Opozita në Mal të Zi, e udhëhequr nga Partia Demokratike e Socialistëve (DPS), e bllokoi seancën e 21 janarit në Kuvend, ku në rend dite ishte diskutimi dhe miratimi i buxhetit të vitit 2025.

Pasi kryetari i Kuvendit, Andrija Mandiq, hapi seancën, deputetët e opozitës u ngritën nga vendet e tyre dhe dolën para tij.

“Shikoni se në çfarë kushtesh punojmë, ndërkohë që duhet të diskutojmë një çështje të rëndësishme. Autoriteti i Kuvendit po vihet në pikëpyetje”, tha Mandiq.

Ai paralajmëroi se deputetët që u ngritën nga vendet e tyre, do të marrin masa ndëshkuese me shkrim.

Mandiq nuk specifikoi se kur do të vazhdojë seanca.

Opozita i ka penguar seancat parlamentare që nga 20 dhjetori, duke kërkuar që të anulohet vendimi për pensionimin e gjyqtares së Gjykatës Kushtetuese, Dragana Gjuranoviq, i marrë po atë muaj.

Sipas opozitës, ky vendim ka qenë i paligjshëm.

BE-ja ofron ndihmë

Bllokimi i punimeve në Kuvendin e Malit të Zi u diskutua edhe gjatë vizitës zyrtare të komisionares evropiane për Zgjerim, Marta Kos, në Mal të Zi, e cila ofroi ndihmën e Komisionit Evropian për normalizimin e punës së Kuvendit.

Delegacioni i BE-së propozoi përfshirjen e Komisionit të Venecias – një organ këshillues i Këshillit të Evropës – në zgjidhjen e krizës kushtetuese dhe parlamentare.

Edhe pse DPS-ja nuk e refuzoi publikisht këtë propozim, kryeministri malazez, Millojko Spajiq, e akuzoi atë për aktivitete antievropiane.

Deputeti i opozitës nga Social-demokratët, Nikolla Zirojeviq, tha se nuk ka vend për kompromis kur shkelet Kushtetua.

“Nuk e di se si duhet ta komunikojmë, ta shkruajmë, ta vizatojmë, ta këndojmë, si me shumicën parlamentare, ashtu edhe me Delegacionin e BE-së: nuk negociojmë për respektimin e Kushtetutës së Malit të Zi në Kuvendin e Malit të Zi”, tha Zirojeviq.

Kërkesat e opozitës

Përveçse anulimin e pensionimit të gjyqtares Gjuranoviq, opozita kërkon edhe nënshkrimin e marrëveshjes me pushtetin për të mos e ndryshuar Kushtetutën në fushën e çështjeve të identitetit dhe as Ligjin për shtetësinë malazeze.

Ndryshime të tilla kërkojnë partitë e ish-Frontit Demokratik prorus, i udhëhequr nga Andrija Mandiq.

Konkretisht, ato kërkojnë që serbishtja të bëhet gjuhë zyrtare, duke u barazuar kështu me gjuhën malazeze, dhe liberalizim të shtetësisë, përkatësisht t’u mundësohet edhe shtetasve të vendeve fqinje të bëhen shtetas malazezë.

Përveç opozitës, këto kërkesa i kanë kundërshtuar edhe partitë shqiptare në Qeverinë e Malit të Zi.

Spajiq tha se për to do të vendoset me konsensusin e të gjitha palëve.

Opozita, në anën tjetër, tha se nuk do të lejojë mbajtjen e seancës së Kuvendit deri në plotësimin e kërkesave./REL/

Një tragjedi ka ndodhur në provincën veriperëndimore të Turqisë, Bolus, ku një zjarr shpërtheu në orët e para të mëngjesit në një hotel të vendpushimit të skive Kartalkaya, duke shkaktuar të paktën 66 viktima dhe dhjetëra të plagosur. Ngjarja ndodhi rreth orës 03:30, kur shumica e pushuesve ishin ende në gjumë, duke bërë që evakuimi të ishte shumë i vështirë.

Zjarrvënia e ka origjinën në restorantin e hotelit dhe, për shkak të pamjes së jashtme prej druri, ai u përhap shpejt në të gjithë ndërtesën 12-katëshe. Deri tani, shkaqet e zjarrit mbeten të paqarta, sipas raporteve të medieve turke. Guvernatori i rajonit, Abdulaziz Aydin, tha se në hotel ishin të ftuar 234 persona në momentin e shpërthimit të flakëve.

Videot që qarkulluan në mediat sociale kapën skena tronditëse, ku disa pushues lidhën çarçafë për t’u zbritur nga dritaret për t’i shpëtuar flakëve, ndërkohë që të tjerë kërkonin ndihmë me të madhe. Dy nga viktimat humbën jetën pasi u hodhën nga ndërtesa në një përpjekje për t’u shpëtuar.

Presidenti turk, Rexhep Tajip Erdogan, shprehu ngushëllimet e tij për familjet e viktimave dhe u informua për situatën nga autoritetet. Po ashtu, Ministri i Drejtësisë, Yilmaz Tundes, njoftoi hapjen e një hetimi për zjarrin, duke emëruar një ekip prej pesë ekspertësh dhe gjashtë prokurorësh për të hetuar shkaqet e këtij tragjedi./UBTNews/