Komuna e Prishtinës ka bërë të ditur se pas një muaji është arritur marrëveshje me punëtorët e Ndërmarrjes Publike “Pastrimi”, duke i dhënë fund grevës së tyre.

Në një njoftim zyrtar, thuhet se sot është arritur dakordimi mes Komunës dhe Këshillit Grevist të “Pastrimit” për ndërprerjen e grevës që po mbahej para objektit të Komunës. Po ashtu, është bërë e ditur se në orën 16:30 do të zhvillohet një deklaratë e përbashkët për media.

Punëtorët e “Pastrimit” kishin nisur grevën që nga një muaj më parë, duke kërkuar shlyerjen e një borxhi prej 2.7 milionë eurosh, që sipas kompanisë u takon nga Komuna, një pretendim i cili është kundërshtuar nga zyrtarët komunalë. Përveç kësaj, ata kërkonin edhe ndalimin e operatorëve privatë për grumbullimin e mbeturinave në kryeqytet.

Fillimisht, grevistët kishin bllokuar rrugën përpara ndërtesës së Komunës me kamionët e tyre, por më pas i hoqën automjetet dhe vazhduan grevën duke qëndruar në oborrin e objektit.

Gjatë periudhës së grevës, shumë lagje të Prishtinës mbetën pa pastrim, duke shkaktuar reagime të shumta nga qytetarët. Komuna kishte premtuar zgjidhje për këtë situatë, e cila duket se është arritur me marrëveshjen e fundit.

Presidentja e vendit, Vjosa Osmani, ka thënë se në takim me presidentin hungarez, Tamas Sulyok, diskutuan thellimin e partneritetit në mes të dyja shteteve.

Osmani tha se potenciali për rritjen e mëtejme të bashkëpunimit Kosovë-Hungari është i madh dhe sipas saj, Kosova mbetet e përkushtuar për të hapur kapituj të rinj në marrëdhëniet dypalëshe.

“Në takim, i shpreha Presidentit Sulyok mirënjohjen e qytetarëve të Kosovës për rolin e Hungarisë në kuadër të KFOR-it, për mbështetjen e dhënë studentëve të Kosovës ndër vite, si dhe për iniciativat që kanë afruar edhe më shumë dy vendet tona”, shkroi Osmani.

E para e shtetit e ka nisur sot vizitën zyrtare në Hungari, ku u prit me nderime ushtarake në Budapest.

Korporata Energjetike e Kosovës ka njoftuar për ndaljen e njësinë A4 të Termocentralit Kosova A në mesnatë.

Sipas KEK-ut, kjo do të ndodhë për shkak të një sinjalizimi për defekte në ventilatorë të kullës ftohëse.

“Kjo ndalesë bëhet me qëllim të parandalimit të një defekti me përmasa më të mëdha dhe për të mundësuar trajtimin sa më të hershëm të problemit”, thuhet në njoftim.

Tutje është bërë e ditur se kapaciteti i kësaj njësie nuk është planifikuar për prodhim gjatë ditës së nesërme.

“Ekipet e Termocentralit Kosova A janë në gjendje të plotë gatishmërie dhe do të ndërmarrin të gjitha veprimet e nevojshme për identifikimin dhe sanimin e defektit, sapo të krijohen kushtet teknike. Objektivi ynë mbetet rikthimi i njësisë në operim sa më parë që të jetë e mundur”, thuhet në njoftim.

Gjykata dje ka dënuar Zivojin Nesiq me 15 vjet burgim për krime të dhunës seksuale të kryera gjatë luftës në Kosovë. Ky është vetëm rasti i dytë në historinë e pasluftës ku një individ dënohet për dhunë seksuale si krim lufte, duke përfaqësuar një zhvillim të rëndësishëm në procesin e drejtësisë tranzicionale në vend.

Qendra Kosovare për Rehabilitimin e të Mbijetuarve të Torturës (QKRMT) e mirëpriti vendimin, duke e cilësuar si një hap të domosdoshëm për njohjen e vuajtjeve të të mbijetuarve dhe për ndërtimin e një sistemi drejtësie që vë në qendër viktimën.

Në këtë rast, e mbijetuara ka qenë përfituese e shërbimeve të QKRMT-së, duke marrë mbështetje të vazhdueshme psikologjike dhe ligjore përgjatë gjithë procesit gjyqësor. Organizata thekson se fuqizimi i të mbijetuarve për të dëshmuar, pavarësisht barrierave shoqërore dhe emocionale, është një element thelbësor në kërkimin e drejtësisë.

“Ky dënim nuk është vetëm drejtësi individuale, por edhe një mesazh i qartë për shoqërinë kosovare dhe institucionet që duhet të përballen me të kaluarën e dhimbshme të luftës”, thuhet në deklaratën e QKRMT-së.

Qendra gjithashtu ritheksoi përkushtimin për të vazhduar mbështetjen ndaj të mbijetuarve të dhunës seksuale të luftës dhe për të kontribuar në krijimin e një sistemi drejtësie që respekton dhe dëgjon zërin e viktimave./KP/