Sport

​FFK dhe FIFA premtojnë mbështetje për klubet e prekura nga vërshimet

Përveç stadiumeve, nga vërshimet janë dëmtuar edhe palestra dhe salla të ndryshme sportive.

Published

on

Mbi 300 mijë euro po vlerësohet dëmi i shkaktuar në dy stadiume të Kosovës, atë “18 Qershori” në Klinë dhe “Bajram Aliu” në Skenderaj, nga vërshimet e fundit që prekën disa komuna të Kosovës.

Për të dalë nga kjo gjendje e rënduar, drejtuesit e klubit të futbollit Dukagjini dhe ata të klubit të futbollit Drenica kanë kërkuar ndihmën e institucioneve të Republikës së Kosovës dhe të Federatës së Futbollit.

Kjo e fundit ka premtuar mbështetje direkte për të gjitha klubet që janë prekur nga këto vërshime dhe se për këtë tashmë janë duke u bërë vlerësimet e nevojshme.

Ushtruesi i detyrës së Sekretarit të Përgjithshëm të FFK-së, Taulant Hodaj ka thënë se në këtë gjendje emergjente FFK së bashku me UEFA-në dhe FIFA-në do t’iu dalin në ndihmë klubeve.

“Federata e Futbollit si në vazhdimësi që është përkrah klubeve, posaçërisht në këtë situatë emergjente, menjëherë kryetari ka shkuar me një komision e ka verifikuar këtë gjendje të jashtëzakonshme që ka ndodhur me dëmtimin e këtyre stadiumeve. Po, iu konfirmoj që do të mbështeten nga Federata e Futbollit të Kosovës dhe besoj që edhe UEFA dhe FIFA do të na ndihmojnë në këtë drejtim që për shkak se ka qenë situatë emergjente ka qenë një vis major apo gjendje e jashtëzakonshme dhe në rrethana të tilla gjithmonë ne i mbështesim anëtarët dhe do t’i mbështesim edhe në përmirësim të infrastrukturës ku ka dëmtuar kjo gjendje që ishte”, tha Hodaj.

Hodaj ka shtuar se Federata e Futbollit pret që në këtë situatë të ndihmohen edhe nga komunat dhe institucionet qendrore të Republikës së Kosovës, por pavarësisht kësaj, kjo federatë do të jetë pranë klubeve me program konkret për përmirësimin e infrastrukturës së dëmtuar.

“Është duke u bërë një raport dhe në bashkëpunim me komunat përkatëse dhe nëse edhe institucionet qendrore të Kosovës involvohen ne do t’i ndihmojmë. Por varësisht a i ndihmojnë komunat apo institucionet qendrore, ne, FFK-ja ka në program të vetin që të iu ndihmojë në përmirësimin e infrastrukturës të këtyre stadiumeve që janë afektuar nga kjo gjendje e jashtëzakonshme”, theksoi Hodaj.

E një lajm i mirë për këto klube ka ardhur edhe nga shtëpia më e madhe e futbollit botëror, FIFA. Kjo organizatë përmes një letre dërguar FFK-së, e cila u lexua në kuvendin e jashtëzakonshëm të mbajtur më 27 janar, ka ofruar mbështetje për të gjitha klubet e prekura duke bërë të ditur se është duke u shqyrtuar mënyra e ndihmës për mes projektit të quajtur “FIFA Recovery Program”.

“Dua të shpreh solidaritetin për të gjithë të prekurit nga vërshimet për të gjithë të prekurit nga vërshimet në pjesën jugore të regjionit të Mitrovicës. Mendimet tona janë me ju dhe jemi duke shqyrtuar mënyrën që në këtë kohë të vështirë ta asistojmë komunitetin e prekur nga këto vërshime nën kornizën e ‘FIFA Recovery Program’”, thuhet në letrën e FIFA-s dërguar Federatës së Futbollit të Kosovës.

Përveç stadiumeve, nga vërshimet janë dëmtuar edhe palestra dhe salla të ndryshme sportive nëpër komuna si Klinë, Skenderaj, Pejë dhe Mitrovicë.

Sport

Barcelona shqyrton alternativa për ndeshjen ndaj Valencias për shkak të vonesave në “Camp Nou”

Published

on

By

Barcelona pritet të luajë ndeshjen e parë në shtëpi për sezonin 2025/2026 më 14 shtator kundër Valencias, por ka dyshime të mëdha nëse stadiumi i saj, “Spotify Camp Nou”, do të jetë gati në kohë për këtë takim.

Ndërkohë, janë propozuar disa alternativa për zhvillimin e ndeshjes, nëse stadiumi nuk përfundon në kohë. Disa opsione përfshijnë luajtjen në stadiumin Montjuic, por kjo është e pamundur për shkak të një koncerti që do të mbahet aty të premten në mbrëmje. Një tjetër mundësi është Estadi Johan Cruyff, por ai ka kapacitet vetëm për 6,000 tifozë. Po ashtu, mund të zhvillohet ndeshja pa praninë e tifozëve.

Një mundësi tjetër që po shqyrtohet është që Barcelona të kërkojë që ndeshja të zhvillohet jashtë fushe, duke e lënë Valencian të presë në Mestalla. Megjithatë, Cadena Cope raporton se La Liga nuk lejon që ndeshjet të ndryshohen në kalendar, dhe kërkesa e Barcelonës për të luajtur tri ndeshje radhazi jashtë fushe është refuzuar.

Për momentin, Barcelona ende nuk ka njoftuar La Ligën për një alternativë tjetër dhe opsionet më të mundshme janë stadiumi Estadi Johan Cruyff ose ai i Gironës, Montilivi. Ky i fundit ndodhet rreth një orë në veri të Barcelonës dhe mund të pranojë deri në 15,000 tifozë.

Sipas Marca, Barcelona ka përfunduar të gjitha përpjekjet për dërgimin e Certifikatës së Përfundimit në Këshillin e Qytetit për të siguruar lejen për hapjen e “Camp Nou”, por vonesat mund të vazhdojnë.

Continue Reading

Sport

Andre Onana mbetet në Manchester United, nuk ka oferta për portierin

Published

on

By

Andre Onana pritet të qëndrojë në Manchester United pasi deri më tani nuk janë bërë oferta për portierin kamerunas, pavarësisht pritshmërive për ndryshime në portën e “Old Trafford”.

Portieri 29-vjeçar ka pasur dy sezone të vështira në Angli, ku gabimet e tij kanë ngritur dyshime për të ardhmen e tij në skuadër. Megjithatë, United kanë qenë të hapur ndaj ofertave në kërkim të një numri 1 të ri.

Një dëmtim i pësuar gjatë stërvitjeve përgatitore ka komplikuar më tej situatën, duke bërë që Onana të lihet jashtë për nisjen e sezonit 2025/2026.

Ndërkohë, trajneri Ruben Amorim i ka besuar Altay Bayindir në ndeshjet kundër Arsenal dhe Fulham, por ai ka treguar pasiguri në portë, duke lënë Manchester United me probleme në këtë pozicion të rëndësishëm.

Skuadra londineze është lidhur me emra si Emi Martinez nga Aston Villa dhe Gianluigi Donnarumma nga Paris Saint-Germain, ndërsa thuhet se po afron marrëveshjen me portierin belg Senne Lammens nga Royal Antëerp.

Sipas raportimeve nga GIVEMESPORT dhe Fabrizio Romano, ardhja e Lammens në klub nuk do të nënkuptojë largimin e Onanës, pasi portieri kamerunas nuk ka asnjë ofertë për t’u shqyrtuar.

Continue Reading

Sport

Arsenali synon të nënshkruajë me Piero Hincapie, sfidon Tottenhamin

Published

on

By

Pas nënshkrimit me mesfushorin Eberechi Eze, Arsenali po synon të sigurojë edhe një tjetër objektiv të Tottenhamit në këtë afat kalimtar veror. Sipas një raportimi nga gazetari David Ornstein, klubi nga “Emirates” është duke punuar për një marrëveshje me mbrojtësin Piero Hincapie të Bayer Leverkusen.

Hincapie, i cili mund të luajë si qendërmbrojtës dhe si mbrojtës i majtë, është aktualisht nën kontratë me kampionët e Gjermanisë deri në vitin 2029. Megjithatë, 23-vjeçari raportohet se ka shprehur dëshirën për t’u larguar gjatë kësaj vere. Ai ka një klauzolë lirimi prej 60 milionë eurosh, por po zhvillohen bisedime për ta ulur këtë çmim në një vlerë më të përballueshme.

Arsenali, i cili ka afruar tashmë shtatë lojtarë të rinj gjatë verës, përfshirë Viktor Gyokeres dhe Martin Zubimendi, thuhet se është i gatshëm të avancojë në bisedime me Leverkusen, me kusht që të realizohen disa largime nga skuadra aktuale për të balancuar financat.

Raporti i Ornstein vjen menjëherë pas lajmeve se Tottenham kishte bërë një ofertë për Hincapie, duke propozuar një marrëveshje huazimi me detyrim blerjeje në verën e ardhshme. Spurs kanë nisur gjithashtu diskutimet për kushtet personale me lojtarin.

Megjithatë, preferenca e vetë Hincapie thuhet se është një kalim te Arsenali, që tani duket se janë në pozita më të favorshme për të siguruar nënshkrimin e tij, duke ndjekur një rrugë të ngjashme me transferimin e Eze.

Continue Reading

Sport

Dani Ceballos mund të largohet nga Real Madrid këtë verë

Published

on

By

Mesfushori Dani Ceballos ka lënë të hapur mundësinë e një largimi nga Real Madrid gjatë afatit kalimtar veror. Pas paraqitjes së shkurtër në ndeshjen e fundit të La Ligës ndaj Oviedos, Ceballos publikoi në Instagram një foto me mbishkrimin “Last dance” (Vallja e fundit) dhe një emoji falënderimi, që shihet si një sinjal i qartë për ndarje të afërt nga klubi.

29-vjeçari po konsideron ndryshimin e destinacionit, teksa ka marrë oferta nga skuadra që garojnë në Ligën e Kampionëve. Me Xabi Alonson në krye të stolit të Realit, Ceballos ka humbur rëndësinë në hierarkinë e mesfushës, duke u renditur i gjashti në këtë repart, përkrah edhe lojtarëve të dëmtuar si Jude Bellingham dhe Eduardo Camavinga.

Trajneri ka preferuar të aktivizojë Aurelien Tchouamenin dhe Federico Valverden, ndërsa Arda Güler është përshtatur në rolin e mesfushorit qendror, duke shtuar konkurrencën për vendin e Ceballos. Kjo e vështirëson shumë mundësinë për të siguruar minuta të rregullta në formacionin titullar.

Në fitore 3-0 ndaj Oviedos, Ceballos u aktivizua vetëm në minutën e 86-të, ndërsa në ndeshjen me Osasunën nuk u përfshi në planet kryesore, pavarësisht dëshirës për të qëndruar dhe për të luftuar për vendin e tij.

Ceballos ishte i vetëdijshëm se për të fituar një rol të rëndësishëm në Real Madrid dhe për të bindur përzgjedhësin e Spanjës, Luis de la Fuente, për një vend në Botërorin 2026, duhet të kishte më shumë minuta në fushë. Nëse nuk gjen një klub ku të luajë rregullisht, ëndrra e tij për Botërorin rrezikon të ngecë.

Continue Reading

Të kërkuara