Inspektorati Qendror i Mbikëqyrjes së Tregut (IQMT), në bashkëpunim me Policinë e Kosovës dhe Inspektoratin Qendror të Punës, ka ndërmarrë një aksion të gjerë kontrolli, duke realizuar 98 inspektime të përbashkëta në qendrat e masazhit dhe lokalet e muzikës në të gjithë territorin e vendit.

Siç njofton Ministria e Industrisë, Ndërmarrësisë, Tregtisë dhe Inovacionit, si rezultat i mungesës së dokumentacionit të nevojshëm dhe mosrespektimit të orarit të punës, janë mbyllur tri qendra masazhi, prej të cilave dy në Komunën e Gjakovës dhe një në Komunën e Rahovecit.

Përveç mbylljes së këtyre lokaleve, IQMT ka shqiptuar edhe pesë gjoba ndaj subjekteve të tjera ekonomike që nuk kanë prezantuar dokumentacionin e kërkuar ligjor gjatë procesit të inspektimit.

Nga ministria theksojn se me qëllim të garantimit të ushtrimit të ligjshëm të veprimtarive ekonomike, IQMT në koordinim me institucionet përgjegjëse do të vazhdojë organizimin e aksioneve të tilla në të gjithë vendin. /E.A/

Ushtruesja e Detyrës së Presidentes së Republikës së Kosovës, Albulena Haxhiu, mori pjesë në përmbylljen e projektit “Na Mungojnë”, një nismë e cila përmes dokumentarëve dhe debateve publike ka sjellë në vëmendje rrëfimet e familjeve të personave të pagjetur dhe kërkesën e tyre të pandërprerë për drejtësi.

Në fjalën e saj, Haxhiu theksoi se mungesa e përgjigjeve vjen si pasojë e faktit që Serbia vazhdon t’i mbajë të mbyllura arkivat e saj ushtarake, policore dhe shtetërore. Sipas saj, në ato arkiva ndodhen të dhëna mbi urdhra, varrime e zhvarrime që familjet i presin prej më shumë se një çerek shekulli, duke shtuar se fshehja e gjurmëve në varrezat masive në territorin e Serbisë ka qenë tërësisht e qëllimshme.

Haxhiu bëri thirrje që hapja e arkivave të mos mbetet në vullnetin e Beogradit, por të trajtohet nga partnerët ndërkombëtarë si një detyrim i qartë i Serbisë ndaj të vërtetës. Ajo kujtoi se rreth 1,600 persona mbeten ende në listat e të pagjeturve, duke potencuar se projekte të tilla u japin emra dhe fytyra njerëzore statistikave.

Më tej, U.D. Presidentja nënvizoi se kërkesa për të ditur fatin e të pagjeturve kërkon punë të përditshme institucionale dhe falënderoi Institutin e Mjekësisë Ligjore, Komisionin Qeveritar, Prokurorinë Speciale dhe Policinë. Ajo vuri në pah se vitet e fundit është shënuar përparim falë rritjes së kapaciteteve dhe ndryshimeve ligjore që mundësojnë gjykimin në mungesë.

Në këtë rrafsh, Haxhiu përmendi hapat e rëndësishëm ligjorë e institucionalë që ka bërë Kosova, si anëtarësimin në Komisionin Ndërkombëtar për Persona të Zhdukur (ICMP) në korrik 2023, themelimin e Institutit për Krimet e Kryera gjatë Luftës në gusht 2023, si dhe Strategjinë për Drejtësi Tranzicionale 2024–2034. Si shembull të angazhimit konkret, ajo solli identifikimin dhe rivarrimin e fundit të viktimave të masakrës së Kralanit.

Në përmbyllje,  Haxhiu shprehu mirënjohje për BIRN Kosovën, ACDC-në, Bashkimin Evropian dhe veçanërisht për familjarët që pranuan të ndajnë dhimbjen e tyre, duke përsëritur zotimin se kjo punë nuk do të konsiderohet e kryer derisa të ketë përgjigje për çdo person të pagjetur. /E.A/

Departamenti për Mbrojtjen e Konsumatorit në kuadër të Ministrisë së Industrisë, Ndërmarrësisë, Tregtisë dhe Inovacionit (MINTI) ka trajtuar mbi 1.567 ankesa të konsumatorëve gjatë gjashtëmujorit të parë të vitit 2026.

Sipas MINTI-t, numri më i madh i ankesave lidhet me keqllogaritjet e orës në njehsorët elektrikë, garancionin dhe kthimin e mallit, mospërputhjen e çmimeve në markete, si dhe me blerjet online dhe mosdorëzimin e produkteve sipas përshkrimit.

Nga ministria theksojnë se numri i lartë i ankesave tregon se në shumë raste operatorët ekonomikë nuk po respektojnë plotësisht të drejtat e konsumatorëve, duke paralajmëruar rritje të mbikëqyrjes së tregut dhe masa shtesë për mbrojtjen e qytetarëve.

Ndërkohë, MINTI ka njoftuar se ka shqiptuar një tjetër gjobë prej 25 mijë eurosh ndaj KEDS-it, pasi gjatë kontrolleve janë gjetur pesë njehsorë elektrikë me afat të skaduar të verifikimit.

Deri më tani, ndaj KEDS-it janë shqiptuar gjithsej gjashtë gjoba, me vlerë totale prej 336 mijë eurosh.

Nga Zyra e Rregullatorit për Energji është bërë e ditur se konsumatorët që vërtetohet se janë dëmtuar nga devijimi i orës në njehsorë do të kompensohen plotësisht, ndërsa procedura e ankesës duhet të kalojë fillimisht përmes MINTI-t dhe KEDS-it, para se të dërgohet në ZRRE./A.K/

Komuna e Prishtinës ka njoftuar se faza e tretë e dezinsektimit hapësinor për vitin 2026 do të fillojë më 29 qershor, nga ora 20:00.

Sipas njoftimit, aktivitetet do të zhvillohen sipas planit dinamik të operimit, ndërsa hedhja e larvicideve do të realizohet më 29 dhe 30 qershor, duke filluar nga ora 09:00.

Nga komuna bëhet e ditur se realizimi i aktiviteteve varet nga kushtet atmosferike, ndaj mund të ketë ndryshime në datat dhe oraret e parapara.

Autoritetet u kanë bërë thirrje qytetarëve të informohen për zhvillimin e procesit dhe të respektojnë rekomandimet gjatë periudhës së dezinsektimit./A.K/