Dukesha e Sussex-it, ka përjetuar një valë kritikash pasi postoi një video në Instagram ku shihej në një limuzinë në Paris me këmbët të ngritura, jo shumë larg tunelit ku princësha Diana humbi jetën në mënyrë tragjike në vitin 1997.

Shumë përdorues e kanë cilësuar këtë veprim si “të padenjë” dhe “të papërgjegjshëm”, duke shkaktuar reagime të forta në rrjetet sociale.

Videoja u publikua gjatë qëndrimit të Meghan Markle për Javën e Modës në Paris dhe tregonte këndin e saj nga makina duke kaluar pranë urave të njohura të qytetit, si Pont Alexandre III dhe Pont des Invalides.

Ajo që ndezi polemikat ishte afërsia me Pont d’Alma, pranë tunelit ku Diana, partneri Dodi Fayed dhe shoferi i saj Henri Paul humbën jetën në një aksident automobilistik. Kjo ngjarje erdhi pak ditë pas pjesëmarrjes së saj të papritur në Javën e Modës, e cila ishte vizita e parë në Evropë që nga Lojërat Invictus 2023 në Dyseldorf. Video e ndau me 4.2 milionë ndjekës, duke shkaktuar reagime të menjëhershme.

Eksperti mbretëror, Richard Fitzwilliams, e përshkroi si “konfuz”, “absurd” dhe “të papërshtatshëm”. Ai theksoi se, megjithëse Meghan ka të drejtë të marrë pjesë në evente të modës, ndarja e një videoje që lidhet me tragjedinë e Dianës është “e pakuptimtë dhe e pandjeshme”.

Fitzwilliams shtoi se edhe princi Harry mund të jetë ndjerë i prekur nga situata: “Vdekja e Dianës është një plagë që e ka shoqëruar gjithë jetën e tij. Nuk mund të imagjinoj që ta ketë marrë mirë këtë gjest.”

Edhe përdoruesit e platformës X u shprehën kritikë, duke theksuar se videoja nuk ndihmon aspak Harry-n dhe është e papranueshme për shumë njerëz. Meghan mori pjesë në sfilatën e Balenciaga-s, ku u pa në shoqërinë e Anna Wintour, Anne Hathaway dhe Baz Luhrmann.

Përfaqësuesi i saj tha për People se ajo ishte aty për të mbështetur Pierpaolo Piccioli, mikun e saj të ngushtë dhe drejtorin kreativ të markës.

Dukesha kishte zgjedhur një fustan të personalizuar nga Balenciaga, të kombinuar me një çantë të zezë dhe taka elegante të së njëjtës markë, me një vlerë prej rreth 745 funte (854 euro). /A.Z/UBT News/

Albumi i ri i Taylor Swift, “The Life of a Showgirl”, ka thyer rekordin për albumin më të dëgjuar brenda një dite në historinë e Spotify për vitin 2025 — vetëm 11 orë pas publikimit.

Platforma konfirmoi se albumi ka kaluar në numër dëgjimesh “Music” të Playboi Carti-t, i cili deri tani mbante vendin e parë këtë vit, sipas raportimeve të Rolling Stone.

Rekordi i ri vjen vetëm disa ditë pas një tjetër arritjeje historike për Swift: më shumë se 5 milionë pararuajtje në Spotify, rekord i platformës.

Në një intervistë për Good Morning America, përfaqësues të Spotify zbuluan se 1.2 milionë përdorues e dëgjonin albumin njëkohësisht në momentin e publikimit.

Gjatë një bisede të sinqertë me Magic Radio Breakfast Show, Swift rrëfeu se ideja për albumin lindi gjatë turneut të saj Eras Tour, që përfshiu 149 shfaqje në pesë kontinente.

“Gjatë verës së kaluar… shpesh isha e sëmurë dhe fizikisht e rraskapitur,” tha ajo. “Trupi im funksiononte në autopilot, por truri kishte nevojë për diçka që ta zgjonte. Ky album ishte mënyra ime për të mbajtur lidhjen me krijimtarinë.”

Në një postim, Swift falënderoi bashkëpunëtorët dhe dërgoi një mesazh për fansat: “Nëse menduat se spektakli ishte çmenduri, ndoshta duhet të hidhni një sy prapa perdes.” /A.Z/UBT News/

Këngëtari britanik Robbie Williams ka njoftuar se koncerti i tij i planifikuar në Stamboll, më 7 tetor, është anuluar nga autoritetet turke “në interes të sigurisë publike”.

Vendimi vjen pas fushatave të zhvilluara nga OJQ-të pro-Gazës e përdorues të mediave sociale, që protestuan kundër mbajtjes së ngjarjes.

Data e koncertit përkonte me përvjetorin e dytë të sulmit të Hamasit ndaj komuniteteve jugore izraelite – ngjarje që çoi në ofensivën ushtarake të Izraelit në Gazë.

Për disa ditë me radhë, rrjete sociale turke dhe organizata aktiviste kërkuan anulimin, duke e akuzuar këngëtarin britanik si “sionist”, raportoi Reuters.

Koncerti i artistit 51-vjeçar është vënë në qendër të vëmendjes në Turqinë kryesisht myslimane, për shkak të origjinës hebraike të familjes së tij dhe performancës së tij në Izrael në vitin 2015, e cila asokohe shkaktoi kritika nga grupet pro-palestineze.

Kompania e biletave Bubilet deklaroi se anulimi u bë me kërkesë të Zyrës së Guvernatorit të Stambollit.

Në një postim në Instagram, Williams tha se siguria e fansave të tij “vjen e para”, duke shprehur keqardhje për anulimin e koncertit dhe theksuar se “vendimi ishte jashtë kontrollit tonë”. /A.Z/UBT News/

Madonna mbajti një profil të ulët gjatë një daljeje të rrallë publike në Londër, ku u pa në stadiumin “Stamford Bridge” për të ndjekur ndeshjen mes Chelseat dhe Liverpoolit, në shoqërinë e të dashurit të saj, Akeem Morris.

Ajo dhe partneri i saj u përzien me turmën e tifozëve ndërsa mbështesnin ekipin londinez, që fitoi me rezultatin 2-1.

E veshur me një pallto të zezë dimërore, Madonna kishte lënë mënjanë pamjen e saj karakteristike glamuroze, duke zgjedhur një stil më të thjeshtë dhe diskret. Akeem qëndronte pranë saj gjatë gjithë kohës, shkruan DailyMail.

Çifti është parë më parë në ndeshje të Chelseat, lidhja e tyre u bë publike në korrik 2024, pas muajsh të tërë spekulimesh. Ata njihen që prej vitit 2022, kur pozuan së bashku për revistën Paper.

Paraqitja e fundit e këngëtares vjen pas periudhës së vështirë që kaloi për shkak të një sëmundjeje kërcënuese për jetën, e cila e detyroi të qëndronte katër ditë në kujdes intensiv. Në një intervistë Madonna rrëfeu se kishte pësuar një infeksion bakterial që u shndërrua në sepsë gjatë përgatitjeve për turneun e saj “Celebration Tour”.

Ajo pranoi se rikuperimi ishte i gjatë dhe i vështirë, por shprehu mirënjohje për mbështetjen e fansave duke shtuar:

“Mendimi im i parë kur u zgjova në spital ishin fëmijët e mi, dhe i dyti ishte se nuk doja të zhgënjeja askënd që kishte besuar tek unë.”

Dy vjet pas incidentit, Madonna duket në formë të mirë, duke u rikthyer ngadalë në jetën publike dhe skenën muzikore. /A.Z/UBT News/