Presley Gerber, djali i supermodeles Cindy Crawford dhe sipërmarrësit Rande Gerber, ka vdekur në moshën 27-vjeçare. Vdekja e tij po hetohet nga autoritetet amerikane si një mbidozë e dyshuar.

Policia e Santa Monikës bëri të ditur se më 20 shtator, rreth orës 09:35, mori një njoftim për një mbidozë të mundshme në një objekt në Santa Monica. Kur mbërritën në vendngjarje, zyrtarët gjetën Gerberin pa shenja jete. Vdekja e tij u konfirmua në orën 09:45 nga ekipet mjekësore.

Autoritetet kanë theksuar se deri tani nuk ka asnjë tregues për vepër penale. Shkaku dhe mënyra zyrtare e vdekjes ende nuk janë përcaktuar nga Zyra e Mjekut Ligjor të Los Angelesit, e cila ka bërë të ditur se nevojiten ekzaminime dhe analiza shtesë.

Gerber kishte folur publikisht për betejën e tij me varësinë dhe problemet e shëndetit mendor. Ai kishte ndarë me ndjekësit edhe përvojat e tij gjatë përpjekjeve për trajtim dhe rikuperim, përfshirë përdorimin e ibogainës në Meksikë.

Sipas raportimeve, Gerber ishte në një qendër rehabilitimi në Santa Monica në kohën e vdekjes. Ai ishte model dhe kishte punuar me agjenci të njohura të modës, duke ndjekur edhe profesionin e nënës së tij.

Hetimi për vdekjen e tij vazhdon, ndërsa familja Gerber ka kërkuar privatësi gjatë kësaj kohe./A.K/

Taylor Swift u shfaq e emocionuar në tribunat e stadiumit Arrowhead, teksa festoi touchdown-in e bashkëshortit të saj, Travis Kelce, në ndeshjen e Kansas City Chiefs ndaj Indianapolis Colts.

Këngëtarja ishte në stadium së bashku me prindërit e saj, Scott dhe Andrea Swift, si dhe me vjehrrën e saj, Donna Kelce.

Në momentin kur Kelce shënoi, kamerat fokusuan Swift duke festuar dhe duke treguar unazën e saj të martesës. Sipas raportimeve, unaza vlen rreth 1 milion dollarë. “Ky është burri im”, dëgjohet të thotë ajo me entuziazëm, sipas Daily Mail.

Kelce pati një paraqitje të mirë në fitoren 33-30 të Chiefs ndaj Colts në kohën shtesë, duke regjistruar nëntë kapje për 101 jardë dhe një touchdown.

Swift zgjodhi të ishte në stadium për të mbështetur bashkëshortin e saj, në vend që të merrte pjesë në ceremoninë e ndarjes së çmimeve Emmy.

Një natë më parë, Swift dhe Kelce kishin marrë pjesë në festën e ditëlindjes së 31-të të Patrick Mahomes në restorantin e tij, 1587 Prime.

Ndërkohë, Kelce është përmendur së fundmi si një nga viktimat e një skeme Ponzi me vlerë mbi 35 milionë dollarë. Sipas autoriteteve, ai nuk akuzohet për ndonjë shkelje dhe konsiderohet viktimë e mashtrimit, ndërsa nuk është bërë e ditur shuma që mund të ketë humbur./A.K/

Kim Kardashian është përballur me një problem shëndetësor që i ka rikthyer familjes kujtimet e dhimbshme për babain e saj, Robert Kardashian, i cili vdiq nga kanceri i ezofagut në vitin 2003, në moshën 59-vjeçare.

Në trailerin e sezonit të tetë të reality-show-t “The Kardashians”, Kim tregon se është diagnostikuar me ezofagit, një inflamacion ose irritim i shtresës së brendshme të ezofagut.

Në një moment të videos, Kim i tregon ekipit të saj të grimit se ka ezofagit, ndërsa më pas shfaqet e shtrirë në një shtrat spitali, ndërsa merr kujdes mjekësor.

Gjendja ka prekur edhe nënën e saj, Kris Jenner. Një mike e Kim-it e pyet nëse problemi shëndetësor lidhet me të njëjtën sëmundje nga e cila kishte vdekur Roberti.

“Nuk mundem… vetëm kjo më bën të qaj”, dëgjohet të thotë Kris Jenner në trailer.

Kris dhe Robert Kardashian ishin të martuar për 13 vjet dhe kanë katër fëmijë: Kim, Kourtney, Khloé dhe Robert Jr. Çifti u divorcua në vitin 1991.

Robert Kardashian, avokat i njohur për përfshirjen në ekipin mbrojtës të O.J. Simpson në gjyqin e tij për vrasje, vdiq katër vjet para se familja Kardashian të bëhej e njohur në mbarë botën përmes reality-show-t “Keeping Up With the Kardashians”.

Në vitin 2023, Kim kishte kujtuar për GQ një nga bisedat e fundit me të atin para vdekjes së tij, duke treguar se ai i kishte kërkuar të kujdesej për vëllezërit dhe motrat e saj./A.K/

Zhvillimet e fundit në Hagë kanë sjellë reagime të shumta edhe nga figura shqiptare me famë ndërkombëtare, të cilat ndër vite kanë shprehur lidhjen dhe përkrahjen e tyre për Kosovën.

Në mesin e emrave më të njohur janë Dua Lipa, Rita Ora dhe futbollisti Granit Xhaka, figura që kanë përfaqësuar Kosovën dhe shqiptarët në skenat më të mëdha ndërkombëtare.

Dua Lipa ka reaguar në rrjetet sociale duke shpërndarë mesazhe në mbështetje të Ushtrisë Çlirimtare të Kosovës dhe duke rikujtuar sakrificën e atyre që dhanë jetën për lirinë e Kosovës.

Në një prej postimeve, të cilin e ka ndarë së bashku me babain e saj, Dukagjin Lipën, thuhet:

“Liria është fitu me gjak, me gjakun e dëshmorëve që dhanë jetën për liri. Askush nuk ka të drejtë ta njollosë luftën tonë për liri. Askush nuk ka të drejtë të njollosë Ushtrinë Çlirimtare të Kosovës dhe idealin e mijëra të rinjve e të rejave që dhanë jetën për lirinë që e gëzojmë sot.

UÇK është dhe gjithmonë do të mbetet simbol i lirisë dhe pavarësisë sonë. Liria ka emër.”

Edhe Rita Ora ka reaguar përmes rrjeteve sociale, duke publikuar imazhe dhe mesazhe që lidhen me Kosovën dhe luftën për çlirim.

Ndërkohë, Granit Xhaka, një prej figurave më të njohura të sportit shqiptar në arenën ndërkombëtare, është po ashtu ndër emrat që vazhdimisht ka shfaqur lidhjen e tij me Kosovën dhe identitetin shqiptar.

Reagimet e figurave të njohura shqiptare kanë marrë vëmendje të madhe në rrjetet sociale, duke rikthyer në qendër të vëmendjes historinë e luftës së Kosovës, sakrificën e dëshmorëve dhe rolin e UÇK-së në çlirimin e vendit.

Mesazhi i përcjellë nga këto reagime është i fuqishëm: “Liria ka emër.”

D.L