Autoritetet palestineze kanë paralajmëruar për një krizë akute humanitare në Rripin e Gazës, ku sipas tyre nevojiten të paktën 500 mijë thasë me miell çdo javë për të shmangur urinë në masë, në një territor të rrethuar dhe të izoluar prej muajsh nga ushtria izraelite, raporton agjencia Anadolu.

“Uria po bëhet më e rëndë dhe e përhapur në Gaza për shkak të mbylljes së plotë të të gjitha kalimeve nga pushtimi izraelit për 145 ditë dhe ndalimit të hyrjes së formulës(ushqimore) për foshnje dhe ndihmës humanitare” thuhet në një deklaratë të zyrës së medias së qeverisë së Gazës.

Deklarata zyrtare mohon pretendimet se hyrja e disa kamionëve me ndihma ka zbutur situatën, duke e quajtur këtë një “narrativë mashtruese dhe shtrembërim të qëllimshëm të realitetit në terren”.

Sipas kanalit shtetëror egjiptian Al-Qahera News, nga e mërkura e kaluar kanë hyrë në Gaza 166 kamionë me ndihma përmes pikave kufitare Zikim në veri dhe Kerem Shalom në jug. Megjithatë, sipas autoriteteve palestineze, ky është një volum ndihmash shumë i pamjaftueshëm për të përballuar krizën masive të urisë që po përshkon enklavën.

“Gaza ka nevojë urgjente për të paktën 500.000 thasë me miell në javë për të shmangur një kolaps të plotë humanitar” tha zyra.

Sipas të dhënave të Ministrisë së Shëndetësisë në Gaza, që nga tetori i vitit 2023, të paktën 111 persona – shumica fëmijë dhe të moshuar – kanë humbur jetën për shkak të urisë dhe kequshqyerjes.

Kriza humanitare po thellohet në kushtet kur Izraeli ka vonuar zbatimin e marrëveshjes për armëpushim dhe shkëmbim të të burgosurve me Hamasin, duke mbajtur të mbyllura kalimet kufitare që nga 2 marsi. Si pasojë, qindra kamionë me ndihma mbeten të bllokuar, të paaftë për të kaluar në territorin palestinez.

Fushata ushtarake izraelite, që nisi në tetor 2023 pas sulmit të Hamasit, ka vrarë mbi 59.200 palestinezë, sipas të dhënave lokale, shumica gra dhe fëmijë. Infrastrukturat kryesore të Gazës, përfshirë sistemin shëndetësor, janë shkatërruar, ndërsa mungesa ekstreme e ushqimit po rrezikon jetën e qindra mijëra civilëve.

Në nëntorin e kaluar, Gjykata Ndërkombëtare Penale (GJNP) lëshoi urdhër-arreste ndaj kryeministrit izraelit Benjamin Netanyahu dhe ish-ministrit të tij të Mbrojtjes Yoav Gallant, duke i akuzuar për krime lufte dhe krime kundër njerëzimit në Gaza. Ndërkohë, Izraeli përballet edhe me një padi për gjenocid në Gjykatën Ndërkombëtare të Drejtësisë (GJND), për shkak të operacioneve ushtarake dhe pasojave të tyre shkatërrimtare për popullsinë palestineze.

Krizat e njëpasnjëshme në Gaza kanë shtuar thirrjet ndërkombëtare për veprim urgjent dhe për lehtësimin e aksesit të ndihmës humanitare në territorin e rrethuar.

Kryeministri në detyrë, Albin Kurti mori pjesë në hapjen e Festivalit Ndërkombëtar të Domates, edicioni i 16-të, i cili mbahet tradicionalisht në Komunën e Mamushës. Kurti tha se festivali është dëshmi e shpirtit të banorëve të zellshëm të Mamushës, një komunë relativisht e vogël në përmasë, por shembull bereqeti për bujqësinë e Kosovës

“Vetëm përmes skemës së granteve fermerët e Mamushës kanë përfituar 7.5 milionë euro. Kjo përkrahje e jona e ka përmirësuar imazhin për bujqësinë e Kosovës dhe ka shtuar vullnetin te fermerët. Përkrahja do të vazhdojë të rritet sepse nevojat dhe kërkesa janë që prodhimet e Kosovës të jenë të mira, të shumta dhe cilësore”, tha ai.

Ai shtoi se Mamusha është mbështetur dhe ndihmuar, por sipas tij përkrahja për Mamushën do të shtohet edhe më shumë.

“Rritja e mbështetjes, e prodhimit dhe eksportit nënkupton rritje të ekonomisë dhe mirëqenies së fermerit, familjeve të tyre dhe të tjerëve hisedarë në zinxhirin e vlerës. Vetëm gjatë katër viteve të qeverisjes sonë 2021-2024, eksporti i perimeve është rritur për mbi 70%, nga 24 milionë euro sa ishte në periudhën 2017-2020, në 41 milionë euro në këto vitet e fundit”, u shpreh më tej Kurti.

Komuna e Prishtinës, në bashkëpunim me NDI Kosova, organizoi një diskutim të hapur me temën “Udhëheqje që transformon: Politikat lokale arsimore”, aktivitet ky i zhvilluar në kuadër të Javës së Gruas.

Ambasadorja Nancy Soderberg, drejtore e NDI në Kosovë, theksoi rëndësinë e zhvendosjes së debatit publik nga niveli qendror në atë lokal për të dëgjuar zërin e grave në terren. Ajo tha se fuqizimi i grave mund të jetë i qëndrueshëm vetëm kur përfshin çdo nivel të shoqërisë.

“Kjo platformë përbën rrjetin më të madh ndërsektorial në Kosovë dhe ka dëshmuar vazhdimisht se kur grave u jepen mjetet e nevojshme, mbështetja e duhur dhe njohja që meritojnë, ato udhëheqin ndryshime transformuese nëpër komunitete dhe institucione. Sot, së bashku me ju, po e lansojmë Javën e Gruas me debatet politike në nivel komunal me qëllim që të zhvendosim dialogun dhe diskutimin publik nga niveli qendror në atë lokal dhe si rrjedhojë të dëgjojmë zërat nga terreni. Ne e dimë se fuqizimi i grave do të jetë i qëndrueshëm dhe gjithëpërfshirës vetëm kur arrin në të gjitha nivelet e shoqërisë. Me padurim presim debatet e radhës që do të mbahen javën që vjen në komunat”, shtoi ajo.

Kryetari i Prishtinës, Përparim Rama, gjithashtu theksoi rëndësinë e një politike arsimore që bazohet në nevojat reale të fëmijëve dhe në bashkëpunim të ngushtë me komunat në gjithë vendin.

“Le ta ndërtojmë të ardhmen e vendit tonë së bashku, me hapa të përbashkët dhe në mënyrën më të mirë të mundshme.
Kjo nuk është rruga që duam ta bëjmë vetëm se është proces që duam ta ndajmë me të gjithë ju me të gjitha komunat dhe gjithë vendin. Një politikë që nis nga nevojat reale të fëmijëve tanë që mbështet në nevoja reale që i kemi, me informata të sakta, të cilat sjellin rezultatet të matshme. T’i japim zë këtij vizioni të përbashkët që lidh çdo qytet dhe çdo pjesë të territorit të vendit tonë, të ndërtuar së bashku me komunat tona, që t’i njohim nevojat dhe së bashku t’i bëjmë hapat. E shoh si mundësi që hapat t’i bëjmë së bashku dhe ta ndërtojmë të ardhmen e vendit tonë në mënyrë më të mirë të mundshme”, tha Rama.

Ndërsa, koordinatorja e Forumit Ekonomik të Grave, Saxhide Mustafa, tha se arsimi është thelbi i zhvillimit ekonomik dhe një shoqërie të barabartë.

Ajo ngriti shqetësimin për rënien e përfshirjes në arsim prej 5 për qind në disa grupmosha, duke theksuar nevojën për politika të koordinuara mes nivelit lokal dhe qendror.

Mustafa gjithashtu nënvizoi sfidat, me të cilat po përballen qytetet si Prishtina dhe Fushë Kosova për shkak të migrimit nga zonat rurale dhe mbingarkesës në infrastrukturë.

“Për të diskutuar për rëndësinë dhe rolin që luan politikat arsimore për një shoqëri të barabartë dhe të qëndrueshme është e nevojshme çdo ditë. Arsimi është thelbi është baza e një shteti është një proces që transformohet në zhvillimin ekonomik. Është e rëndësishme që edhe politikat lokale të jenë bashkë me politikat qendrore që të ketë përfshirje. Ka rënie 5 për qind kjo kërkon thellë transformim kjo grupmoshë. Dikur jemi mburrur me një popullsi të re po e shohim që vitet e fundit ka ndikuar faktorë të ndryshëm. Qyteti i Prishtinës dhe Fushë Kosovës ka sfida që po e presion ka mbi ngarkesë një migrim prej zonave rurale në ato urbane”, tha ajo.

Ministri në detyrë i Mbrojtjes, Ejup Maqedonci, ka thënë se politika shtetërore e Serbisë është mbështetësja më e madhe e destabilizimit në Ballkanin Perëndimor. Ai i ka reaguar homologut nga Serbia, Bratislav Gashiq, pasi ky i fundit ka folur për kushtet e jetesës së serbëve të Kosovës derisa i ka paraqitur ato si të këqija.

Gashiq ka akuzuar kryeministrin në detyrë, Albin Kurti, e ministrin në detyrë të Brendshëm, Xhelal Sveçla, se kanë synim destabilizimin.

“Deklarata e Ministrit serb të Mbrojtjes, Gashiq, se Kryeministri i Republikës së Kosovës, Albin Kurti, dhe institucionet tona po ‘sajojnë luftën kundër krimit për qëllime terrori dhe spastrimi etnik’, është një deklaratë në frymën e shefit të tij, Aleksandër Vuçiq, dhe idolit të tyre të përbashkët ideologjik, kryekriminelit Sllobodan Millosheviq”, ka shkruar Maqedonci në Facebook.

Maqedonci e ka quajtur hipokrizi akuzën e Gashiqit derisa ka thënë se në Serbi përgatisin parada madhështore ushtarake për të frikësuar fqinjët. Ai i ka quajtur tërësisht të pabaza deklaratat e Gashiqit, duke theksuar se Kosova vepron ligjshëm brenda kufijve shtetërorë.

“Kur flasim për krimin dhe destabilizimin, i kujtojmë Ministrit Gashiq se politika shtetërore e Serbisë mbetet gjeneratorja dhe mbështetësja më e madhe dhe më e rrezikshme e destabilizimit dhe krimit në Ballkanin Perëndimor. Përmes një lufte hibride — që përfshin kërcënimin konvencional përmes militarizimit të zonave përreth Kosovës, mbështetjen dhe strehimin e grupeve terroriste të udhëhequra nga krimineli Millan Radoiçiq, fushatave të dezinformimit dhe lajmeve të rreme, luftësdiplomatike dhe sponsorizimit të akteve të sabotazhit — strukturat politike dhe të sigurisë në Serbi synojnë destabilizimin e qëllimshëm të Republikës së Kosovës, si dhe minimin e sovranitetit, kushtetutshmërisë dhe ligjshmërisë së saj”, ka shkruar ai.

Maqedonci ka paraqitur dy masa që sipas tij Serbia duhet t’i ndërmarrë për të arritur një paqe të qëndrueshme dhe stabilitet në Evropën Juglindore, së pari, de-hegjemonizimi i politikës serbe, e cila sipas tij ende sillet me logjikën e dominimit ndaj fqinjëve; dhe së dyti, dekriminalizimi i ushtrisë serbe.