, ka konfirmuar se seanca për zgjedhjen e kreut të ri të shtetit do të mbahet gjatë ditës së sotme, vetëm një ditë para skadimit të afatit kushtetues.

Pavarësisht paralajmërimit të saj, partitë politike ende nuk kanë arritur një marrëveshje për sigurimin e kuorumit prej 80 deputetësh.

Lëvizja Vetëvendosje u ka kërkuar subjekteve opozitare propozimin e figurave unifikuese, por kjo ofertë është refuzuar nga PDK-ja si joserioze, ndërsa LDK-ja ka kushtëzuar mbështetjen me votat e pushtetit për kandidaturën e Vjosa Osmanit.

Nëse dështon zgjedhja e presidentit deri më 28 prill, vendi sipas Kushtetutës shkon automatikisht në zgjedhje të parakohshme brenda 45 ditësh.

UBT, Qendra në Prizren ka zhvilluar një aktivitet informues dhe promovues me maturantët e Gjimnazi “Gjon Buzuku” në Prizren, me qëllim ofrimin e këshillimit të drejtpërdrejtë për zgjedhjet akademike dhe profesionale.

Ky aktivitet u realizua nën udhëheqjen e drejtorit të UBT-së për këtë qendër, Vehbi Sofiu, së bashku me stafin akademik të përbërë nga profesorët Lamir Shkurti, Diellza Elshani dhe Mirjeta Arifi, të cilët prezantuan në mënyrë të detajuar ofertën akademike dhe mundësitë që ofron UBT për studentët e ardhshëm.

Pjesëmarrësit u pritën nga drejtoresha e shkollës, Gylaj Shipkovica, e cila shprehu gatishmërinë për bashkëpunim të vazhdueshëm ndërinstitucional dhe theksoi rëndësinë e orientimit të hershëm në karrierë për nxënësit maturantë. Ajo vlerësoi iniciativa të tilla si shumë të nevojshme për të ndihmuar të rinjtë në marrjen e vendimeve të duhura për të ardhmen e tyre, duke theksuar se përzgjedhja e drejtimit të studimit duhet të jetë në harmoni me aftësitë dhe ambiciet individuale.

Gjatë bashkëbisedimit me nxënësit, profesorët e UBT-së ndanë informacione konkrete mbi programet studimore, duke u fokusuar në fushat më të kërkuara në tregun e punës, si dhe në zhvillimet më të fundit në arsim dhe teknologji. Theks i veçantë iu kushtua rëndësisë së ndërlidhjes së studimeve me praktikën profesionale, inovacionin dhe ndërkombëtarizimin, si elemente kyçe që UBT i integron në programet e veta.

Aktiviteti u karakterizua nga një bashkëbisedim interaktiv, ku nxënësit patën mundësi të parashtrojnë pyetje rreth programeve, bursave, praktikave dhe mundësive të punësimit pas përfundimit të studimeve. Interesimi i lartë i maturantëve dëshmoi nevojën për orientim të strukturuar në këtë fazë të rëndësishme të jetës së tyre.

Përmes këtij organizimi, UBT edhe një herë konfirmon përkushtimin e tij për të qenë pranë të rinjve, duke i mbështetur ata në ndërtimin e një rruge të qartë drejt zhvillimit akademik dhe profesional, në përputhje me standardet bashkëkohore të arsimit dhe kërkesat dinamike të tregut të punës.

Në shënim të 27 Prillit, Ditës së Personave të Zhdukur me Dhunë gjatë Luftës në Kosovë, Kryeministri Albin Kurti ka bërë homazhe pranë Monumentit dedikuar të pagjeturve.

I shoqëruar nga nëna Ferdonije, familjarë të tjerë, ministra dhe deputetë, Kurti rikujtoi se Kosova pret ende përgjigje për fatin e 1,565 qytetarëve të saj.

Gjatë prononcimit të tij, kryeministri vuri theksin te përgjegjësia e drejtpërdrejtë e Beogradit zyrtar, duke denoncuar fshehjen e informacioneve për varrezat masive në territorin e Serbisë.

“Janë edhe njëmbëdhjetë varreza të tjera masive, përveç atyre pesë që tashmë janë zbuluar, e për të cilat Serbia nuk jep informacion, sepse është komunikuar edhe nga vetë ata publikisht se janë 16 varreza masive gjithsej,” deklaroi Kurti.

Kryeministri solli në vëmendje historinë prekëse të Sinan Dautit, 9-vjeçarit nga Prekazi, eshtrat e të cilit u gjetën së fundmi pas më shumë se dy dekadash. Ai theksoi se institucionet e Kosovës po bëjnë përpjekje maksimale, por mungesa e juridiksionit mbi Serbinë kërkon ndërhyrje ndërkombëtare.

“Faktorët ndërkombëtarë, evropianë dhe amerikanë duhet t’i bëjnë më shumë trysni Beogradit, ashtu që të zbardhet e vërteta dhe përgjegjësitë të dalin para gjyqit. Atje ku është përgjegjësia, atje është edhe e vërteta”, shprehet Kurti.

Kurti gjithashtu u bëri thirrje organeve të drejtësisë në Kosovë që të përshpejtojnë proceset për gjykimin në mungesë të kriminelëve të luftës, duke pasur parasysh moshën e dëshmitarëve.

“Besoj që duhet të punojnë edhe më shumë e më shpejtë seç po bëhet, meqenëse dëshmitarët po mplaken… dhe në këtë mënyrë vështirësohet përndjekja dhe sjellja para drejtësisë e kriminelëve serbë të luftës,” përfundoi ai.

Në fund të homazheve, kryeministri shprehu mirënjohje të pafund për familjarët që, përkundër ankthit të përditshëm, vazhdojnë të qëndrojnë të fortë në kërkim të drejtësisë.

Irani ka paraqitur një propozim të ri për t’i dhënë fund bllokadës në Ngushticën strategjike të Hormuzit, por pa përfshirë në marrëveshje programin e tij bërthamor. Sipas zyrtarëve rajonalë, kushti kryesor i Teheranit është që Shtetet e Bashkuara të përfundojnë bllokadën ndaj porteve iraniane.

Ky propozim, i përcjellë përmes Pakistanit, vjen në një kohë kur Ministri i Jashtëm iranian, Abbas Araghchi, po viziton Rusinë për t’u konsultuar me Vladimir Putinin lidhur me konfliktin ndaj Izraelit dhe SHBA-së. Megjithatë, gjasat për një marrëveshje mbeten të vogla, pasi Presidenti Donald Trump insiston që çdo pakt duhet të përfshijë dhënien fund të programit atomik të Iranit.

Presidenti amerikan ka lënë të kuptohet se nuk ka nevojë për ndërmjetësues të tjerë, duke sugjeruar komunikim të drejtpërdrejtë:

“Ne i kemi të gjitha letrat në dorë. Nëse ata duan të flasin, mund të vijnë tek ne, ose mund të na telefonojnë”, ka thënë Trump për Fox News.

Nga ana tjetër, Araghchi ka fajësuar Uashingtonin për dështimin e deritanishëm të bisedimeve, duke i cilësuar kërkesat e SHBA-së si “të tepruara”.

Bllokimi i kësaj pike kyçe, ku kalon një e pesta e tregtisë globale të naftës dhe gazit, ka mbajtur çmimet e karburanteve në nivele alarmante. Ndërsa Irani ka kufizuar lëvizjen në ngushticë, SHBA po zbaton bllokadë në portet iraniane, duke lënë dhjetëra tankerë të bllokuar në Gjirin Persik.

Shtëpia e Bardhë ka anuluar dërgimin e emisarëve Steve Witkoff dhe Jared Kushner në Pakistan, për shkak të asaj që Trump e quajti “mungesë e përparimit” nga ana e Iranit. Për momentin, ngërçi diplomatik dhe ushtarak vazhdon të mbajë tregjet globale të energjisë nën tension.