Lajmet

Ibishi: Ndërtimi i universitetit në veri ka qëllime të caktuara nga pala serbe, Kosova duhet të reagojë

Published

4 years ago

on

Kosova është në një fazë kritike të sigurisë shëndetësore duke u ballafaquar me pandeminë, por veç kësaj vendit po i cenohet edhe siguria në veri të Mitrovicës me ardhjen e një vale prej 2000 afganëve.

Eksperti i sigurisë vendore, Nuredin Ibishi ka thënë në një intervistë për Ekonomia Online se pas fillimit të ndërtimit të një universiteti nën financimin e Qeverisë së Serbisë në pjesën veriore të Mitrovicës, ka pasur pak reagime.

Sipas Ibishit ndërtimi i këtij universiteti ka qëllime të caktuara nga ana e serbëve andaj Kosova duhet të kërkojë ndihmë nga bashkësia ndërkombëtare.

“Realisht ne pak kemi reaguar, kjo po vazhdon edhe tani duke arsyetuar se ekziston Universiteti në Veri të Mitrovicës, e dimë lagjja Bregu i Diellit që është ndërtuar si një lagje e veçantë pa leja as urbanistike as hapësinore, kështu që mendoj se duhet të reagohet me kohë se kur arrin një fazë të ndërtimit dhe zgjerimit të kapaciteteve çfarë po i bëjnë në Mitrovicë, që po ka qëllime të caktuara mendoj se duhet kërkuar ndihma e bashkësisë ndërkombëtare këtu që është në mision që këta tu përmbahen procedurave, që të jenë konformë e jo me diktat të Qeverisë së Serbisë”, është shprehur ai.

Ibishi ka kërkuar nga institucionet kosovare të mos mbyllen në “gëzhojë” që të komunikojnë me parterët strategjik dhe nëse ndërtimet në Mitrovicën veriore po bëhen pa respektim të procedurave, të ndërpriten ato.

“Institucionet tona mos të mbyllen në gëzhojë, por të komunikojnë me ndërkombëtarët, edhe me BE-në edhe me partnerët tanë strategjik dhe të tregojnë realitetin që një situatë kur nuk mundemi plotësisht ta menaxhojmë, të kërkojnë ndihmë me qëllim të reagimit dhe normal të veprimit, që të pengojnë edhe ndërtimin nëse nuk është konformë atyre standardeve”, ka thënë ai.

Tutje Ibishi ka konsideruar se ardhja e afganëve në Kosovë është barrë si në aspektin financiar ashtu edhe në atë të sigurisë.

“Kur flasim për një situatë të rënduar në Kosovë, kur jemi në një fazë shumë kritike të ballafaqimit me sigurinë shëndetësore, me trendin në rritje të pandemisë që po tregon shifra alarmante, kjo është një barrë shtesë, pra ardhja e afganëve, si në aspektin logjistik të vendosjes së tyre por edhe financiar e të sigurisë. Deri më tani diku rreth 82 mijë janë të evakuuar në këtë fazë emergjente mes Kabulit dhe vendkalimeve tjera. Edhe pesë ditë mbeten në bazë të marrëveshjes pritet edhe vala që do të përfshijë Kosovën, zyrtarët janë deklaruar se rreth 2 000 mijë ka mundësi Kosova që t’i pres, si Shqipëria që ka filluar”, ka shtuar ai.

Gjithashtu Ibishi ka thënë se mund të ekzistojë rreziku nga afganë që kanë të kaluar kriminale e që mund të infiltrohen në valën e refugjatëve.

“Mendoj që ballafaqimi në aspektin e sigurisë do të jetë mjaftë i rëndë për shkak se edhe vet kapacitetet e kufizuara të Kosovës. Mendoj që duhet që sidomos kur ka të bëjë më verifikimin e tyre që mos të implikohen personat që mund të na shkaktojnë probleme të sigurisë në kamp por edhe jashtë tij. “Gjithashtu duhet kuptuar se këta janë persona në kërkim të talibanëve, të përfshirë në forca të armatosura e në siguri e struktura tjera, pra aleat të ShBA-së. E dimë që një masë e madhe diku mbi 5000 mijë të burgosur që kanë qenë ish apo pjesëtarë të grupeve terroriste apo kriminel me dënime të rënda e ata mund të infiltrohen në këtë valë të refugjatëve”, është shprehur ai.

Ndërsa si vende të destinuara për strehim të përkohshëm të qytetarëve afgan, ani pse me kapacitete të ultë, Ibishi ka vlerësuar se në Kosovë mund të jenë kampi në Vranidoll të Prishtinës e në Magurë të Lipjanit.

Related Topics:
Continue Reading

Lajmet

Trendafilova në vizitë triditore në Kosovë

Published

1 hour ago

on

May 12, 2025

By

Nga sot deri më 14 maj në Kosovë do të qëndrojë për vizitë kryetarja e Dhomave të Specializuara të Gjykatës Speciale, Ekaterina Trendafilova. Gjatë vizitës së saj, ajo pritet të mbajë dhe konferencë për media.

Për herë të fundit, Trendafilova qëndroi në vendin tonë në tetor të vitit të kaluar.

Për vizitën e saj, ka njoftuar edhe Policia e Kosovës, se përkohësisht mund të mbyllen edhe segmente rrugore gjatë vizitës së saj.

Njoftimi i plotë:

Me datën 12-14 maj 2025, në Republikën e Kosovës, do të qëndrojë për vizitë kryetarja e Dhomave të Specializuara të Gjykatës Speciale, znj. Ekaterina Trendafilova.

Me këtë rast, Policia e Kosovës, në bashkërendim me autoritetet kompetente ndërkombëtare, gjatë kësaj vizite, e cila realizohet në Republikën e Kosovës, do të angazhohet për ruajtjen e rendit dhe qetësisë publike.

Për të mundësuar qarkullim të lirë sipas itinerarit të lëvizjes si dhe zhvillimin e aktiviteteve apo takimeve të personaliteteve sipas agjendës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore, ku edhe mund të ketë riorientim të trafikut në rrugë alternative, andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik.

Continue Reading

Lajmet

Sekuestrohen pasuri prej mbi 2 milionë eurosh në Prishtinë, nën dyshimet për shpëlarje parash

Published

1 hour ago

on

May 12, 2025

By

Autoritetet kosovare kanë sekuestruar pasuri me vlerë prej mbi 2 milionë eurosh, nën dyshimet për shpëlarje parash, ka bërë të ditur Prokuroria Speciale e Kosovës, të hënën.

Ajo ka njoftuar se është duke zhvilluar “hetime intensive në bashkëpunim me hetuesit e Sektorit të Hetimeve Financiare, në rastin e koduar me emrin ‘Mati’, ku gjatë muajit shtator të vitit të kaluar ishin arrestuar tre persona”.

Nëpërmjet një komunikate, Prokuroria Speciale ka treguar se janë sekuestruar njëzet njësi banesore me vlerë prej rreth 1.7 milion eurosh, dy lokale afariste me vlerë prej afër 335 mijë eurosh, 17 garazhe me vlerë prej rreth 145 mijë eurosh, si dhe gjashtë depo me vlerë prej afër 17 mijë eurosh.

Pasuria e sekuestruar, me vlerë prej 2 milionë e 286 mijë e 54 eurosh, sipas Prokurorisë Speciale, është identifikuar në emrin e të dyshuarit Sh.C.

Ajo është sekuestruar me urdhër ndalues përfundimtar të Gjykatës Themelore në Prishtinë, thuhet në njoftimin e Prokurorisë Speciale.

Shpëlarja e parave definohet nga fjalorët si proces ilegal përmes të cilit fshihet origjina e pasurisë së fituar në mënyrë të paligjshme, qoftë përmes transfereve bankare apo bizneseve jolegjitime.

Në Kosovë, sipas një raporti të vitit 2020 nga Njësia për Inteligjencë Financiare, pastrimi i parave ka më shumë gjasa të bëhet përmes sektorëve të patundshmërisë dhe ndërtimtarisë, organizatave joqeveritare dhe faturave të fryra artificialisht me vlera të larta.

Sipas Ligjit për parandalimin e këtij fenomeni, kushdo që kryen veprën penale të pastrimit të parave mund të ndëshkohet me deri në dhjetë vjet burgim dhe me gjobë deri në tri herë më të madhe sesa vlera e pasurisë që është subjekt i veprës penale.

Bashkimi Evropian kishte shprehur më herët shqetësimin se Kosova nuk po bën mjaftueshëm hapa për luftimin e shpëlarjes së parave.

“Rastet e pastrimit të parave, me të vërtetë, nuk trajtohen në mënyrë adekuate nga institucionet e sistemit të drejtësisë në Kosovë”, thuhej në përgjigjen e BE-së për REL-in, më 2024./REL/

Continue Reading

Lajmet

AAK-ja i drejtohet Kushtetueses për çështjen e votimit të fshehtë

Published

3 hours ago

on

May 12, 2025

By

Aleanca për Ardhmërinë e Kosovës (AAK) do të dorëzojë, në ora 11:00, kërkesën për vlerësim kushtetues të vendimit të Kuvendit të Kosovës që refuzoi formimin e Komisionit për votim të fshehtë.

AAK-ja njoftoi nëpërmjet një komunikate se në Kushtetuese do të dorëzojnë “edhe të gjitha vendime të tjera me natyrë të njëjtë” që kanë të bëjnë me seancat e paraprake dhe të mëvonshme lidhur me këtë çështje.

Partia që drejtohet nga deputeti Ramush Haradinaj tha se dokumenti me këtë përmbajtje quhet “Transkript i Mbledhjes Konstituive të Kuvendit të Republikës së Kosovës, e mbajtur më 15, 17, 19, 21, 23, 25, 27, 29 prill, si dhe më 1, 3 dhe 5 maj 2025.”

Continue Reading

Lajmet

Sot shënohet Dita Ndërkombëtare e Infermierëve

Published

3 hours ago

on

May 12, 2025

By

Mirëqenia e stafit të infermierëve do të jetë fokusi i Ditës Ndërkombëtare të Infermiereve për vitin 2025.

Dita Ndërkombëtare e Infermiereve festohet çdo vit më 12 maj, që këtë vit do të ishte ditëlindja e 205-të e Florence Nightingale dhe përdoret për të festuar profesionin e infermierisë dhe për të rritur ndërgjegjësimin për sfidat më të mëdha me të cilat përballen infermierët në mbarë botën.

Këshilli Ndërkombëtar i Infermierëve (ICN) zbuloi se tema e vitit 2025 do të jetë “Kujdesi për infermierët forcon ekonomitë”.

Ajo shënon vazhdimin e temës gjithëpërfshirëse shumëvjeçare të “Infermierëve tanë, e ardhmja jonë”, e cila synon të rrisë profilin e infermierisë dhe të tregojë se sa i rëndësishëm është profesioni për sistemet shëndetësore.

Pamela Cipriano, presidente e ICN, tha se do të promovonte rëndësinë e mbështetjes së shëndetit fizik dhe mendor të infermierëve.

“Infermierët përballen me sfida të shumta: fizike, mendore, emocionale dhe etike, dhe është e domosdoshme që ne t’i trajtojmë këto sfida në një mënyrë që promovon shëndetin e tyre të përgjithshëm,” tha Cipriano.

Tema e vitit 2025 është zgjedhur për të nënvizuar se si një fuqi punëtore e shëndetshme dhe e sigurt infermiere është thelbësore për funksionimin e përgjithshëm të kujdesit shëndetësor.

Continue Reading

Të kërkuara