Danimarka dhe Norvegjia u detyruan të mbyllin aeroportet e tyre kryesore të hënën në mbrëmje për shkak të vëzhgimeve të dronëve, raporton BBC.

Policia daneze nuk ishte në gjendje të konfirmonte llojin ose numrin e dronëve të parë rreth Aeroportit të Kopenhagës, por u tha gazetarëve të martën në mëngjes se me shumë gjasa ato u fluturuan nga një “operator i aftë” që donte të “shfaqej”.

Policia konfirmoi se forcat e armatosura u aktivizuan në përgjigje të këtij incidenti, por theksoi se nuk kishte asgjë që të tregonte se dronët synonin të shkaktonin dëme.

Operacionet në Aeroportin e Kopenhagës rifilluan në orën 00:30 me orën lokale (23:30 GMT) pasi fluturimet u pezulluan për gati katër orë për shkak të vëzhgimit të dronëve. Aeroporti i Oslos gjithashtu u rihap pas katër orësh mbyllje të hapësirës ajrore.

Policia daneze tha gjithashtu se “një sërë masash do të zbatohen” si pjesë e hetimit, por nuk konfirmoi se cilat mund të jenë këto masa.

Ajo konfirmoi se rreth 20,000 pasagjerë u prekën nga mbyllja e aeroportit.

Të hënën në mbrëmje, sipas autoriteteve, dy deri në tre dronë të mëdhenj u raportuan duke fluturuar në zonën përreth Aeroportit të Kopenhagës.

Nisjet dhe uljet në aeroport u pezulluan për rreth katër orë.

Në një deklaratë, aeroporti paralajmëroi për vonesa dhe anulime të vazhdueshme dhe u bëri thirrje pasagjerëve të kontrollonin statusin e fluturimit të tyre pranë linjave ajrore.

I pyetur nga gazetarët të hënën nëse dronët ishin me origjinë ruse, Zëvendësinspektori i Policisë Jakob Hansen tha se nuk mund ta konfirmonte apo mohonte këtë.

Më vonë, në një postim në rrjetet sociale, presidenti ukrainas Volodymyr Zelensky përmendi “shkeljen e Rusisë” të hapësirës ajrore të NATO-s në Kopenhagë më 22 shtator, por nuk dha ndonjë burim për informacionin.

Liderët e BE-së dhe të NATO-s nuk kanë bërë një atribuim publik.

Në konferencën për shtyp të së martës, policia daneze tha se nuk kishte asgjë që “i lidhte menjëherë” incidentet me dronë në Norvegji dhe Danimarkë me njëra-tjetrën.

Një zëdhënës i Aeroportit të Kopenhagës konfirmoi se hapësira ajrore mbi aeroport u mbyll rreth orës 20:30 me orën lokale të hënën për shkak të dronëve të paidentifikuar.

“Asnjë avion nuk mund të ngrihet apo të ulet në aeroport, dhe si rezultat, disa fluturime po devijohen në aeroporte të tjera”, thanë ata në një deklaratë.

“Policia po heton çështjen dhe për momentin nuk kemi një afat kohor për rihapjen”.

Faqja e gjurmimit të fluturimeve, Flightradar24, raportoi se të paktën 35 fluturime të destinuara për Kopenhagë ishin devijuar si rezultat i mbylljes së aeroportit.

Në Oslo, një dron u zbulua gjithashtu pranë aeroportit kryesor të hënën në mbrëmje, konfirmoi policia norvegjeze për median vendase NRK.

Një zëdhënës i aeroportit i tha transmetuesit publik NRK se hapësira ajrore mbi aeroport u mbyll në orën 00:00 me orën lokale për shkak të “vëzhgimit të dronëve” dhe të gjitha fluturimet do të devijoheshin në aeroportin më të afërt.

Rreth orës 04:30 me orën lokale, zëdhënësi tha se Aeroporti i Oslos ishte rihapur./D.B/KP

I dërguari i ri i ShBA-së në Kombet e Bashkuara, Mike Waltz, dha mendimin e tij mbi akuzat e fundit për shkelje të hapësirës ajrore ruse.

Ai i tha Këshillit të Sigurimit të OKB-së se ShBA-të e kishin paralajmëruar Rusinë të ndalonte veprimet që mund ta rrezikonin atë të përshkallëzohej në një konflikt më të gjerë pasi dronët e saj shkelën hapësirën ajrore polake nëntë ditë më parë.

Pavarësisht këtij paralajmërimi, tha theksoi se Rusia shkeli përsëri hapësirën ajrore të një anëtari të NATO-s.

“Dua të shfrytëzoj këtë mundësi të parë për të përsëritur dhe theksuar se Shtetet e Bashkuara dhe aleatët tanë do të mbrojnë çdo centimetër të territorit të NATO-s. Rusia duhet të ndalojë urgjentisht një sjellje të tillë të rrezikshme”, vijoi ai.

Ai shton se edhe një herë i bën thirrje Rusisë, si anëtare e përhershme e këtij Këshilli, të mbështesë paqen dhe sigurinë ndërkombëtare, të respektojë sovranitetin e fqinjëve të saj, të ndalojë shkeljen e hapësirës së tyre ajrore.

Gjithashtu, Waltz tha se i bën thirrje Rusisë të negociojë drejtpërdrejt me Ukrainën për t’i dhënë fund luftës/S.K/EO/Skynews/

Grupi militant islamik palestinez, Hamas i ka shkruar presidentit amerikan, Donald Trump duke i kërkuar atij të garantojë një armëpushim në Gaza në këmbim të lirimit të gjysmës së pengjeve.

”Hamasi i kërkon presidentit Trump që të garantojë një armëpushim 60-ditor në Gaza në këmbim të lirimit të gjysmës së pengjeve të mbajtura atje”, sipas ”Fox News” duke cituar një zyrtar të lartë të administratës Trump dhe një burim të përfshirë në negociata.

Letra aktualisht mbahet nga Katari dhe do t’i dorëzohet Trumpit më vonë këtë javë.

Lajmi u konfirmua edhe nga ”Times of Israel”./S.K/KP/ATSh/

Presidenti i Francës, Emmanuel Macron riafirmoi thirrjen për zgjidhje paqësore me dy shtete teksa edhe zyrtarisht kanë deklaruar njohjen e shtetit të Palestinës në Asamblenë e Përgjithshme të OKB-së në Nju Jork.

“Ajo që dëshiron Franca janë dy shtete që jetojnë në paqe krah për krah: një shtet i Izraelit që njeh një shtet të Palestinës, një shtet i Palestinës që njeh një shtet të Izraelit”, tha Macron në një video në X.

Ai vuri në dukje dhimbjn, vuajtjen dhe shqetësimin e të gjithë njerëzve në Rripin e Gazës dhe atyre që jetojnë nën bombardimet pa qasje në ndihmë humanitare.

“Thellë-thellë, të gjitha jetët janë të barabarta. Dhe pas gjithë kësaj, ne kemi vjedhur jetë, kemi marrë jetë, njerëz që vuajnë. Dhe ajo që duam, ajo që dëshiron Franca, është paqja”, tha Macron.

Ministria e Jashtme palestineze e mirëpriti njohjen nga Franca, duke e cilësuar si një hap historik dhe të guximshëm që mbështet përpjekjet për arritjen e paqes dhe zbatimin e zgjidhjes me dy shtete./S.K/KP/ATSh