Lajmet

​Serbët nuk duan të largohen nga Forca e Sigurisë së Kosovës

Published

on

Ministri i Mbrojtjes, Anton Quni thotë se problemet me largimin e pjesëtarëve serbë nga Forca e Sigurisë së Kosovës kanë stagnuar dhe tash e sa kohë nuk ka kërkesa të tilla për largim.

Në një intervistë për KosovaPress, Quni flet edhe për realizimin e planit të vitit, problemet e shkaktuara nga pandemia, shkurtimin e buxhetit për ushtrinë dhe ndihmën e marrë nga partnerët ndërkombëtarë.

Pas ngritjes së kapaciteteve të FSK-së, autoritetet e Serbisë në forma të ndryshme, edhe përmes shantazheve, kishin nisur presionin ndaj ushtarëve të FSK-së, pjesë e komunitet serb, çka edhe kishte bërë që shumë prej tyre të dorëzojnë uniformën duke u larguar nga Forca.

Quni thotë se tash e sa kohë nuk ka pasur kërkesa të tilla nga serbët në FSK. Megjithatë, presioni nga Beogradi ka vazhduar në forma të ndryshme njëjtë sikurse edhe në të kaluarën, pjesëtarët serbë të FSK-së vazhdojnë t’i qëndrojnë besnikë Forcës.

“Mund të themi që ka stagnuar, është një periudhë kur nuk kemi pasur kërkesa të pjesëtarëve të komunitetit serb që të largohen nga FSK. Vazhdojmë t’ju japim përkrahje të gjithë atyre që i mbesin besnik Forcës së Sigurisë së Kosovës duke i ndërmarrë masat e sigurisë, duke u marrë me problemet më esenciale, për të gjitha këto ngjarje janë të njoftuara të gjitha autoritetet më të larta shtetërore dhe besoj e marrin në konsideratë shqetësimin tonë, sepse nuk është shqetësim vetëm i komunitetit serb, por i gjithë FSK-së sepse nuk dëshirojmë që asnjë pjesëtar i FSK-së të jetë viktimë e ndonjë presioni, shantazhi që vjen nga jashtë Kosovës”, thotë Quni.

FSK është në fazën e rekrutimit dhe vitin e ardhshëm pritet të pranohen 400 pjesëtarë të rinj, prej të cilëve edhe nga komunitetet pakicë.

Janë bërë dy vjet prej kur FSK ka nisur procesin e transformimit e Quni thotë se po hyjnë në vitin e tretë me përmbushjen e të gjitha çështjeve të parapara në plan.

“Jemi duke siguruar pajisjet dhe mjetet teknike që sigurojë realizimin e misioneve të njësive veç e veç, kështu që po i afrohemi fazës kur shumica e njësive munden t’i deklarojnë aftësitë për t’i kryer detyrat specifike. Në vitin 2028 ne të kemi mundësinë t’i deklarojmë kapacitetet e plota të Forcave të Sigurisë së Kosovës”, thotë ai.

Quni në intervistën dhënë për KosovaPress thotë se janë në hap me planin e paraparë 10-vjeçar dhe nuk mund të mendohet që procesi i tranzicionit drejt shndërrimit në Forcë me kapacitete të plota ushtarake të përfundojë më shpejtë se viti 2028 duke parë situatën e shkaktuar nga pandemia me COVID-19.

“Në këtë plan (të tranzicionit) kanë punuar ekspertët e fushës, në bashkëpunim me ekspertët e partnerëve strategjikë, kur është hartuar ky plan janë marrë parasysh shumë faktorë, zhvillimet në rajon, koeficienti i rrezikshmërisë, nevojat, mundësitë buxhetore e të tjera, dhe është hartuar gjithnjë me parashikimet për kushtet optimale. Tani të mendohet që të dinamizohet ky proces në kushtet e pandemisë, mund të them se do të ishte utopiste sepse duhet marrë parasysh nevojat e institucioneve të tjera, kështu që ne po i përmbahemi asaj dinamike të paraparë me planin e tranzicionit”, thotë Quni.

Për shkak të pandemisë, me rishikimin e buxhetit është shkurtuar ai për ushtrinë dhe i është dhënë prioritet sektorit të shëndetësisë dhe ekonomisë.

“Gjithnjë ushtria ka nevojë për më shumë buxhet sepse çdo rritje e fondeve do të thotë mundësi të mëdha për zhvillimin e ushtrisë, por ne duhet t’i kemi parasysh faktet dhe argumentet dhe bazohemi gjithnjë në të dhëna empirike dhe jo vetëm në dëshira. Edhe shkurtimet buxhetore kanë ndikuar, por për fat të mirë ne kemi raporte të mira me partnerët strategjikë, ekonomia e të cilëve është shumë më e fuqishme dhe në këto raste të vështira për Kosovën si tërësi, por specifikisht për Forcat e Sigurisë së Kosovës apo sektorin e sigurisë në përgjithësi, ne kemi pasur me të vërtetë partnerë, të cilët edhe në këtë situatë na kanë dalë në ndihmë, ne formën e donacioneve kemi arritur t’i kompensojmë të gjitha mangësitë që janë paraqitur”, thotë Quni.

Anton Quni u emërua ministër i Mbrojtjes në qeverinë e koalicionit LDK-Vetëvendosje, por udhëheqjen e kësaj ministrie e vazhdoi edhe me qeverinë e udhëhequr nga Avdullah Hoti të koalicionit LDK-AAK-Nisma.

Por me vendimin e Gjykatës Kushtetuese e cila ka vendosur që Qeveria Hoti është zgjedhur në mënyrë jo-kushtetuese, Kosova pritet të bëhet me institucione të reja të dala nga zgjedhjet e jashtëzakonshme.

Mirëpo, ndryshimi i mundshëm i titullarit në Ministrinë e Mbrojtjes nuk shihet si shqetësim nga Quni që deklaron për KosovaPress se po lë një plan të detajuar të shtrirë gjatë në kohë me planifikimet për punët dhe proceset që e presin këtë dikaster.

“Për çdo ministër është privilegj të vijë dhe të ushtrojë kontrollin demokratik dhe civil, udhëheqjen civile sepse gjërat janë mirë sistemuara. […] Çdo minutë në ministri dhe FSK është i planifikuar, dihet me ditë, javë dhe muaj se cilat procese janë në pritje, në zhvillim, përfundim, kështu që edhe me ardhjen e ministrit të ri dihet saktësisht çka do të ndodh në muajin mars apo qershor edhe në aspektin e ligjeve dhe aspektin e ngritjes së kuadrove, ushtrimeve fushore që do të zhvillohen”, thotë Quni.

Vendi

Dështon mbledhja e Kryesisë së Kuvendit për mungesë kuorumi, shtyhet shqyrtimi i Projektligjit për Gjykatën Speciale

Published

on

Mbledhja e Kryesisë së Kuvendit të Kosovës ka dështuar të mbahet të martën për shkak të mungesës së kuorumit.

Këtë e bëri të ditur nënkryetari i Kuvendit, Ardian Gola, i cili para gazetarëve foli edhe për Projektligjin për Gjykatën Speciale. Ai tha se vazhdimi i seancës së ndërprerë, ku ishte paraparë shqyrtimi i këtij projektligji, kërkon koordinim dhe dakordim mes partive politike.

“Është çështje komplet jashtë rendit të ditës së Kryesisë. Arsyeja që është ndërprerë seanca ka të bëjë me mungesë të kuorumit dhe realisht kryetarja Haxhiu ka autorizuar që, në koordinim me shefat e grupeve parlamentare, të caktohet një datë kur do të vazhdojë ajo seancë. Mbetet çështje e dakordimit politik, të menaxhuar dhe drejtuar nga kryetarja e Kuvendit”, theksoi Gola.

Ai u pyet edhe për dënimin e ish-presidentit Hashim Thaçi nga Dhomat e Specializuara në Hagë.

Gola shprehu keqardhje për procesin gjyqësor që po zhvillohet në këtë institucion, ndërsa bëri të ditur se vendimi i fundit do të trajtohet edhe në kuadër të grupit punues për strategjinë lidhur me ish-krerët e UÇK-së, të udhëhequr nga zëvendëskryeministri Glauk Konjufca.

“Shprehim keqardhjen tonë për gjithë procesin që po zhvillohet në Dhomat e Specializuara. Ne e kemi themeluar një grup punues, në krye të të cilit është zëvendëskryeministri Glauk Konjufca, dhe shpresojmë që edhe ky vendim të jetë si pjesë shtesë e këtij grupi punues”, tha ai./A.K/

Continue Reading

lajme

Gjykata e Lartë në Beograd cakton paraburgimin dhe lëshon urdhërarrest për Milan Radoiçiqin

Published

on

By

Gjykata e Lartë në Beograd ka marrë vendim për caktimin e masës së paraburgimit dhe lëshimin e urdhërarrestit ndaj ish-nënkryetarit të Listës Serbe, Milan Radoiçiq, pasi ky i fundit nuk është paraqitur në stacionin policor, konfirmim ky i dhënë për median serbe Insajder nga vetë Gjykata e Lartë në Beograd.

Sipas Gjykatës, vendimi për paraburgim dhe fletarrest është marrë për shkak se Radoiçiq i cili ndodhet nën hetime për pjesëmarrje në sulmin e armatosur në fshatin Banjskë nuk është lajmëruar në stacionin policor më 15 nëntor. Paraqitja periodike në polici ishte një nga masat e sigurisë të caktuara nga gjykata si garanci se ai do të ishte i disponueshëm gjatë kohëzgjatjes së hetimeve. Sipas po të njëjtave burime gjyqësore, paraburgimi u caktua për shkak të rrethanave që tregojnë se i pandehuri po fshihet ose është arratisur. Informacionin fillimor se për Radoiçiq është lëshuar urdhërarrest e kishte publikuar portali BIRN.

Milan Radoiçiq po hetohet në Serbi në kuadër të lëndës “Banjska”, e cila u iniciua pas konfliktit të armatosur në fshatin Banjskë të Kosovës më 24 shtator 2023, ku mbetën të vrarë katër persona, rreshteri i Policisë së Kosovës,  Afrim Bunjaku i cili ishte në detyrë dhe tre anëtarë të grupit të armatosur.

Radoiçiq kishte pranuar përmes avokatit të tij, Goran Petronijević, se kishte qenë përgjegjës logjistike për organizimin e grupit terrorist.

Ndonëse Prokuroria e Lartë në Beograd kishte kërkuar paraburgim pas nisjes së procedurës penale për vepra të tilla si armëmbajtje pa leje dhe vepra kundër sigurisë përgjithëshme, gjykata e kishte lënë të mbrohet në liri, me kusht që të dorëzonte pasaportën, të mos udhëtonte në Kosovë dhe të paraqitej në polici çdo dy javë. Që atëherë, prokuroria nuk kishte dhënë asnjë informacion për ndonjë përparim tjetër në këtë hetim.

Paralelisht me këto zhvillime në Serbi, në Kosovë është duke u zhvilluar një proces gjyqësor kundër 45 personave, ku rasti në Banjskë është cilësuar si terrorizëm dhe sulm ndaj rendit kushtetues, proces në të cilin dy persona tashmë janë dënuar me burgim të përjetshëm dhe një tjetër me 30 vjet burgim.

Në kohën kur ndodhi sulmi terrorist në Banjskë, Milan Radoiçiq ushtronte funksionin e nënkryetarit të Listës Serbe, subjekti kryesor i serbëve të Kosovës me lidhje të ngushta me Partinë Përparimtare Serbe (SNS) në pushtet, ndërsa më parë ishte shfaqur shpesh në tubime politike dhe në shoqërinë e zyrtarëve më të lartë shtetërorë të Serbisë. /E.A/

 

Continue Reading

Vendi

Marko Hatlak kërkon falje për interpretimin e këngës “Oj Kosovo, Kosovo” në Bruksel

Published

on

Muzikanti dhe fizarmonicisti slloven, Marko Hatlak, ka kërkuar falje për përzgjedhjen dhe interpretimin e këngës “Oj Kosovo, Kosovo” gjatë ceremonisë hapëse të Forumit të Zgjerimit të Bashkimit Evropian 2026 në Bruksel.

Kënga, e cila përmban pretendime nacionaliste serbe ndaj Kosovës, kishte nxitur reagime të shumta pas interpretimit të saj në këtë aktivitet.

Hatlak, i cili ishte përgjegjës për përgatitjen e programit muzikor në emër të Komisionit Evropian, ka thënë se përzgjedhja ishte e paqëllimshme dhe se nuk ishte në dijeni të kontekstit historik e politik të këngës.

Në një reagim publik, ai ka shpjeguar se ishte ngarkuar të përzgjidhte dhjetë këngë, nga një për secilin vend pjesëmarrës në forum, dhe t’ia dorëzonte ato organizatorëve për miratim.

Sipas tij, gjatë kërkimit në Google për një këngë tradicionale nga Kosova, kishte hasur në “Oj Kosovo, Kosovo”, e cila ishte përshkruar si këngë patriotike.

“Unë e përzgjodha atë nga këndvështrimi i një muzikanti, pra duke u bazuar në harmoninë, ritmin dhe tingullin e saj”, ka shpjeguar Hatlak.

Ai ka thënë se kishte vetëm një javë kohë për përgatitjen dhe interpretimin e programit dhe se, për shkak të afatit të shkurtër, nuk kishte arritur të hulumtonte prejardhjen dhe domethënien e këngës. Sipas tij, as organizatorët nuk e kishin vënë në pah natyrën problematike të përzgjedhjes gjatë shqyrtimit të programit.

“U kërkoj sinqerisht falje të gjithë atyre që janë prekur nga kjo ngjarje”, ka deklaruar muzikanti.

Hatlak ka bërë të ditur se kërkimfaljen ua ka dërguar drejtpërdrejt edhe ambasadorit të Kosovës në Slloveni, Valdet Sadiku, ambasadorit të Kosovës në Belgjikë, Agron Bajrami, kryenegociatorit për Integrimin Evropian, Jeton Zulfaj, si dhe komisioneres evropiane për Zgjerim, Marta Kos.

Ai ka theksuar se nuk kishte pasur qëllim të ofendonte askënd dhe se nuk do ta kishte interpretuar këngën po ta kishte ditur kontekstin e saj.

“Po ta kisha ditur kontekstin dhe domethënien e saj, sigurisht që nuk do ta kisha interpretuar. Gjatë gjithë karrierës sime, jam përpjekur që përmes muzikës t’u sjell njerëzve vetëm gëzim dhe paqe të brendshme. Nuk ka qenë kurrë qëllimi im të fyej askënd”, ka shkruar ai.

Në fund, Hatlak ka shprehur keqardhje për situatën e krijuar, duke shpresuar që kërkimfalja e tij të pranohet./A.K/

Continue Reading

Lajmet

Studimi i profesorëve të UBT-së publikohet në revistën ndërkombëtare “Pharmacoepidemiology”

Published

on

By

Punimi shkencor i profesorëve të Shkencave Mjekësore në UBT, Prof. Dr. Fitim Alidema dhe Prof. Dr. Zejdush Tahiri, në bashkëautorësi me Mr. Ph. Flakron Alidema, është publikuar në revistën prestigjioze ndërkombëtare Pharmacoepidemiology.

Ky studim vëzhgues retrospektiv ka analizuar të dhënat e 4.668 pacientëve të trajtuar me aspirinë 100 mg në kujdesin parësor shëndetësor. Gjetjet kryesore të hulumtimit tregojnë se përdorimi potencialisht i papërshtatshëm i aspirinës është dukshëm më i lartë në parandalimin parësor kardiovaskular (52,3%) krahasuar me atë dytësor (1,8%).

Kontributi i veçantë i këtij punimi të profesorëve të UBT-së qëndron në vlerësimin e përbashkët të indikacionit mjekësor, profilit të rrezikut për gjakderdhje dhe barnave shoqëruese, në raport me ndërprerjen e dokumentuar të terapisë. Sipas analizës, historia e gjakderdhjes gastrointestinale rezultoi të jetë faktori kryesor i lidhur me ndërprerjen e trajtimit me aspirinë, duke nxjerrë në pah nevojën për rivlerësim individual të raportit përfitim–rrezik te secili pacient.

Revista Pharmacoepidemiology, e botuar nga MDPI, renditet në kuartilin Q2 sipas SCImago 2025 në kategorinë e farmakologjisë dhe toksikologjisë, indeksohet në platformat e njohura Scopus dhe Web of Science (ESCI), dhe ka faktor ndikimi 1,6 sipas Clarivate.

Continue Reading

Të kërkuara