Lajmet

Veseli përfundon dëshminë në Hagë, thotë se askush nuk mund ta mohojë që BIA ka luftuar kundër pushtuesit

Ai ka thënë që beson se trupi gjykues është i interesuar të gjejë të vërtetën.

Published

4 years ago

on

Veterani i Ushtrisë Çlirimtare të Kosovës, Sejdi Veseli ka thënë se anëtarët e njësisë BIA kanë qenë pjesëtarë të UÇK-së dhe se askush nuk mund ta mohojë që të njëjtit kanë luftuar kundër pushtuesit serb. Veseli i cili ka dëshmuar në gjykimin ndaj Salih Mustafës në Hagë, ka thënë para trupit gjykues që BIA ishte vendosur në Zllash meqë ishin të rrezikuar të qëndronin në qytet për shkak të aksioneve të shumta që kishin kryer.

Në Hagë, Veseli ka pasur kritika për çështjen e përkthimit pasi sipas tij, transkriptet janë me gabime.

“Për që kam thënë vinë me u strehu ata nuk kanë ardhur që kanë punuar në bujqësi, kanë marrë pjesë luftarake, nuk bien ë kontradiktë me vetveten, unë e kuptoj ata kanë ardhur, ka mujt me qenë ‘lapsus’, edhe mundet me ndodh që edhe të përkthimi, unë dje e kam parë, kur e kam parë transkriptën e kam parë çfarë gabime katastrofale ka, çfarë konstrukti të fjalisë palidhje ka, dhe mund të ndodh, unë po them shumë troç ata kanë qenë pjesëtar të Ushtrisë Çlirimtare të Kosovës sikur që kam qenë unë, ata e kanë pasur komandën e vet nuk ka qenë detyrë e imja me përcjellë çka punojnë ata, dhe as nuk kam lejuar me më përcjellë çka punon Brigada 153 se janë rregulla ato, shumë strikte. Askush nuk mund të ua mohojë se ata kanë luftuar kundër pushtuesit dhe kanë ardhur jo për qejf, nuk kanë ardh në piknik në Zllash, por kanë ardh me u rehabilitu pas aksioneve që kanë kryer sepse kanë kryer shumë aksione”, ka thënë Veseli.

Veseli ka thënë se nuk ka qenë në dijeni për programin e njësisë BIA veçse të njëjtit janë bashkuar me Brigadën 153 në ofensivën e prillit të vitit 1999.

“Unë programin e tyre nuk e kam ditë dhe nuk kam dashur me interefru në punën e tyre, ata i kanë ditë punët e veta por një e di dhe e kam thënë gjithmonë, kanë qenë ushtar të Ushtrisë Çlirimtare të Kosovës dhe ata e kanë pasur programin e vet, e kanë pasur komandën e vet dhe natyrisht në bazë të programit të vet kanë bërë edhe veprime taktike çfarë është dashur me i bë, por e thash që kur ka ardh puna te ofensiva ata ushtarët e BIA-s të cilët kanë qenë të strehuar në atë kompleks, ata janë bashkuar në një front me Brigadën 153, kanë luftuar dhe më konkretisht te Vitia e Marecit”, ka thënë Veseli.

Megjithatë, Veseli ka deklaruar që BIA nuk i ka raportuar Brigadës 153 duke theksuar se ata kanë qenë njësi në vete.

Në fund të dëshmisë së tij, Veseli i cili është ftuar nga ZPS për dëshmi, ka thënë që beson se trupi gjykues është i interesuar të gjejë të vërtetën.

“Kam besim që jeni luftëtarë që doni me zbulu të vërtetën dhe qëndrimi im prej fillimit ka qenë shumë i sinqertë, pa marrë parasysh që ju jeni panel gjykues, këta janë prokurorë, në mua çdo herë mund të llogarisni një mik”, ka thënë ai.

Dëshmitari i radhës në gjykimin ndaj Salih Mustafës do të dëgjohet të martën, më 1 shkurt, dhe i njëjti mban kodin W04849.

Deri tani në proces janë dëgjuar dhjetë dëshmitarë të mbrojtur të ZPS-së, pas tyre Fatmir Sopi e Sejdi Veseli në seanca të hapura.

Gjykimi ndaj Mustafës ka filluar më 15 shtator 2021 dhe është i pari në Dhomat e Specializuara të Kosovës në Hagë.

Aktakuza ndaj Salih Mustafës, i cili është i arrestuari i parë nga Specialja, është konfirmuar më 12 qershor të vitit 2020 ndërsa ai u arrestua më 24 shtator të vitit të kaluar, me pretendimin për krime lufte. Ai po qëndron në qendrën e paraburgimit në Hagë ndërsa në deklarimin e tij para trupit gjykues, Salih Mustafa është deklaruar i pafajshëm.

Related Topics:
Continue Reading

Lajmet

Rama nga Londra: Kosova s’duhet të merret me Serbinë, por të përmbushë detyrimet ndaj BE-së

Published

3 hours ago

on

October 21, 2025

By

Në Londër po zhvillohet një tryezë me temën “Ballkani Perëndimor dhe Bashkimi Europian”, ku ndër folësit kryesorë është edhe kryeministri i Shqipërisë, Edi Rama.

I pyetur për pozicionin e Kosovës në rajon dhe për ecurinë e saj drejt anëtarësimit në Bashkimin Europian, Rama u shpreh se Prishtina duhet të fokusohet tek përmbushja e detyrimeve që burojnë nga dialogu me Serbinë dhe jo tek vetë raportet dypalëshe.

“Që të jetë e suksesshme Kosova duhet të harrojë Serbinë, fjalë për fjalë dhe duhet të realizojë të gjitha pikat që kanë të bëjnë me dialogun e ndërmjetësuar nga BE-ja, pavarësisht nga Serbia, pra ata t’ia lënë topin në fushë Serbisë dhe të ecin para drejt Europës duke lënë Europën të merret me Serbinë dhe mos ta lënë çështjen e Serbisë të shndërrohet në çështje fajësimi midis të dyjave. Megjithatë, është mendimi im ky, unë respektoj atë që vendosin udhëheqësit e zgjedhur të Kosovës për vendin e tyre”, tha ai./EO

Continue Reading

Lajmet

Supremja: Pranohet ankesa e kandidatit të pavarur për kryetar të Kllokotit, rrëzohet vendimi i PZAP-së

Published

3 hours ago

on

October 21, 2025

By

Kolegji i Gjykatës Supreme e ka pranuar si të bazuar ankesën e kandidatit të pavarur për kryetar të Komunës së Kllokotit, Arber Emini, dhe ka prishur vendimin e Panelit Zgjedhor për Ankesa dhe Parashtresa (PZAP), të datës 15.10.2025.

Sipas Supremes, çështja është kthyer në rivendosje në PZAP.

“Bazuar në shkresat e lëndës, Arber Emini me datë 13.10.2025, është ankuar në PZAP, me pretendimin se “me datë 12.10.2025 në Zgjedhjet Lokale në Kllokot, Serbia ka ndërhyrë në sistemin zgjedhor në Komunën e Kllokotit, duke fabrikuar dëshmi mjekësore serbe të strukturave paralele për t’u shfrytëzuar votuesit me asistencë të përdorin këtë vërtetim mjekësor”, thuhet në komunikatë.

Më tej thuhet se Gjykata Supreme e Kosovës vlerëson se PZAP, gabimisht ka vendosur kur e ka hedhur poshtë ankesën e ankuesit, për faktin se nga pretendimet që dalin nga ankesa, i njëjti është ankuar për procesin dhe parregullsitë gjatë ditës së votimit dhe jo kundër rezultateve preliminare të tabuluara nga KQZ, ashtu siç ka pretenduar PZAP në vendimin e saj.

“Andaj, në rivendosje, PZAP, udhëzohet që t’i evitojë shkeljet e theksuara në Aktvendimin e Gjykatës Supreme, AA.nr.93/2025, dhe të vendos në mënyrë meritore lidhur me ankesën e kandidatit të pavarur për kryetar të Komunës së Kllokotit, Arber Emini”, thuhet në njoftim.

Zgjedhjet e rregullta komunale janë mbajtur më 12 tetor./KP

Continue Reading

Lajmet

Rrahje dhe gjuajtje me armë zjarri në qendër të Podujevës, policia jep detaje

Published

3 hours ago

on

October 21, 2025

By

Pak qaste më parë ka ndodhur një rrahje dhe gjuajtje me armë zjarri në Podujevë.

Lajmin e ka konfirmuar Flora Ahmeti zëdhënëse e Policisë së Kosovës për Rajonin e Prishtinës.

Sipas Ahmetit lidhur me këtë rast policia ka shoqëruar në stacion policor katër persona, prej tyre 1 dëshmitar dhe tre persona të dyshuar të cilët ishin të përfshirë në rast.

Ajo tha se sot rreth orës 14:30 është pranuar informata për një rrahje dhe shkrepje të armës në Podujevë.

“Me të marrë informatën policia, ka dalë në vendin e ngjarjes nga ku jemi njoftuar se si pasojë e rrahjes nga një mjet i fortë (shkop) është lënduar një person i cili është dërguar për trajtimin e nevojshëm mjekësor. Lidhur me këtë rast policia ka shoqëruar në stacion policor katër persona, prej tyre 1 dëshmitar dhe tre persona të dyshuar të cilët ishin të përfshirë në rast”, thuhet në përgjigjen e zëdhënëses Ahmeti.

Ajo ka shuar se aktualisht policia po vazhdon punën për zbardhjen e rrethanave dhe motiveve që karakterizojnë ngjarjen./KP

Continue Reading

Lajmet

​Vdes në moshën 29-vjeçare kampioni amerikan i shahut

Published

4 hours ago

on

October 21, 2025

By

Kampioni amerikan i shahut dhe komentatori online Daniel Naroditsky ka ndërruar jetë në moshën 29-vjeçare.

Sipas BBC, familja e tij e përshkroi vdekjen si të papritur, pa dhënë shkakun.

Naroditsky ishte një lojtar i talentuar, edukator dhe komentator, i njohur për kanalin e tij në YouTube me afro 500,000 abonentë dhe stream-et në Twitch me 340,000 ndjekës.

Ai luajti një rol kyç në popullarizimin e përmbajtjes së shahut online.

Ai filloi shahun në moshën 6 vjeç, fitoi Kampionatin Botëror të të Rinjve nën 12 vjeç në 2007, dhe në 2013 u bë Grandmaster i SHBA-së. Naroditsky u diplomua në Stanford dhe punoi si trajner shahu në Charlotte, Karolina e Veriut.

Shumë kolegë dhe fansa e përshkruan si një inspirim, historian të shahut dhe dikë që e bënte lojën argëtuese dhe të thjeshtë për të gjithë./S.K/KP/

Continue Reading

Të kërkuara