Ylber Ramadani, mesfushori i Kombëtares shqiptare, është pranë një hapi të madh në karrierën e tij, teksa Napoli, nën drejtimin e trajnerit Antonio Conte, ka shfaqur interes për ta afruar në radhët e veta gjatë kësaj merkatoje dimërore.

Sipas burimeve pranë klubit, Napoli synon të sigurojë kartonin e Ramadanit, i cili aktualisht është pjesë e Lecce. Negociatat janë në fazat e para, dhe pritet që ditët në vijim të jenë vendimtare për të përcaktuar të ardhmen e lojtarit shqiptar në Serie A.

Ndërkohë, Lecce vazhdon të ruajë fokusin te futbollistët shqiptarë. Pas suksesit me Ramadanin dhe Medon Berishën, klubi italian ka piketuar dy lojtarë të tjerë të Kombëtares: Elseid Hysajn dhe Arbër Hoxhën. Hysaj, aktualisht pjesë e Lazios, dhe Hoxha, që luan për Dinamo Zagreb, nuk po gjejnë hapësirat e dëshiruara në ekipet e tyre, duke e bërë transferimin në Lecce një mundësi premtuese për të dy.

Me një qasje të qartë drejt përforcimit të mbrojtjes dhe krahëve të sulmit, drejtuesit e Lecces synojnë që Hysaj dhe Hoxha të sjellin eksperiencë dhe cilësi. Nëse këto transferime realizohen, Lecce do të ketë një prani të fuqishme shqiptare në skuadër, duke nisur nga mbrojtja e deri në sulm.

Një gjë është e sigurt: tregu i futbollistëve shqiptarë vijon të jetë një burim i rëndësishëm për Serie A, dhe transferimet e mundshme të Ramadanit, Hysajt dhe Hoxhës do të forcojnë edhe më shumë ndikimin e Kombëtares shqiptare në kampionatin italian./UBTNews/

Kristjan Asllani, mesfushori shqiptar, duket se do të ketë mundësi të luajë titullar më shumë se sa aktualisht në Inter, ku konkurenca është e fortë për një vend në formacionin bazë, për shkak të pranisë së Hakan Çalhanollu. Ky fakt ka shtyrë shumë skuadra të tjera të shprehin interes për Asllanin, dhe një prej tyre është Bologna.

Sipas raporteve nga gazeta e qytetit të Bolognas, “Il Resto Del Carlino”, klubi italian ka identifikuar Asllanin si një prej përforcimeve të mundshme për pjesën e dytë të sezonit, ku Bologna synon t’i afrohet sërish zonës së Ligës së Kampioneve. Në këtë edicion, skuadra po lufton për një vend në këtë kompeticion elitar.

Bologna i ofron mundësinë Asllanit të luajë titullar, një mundësi që do të ishte interesante për mesfushorin shqiptar. Megjithatë, klubi i Bologna është i ndërgjegjshëm se do të jetë e vështirë të sigurohet transferimi i Asllanit, pasi ai mbetet një alternativë e rëndësishme për trajnerin e Interit, Simone Inzaghi, në betejën për mbrojtjen e titullit dhe një ecuri të suksesshme në Ligën e Kampioneve./UBTNews/

Finalja e 37-të e Superkupës së Italisë zhvillohet sot, ku përballen dy rivalët e përjetshëm, Inter dhe Milan. Zikaltrit e Simone Inzagit, kampionët në fuqi, u kualifikuan pas fitores 2-0 ndaj Atalantës falë dopietës së Dumfrisit. Në anën tjetër, kuqezinjtë e Serxho Konseisaos triumfuan ndaj Juventusit me një përmbysje dramatike. Milani synon të fitojë trofeun për herë të parë që nga viti 2016 dhe të arrijë kuotën e 8 trofeve, ndërsa Interi kërkon të barazojë rekordin e Juventusit me 9 fitore në këtë kompeticion.

Statistikat flasin për një rivalitet të ngushtë. Ky është derbi i dytë i sezonit, pas fitores 2-1 të Milanit në shtator. Në përballjet e kaluara në Superkupë, secila skuadër ka nga një fitore: Milani në vitin 2011 dhe Interi në vitin 2022. Nëse Milani fiton, do të arrijë dy fitore radhazi kundër Interit, diçka që nuk ka ndodhur që nga sezoni 2010-2011. Ndërkohë, Interi synon të bëhet skuadra e parë që fiton 4 finale radhazi në këtë kompeticion.

Për trajnerët, kjo finale është gjithashtu historike. Simone Inzagi mund të barazojë rekordin e Mançinit dhe Herrerës si trajneri më fitues i Interit, ndërsa Serxho Konseisao synon të bëhet trajneri i parë i Milanit që regjistron dy fitore radhazi që nga viti 2014. Me lojtarë si Dumfris dhe Pulisiç në formë të mirë, finalja pritet të jetë një spektakël i madh për tifozët e të dyja skuadrave./UBTNews/