Policia e Kosovës ka realizuar me sukses ekstradimin e dy shtetasve kosovarë pas një bashkëpunimi të ngushtë me autoritetet gjermane.

Gjatë ditës së djeshme, nga Gjermania për në Kosovë është sjellë një person i kërkuar për “lëndim të rëndë trupor”, ndërsa sot drejt autoriteteve gjermane është ekstraduar një tjetër shtetas që kërkohej për “vrasje në tentativë” dhe “grabitje”.

“Në koordinim dhe në bashkëpunim me institucionet e drejtësisë, me datën 11.02.2026 ka bërë ekstradimin e shtetasit kosovar nga Gjermania për në Kosovë. I njëjti ishte arrestuar nga autoritetet gjermane, pasi që kërkohej me urdhërarrest ndërkombëtar lëshuar nga institucionet e drejtësisë së Kosovës, për veprën penale ‘lëndim i rëndë trupor’. Po ashtu me datën 12.02.2026 është realizuar ekstradimi nga Kosova për në Gjermani i shtetasit kosovar i cili kërkohej me urdhërarrest ndërkombëtar të lëshuar nga institucionet e drejtësisë gjermane për përfshirje në veprat penale ‘vrasje në tentativë’ dhe ‘grabitje’.”, thuhet në njoftimin e Policisë.

Të dy operacionet u kryen përmes Drejtorisë për Bashkëpunim Ndërkombëtar Policor, duke u bazuar në urdhërarrestet ndërkombëtare dhe marrëveshjet ligjore mes dy shteteve.

Policia e Kosovës ka bërë të ditur se personat e arrestuar u janë dorëzuar njësive përkatëse për procedim të mëtejshëm, duke rikonfirmuar përkushtimin për kapjen e personave që tentojnë t’i ikin drejtësisë, pavarësisht se ku ndodhen.

Në mbledhjen e parë të kabinetit të ri qeveritar, Kryeministri Albin Kurti ka kërkuar angazhim të menjëhershëm, duke e kthyer takimin ceremonial në një mbledhje pune.

Ai theksoi se përvoja e fituar dhe përgatitja e kabinetit janë garanci se “ky kabinet i ka të gjitha parakushtet që të jetë më i suksesshmi në historinë e re të Kosovës”.

Fokus i veçantë iu dha zhbllokimit të fondeve ndërkombëtare që kishin mbetur peng i shpërndarjes së Kuvendit.

Kurti vuri në dukje rëndësinë e votimit të planit të rritjes nga BE-ja prej 882.6 milionë eurosh dhe marrëveshjeve me Bankën Botërore, duke deklaruar: “Me votën tuaj sot po i japim vendit një mundësi tjetër për t’i ratifikuar këto marrëveshje”.

Në përfundim të mbledhjes, kabineti miratoi pa asnjë kundërshtim projektligjin për buxhetin e vitit 2026, i cili kap vlerën rekord prej mbi 4 miliardë eurosh.

Kurti e përmbylli këtë pikë duke konfirmuar riprocedimin e menjëhershëm të këtij projektligji drejt Kuvendit për miratim final.

Qeveria Kurti 3 u votua më 11.02.2026. Për kanë votuar 66 deputetë për, 49 kundër dhe asnjë abstenim.

Gjatë paraqitjes së argumenteve të tij, avokati i Selimit, Geoffrey Roberts vuri në dukje se prokuroria po operon me hamendësime sa i përket funksionimit të brendshëm të Shtabit të Përgjithshëm të UÇK-së.

Sipas Roberts, prokuroria ka dështuar të vërtetojë takimet që pretendon se kanë ndodhur mes krerëve të zonave operative. Ai ka theksuar se në rindërtimin e ngjarjeve nga ana e ZPS-së ka paqartësi totale për elementet bazë të një akuze:

“Takimet që ZPS-ja pretendon se kanë ndodhur në Shtabin e Përgjithshëm apo mes komandantëve të zonave kanë boshllëqe të mëdha se kush mori pjesë në këto takime, kur dhe ku, dhe se si informacioni u nda në këto takime,” deklaroi Roberts.

Mbrojtja u ndal edhe te pretendimet për urdhra të lëshuar ndaj personave që perceptoheshin si bashkëpunëtorë të regjimit. Roberts ka sqaruar se nuk ka asnjë dokument apo dëshmi që lidh Selimin me vendime të tilla.

“Nuk ka prova se Selimi kishte dijeni, ishte i përfshirë apo mbështeste këto urdhra të supozuara,” u shpreh avokati, duke shtuar se sjellja e Shtabit të Përgjithshëm po interpretohet pa pasur një bazë faktike që implikon klientin e tij.

Në fund, avokati Roberts kritikoi logjikën e prokurorisë, e cila sipas tij, po përpiqet ta fajësojë Selimin thjesht për shkak të pozicionit dhe prezencës së tij fizike në Kosovë gjatë luftës.

“Fakti se Selimi në atë kohë ishte në Kosovë nuk është asgjë më tepër se një supozim nga ana e prokurorisë,” përfundoi ai, duke e quajtur këtë qasje të pamjaftueshme për të dëshmuar përgjegjësinë penale.

Avokati i Selimit: Nuk pati ndërmarrje kriminale, synimi ishte fundi i shtypjes nga Millosheviqi

Gjatë paraqitjes së fjalës përfundimtare në Gjykatën Speciale në Hagë, avokati i Rexhep Selimit, Geoffrey Roberts, ka deklaruar me vendosmëri se nuk ka ekzistuar asnjë Ndërmarrje e Përbashkët Kriminale në të cilën ishte i përfshirë klienti i tij apo të bashkakuzuarit e tjerë në asnjë moment të periudhës që përfshin aktakuza.

“Dua të themi shumë qartë se nuk ka ekzistuar Ndërmarrje e Përbashkët Kriminale (NKP) në të cilën ishte përfshirë Rexhep Selimi apo të bashkakuzuarit e tij në asnjë moment të periudhës së aktakuzës. Kjo është kështu, ka qenë dhe mbetet dhe ky është qëndrim “

Roberts theksoi para trupit gjykues se ky qëndrim mbetet i palëkundur, duke argumentuar se qëllimi për të marrë në kontroll Kosovën nuk ishte në asnjë mënyrë kriminal.

Përkundrazi, sipas tij, kjo ishte rruga e vetme dhe e domosdoshme për t’i dhënë fund shtypjes sistematike dhe brutale që forcat e dhunshme të regjimit të Millosheviqit po ushtronin mbi popullsinë shqiptare në Kosovë, duke e cilësuar veprimtarinë e UÇK-së si një mjet për çlirim dhe jo si projekt kriminal.

“Në vetvete qëllimi për të marrë në kontroll Kosovën nuk është kriminal dhe shumë larg nga kjo është e vetmja mënyrë për ti dhënë fund shtypjes sistematike dhe brutale të popullsisë shqiptare në Kosovë nga forcat e dhunshme të Millosheviqit” tha avokati i Selimit

Roberts: Selimi është tërësisht i pafajshëm

Pas përfundimit së fjalëve përmbyllëse të mbrojtjes së Kadri Veselit, fjalët përfundimtare po i vazhdon mbrojtja e Rexhep Selimit.

Avokati i Rexhep Selimit, Geoffrey Roberts, deklaroi në hapje të fjalës së tij se Zyra e Prokurorit të Specializuar ka dështuar plotësisht të vërtetojë krimet që i ngarkohen klientit të tij.

Ai theksoi se Selimi është tërësisht i pafajshëm për të gjitha pretendimet e aktakuzës dhe se prokuroria nuk ka arritur të përmbushë detyrimin ligjor për të vërtetuar fajësinë e tij.

“Selimi është tërësisht i pafajshëm për të gjitha krimet e pretenduara në aktakuzë. ZPS-ja thjesht nuk ka arritur të përmbush detyrimin e saj për të vërtetuar krimet e pretenduara. Kaq është dhe ky është qëndrimi ynë” tha ai.

Roberts sqaroi se mbrojtja nuk e ka për detyrë të vërtetojë se pretendimet e prokurorisë janë të gabuara, pasi barra e provës i takon vetëm ZPS-së.

Sipas tij, prokuroria nuk mund ta transferojë këtë përgjegjësi te mbrojtja, por duhet të paraqesë prova që kanë vlerë provuese, janë koherente, relevante dhe dëshmi të dëshmitarëve të mbështetshme për të vërtetuar akuzat e ngritura.

Avokati i Veselit: ZPS-ja po përdor dëshmitë e pasluftës sepse nuk ka prova për periudhën e luftës

Në Gjykatën Speciale në Hagë, mbrojtja e Kadri Veselit ka argumentuar se Zyra e Prokurorit të Specializuar po tenton të përdorë zhvillimet e pasluftës për të mbuluar mungesën e provave gjatë periudhës së luftës.

Avokati Rodney Dixon ka sqaruar para trupit gjykues se dëshmitë që lidhen me Shërbimin Informativ të Kosovës (SHIK) i përkasin një periudhe shumë më të vonshme se ajo e pretenduar në aktakuzë.

Gjatë fjalës së tij, Dixon deklaroi se: “Dëshmia e Veselit, së cilës ata i referohen, ka të bëjë me SHIK-un pas luftës, ku ai përshkruan zhvillimet në periudhën pasluftës në gjysmën e dytë të vitit ’99 dhe pastaj në vitin 2000 deri në zhbërjen e strukturës së SHIK-ut në vitin 2008. Veseli shprehet se kapacitetet e SHIK-ut si strukturë në fillim ishin të kufizuara sa i përket numrit dhe trajnimeve, dhe vetëm më vonë, në gjysmën e dytë të vitit 2000, kishin filluar një bazë të strukturës që funksiononte në mënyrën e duhur sa i përket operacioneve.”

Më tej, mbrojtja u ndal edhe te dëshmitë e bashkëluftëtarëve të tij, duke specifikuar se asokohe nuk kishte trajnime të mirëfillta të inteligjencës.

Avokati përmendi se: “Për këtë dha dëshmi edhe Jakup Krasniqi, se ai ishte rekrutuar në verën e vitit 2000 dhe në dëshminë e tij ai tha se kur bëri trajnimin e parë nga miqtë ndërkombëtarë, ishte trajnimi i parë që kishte të bëjë me shërbimet e zbulimit.” Në mbyllje të argumentit të tij, Dixon akuzoi ZPS-në për mungesë faktesh konkrete për periudhën e konfliktit, duke theksuar se: “Pra, e gjitha kjo është pas lufte dhe ajo çfarë bëri ZPS-ja është se kaloi në periudhën e pasluftës, sepse nuk kanë asgjë gjatë luftës.”

Mbrojtja e Veselit kërkon hetim të thellë për dokumentet e Beogradit

Avokati i Kadri Veselit, Rodney Dixon, ka ngritur shqetësime serioze lidhur me provat që dorëzohen nga autoritetet serbe në procesin gjyqësor në Dhomat e Specializuara.

Ai ka kërkuar që çdo material që vjen nga Beogradi t’i nënshtrohet një analize të rreptë për të vërtetuar origjinën dhe vërtetësinë e tij, duke insistuar se Prokuroria ka detyrim të verifikojë çdo detaj përpara se t’i paraqesë ato si prova.

“Duhet kushtuar rëndësi e veçantë dokumenteve që u janë dhënë autoriteteve e sigurisht që do t’i cekim shënimet dhe dokumentet; duhet trajtuar po ashtu edhe autenticiteti, zinxhiri i ruajtjes e të tjerë. Dhe, sipas Dhomës së Apelit, është shumë e rëndësishme që të shikohen me shumë imtësi provat që janë dhënë nga autoritetet e Beogradit lidhur me përgjimet dhe dokumentet e tjera, dhe kjo është një gjë që duhet ta bëjë realisht prokuroria. Është tjetër gjë t’i japësh të gjitha dokumentet në grup pa vënë në diskutim asnjë prej tyre, por është tjetër gjë të shohësh me hollësi se çfarë origjine kanë këto dokumente dhe çfarë autenticiteti; kjo si punë duhet të bëhet absolutisht me shumë hollësi.”, tha avokati i Veselit

Dixon: ZPS po përdor dokumente pa vërtetësi nga frika e dëshmitarëve

Gjatë seancës gjyqësore në Hagë, avokati i Kadri Veselit, Rodney Dixon, ka hedhur akuza të rënda ndaj Zyrës së Prokurorit të Specializuar (ZPS), duke e cilësuar qasjen e tyre për nxjerrjen e provave si tërësisht jo logjike.

Dixon argumentoi se prokuroria po tenton të fusë dokumente si prova pa i ballafaquar dëshmitarët me to, pasi sipas tij, prokurorët janë të pasigurt për atë që mund të thuhet në sallë.

“Sigurisht kur je i frikësuar se çfarë mund të thotë dëshmitari, është më e sigurt që të kërkosh pranimin e provave jo gojore,” u shpreh ai, duke kujtuar se shumë dëshmitarë kanë deklaruar se nuk dinë asgjë për dokumentet që u janë treguar.

Avokati theksoi se ZPS-ja ka për detyrë të vërtetojë autenticitetin e çdo materiali, por në vend të kësaj po tenton të shmangë lidhjen direkte midis dëshmisë dhe dokumentit.

Sipas Dixon, prokuroria po aplikon standarde të dyfishta, duke kundërshtuar dokumentet e mbrojtjes kur nuk i volit, ndërsa insiston në vërtetësinë e dokumenteve të veta pa asnjë bazë solide: “ZPS-ja e ka për detyrë të tregojë që këto janë dokumente autentike në qoftë se duan të mbështeten në vërtetësinë e përmbajtjes së tyre.”

Mbrojtja e Veselit nis fjalët përfundimtare

Pas përfundimit të mbrojtjes së Hashim Thaçit, procesi gjyqësor në Gjykatën Speciale ka vazhduar me paraqitjen e fjalëve përfundimtare nga ekipi mbrojtës i ish-kryetarit të Kuvendit të Kosovës, Kadri Veseli.

Para trupit gjykues, Veseli po përfaqësohet nga avokati i tij, Rodney Dixon, i cili po shpalos argumentet përmbyllëse kundër akuzave të Prokurorisë.

Ky proces po zhvillohet në një moment kyç, pasi vetëm një ditë më parë ekipi mbrojtës i ish-presidentit Hashim Thaçi mbylli zyrtarisht fjalën e tij përfundimtare.

Të dy udhëheqësit, së bashku me Rexhep Selimin dhe Jakup Krasniqin, po gjykohen për pretendimet mbi krime lufte dhe krime kundër njerëzimit.

Pas përfundimit të fjalëve përmbyllëse nga të gjitha ekipet e mbrojtjes, trupi gjykues do të tërhiqet për të shqyrtuar provat përpara shpalljes së aktgjykimit.

Shefja e Politikës së Jashtme të Bashkimit Evropian, Kaja Kallas ka përshëndetur formimin e Qeverisë së re të Kosovës, pas më shumë se një viti bllokade politike.

Përmes një reagimi në rrjetin “X”, ajo e cilësoi si lajm inkurajues krijimin e institucioneve të reja dhe uroi kryeministrin Albin Kurti për marrjen e detyrës.

“Pas më shumë se një viti ngërçi politik, formimi i qeverisë së re të Kosovës është lajm inkurajues. Urime Albin Kurti!”, thuhet në reagim e Kallasit.

Ajo theksoi se tani është thelbësore që qeveria të veprojë shpejt në zbatimin e reformave, duke nënvizuar se kjo është mënyra më e shpejtë për të zhbllokuar mbështetjen e BE-së me vlerë qindra miliona euro dhe për të avancuar në rrugën drejt integrimit evropian.

Sipas saj, ky zhvillim krijon një momentum të ri për avancimin e marrëdhënieve mes BE-së dhe Kosovës, si dhe për dialogun ndërmjet Prishtinës dhe Beogradit. Shefja e diplomacisë evropiane ka shprehur gjithashtu gatishmërinë për të organizuar së shpejti një takim të nivelit të lartë në kuadër të dialogut

Kuvendi i Kosovës ka votuar Qeverinë e re të Kosovës, dje më 11.02.2026, në krye me Albin Kurtin. Pro qeverisë votuan 66 deputetë, 49 votuan kundër, ndërsa nuk pati asnjë abstenim.

Me këtë votim, Kuvendi zgjodhi zyrtarisht Qeverinë e re të Kosovës, e cila do të udhëhiqet nga kryeministri Albin Kurti.