Rusia dhe Ukraina kanë kryer sulme ajrore gjatë natës, vetëm disa orë pasi Kievi u pajtua për një armëpushim 30-ditor pas negociatave me zyrtarët amerikanë në Arabinë Saudite.

Dy sulme me raketa të kryera nga Rusia goditën qytetin Krivij Rih të Ukrainës, tha guvernatori rajonal, Serhiy Lysak më 12 mars. Ai tha se nga këto sulme u vra një person, ndërkaq në një sulm të ndarë ndaj një anijeje mallrash pranë qytetit të Odesës u vranë katër anëtarë të bordit të anijes.

Më pas, kryeqyteti ukrainas, Kiev, u godit nga një sulm tjetër i madh. Sulmi ndodhi vetëm disa orë pas negociatave në Xhedah të Arabisë Saudite mes delegacionit ukrainas dhe atij amerikan lidhur me përfundimin e luftës që Rusia nisi kundër Ukrainës më 2022.

Kryetari i Kievit, Vitali Klitschko, tha se mbrojtja ajrore u aktivizua dhe zmbrapsi sulmet.

Sulme janë raportuar edhe në Harkiv dhe Ministria për Transformim Digjital e Ukrainës tha se alarmet për sulme ajrore janë aktivizuar në dhjetë rajone që gjenden përreth Kievit.

Ministria ruse e Mbrojtjes tha se sistemet e saj kundërajrore kanë rrëzuar gjashtë dronë gjatë natës, një mbi Krimenë e aneksuar nga Moska dhe pesë mbi Detin e Zi. Kanali në Telegram, The Krymsky Veter, raportoi për shpërthime të fuqishme dhe lëshim të alarmeve paralajmëruese për sulme në qytetet në Gadishullin ukrainas të Krimesë dhe pranë objekteve të ushtrisë ruse.

Rusia, ndërkaq, tha se ka bërë përparime të tjera në rajonin perëndimor të Kurskut, teksa Moska po tenton të dëbojë forcat ruse që kanë pushtuar disa pjesë të territorit rus që nga gushti i vitit të kaluar.

Sulmet u kryen pasi Ukraina shprehu gatishmëri për të pranuar propozimin amerikan për zbatimin e një marrëveshje të përkohshme armëpushimi, me kohëzgjatje për 30 ditë, teksa SHBA-ja ka thënë se tani është në dorën e Moskës që të pajtohet në mënyrë që të hyjë në fuqi armëpushimi.

Kancelari gjerman Olaf Scholz deklaroi sot se tani i takon presidentit rus Vladimir Putin të mbajë një qëndrim, pasi Ukraina pranoi një propozim të SHBA-së për një armëpushim të menjëhershëm 30-ditor me Moskën.

“Tani topi është në fushën e Putinit”, tha kancelari gjerman në një postim në platformën ‘X’. Ai e konsideroi idenë e një armëpushimi njëmujor “një hap të rëndësishëm drejt një paqeje të drejtë për Ukrainën”.

“Ne qëndrojmë me Ukrainën dhe Shtetet e Bashkuara dhe mirëpresim propozimet nga Jeddah”, shtoi Scholz.

Edhe Kina njoftoi nga ana e saj se po ndjek me kujdes qasjen e Ukrainës, e cila ka shprehur gatishmërinë të pranojë propozimin amerikan për një armëpushim të menjëhershëm 30-ditor me Rusinë dhe se shpreson për një “paqe të qëndrueshme”.

“Ne shpresojmë që të gjitha palët, përmes dialogut dhe negociatave, të gjejnë një plan për një paqe të qëndrueshme dhe të përhershme që merr parasysh shqetësimet e të gjithëve”, tha Mao Ning, një zëdhënëse e Ministrisë së Jashtme kineze, gjatë një konferencë me gazetarët.

Për më tepër, Ministri i Jashtëm polak Radoslaw Sikorski tha sot se ai mund të konfirmojë se furnizimet me armë nga SHBA në Ukrainë nëpërmjet Polonisë kanë rifilluar dhe shërbimet e internetit satelitore Starlink janë funksionale.

Duke folur për gazetarët në Varshavë së bashku me ministrin e Jashtëm ukrainas Andriy Sibiha, Sikorski tha se Polonia është e kënaqur me propozimet e reja për Ukrainën.

Ish-presidenti i Gjeorgjisë, Mikheil Saakashvili u dënua sot me nëntë vjet burg shtesë, pasi u shpall fajtor për përvetësim.

Saakashvili , i cili shërbeu si president i vendit nga viti 2004 deri në 2013, ishte dënuar më herët me gjashtë vite burg për shpërdorim detyre pasi u kthye në Gjeorgji në 2021, ndërsa një pjesë të madhe të dënimit e ka kryer në spitalin e burgut.

Televizioni gjeorgjian transmetoi pamje nga salla e gjyqit, ku mbizotëronte tensioni gjatë leximit të vendimit, me mbështetësit e Saakashvilit që e cilësojnë gjyqtarin një “skllav” të qeverisë aktuale.

Një figurë thellësisht polarizuese në Gjeorgji sot, Saakashvili erdhi në pushtet në Revolucionin e Trëndafilave të vitit 2003. Ai udhëhoqi protestat e përditshme në qendër të Tbilisit dhe së shpejti detyroi presidentin e atëhershëm Shevardnadze të jepte dorëheqjen.

Mbështetësit e tij nuk hezituan të pushtonin parlamentin gjeorgjian – dhe në vitin 2004, në zgjedhjet ku ai garoi praktikisht pa kundërshtar, fitoi me 96% të votave dhe u bë presidenti më i ri në Evropë. Teksa ishte në pushtet, ai e riorientoi Gjeorgjinë drejt Perëndimit dhe nisi një program ambicioz reformash në sektorin publik, i cili pati rezultate të shpejta në këtë vend të Kaukazit Jugor me 3.7 milionë banorë.

Megjithatë, vitet e fundit të mandatit të tij u shënuan nga autoritarizmi, brutaliteti policor dhe një luftë shkatërruese me Rusinë në vitin 2008.

Në vitin 2012, partia e Saakashvilit, Lëvizja e Bashkuar Kombëtare, humbi një betejë zgjedhore ndaj një aleance të udhëhequr nga biznesmeni miliarder Bidzina Ivanishvili, i cili mbetet lider i Gjeorgjisë deri në ditët e sotme.

Pas largimit nga pushteti, Saakashvili u vendos në Ukrainë, ku shërbeu për një kohë të shkurtër si guvernator i rajonit jugor të Ukrainës, Odessa.

Në vitin 2021, ai u kthye në Gjeorgji, pavarësisht se u dënua në mungesë për shpërdorim detyre. Ai u arrestua dhe u burgos me të mbërritur në vend.

Presidenti i SHBA-së, Donald Trump, ka deklaruar se dhuna kundër shitësve të kompanisë së automobilave Tesla do të etiketohet si një akt i terrorizmit të brendshëm, si dhe u zotua për pasoja të rënda për autorët.

Duke folur së bashku me shefin ekzekutiv të kompanisë Tesla, Elon Musk, presidenti Trump theksoi mbështetjen e tij për prodhuesin e automjeteve elektrike.

Trump e quajti Tesla-n një “produkt të shkëlqyeshëm” dhe zgjodhi personalisht një Tesla Model S të kuq nga një flotë e parkuar në Shtëpinë e Bardhë. Ai tha se shpreson se lëvizja e tij do të rrisë shitjet e Tesla-s.

Musk, i cili konfirmoi planet për të vazhduar si shef ekzekutiv i Tesla-s, njoftoi se kompania do të dyfishojë prodhimin e automjeteve të saj në SHBA në dy vitet e ardhshme.

Ngjarja në Shtëpinë e Bardhë rriti aksionet e Tesla-s, duke ofruar një pushim mes rënies së shitjeve dhe vlerës së aksioneve për shkak të vandalizmit dhe kritikave ndaj rolit të Muskut në administratën amerikane.

Tesla është përballur me një valë sulmesh ndaj tregtarëve dhe objekteve të saj, të nxitura nga pakënaqësia me aktivitetet politike të Muskut, përfshirë udhëheqjen e tij të Departamentit të Efikasitetit të Qeverisë (DOGE), që kërkon të shkurtojë fuqinë punëtore dhe programet federale.

Vandalizmi ka shkaktuar humbje të konsiderueshme financiare, duke nxitur qëndrimin e fortë të Trumpit dhe shfaqjen publike të mbështetjes për kompaninë.