

Lajmet nga UBT
Demokracia konsensuale në Kosovë e rrezikuar nga mungesa e kulturës demokratike
Published
1 month agoon
By
UBTnewsShkruan: Prof. Dr. Avni H. Alidemaj
Profesor i Shkencave Politike dhe Juridiko-Administrative
Demokracia konsensuale, sipas politologut Arend Lijphart, është mënyrë e qeverisjes që synon të ruajë dinamikën dhe funksionalitetin e demokracisë në shoqëritë thellësisht të përçara. Për dallim nga demokracia e shumicës, e cila mbështetet në parimin “fituesi i merr të gjitha”, demokracia konsensuale përpiqet të përfshijë të gjitha grupet shoqërore të rëndësishme në procesin e vendimmarrjes. Lijphart e ka zhvilluar këtë model si përgjigje ndaj sfidave qeverisëse në shoqëritë pluraliste, të ndara mbi baza etnike, fetare, gjuhësore apo edhe ideologjike, me ç’rast sundimi i shumicës mund të rezultojë në përjashtim, konflikte dhe paqëndrueshmëri politike.
Në vet thelbin e saj, demokracia konsensuale karakterizohet me mekanizma të fuqishëm të ndarjes së pushtetit, qeveri të gjëra koalicioni, përfaqësim proporcional, garanci për të drejtat e pakicave dhe një kontroll të fortë kushtetues përmes sistemit gjyqësor. Ky model i demokracisë thekson rëndësinë e negocimit, të kompromisit dhe të respektit të ndërsjellë ndërmjet aktorëve politikë dhe grupeve të ndryshme shoqërore.
Shumica e dijetarëve të qeverisjes argumentojnë se demokracia konsensuale është sistemi më i qëndrueshëm dhe më i përshtatshëm për shoqëritë e cilësuara nga diversiteti i madh etnik, fetar, kulturor, gjuhësor apo edhe polarizimet e thella politike. Në kontekste të tilla, sistemet mazhoritare shpërfaqin tendenca të manifestimit të tensioneve shoqërore duke i mundësuar një grupi të vetëm të kontrollojë procesin politik, me çka shkaktohet edhe margjinalizimi i pakicave etnike, fetare, kulturore apo edhe ideologjike. Rrjedhimisht, shkaktohet një shtresëzim i theksuar edhe i vet shoqërisë. Lijphart ka pohuar se demokracia konsensuale ofron një mjedis më gjithëpërfshirës dhe pjesëmarrës, që sjell rritje të legjitimitetit të institucioneve politike dhe ulje të rrezikut për tensione dhe konflikte qytetare.
Pra, fokusi parësor i këtij modeli qëndron në theksimin e dialogut dhe të përfshirjes. Demokracia konsensuale promovon stabilitet afatgjatë, duke e shndërruar bashkëpunimin ndërmjet grupeve të ndryshme shoqërore në një praktikë të zakonshme. Ky model gjithashtu nxit rritjen e vetëdijes politike të qytetarëve dhe kultivon një kulturë të respektit për pluralizmin dhe kompromisin. Hulumtimet empirike të zhvilluara nga vet Lijphart dëshmojnë se demokracitë konsensuale i përmbushin më mirë indikatorët e cilësisë së qeverisjes dhe respektimit të të drejtave të njeriut. Për më tepër, demokracia konsensuale kontribuon fuqishëm në ndërtimin e besimit ndaj institucioneve dhe në procesin e pajtimit në shoqëritë që kanë dalë nga konfliktet ose që ndodhen në tranzicion demokratik. Kjo krijon hapësirë për përfaqësimin e interesave dhe të identiteteve të ndryshme, duke i shndërruar marrëdhëniet potencialisht antagoniste në bashkëpunim konstruktiv, duke ndikuar në pacifikimin e shoqërisë dhe avancimin e proceseve demokratike.
Në shumë vende perëndimore, por edhe të tjera, demokracia konsensuale funksionon në mënyrë efektive. Shembulli më i mirë i modelit të Lijphart-it është sistemi holandez, ku grupet fetare, ideologjike dhe gjuhësore bashkëjetojnë në mënyrë paqësore përmes ndarjes së pushtetit. Zvicra ka arritur të menaxhojë dallimet e saj gjuhësore dhe fetare përmes një federalizmi të decentralizuar dhe një sistemi të demokracisë direkte. Po ashtu, Belgjika ka zhvilluar një sistem të ndërlikuar të ndarjes së pushtetit ndërmjet komuniteteve që flasin gjuhën holandeze, frënge dhe gjermane, çka ka kontribuar në stabilitetin institucional të vendit. Në Afrikën e Jugut pas aparteidit, qeverisja gjithëpërfshirëse ka transformuar një regjim autoritar të bazuar në ndarje racore në një demokraci shumëracore. Sistemi politik i Libanit fillimisht kishte karakter konsociacional, me synimin për të përfaqësuar pluralitetin fetar të vendit, megjithatë, vitet e fundit është përballur me tensione të mëdha. Këta shembuj dëshmojnë se demokracia konsensuale funksionon më së miri në shtete ku ekzistojnë mekanizma të konsoliduar mirë të dialogut ndërshoqëror, elita politike bashkëpunuese dhe forma paqësore të zgjidhjes së dallimeve dhe kundërshtive të shumta sociale.
Pavarësisht përparësive të saj, demokracia konsensuale nuk është gjithmonë e suksesshme. Ajo mund të dështojë si rezultat i mungesës së kulturës demokratike, të indiferencës së elitave politike apo i brishtësisë institucionale. Mentalitetet “zero-sum”, klientelizmi dhe oportunizmi politik mund të pengojnë ndarjen e pushtetit në shoqëritë e polarizuara thellësisht ose në ato që kanë dalë nga konflikti, ku mosbesimi është i lartë. Demokracia konsensuale kërkon një shkallë të lartë bashkëpunimi ndërmjet elitave politike, apo siç e quan Lijphart, “sjellje kartelare e elitave”. Dakordimet për ndarjen e pushtetit mund të shndërrohen në demokraci të bllokuara ose formale, në rastet kur elitat politike vënë interesat personale apo partiake përpara konsensusit kombëtar.
Efikasiteti i demokracisë konsensuale është thellësisht i ndërlidhur me shkallën e kulturës demokratike brenda një shoqërie. Kultura demokratike, e cila përfshin respektin për pluralizmin, tolerancën ndaj opozitës, përkushtimin ndaj sundimit të ligjit dhe vlerësimin e kompromisit, përbën themelin mbi të cilin duhet të ndërtohet demokracia konsensuale. Në shoqëritë ku normat demokratike janë të dobëta ose të pazhvilluara, konsensusi mund të jetë vetëm sipërfaqësor apo i manipuluar. Demokracia konsensuale kërkon një peizazh politik të sofistikuar, në të cilin të gjithë aktorët politikë e konsiderojnë bashkëpunimin jo si një lëshim, por si një parim themelor të qeverisjes. Në të kundërtën, gjendja mund të përkeqësohet dhe të rezultoj në paralizë institucionale (siç është rasti në Kosovë), rritje të populizmit apo rikthimit të autoritarizmit. Prandaj, për funksionimin e këtij modeli, është thelbësore që si elitat politike, ashtu edhe qytetarët e zakonshëm, të përvetësojnë dhe zbatojnë vlerat demokratike.
Kushtetuta dhe legjislacioni i Kosovës shpërfaqin qartë idenë e demokracisë konsensuale të zhvilluar nga Lijphart. Megjithatë, ky model është institucionalizuar në mënyrë të pjesshme dhe është përvetësuar në mënyrë selektive, duke vepruar më shumë si një model i imponuar sesa si një kulturë politike. Kushtetuta e Kosovës e vitit 2008, e hartuar nën mbikëqyrje ndërkombëtare dhe në përputhje me Planin e Ahtisaarit, përfshin karakteristika thelbësore të demokracisë konsensuale, duke përfshirë: vendet e rezervuara për komunitetet jo-shumicë (Nga 120 ulëse në Kuvend, 20 janë të rezervuara për komunitetet jo-shumicë, 10 për komunitetin serb dhe 10 për komunitete të tjera); Rregulli i shumicës së dyfishtë (nenet 78 dhe 81, të Kushtetutës së Republikës së Kosovës), me ç’rast ndryshimet kushtetuese dhe ligjet që prekin komunitetet, liritë fetare, të drejtat gjuhësore dhe çështje të ndjeshme kërkojnë shumicë të dyfishtë (shumicën e të gjithë deputetëve dhe shumicën e deputetëve të komuniteteve jo-shumicë); E drejta e vetos nga pakicat, përmes së cilës komunitetet kanë mundësinë të kundërshtojnë legjislacionin që konsiderohet i dëmshëm për interesat e tyre përmes Këshillit Konsultativ për Komunitetet dhe shqyrtimit nga Gjykata Kushtetuese; Përbërja e qeverisë, ku kërkohet të përfshihet të paktën një ministër nga komuniteti serb dhe një nga komunitetet tjera (neni 96); Qeverisja komunale në zonat me shumicë serbe posedojnë kompetenca të zgjeruara dhe decentralizim funksional.
Nga ana tjetër, sistemi zgjedhor i përfaqësimit proporcional me lista të hapura nxit konkurrencën shumëpartiake dhe qeverisjen përmes koalicioneve. Ky model mundëson përfaqësimin e grupimeve etnike dhe ideologjike në jetën politike, në përputhje me kërkesën e Lijphart për proporcionalitet në shoqëritë e ndara.
Pavarësisht nga korniza ligjore, proceset politike në Kosovë nuk po arrijnë të përmbushin standardet e demokracisë konsensuale. Kjo për shkak të: Segmentimi etnik në vend të integrimit, me ç’rast sistemi nuk është duke nxitur bashkëpunim ndëretnik dhe ndarja e pushtetit është më shumë formale sesa thelbësore; Bojkoti politik ose pengesat nga Serbia, ku Lista Serbe, e mbështetur nga Beogradi, shpesh pengon qeverisjen qendrore ose tërhiqet nga institucionet, duke minuar mekanizmat konsensualë; Perceptimi i konsensusit si formalitet nga partitë dhe jo si një ideologji qeverisëse.
Pra, parakushti thelbësor i Lijphart-it, bashkëpunimi i elitave politike, mungon në Kosovë për shkak të mungesës së besimit, polarizimit të thellë politik dhe nivelit të ulët të kulturës demokratike.
Sistemi politik i Kosovës ka pasur vështirësi në konsolidimin e një demokracie konsensuale funksionale, ndonëse formalisht i përmbush kriteret e Lijphart-it. Janë disa faktorë që e pengojnë këtë proces. Së pari, mbizotërimi i një kulture politike konfliktuale ku rivalitetet politike udhëhiqen nga patronazhi dhe jo nga debatet programore apo përputhja ideologjike. Mospajtimet mes elitave dhe mungesa e besimit politik pengojnë bashkëpunimin, qoftë brenda shumicës, qoftë me opozitën apo komunitetet jo-shumicë. Së dyti, struktura e imponuar ndërkombëtare përmes Planit të Ahtisaarit, pa i përgatitur aktorët vendorë për bashkëpunim politik të qëndrueshëm. Pastaj, raporti kompleks me komunitetin serb të cilët shpesh e refuzojnë shtetin e Kosovës, duke e bërë të pamundur ndarjen e pushtetit dhe përfshirjen efektive në qeverisje. Së fundi, korrupsioni, sundimi i dobët i së drejtës dhe politizimi i institucioneve, rrisin pakënaqësinë qytetare dhe minojnë debatin politik.
Në kontekstin gjeopolitik aktual të Ballkanit Perëndimor, i cilësuar nga rivaliteti i fuqive të mëdha, pasiguria rajonale, konsensusi politik në Kosovë është më i rëndësishëm se kurrë. Kosova ka nevojë për unitet të brendshëm për të negociuar me Serbinë në kuadër të Dialogut të Brukselit dhe të proceseve të ndërmjetësuara nga BE-ja. Fragmentimi politik e bën Kosovën të cenueshme ndaj ndikimeve të jashtme, manipulimeve dhe paqëndrueshmërisë, veçanërisht në pjesën veriore të saj. Konsensusi politik është i domosdoshëm për qeverisje efektive dhe për forcimin e legjitimitetit diplomatik dhe të shtetësisë së Kosovës në arenën ndërkombëtare.
Demokracia konsensuale, siç është konceptuar nga Arend Lijphart, mbetet një model i vlefshëm për qeverisjen e shoqërive të thellësisht të ndara. Ajo nxit bashkëpunim paqësor, vendimmarrje gjithëpërfshirëse dhe stabilitet afatgjatë. Megjithatë, zbatimi i saj kërkon më shumë se arkitekturë institucionale, ai kërkon kulturë demokratike, përkushtim të elitave dhe një vizion të përbashkët për të mirën publike. Konteksti i Kosovës tregon vështirësitë e ngërthimit të këtij modeli në një shoqëri post-konfliktuale dhe me standarde të dobëta demokratike. Kosova ka nevojë për konsensus të brendshëm, ngase sovraniteti, siguria dhe zhvillimi ndërkombëtar varen nga forcimi i kulturës demokratike dhe nga ndërtimi i bashkëpunimit ndërmjet elitave politike.
Korniza kushtetuese dhe ligjore e Kosovës përfshin elemente të fuqishme të demokracisë konsensuale, megjithatë, mungesa e konsensusit demokratik kufizon efektivitetin e saj. Për të zbatuar plotësisht qasjen e Lijphart-it, Kosovës i duhet një kulturë demokratike e elitave politike, por edhe i vet qytetarëve të saj, për të kuptuar se gjithëpërfshirja dhe konsensusi janë domosdoshmëri të demokracisë funksionale. Deri sa kjo nuk arrihet për t’u kuptuar dhe zbatuar, vazhdojmë të ballafaqohemi me kriza të fuqishme politike dhe institucionale duke rrezikuar stagnimin e shtetit, dobësimin e subjektivitetit shtetëror në arenën ndërkombëtare dhe humbjen e besimit të aleatëve tonë se mund të qeverisim me vendin dhe popullin.
Aktualitet
UBT pret në vizitë zyrtare Kryetarin e FFK-së, Agim Ademi – fokus te edukimi dhe inovacioni në sport
Published
12 hours agoon
August 5, 2025By
Driton Iseni
Kryetari i Federatës së Futbollit të Kosovës (FFK), Agim Ademi, ka zhvilluar sot një vizitë zyrtare në UBT, ku është mirëpritur nga Presidenti dhe Themeluesi, Rektori, Prof. Dr. Edmond Hajrizi, në ambientet e Parkut Shkencor, Inovativ dhe Teknologjik të UBT-së në Lipjan.
Gjatë kësaj vizite, Ademi pati mundësinë të njihet nga afër me kapacitetet infrastrukturore, laboratorët e avancuar, si dhe projektet ndërdisiplinore që po zhvillohen në UBT.
Rektori Hajrizi dhe Kryetari Ademi diskutuan për mundësitë e bashkëpunimit ndërmjet UBT-së dhe FFK-së, me qëllim të ndërlidhjes së teknologjisë, inovacionit dhe sportit në funksion të zhvillimit të qëndrueshëm të të rinjve dhe shoqërisë në përgjithësi.
Gjatë vizitës së tij në UBT, Kryetari Ademi, vlerësoi rolin udhëheqës të këtij institucioni në fushën e arsimit, teknologjisë dhe inovacionit. Ai u shpreh i impresionuar nga projektet dhe potenciali që UBT ofron për zhvillimin e të rinjve dhe për krijimin e bashkëpunimeve konkrete ndërmjet sportit dhe edukimit.
“Sot pata kënaqësinë të vizitoj UBT-në në Prishtinë, një qendër jo vetëm e dijes dhe inovacionit, por që me të drejtë mund të quhet edhe një ‘smart city’ brenda kryeqytetit tonë. Ishte impresionuese të shihja nga afër një institucion që jo vetëm e ndjek hapin e zhvillimit teknologjik, por edhe kontribuon në të, me një program të sofistikuar që përfshin gjithçka – nga bazat deri te formimi i shkencëtarëve në profile të ndryshme”, u shpreh Ademi.
Rektori Hajrizi theksoi se përmes programeve bashkëkohore dhe investimeve në infrastrukturë moderne, UBT jo vetëm që udhëheq në fushën akademike, por gjithashtu kontribuon drejtpërdrejt në përgatitjen e sportistëve dhe trajnerëve të rinj, duke i dhënë vendit një bazë të fortë për afirmim në arenën ndërkombëtare.
“UBT është shndërruar në një qendër unike arsimore e inovative, ku talentet e reja jo vetëm edukohen, por edhe fuqizohen për të qenë kampionë në sport, shkencë dhe jetë. Kemi krijuar një ekosistem që i tejkalon kufijtë e edukimit tradicional – duke integruar teknologjinë, lidershipin dhe përgatitjen praktike me standarde ndërkombëtare, për të formuar gjenerata të gatshme të konkurrojnë në çdo arenë”, theksoi Rektori Hajrizi.
Vizita e Kryetarit të FFK-së në UBT hap perspektiva të reja për bashkëpunim në fusha të ndryshme si teknologjia sportive, edukimi i trajnerëve përmes platformave digjitale, organizimi i ngjarjeve të përbashkëta dhe mbështetja e inovacionit në sport.
UBT, si institucion lider në arsimin e lartë në rajon, vazhdon të dëshmojë se është një partner i besueshëm për bashkëpunime strategjike me institucionet vendore dhe ndërkombëtare.
Në këtë kontekst, UBT veçon edhe Fakultetin e Shkencave të Sportit dhe të Lëvizjes, përmes të cilit synon të kontribuojë në zhvillimin e sportit në vend duke nxjerrë kuadro të rinj profesionalë dhe talente të reja, të cilat do të mund të afirmohen në skenën ndërkombëtare përmes përgatitjes me standarde të larta dhe inspirimit nga kampionët botërorë.
Lajmet nga UBT
Studentja e Arkitekturës, Vesa Berisha, përfaqëson Kosovën në shkollën verore ndërkombëtare GUSEGG 2025 në Austri
Published
17 hours agoon
August 5, 2025By
UBTnews
Vesa Berisha, studente e Arkitekturës, ka marrë pjesë në Graz International Summer School Seggau (GUSEGG) 2025, të organizuar nga Universiteti i Graz-it në Austri.
E përzgjedhur si njëra nga katër përfaqësuese nga Kosova, Vesa pati mundësinë të përfaqësojë vendin tonë në këtë platformë të rëndësishme akademike, e cila bashkon studentë dhe profesorë nga mbi 30 shtete të botës.
Gjatë dy javëve intensive, Vesa mori pjesë në ligjërata, seminare dhe diskutime ndërdisiplinore të udhëhequra nga profesorë dhe ekspertë ndërkombëtarë, ku u trajtuan tema të rëndësishme.
Përmes punës grupore, prezantimeve akademike dhe aktiviteteve kulturore, Vesa jo vetëm që thelloi njohuritë e saj, por gjithashtu ndau përvoja dhe ide me studentë nga kultura e vende të ndryshme të botës.
“Kjo eksperiencë më ka dhënë inspirim të madh si studente, si dhe ka forcuar aftësitë e mia për të reflektuar mbi rolin e arkitekturës në kontekstet globale të transformimit shoqëror dhe urban”, u shprehet Vesa.
Fakulteti i Arkitekturës e përgëzon Vesën për këtë arritje dhe inkurajon të gjithë studentët tanë që të aplikojnë në mundësi të tilla ndërkombëtare, që i ndihmojnë në zhvillimin profesional dhe akademik.
Lajmet nga UBT
Studentja e UBT, Aja Gashi, përfaqëson Kosovën në Programin Ndërkombëtar të Verës në Austri
Published
2 days agoon
August 4, 2025By
UBTnews
Aja Gashi, studente e vitit të parë në Fakultetin e Shkencave Politike në UBT, mori pjesë me sukses në GUSEGG International Summer School 2025 në Seggau Castle, Austri. Ky program prestigjioz dyjavor bashkoi studentë nga e gjithë bota dhe u drejtua nga profesorë të njohur ndërkombëtarë nga Austria dhe Amerika.
Gjatë programit, Aja u angazhua në analiza të thella mbi rolin e emocioneve si nostalgjia dhe ndjenjat kolektive në identitetet politike, retorikën populiste dhe aktivizmin shoqëror. Përveç seminarit kryesor, ajo ndoqi ligjërata dhe punëtori mbi shkrimin akademik dhe zhvillimin e aftësive krijuese, duke përforcuar njohuritë dhe aftësitë e saj në kërkim dhe prezantim shkencor.
Përvoja e punës me ekspertë dhe studentë nga kultura të ndryshme e ka pasuruar Aja-n me perspektiva të reja dhe ka forcuar aftësinë e saj kritike dhe akademike.
UBT është krenar për arritjet e studentëve të saj dhe vazhdon t’i mbështesë ata në rrugëtimin drejt suksesit akademik dhe profesional!
Aktualitet
Rektori i UBT-së, Prof. Dr. Edmond Hajrizi pranohet anëtar në Akademinë Evropiane të Shkencave (EurASc)
Published
5 days agoon
August 1, 2025By
Driton Iseni
Themeluesi dhe Presidenti i UBT-së, Rektori, Prof. Dr. Edmond Hajrizi, është pranuar si anëtar në Akademinë Evropiane të Shkencave (European Academy of Sciences – EurASc).
European Academy of Sciences (EurASc) është një nga akademitë më prestigjioze në Evropë, që bashkon shkencëtarë dhe studiues të shquar nga e gjithë bota, me qëllim promovimin e ekselencës shkencore dhe teknologjike për të adresuar sfidat më të mëdha globale. Anëtarët e saj janë emra të njohur që kanë dhënë kontribute të mëdha në fushat përkatëse, përfshirë shumë fitues të çmimeve ndërkombëtare dhe nobelistë.
Ky është një vlerësim i rëndësishëm ndërkombëtar që njeh kontributin e jashtëzakonshëm të Prof. Hajrizit në fushën e arsimit të lartë, kërkimit shkencor, inovacionit dhe politikëbërjes në nivel rajonal dhe evropian.
“Pjesëmarrja ime si anëtar në Akademinë Evropiane të Shkencave është një vlerësim personal, por mbi të gjitha është një njohje për punën dhe përkushtimin afatgjatë të UBT-së në ndërtimin e një ekosistemi akademik dhe shkencor në përputhje me standardet evropiane. Ky është një hap i rëndësishëm drejt fuqizimit të rolit të Kosovës në hartën ndërkombëtare të dijes dhe inovacionit”, tha Rektori Hajrizi.
Akademia Evropiane e Shkencave (EurASc), në publikimin e saj në rrjetet sociale, ka vlerësuar lart kontributin e Prof. Dr. Edmond Hajrizi për përvojën e tij mbi dydekadëshe në ndërthurjen e akademisë me ekosistemet e inovacionit dhe zhvillimit ekonomik.
Nën udhëheqjen e tij strategjike dhe vizionare, UBT është konsoliduar si një nga institucionet më të avancuara të arsimit të lartë në Evropën Juglindore, duke u shndërruar në një qendër të rëndësishme për zhvillimin e inovacionit, teknologjisë dhe sipërmarrjes.
Si pjesë e angazhimeve të tij profesionale, Prof. Hajrizi ka udhëhequr me sukses dhjetëra projekte të financuara nga Bashkimi Evropian, si dhe ka kontribuar si këshilltar për institucione prestigjioze ndërkombëtare, duke promovuar transformimin digjital, prodhimin inteligjent dhe arsimin e orientuar drejt së ardhmes.
Ky pranim përfaqëson jo vetëm një sukses personal për Rektorin Hajrizi, por një arritje të rëndësishme për UBT-në dhe Kosovën në tërësi. Ai dëshmon se përkushtimi ndaj inovacionit, cilësisë akademike dhe vizionit global mund të sjellë njohje ndërkombëtare dhe ta vendosë Kosovën në hartën e qendrave të rëndësishme të dijes dhe teknologjisë.

NASA: Katër astronautë ulen në ISS

Sot është Dita Ndërkombëtare e Motrave

Sharon Stone tregon për debatin e ashpër me Michael Douglas

UBT pret në vizitë zyrtare Kryetarin e FFK-së, Agim Ademi – fokus te edukimi dhe inovacioni në sport

Edicioni i ri në Serie-A vjen me risi në ndarjen e drejtësisë

Kriza në Barcelonë, përplasje e hapur mes klubit dhe Ter Stegen

United paraqet megaofertë për sulmuesin slloven

Meta do t’i ndalojë reklamat politike në BE nga tetori

Pesë suplemente që nuk kombinohen mirë me kafenë
Të kërkuara
-
Lajmet nga UBT2 months ago
UBT organizon debat rreth zgjerimit të BE-së dhe ruajtjes së vlerave evropiane
-
Lajmet nga UBT2 months ago
UBT – Institucioni privat me më së shumti programe të akredituara nga Agjencia e Akreditimit të Kosovës
-
Lajmet nga UBT2 months ago
UBT rilicencohet nga MAShTI për ofrimin e arsimit profesional në katër drejtime të rëndësishme shëndetësore
-
Lajmet nga UBT2 months ago
UBT organizoi Akademi Përkujtimore në nder të Prof. Dr. Naser Kamberit