Rritja e AfD-së në zgjedhjet e djeshme në Gjermani, një parti kundër imigrimit, është rezultat i zemërimit publik rreth çështjeve të migrimit dhe sigurisë, pas një morie të sulmeve të kryera nga emigrantët, dhe pas shqetësimeve për dobësim të ekonomisë.

Pavarësisht kësaj, AfD pritet të mbetet jashtë pushtetit, tani për tani, sepse të gjitha partitë tjera kanë refuzuar të bashkëpunojnë me të.

Liderët e AfD-së kanë thënë se janë shumë të lumtur me rezultatin e këtyre zgjedhjeve.

Njëri prej udhëheqësve, Tino Chrupalla, ka thënë se është “shumë krenar” me partinë.

“Ne ishim të bashkuar, fushata jonë ka pasur cak dhe kemi qenë të disiplinuar”, ka thënë ai, duke qenë afër Alice Weidelit, udhëheqëses tjetër të partisë.

“Ne mund të bëjmë ndryshim epokal”, ka thënë ai, duke shtuar se janë të hapur për negociata.

“Ne kemi fituar besimin e votuesve dhe kjo duhet të jetë diçka që e pranojnë të gjithë”, ka shtuar ai.

Udhëheqësi i ardhshëm i Gjermanisë, Friedrich Merz, ka lëshuar një paralajmërim të ashpër për Evropën se Shtetet e Bashkuara janë bërë “kryesisht indiferente” ndaj fatit të kontinentit dhe duhet të bëhen të pavarura.

Ai kritikoi gjithashtu ndërhyrjen e zyrtarëve amerikanë në zgjedhjet e së dielës, të cilat fitoi partia e tij konservatore CDU, pasi administrata Trump dhe Elon Musk mbështetën AfD-në e ekstremit të djathtë.

Merz tha në një tryezë të rrumbullakët diskutimi televiziv të dielën mbrëma se “përparësia e tij absolute” do të ishte “të forcojë Evropën sa më shpejt që të jetë e mundur në mënyrë që ne të mund të arrijmë pavarësinë e vërtetë nga SHBA-ja hap pas hapi”.

Megjithatë, rezultati u përshëndet nga Presidenti Trump, i cili postoi në mediat sociale se ishte “një ditë e mrekullueshme për Gjermaninë”.

Aleanca konservatore e Gjermanisë CDU/CSU, e udhëhequr nga Friedrich Merz, i ka fituar zgjedhjet e së dielës për Qeverinë e re federale, me 28.5 – 29 për qind të votave, sipas sondazheve të para televizive.

Partia e të djathtës ekstreme, Alternativa për Gjermaninë (AfD) renditet e dyta me 19.5 – 20 për qind të votave, që do të thotë se e ka dyfishuar rezultatin e zgjedhjeve të vitit 2021, bazuar në shifrat e publikuara nga transmetuesit publikë, ARD dhe ZDF.

Sipas tyre, partia e kancelarit Olaf Scholz renditet e treta.

Dalja në zgjedhje ka qenë 83 për qind, në krahasim me 76.6 për qind më 2021.

Më shumë se 59 milionë njerëz kanë pasur të drejtë të votojnë në shtetin me 84 milionë banorë, për të zgjedhur anëtarët e Bundestagut – dhomës së ulët të parlamentit – me 630 ulëse.

Administrata Trump ka vendosur shumicën e punonjësve të Agjencisë së Shteteve të Bashkuara për Zhvillim Ndërkombëtar (USAID) në pushim administrativ nga mesnata e së dielës dhe ka pushuar nga puna qindra të tjerë.

Përveç rreth 4,200 punonjësve që janë lënë në pushim, të paktën 1,600 punonjës janë pushuar nga puna.

Masa vjen disa javë pasi përpjekja fillestare e Presidentit Donald Trump për të eliminuar mijëra punonjës të USAID-it u pengua nga një sfidë ligjore.

Një gjykatës federal ndaloi përkohësisht planin e administratës për të shkatërruar agjencinë amerikane të ndihmës së huaj, por vendosi të premten se pauza nuk do të ishte e përhershme. E themeluar në vitin 1961, USAID punësoi rreth 10,000 staf derisa filloi shkurtimi i fundit i kostove.

Njoftimi për punonjësit e USAID-it të dielën nga Zyra e Administratorit thoshte se “personeli i caktuar” përgjegjës për funksione kritike ose në udhëheqje do të përjashtohej nga pushimi administrativ.

Nuk është e qartë se sa punonjës do të mbahen, por USAID më parë kishte konsideruar 611 personel si thelbësor.