Lajmet

FBI-ja arreston një burrë afgan për planifikim të një sulmi në SHBA

Published

on

Byroja Federale amerikane e Hetimeve (FBI) ka arrestuar një burrë afgan, për të cilin zyrtarë nga Departamenti i Drejtësisë thonë se ishte frymëzuar nga organizata militante Shteti Islamik dhe po planifikonte një sulm në Ditën e Zgjedhjeve, duke synuar turma të mëdha në SHBA.

Nasir Ahmad Tawhedi, 27 vjeç, nga Oklahoma City, u tha hetuesve pas arrestimit të tij se kishte planifikuar që sulmi i tij të përkonte me Ditën e Zgjedhjeve muajin e ardhshëm dhe se ai dhe një bashkëpunëtor prisnin të vdisnin si martirë, sipas aktakuzës.

Tawhedi, i cili mbërriti në SHBA në shtator të vitit 2021, kishte ndërmarrë disa hapa në javët e fundit për të avancuar planet e tij për sulmin, përfshirë këtu porositjen e pushkëve AK-47, likuidimin e pasurive të familjes dhe blerjen e biletave për gruan dhe fëmijën e tij për t’u kthyer në Afganistan, thanë zyrtarët.

Arrestimi vjen ndërsa FBI-ja përballet me shqetësime të rritura për mundësinë e dhunës ekstreme në territorin amerikan, me drejtorin Christopher Wray që i tha Associated Press në gusht se nuk mund ta kujtonte një kohë në karrierën e tij kur kishte kaq shumë kërcënime të ndryshme njëkohësisht.

Terrorizmi mbetet prioriteti numër një i FBI-së dhe ne do të përdorim çdo burim për ta mbrojtur popullin amerikan”, tha Wray në një deklaratë të martën.

FBI-ja nuk zbuloi saktësisht se si Tawhedi ra në radarin e hetuesve, por përmend provat që tregojnë përkushtimin e tij në planifikimin e sulmit. Një fotografi nga korriku, e përfshirë në aktakuzë, tregon një burrë që hetuesit e identifikuan si Tawhedi duke lexuar për dy fëmijë të vegjël, përfshirë vajzën e tij, “një tekst që përshkruan shpërblimet që një martir merr në jetën e përtejme”.

Zyrtarët thonë se Tawhedi gjithashtu konsumoi propagandë të Shtetit Islamik, kontribuoi në një bamirësi që shërben në mënyrë të fshehtë për grupin militant dhe komunikoi me një person që FBI-ja tha se ishte i përfshirë në rekrutimin dhe indoktrinimin e njerëzve të interesuar për ekstremizëm.

Bashkëpunëtori i supozuar i Tawhedit nuk u identifikua nga Departamenti i Drejtësisë, që e përshkroi atë vetëm si një i mitur, shtetas afgan dhe vëllai i gruas së Tawhedit.

Pasi të dy reklamuan shitjen e pronës personale në Facebook, FBI-ja përdori një informator muajin e kaluar për t’iu përgjigjur ofertës dhe për të krijuar një lidhje komunikimi me ta. Informatori më vonë i ftoi ata në një poligon qitjeje, ku ata porositën armë nga një agjent i fshehtë i FBI-së që po shtirej si partner biznesi, sipas dokumenteve të gjykatës.

Tawhedi u arrestua të hënën pasi mori në posedim dy pushkë AK-47 dhe municionin që kishte porositur, thanë zyrtarët. Bashkëpunëtori i paidentifikuar gjithashtu u arrestua, por Departamenti i Drejtësisë nuk dha detaje për shkak se ai është i mitur.

Pasi u arrestua, Departamenti i Drejtësisë tha se Tawhedi u tha hetuesve se kishte planifikuar një sulm për Ditën e Zgjedhjeve që do të synonte turma të mëdha njerëzish.

Tawhedi u akuzua për komplot dhe përpjekje për të ofruar mbështetje materiale për Shtetin Islamik, që është përcaktuar nga SHBA-ja si një organizatë e huaj terroriste. Dënimi për këtë akuzë është deri në 20 vjet burgim.

Ai u paraqit në gjykatë të martën dhe u urdhërua të mbahej në paraburgim.

Një grua që e identifikoi veten si gruaja e Tawhedi refuzoi të diskutojë për rastin.

Nuk duam të flasim me mediat”, tha gruaja, e cila nuk dha emrin e saj.

Tawhedi hyri në SHBA me një vizë speciale imigrimi në vitin 2021 dhe ka qenë me lejeqëndrim të përkohshëm, në pritje të përfundimit të procedurave të tij të imigracionit, tha Departamenti i Drejtësisë.

Shawn VanDiver, president i #AfghanEvac, një koalicion organizatash të përkushtuara për të ndihmuar afganët që përpiqen të largohen nga Afganistani, tha se edhe pse akuzat janë serioze, “është e rëndësishme që të mos fajësojmë një komunitet të tërë për veprimet e një individi. Mijëra afganë që u vendosën në Shtetet e Bashkuara po punojnë për të ndërtuar jetë të reja dhe për të kontribuar në të ardhmen tonë të përbashkët”.

Këta janë të njëjtët individë që qëndruan krah për krah me ne në Afganistan për më shumë se dy dekada, duke mbrojtur vlerat që ne i çmojmë”, tha ai në një deklaratë. “Tani, ata janë fqinjët tanë dhe ne duhet t’i mbështesim ata ndërsa kërkojnë siguri dhe stabilitet në shtëpinë e tyre të re”./REL/

Lajmet

LDK dorëzon kallëzime penale për anëtarët e Qeverisë në detyrë

Published

on

By

Lidhja Demokratike e Kosovës (LDK) ka dorëzuar 17 kallëzime penale ndaj kryeministrit në detyrë, ministrave dhe një zëvendësministre në detyrë, që janë zgjedhur deputetë, duke i akuzuar për shkelje të Ligjit për Qeverinë.

Deputetja e LDK-së, Hykmete Bajrami, që dorëzoi së bashku me deputeten Doarsa Kica-Xhelili kallëzimet penale në Prokurorinë Speciale, tha se kryeministri në detyrë, Albin Kurti, dhe vartësitë e tij, të zgjedhur deputetë në zgjedhjet e 9 shkurtit, kanë shkelur nenin 26 të Ligjit për Qeverinë.

Ajo argumentoi se LDK-ja vlerëson se që nga data 27 mars – kur Komisioni Qendror i Zgjedhjeve certifikoi rezultatin zgjedhor – anëtarët e Qeverisë në detyrë, që janë zgjedhur deputetë, e kanë shkelur këtë ligj.

Duke qenë se që nga data e certifikimit e deri më sot vazhdojnë të qëndrojnë në zyrat e ministrive, duke shfrytëzuar resurset, duke marrë vendime të cilat kanë pasoja financiare dhe pasoja të tjera dhe duke shfrytëzuar resurset e institucioneve të Republikës së Kosovës këta deputetë kanë konsumuar vepër penale“, tha Bajrami.

Bajrami shtoi se për hartimin e kallëzimeve penale, juristët e LDK-së kanë kërkuar qasje në dokumente nga ministritë përkatëse.

Prej disa kemi marrë [qasje në dokumente], disa të tjerë nuk na kanë dhënë qasje dhe ato informata që kemi pasur ne sot i kemi drejtuar te Prokuroria Speciale. Tani, është në dorën e Prokurorisë të kërkojë qasje në vendime të tjera”, tha Bajrami.

Në nenin 26 të Ligjit për Qeverinë, të cilit i është referuar LDK-ja për kallëzimet penale, thuhet: Në rast se anëtari i Qeverisë në detyrë zgjidhet deputet i Kuvendit të Republikës së Kosovës, i njëjti duhet të japë dorëheqje nga posti i anëtarit të Qeverisë para ditës së certifikimit të rezultatit të zgjedhjeve.

Kryeministri në detyrë, Albin Kurti, i cili ka bërë edhe betimin si deputet i legjislaturës së nëntë, më herët ka argumentuar se ekzekutivi i tij është në dorëheqje që nga 23 marsi, kur i ka përfunduar mandati i rregullt 4-vjeçar.

Çështja e dorëheqjes së Kurtit dhe ministrave në detyrë, u aktualizua edhe në nisjen e seancës konstituive më 15 prill, kur deputetët, që mandatin e kaluar ishin në opozitë, votuan kundër verifikimit të mandateve, duke kërkuar dorëzimin e dorëheqjeve zyrtare të kabinetit qeverisës në Kuvend.

Kurti, në anën tjetër, njoftoi Kuvendin, se Qeveria e tij ishte në detyrë që nga 23 marsi, ndërkaq më vonë ministrat e tij kanë deklaruar se dorëheqjet e tyre ia kanë dorëzuar Kurtit. Por, më mospajtimet lidhur me dorëheqjen e Kurtit u tejkaluan në Kuvend, duke i hapur rrugë betimit të deputetëve të legjislaturës së nëntë.

Kallëzimet penale vijnë në kohën kur edhe pas tre muajsh nga mbajtja e zgjedhjeve të rregullta parlamentare, Kosova nuk ka krijuar institucionet e reja.

Që nga 15 prill, deputetët ende nuk e kanë përmbyllur konstituimin e Kuvendit dhe çështja ka ngecur te zgjedhja e kryeparlamentarit. Vetëm me zgjedhjen e kryeparlamentarit dhe nënkryetarëve Kuvendi do të konsiderohej i konstituuar. Një gjë e tillë do t’i hapte rrugë formimit të Qeverisë së re të Kosovës./REL/

Continue Reading

Lajmet

Policia jep detaje për aksionin në disa lokacione në veri ku u zbulua punishtja e armëve, u arrestuan tre të dyshuar

Published

on

By

Policia e Kosovës (PK) përmes raportit 24 orësh ka dhënë detaje për aksionin e së mërkurës në disa lokacione në Mitrovicë të Veriut dhe Zveçan, ku u zbulua një punëtori për modifikimin e armëve.

Sipas Policisë, në këtë aksion u arrestuan tre të dyshuar- ku njëri prej tyre u dërgua në mbajtje, raporton “Betimi për Drejtësi“.

Rasti është iniciuar si “Import, eksport, furnizim, transportim, prodhim, këmbim ose shitje e paautorizuar e armëve dhe materialeve plasëse”.

Mitrovicë Veri-Zveçan  07.05.2025 – 07:00.Pas hetimeve të zhvilluara, me urdhëresë të gjykatës, janë bastisur disa lokacione, në njërën prej tyre është zbuluar një punëtori për modifikimin e armëve të zjarri.  Janë sekuestruar armë të ndryshme, pjesë të armëve, thika, municion, dhe tre makina metalike për gdhendjen e metalit. Lidhur me rastin, tre të dyshuar meshkuj kosovarë janë arrestuar dhe me vendim të prokurorit, njëri prej tyre pronari i shtëpisë është dërguar në mbajtje, ndërsa dy të tjerët janë liruar në procedurë të rregullt”, thuhet në njoftim.

Continue Reading

Lajmet

PE: Kosova të bëjë reforma për t’iu afruar BE-së, të hapë kapitull të ri bisedimesh me Serbinë

Published

on

By

Deputetët e Parlamentit Evropian kanë miratuar një raport për Kosovën që inkurajon shtetin të bëjë reforma për të lëvizur drejt anëtarësimit në Bashkimin Evropian, por po ashtu kërkon që Prishtina dhe Beogradi të hapin një kapitull të ri në bisedimet për normalizim.

Është e qartë që procesi integrues i Kosovës ka nevojë për një momentum të ri – na duhet një kapitull i ri i bisedimeve mes Prishtinës dhe Beogradit. Është jashtëzakonisht pozitive që të gjitha partitë e mëdha politike në Kosovë mbështesin fuqishëm integrimin në BE. E ardhmja e Kosovës është në familjen evropiane dhe ne do të punojmë së bashku në agjendën e reformave sepse çdo anëtarësim në të ardhmen duhet të bazohet në meritë”, tha raportuesi për Kosovën në PE, Riho Terras.

Sipas eurodeputetëve, dialogu për normalizimin e raporteve mes Kosovës dhe Serbisë, “fatkeqësisht nuk ka prodhuar rezultatet e pritura”, teksa ata u kërkuan të dyja palëve që të zbatojnë marrëveshjet e Brukselit dhe Ohrit, përfshirë themelimin e Asociacionit të komunave me shumicë serbe dhe që Serbia të mos kundërshtojë anëtarësimin e Kosovës në organizata rajonale dhe ndërkombëtare.

Për shkak të krizave në veriun e Kosovës, që rritën tensionet mes dy vendeve, që nga shtatori i vitit 2023 në Bruksel nuk është zhvilluar asnjë rund i dialogut politik, por ka pasur vetëm bisedime në nivel të kryenegociatorëve.

BE-ja ka përsëritur vazhdimisht se normalizimi i raporteve mes Kosovës dhe Serbisë është parakusht për rrugën e të dyja vendeve drejt integrimit evropian.

Së voni, shefja për politikë të jashtme dhe siguri e BE-së, Kaja Kallas, ka thënë se Brukseli është duke analizuar gabimet në procesin e dialogut, që ka nisur më 2011.

Ndërkaq, në raportin për Kosovë, PE-ja tha se shteti ka bërë përparim të dukshëm në reformën zgjedhore, qëndrueshmërinë ekonomike dhe mbrojtjen e të drejtave themelore.

Megjithatë, sfidat mbeten sa i përket reformave në gjyqësor, liri të medias, efikasitetit të administratës publike dhe digjitalizimit të shërbimeve publike. Eurodeputetët theksuan se përkushtimi i vazhdueshëm i reformave gjithëpërfshirëse dhe qeverisjes përfshirëse është thelbësore për përparimin e Kosovës në rrugën drejt integrimit evropian.

Eurodeputetët thanë po ashtu se Kosova ka qenë cak i ndërhyrjeve të huaja dhe fushatave dezinformuese, veçmas nga Rusia dhe Kina, që kishin për synim destabilizimin e rajonit dhe pengimin e integrimit evropian të Ballkanit perëndimor.

Prandaj, “Parlamenti Evropian i bën thirrje Qeverisë së Kosovës që të forcojë kapacitetet e saj për të luftuar këto kërcënime”, tha PE-ja.

Më 7 maj, eurodeputetët po ashtu kanë miratuar një raport për Serbinë, të cilës iu kërkua që të përmirësojë dialogun e brendshëm politik, të mbrojë sundimin e ligjit dhe të bëjë reforma kundër korrupsionit.

Ndërkaq, sa i përket dialogut me Kosovës, në raport u tha se Serbia “duhet të punojë në arritjen e një marrëveshjeje gjithpërfshirëse të normalizimit me Kosovën”, por po ashtu edhe të “harmonizojë plotësisht politikën e saj të jashtme me atë të BE-së”./REL/

Continue Reading

Lajmet

Arrestohet i dyshuari për shpërthimin e veturës së u.d. të drejtorit të QKUK-së

Published

on

By

Prokuroria Themelore në Prishtinë njofton se është arrestuar B.K., në Podujevë, nën dyshimin për shpërthimin e veturës private të ushtruesit të detyrës së drejtorit të QKUK-së, Osman Hajdari, më 30 prill 2025.

Prokuroria Themelore në Prishtinë, në bashkëpunim dhe koordinim të plotë me Policinë e Kosovës ka arrestuar një (1) person B.K. në  Podujevë i dyshuar për kryerjen e veprave penale “Përdorimi i armës apo mjetit të rrezikshëm”  nga neni 367 par. 2 të KPRK-së, Zjarrvënia” nga neni 322 par. 2 të KPRK-së dhe “Mbajtja në pronësi, kontroll ose posedim të paautorizuar të armëve” nga neni 366 par 1 të KPRK-së, i cili ka ndodh me datë 30.04.2025 në oborrin e QKUK-së, kundër veturës  se UD Drejtorit të QKUK-së”, thuhet në njoftim.

Sipas Prokurorisë, operacioni policor në bashkëpunim të ngushtë me prokurorin e shtetit është duke vazhduar në mënyrë të intensifikuar në disa lokacione të ndryshme për mbledhjen e provave për hetimin e të gjitha rrethanave të rastit.

Shërbimi Spitalor Klinik Universitar (SHSKUK) përmes një komunikate për medie kishte se dëmtimi ka ndodhur në rrethana të panjohura, teksa parasahihej të mbahej mbledhja e Bordit Drejtues.

Sot, në parkingun e administratës së Qendrës Klinike Universitare të Kosovës (QKUK), ka ndodhur një incident që përfshin dëmtimin e veturës private të ushtruesit të detyrës së drejtorit të QKUK-së, e parkuar në parkingun e administratës. Dëmtimi ka ndodhur në rrethana ende të panjohura, në kohën kur po bëheshin përgatitjet për fillimin e mbledhjes së rregullt të Bordit Drejtues të Shërbimit Spitalor dhe Klinik Universitar të Kosovës (ShSKUK), e cila ishte paraparë të mbahej në hapësirat e administratës qendrore të ShSKUK-së”, thuhej në komunikatë./BetimipërDrejtësi/

Continue Reading

Të kërkuara