Lideri i serbëve të Bosnje e Hercegovinës, Millorad Dodik, e ka shmangur vuajtjen e paraburgimit, pasi të premten u paraqit vullnetarisht në Prokurorinë e Bosnjës për t’u marrë në pyetje si i dyshuar për sulm ndaj rendit kushtetues.

Prokuroria e Bosnjës njoftoi se Dodik u mor në pyetje në prani të avokatit të vet mbrojtës.

Muaj më parë, Gjykata e Bosnjës kishte lëshuar fletarrestim kombëtar për Dodikun dhe kishte urdhëruar një muaj paraburgim për të, por ai nuk u kap asnjëherë nga autoritetet.

Gjatë një seance të premten, gjykata e pranoi kërkesën e prokurorëve për ta shfuqizuar masën e paraburgimit për Dodikun, duke thënë se arsyet e mëparshme për paraburgosjen e tij nuk vlenin më.

Gjykata urdhëroi që Dodiku të paraqitet detyrimisht para autoriteteve të drejtësisë kohë pas kohe.

Urdhri për paraqitje të detyrueshme mund të zgjasë për aq kohë sa të jetë e nevojshme, ose deri në një vendim të ri të gjykatës, thuhet në njoftim.

“I dyshuari është paralajmëruar posaçërisht se mund të caktohet masa e paraburgimit nëse shkel detyrimet nga masat ndaluese“, thuhet në një njoftim të përbashkët të Gjykatës dhe Prokurorisë së Bosnje e Hercegovinës.

Në shkurt, Gjykata e shkallës së parë e Bosnjës e dënoi Dodikun me një vit burgim dhe ia ndaloi ushtrimin e detyrës së presidentit të Republikës Sërpska për gjashtë vjet.

Dodik u shpall fajtor për mosrespektim të vendimeve të përfaqësuesit të lartë ndërkombëtar, Christian Schmidt, dhe për nënshkrimin e dekreteve për zbatimin e ligjeve që Schmidt i kishte shfuqizuar më parë.

Këto ligje kishin për qëllim ta ndalonin zbatimin e vendimeve të Gjykatës Kushtetuese të Bosnjës dhe përfaqësuesit të lartë në territorin e entitetit serb të Bosnjës, të cilat më herët kishin shfuqizuar ligjet e miratuara nga Parlamenti i entitetit lidhur me regjistrimin e pronës shtetërore në emër të entitetit apo ligje për festat.

Prokuroria e Bosnjës kishte njoftuar se që nga dhjetori i vitit 2024 po zhvillonte hetime lidhur me dyshimet për sulm ndaj rendit kushtetues të Bosnjës.

Në mars të këtij viti, gjykata lëshoi fletarresime për Dodikun, kryeministrin e Republikës Sërpska, Radovan Vishkoviq dhe kryetarin e Kuvendit Popullor të Republikës Sërpska, Nenad Stevandiq, si të dyshuar për sulm ndaj rendit kushtetues.

Urdhri u lëshua në ditën kur Kuvendi Popullor i Republikës Sërpska pritej të diskutonte për një draft të kushtetutës së Republikës Sërpska, përmes së cilës autoritetet në këtë entitet planifikonin të përcaktonin atë si shtet të popullit serb, t’i jepnin të drejtën për vetëvendosje, të themelonin ushtrinë e vet dhe të shfuqizonin Këshillin e Popujve.

Kodi Penal i Bosnje e Hercegovinës parashikon dënime deri në pesë vjet burgim dhe ndalim të ushtrimit të detyrës zyrtare për këdo që përpiqet në mënyrë të paligjshme të ndryshojë rendin kushtetues të Bonjës, ose të rrëzojë institucionet më të larta të saj./REL

Një takim mes Presidentit rus Vladimir Putin dhe Presidentit amerikan Donald Trump konsiderohet i domosdoshëm nga Kremlini, por kërkon përgatitje të kujdesshme dhe tërësore, tha të enjten zëdhënësi i presidencës ruse, Dmitry Peskov.

“Një takim i tillë është me të vërtetë i nevojshëm; të gjithë e kuptojnë këtë, dhe të dy presidentët kanë shprehur gatishmërinë e tyre për ta mbajtur atë. Megjithatë, ai duhet të përgatitet me kujdes dhe tërësisht,” deklaroi Peskov për gazetarët.

Komentet e tij erdhën si reagim ndaj vërejtjeve të ndihmësit presidencial rus, Yury Ushakov, pas bisedës së fundit telefonike mes dy liderëve. Sipas Ushakov, pavarësisht se një takim i drejtpërdrejtë nuk u diskutua gjatë telefonatës, ideja “është në ajër”.

Putin dhe Trump zhvilluan një bisedë telefonike një ditë më parë, e katërta në vetëm një muaj e gjysmë dhe e gjashta që nga fillimi i vitit. Biseda zgjati rreth një orë dhe fokusohej në zhvillimet në Ukrainë, Lindjen e Mesme dhe çështje të tjera ndërkombëtare.

Megjithëse asnjë takim nuk është zyrtarizuar ende, shkalla e komunikimit dhe gatishmëria e deklaruar nga të dyja palët lënë të hapur mundësinë për një takim të afërt mes dy presidentëve, në një kohë kur tensionet globale dhe lufta në Ukrainë mbeten prioritete ndërkombëtare.

Ministri izraelit i Mbrojtjes, Israel Katz tha sot se ushtria e vendit të tij synon të ndërmarrë hapa të mëtejshëm pas luftës me Iranin – për të siguruar që Republika Islamike të mos përbëjë më një kërcënim.

Katz tha se ushtria po përgatiste një plan zbatimi për këtë qëllim.

“Ushtria duhet të përgatitet si në aspektin e zbulimeve ushtarake ashtu edhe në atë të operacioneve – për të siguruar epërsi ajrore mbi Teheranin dhe për të parandaluar Iranin të rindërtojë pajisjet e tij ushtarake”, tha ministri pas një takimi me zyrtarë të lartë të mbrojtjes.

Izraeli nisi një luftë disaditore kundër armikut të tij të betuar, Iranit, më 13 qershor, duke kryer sulme ajrore masive ndaj objektivave ushtarake në të gjithë vendin.

Teherani u përgjigj me sulme të ashpra me raketa ndaj Izraelit.

Sulmet izraelite u nxitën nga frika se udhëheqja iraniane po ecte përpara me prodhimin e armëve bërthamore, një akuzë që Irani e ka mohuar. /atsh

Të paktën 15 palestinezë humbën jetën gjatë natës në një sulm ajror izraelit në jug të Gazës, ndërsa tensionet mes Izraelit dhe Hamasit mbeten të larta, në pritje të një përgjigjeje përfundimtare për një propozim armëpushimi të ndërmjetësuar nga ShBA.

Sipas zyrtarëve lokalë të shëndetësisë në Spitalin Nasser në Khan Younis, sulmi goditi një kamp me tenda ku qëndronin palestinezë të zhvendosur nga luftimet që vijojnë prej gati dy vitesh. Sulmi ndodhi rreth orës 2 të mëngjesit, duke shkaktuar viktima në mesin e civilëve. Ushtria izraelite nuk ka dhënë ende një reagim zyrtar mbi këtë sulm.

Pamjet nga vendi i ngjarjes treguan funerale të përshkuara nga dhimbja, me të afërmit që qanin për të dashurit e tyre të vrarë. “Armëpushimi do të vijë, dhe unë e kam humbur vëllain tim? Duhet të kishte ndodhur shumë më parë,” tha mes lotësh 13-vjeçarja Mayar Al Farr, motra e Mahmoudit, një nga viktimat e sulmit.

Ndërkohë, Presidenti i ShBA-së Donald Trump deklaroi se pret që Hamasi të japë një përgjigje përfundimtare ndaj propozimit amerikan për një armëpushim brenda 24 orëve. Sipas tij, Izraeli ka rënë dakord për një marrëveshje armëpushimi 60-ditore, gjatë së cilës pritet të zhvillohen negociata për një zgjidhje përfundimtare të konfliktit.

Hamasi, nga ana tjetër, ka sinjalizuar se po shqyrton propozimin, por deri më tani nuk ka dhënë asnjë qëndrim publik nëse do ta pranojë apo refuzojë atë. Grupi militant ka insistuar më herët se do të pranojë vetëm një marrëveshje që sjell një përfundim të përhershëm të luftës.