Lajmet

BE-ja miraton ndihmë tjetër ushtarake prej 545 milionë eurosh për Ukrainën

Duke e çuar mbështetjen totale për ushtrinë ukrainase në 3,6 miliardë euro.

Published

3 years ago

February 3, 2023

UBT news

Bashkimi Evropian miratoi sot një tjetër ndihmë ushtarake prej 545 milionë eurosh për Ukrainën, duke e çuar mbështetjen totale për ushtrinë ukrainase në 3,6 miliardë euro, transmeton Anadolu.

Vendet anëtare të BE-së dhanë dritën jeshile për paketën e shtatë prej 500 milionë eurosh në kuadër të Lehtësimit Evropian të Paqes, njoftoi Këshilli i Bashkimit Evropian në një deklaratë për shtyp.

“BE-ja po rrit mbështetjen e saj për Ukrainën për të mbrojtur sovranitetin dhe integritetin e saj territorial brenda kufijve të saj të njohur ndërkombëtarisht dhe për të mbrojtur popullsinë civile kundër luftës së vazhdueshme ruse të agresionit”, thuhet në dokument.

Vendimi erdhi përpara samitit të 24-të BE-Ukrainë, i cili do të zhvillohet të premten në kryeqytetin ukrainas Kiev.

Shefja e Komisionit Evropian Ursula von der Leyen dhe 15 komisionerë të BE-së, përfshirë shefin e politikës së jashtme të BE-së, Josep Borrell, kanë mbërritur tashmë në Kiev për të zhvilluar bisedime me homologët e tyre nga qeveria ukrainase.

Përveç mbështetjes prej 500 milionë eurosh, shtetet anëtare të BE-së miratuan gjithashtu një “masë të re ndihme prej 45 milionë eurosh që mbështet përpjekjet stërvitore të Misionit të Ndihmës Ushtarake të Bashkimit Evropian në Ukrainë”, thuhet në deklaratë.

Fondi i ri do të mbulojë pajisjet jovdekjeprurëse, furnizimet dhe shërbimet për ushtarët ukrainas të trajnuar nga BE-ja.

Sipas informacioneve të marra nga Anadolu, Borrell pritet të shpallë një objektiv të ri për misionin e trajnimit ushtarak të BE-së, ku do të përfshihen 15.000 ushtarë, krahas 15.000 trupave aktuale.

Që nga fillimi i luftës së Rusisë kundër Ukrainës, BE-ja dhe shtetet e saj anëtare kanë ofruar 50 miliardë euro në mbështetje të drejtpërdrejtë për Ukrainën.

Ajo përfshin afërsisht 12 miliardë euro ndihmë ushtarake, e cila përbëhet nga 3,6 miliardë euro në fonde të BE-së në kuadër të Lehtësimit Evropian të Paqes dhe mbështetje dypalëshe nga shtetet e saj anëtare./AA

Vendi

Mbi 100 gramë kokainë dhe marihuanë kapen në Vërmicë

Published

16 hours ago

June 19, 2026

UBT News

Dogana e Kosovës, në bashkëpunim me Policinë e Kosovës, ka zbuluar dy raste të substancave narkotike gjatë kontrolleve në Pikën Kufitare të Vërmicës.

Në rastin e parë, gjatë kontrollit të një automjeti që po hynte në Kosovë, janë gjetur 104.90 gramë substancë e dyshuar si kokainë, e fshehur në çantën personale të një udhëtari.

Ndërkaq, në rastin e dytë janë zbuluar 5.53 gramë substancë e dyshuar si marihuanë, e fshehur në bagazhin e një automjeti. Gjatë kontrollit është gjetur edhe një thikë kuzhine e padeklaruar.

Rastet janë proceduar për hetime të mëtejshme nga autoritetet kompetente.

/A.K/

Vendi

Mbyten dy vajza të mitura në Tale

Published

17 hours ago

June 19, 2026

UBTNews

Një ngjarje e rëndë ka ndodhur mesditën e sotme në plazhin e Tales, ku dy vajza të mitura, të moshës 11 dhe 9 vjeçe, janë mbytur në det.

Sipas njoftimit zyrtar të Policisë, tragjedia ka ndodhur rreth orës 12:50. Pas marrjes së informatës, zyrtarët policorë kanë dalë menjëherë në vendngjarje dhe, në bashkëpunim të ngushtë me pushuesit e tjerë, kanë bërë të mundur gjetjen dhe nxjerrjen e trupave të pajetë në breg.

“Në bashkëpunim me pushuesit, është bërë e mundur gjetja dhe nxjerrja e trupave të pajetë në breg“, thuhet në njoftimin e policisë. /E.A/

Vendi

Dyshime për cilësinë: Bllokohen mbi 1 mijë e 400 infuzione në Spitalin e Mitrovicës

Published

18 hours ago

June 19, 2026

UBTNews

Shërbimi Spitalor Klinik dhe Universitar i Kosovës (ShSKUK) ka njoftuar se ka bllokuar përkohësisht 1,432 njësi të një produkti mjekësor në Spitalin Rajonal “Sami Haxhibeqiri” në Mitrovicë, pas dyshimeve se ai mund të mos jetë brenda specifikave të kërkuara të cilësisë.

Bëhet fjalë për infuzionet e llojit Compound Sodium Lactate (500 ml). Alarmi u ngrit fillimisht nga farmacistja përgjegjëse e spitalit, gjë që vuri në lëvizje Inspektoratin Farmaceutik dhe Agjencinë e Kosovës për Produkte dhe Pajisje Medicinale (AKPPM).

Pas një inspektimi të dytë të kryer më 17 qershor, autoritetet urdhëruan bllokimin e menjëhershëm të këtij kontingjenti deri në pranimin e rezultateve nga analizat laboratorike. ShSKUK ka njoftuar opinionin publik se ky është një masë parandaluese dhe se mbetet e përkushtuar për të garantuar sigurinë e plotë të pacientëve dhe cilësinë e barnave nëpër spitalet publike. /E.A/

Lajmet

KQZ gati për rezultatet përfundimtare: Përfundon rinumërimi i 185 vendvotimeve

Published

20 hours ago

June 19, 2026

UBTNews

Komisioni Qendror i Zgjedhjeve (KQZ) ka përmbyllur zyrtarisht procesin e rinumërimit për të gjitha 185 vendvotimet e kontestuara. Sipas zëdhënësit të KQZ-së, Valmir Elezi, procesi ka përfunduar sot në orën 12:00 dhe të dhënat e reja tashmë janë përditësuar në platformën zyrtare të rezultateve.

Me këtë hap, KQZ-ja ka mbyllur teknikisht të gjitha aktivitetet e administrimit të votave dhe është gati për shpalljen e rezultateve përfundimtare të zgjedhjeve të 7 qershorit.

Megjithatë, përpara shpalljes zyrtare, duhet të respektohen afatet ligjore për ankesat e mundshme. Elezi sqaroi se sot përfundon afati për ankesat lidhur me administrimin e numërimit nga dita e mërkurë (17 qershor), ndërsa po ashtu do të pritet nëse do të ketë ankesa për procesin e rinumërimit të përmbyllur sot.

Për më tepër, para se të procedohet tutje, KQZ-ja do të kërkojë një konfirmim zyrtar nga Paneli Zgjedhor për Ankesa dhe Parashtresa (PZAP) për të vërtetuar nëse ka ndonjë ankesë tjetër ende në shqyrtim.

Në fund, Qendra e Numërimit dhe Rezultateve (QNR) do të hartojë një raport të detajuar për gjetjet në secilin prej 185 vendvotimeve. Ky raport synon të konfirmojë se procesi i parë i numërimit nëpër komuna është zhvilluar me saktësi dhe në përputhje të plotë me vullnetin e shprehur të qytetarëve, raporton Ekonomia Online. /Ekonomia Online/ /E.A/