Një gjykatës federal në SHBA ka vendosur në favor të aktores Blake Lively, duke urdhëruar producentin e filmit It Ends With Us, Jamey Heath, të dorëzojë të gjithë materialin filmik që tregon bashkëshorten e tij, Natasha, gjatë lindjes.

Sipas dokumenteve të depozituara më 17 nëntor, gjykatësi Lewis J. Liman theksoi se pamjet “duhej të ishin dorëzuar” në kuadër të  urdhërit të mëparshëm për zbulimin e provave dhe se çdo video që dokumenton momentin e lindjes “mund të mbështesë pretendimet e Lively-t”.

Për shkak të natyrës së ndjeshme të materialit, pamjet do të mbeten të vulosura dhe të mbrojtura nga urdhri gjyqësor.

Lively, 38 vjeç, kishte kërkuar sanksione ndaj Heath për mosdorëzimin e plotë të videove dhe për të ndaluar atë të dëshmojë mbi pamjet që ajo pretendon se i janë treguar. Gjykatësi Liman refuzoi vendosjen e sanksioneve, duke argumentuar se keqinterpretimi i urdhrit nga Heath nuk përbën shkelje të qëllimshme. Ai urdhëroi që të gjithë materialet shtesë të dorëzohen deri më 20 nëntor.

Sipas dokumenteve të paraqitura nga ekipi i Lively-t, Heath kishte dorëzuar vetëm fragment të videos, aktorja ka “kundërshtuar vazhdimisht” se ai përputhet me atë që i është shfaqur asaj dhe asistentes së saj në set.

Ajo pretendon se për javë të tëra pala e Heath këmbëngulte se nuk ekzistonte material tjetër, derisa pranoi në depozitë se posedon më shumë video. Videoja e lindjes është në qendër të padisë së Lively-t, ku ajo akuzon regjisorin Justin Baldoni dhe Heath për sjellje “të shqetësuese” dhe “joprofesionale”.

Pala e Baldoni dhe Wayfarer mohon pretendimet, duke e cilësuar videon si moment “të bukur” familjar, i ndarë me pëlqimin e Natasha-s. /A.Z/UBT News/

Leonardo DiCaprio do të nderohet me një nga çmimet më prestigjioze të Festivalit Ndërkombëtar të Filmit në Palm Springs.

Aktori do të marrë Çmimin Desert Palm Achievement Award, i cili i jepet artistëve që kanë shënuar arritje të madhe në kinematografi.

Lajmin e bëri të ditur kryetari i festivalit, Natchatar Singh Chandi, i cili vlerësoi performancën e DiCaprios në “One Battle After Another”.

“Në filmin ‘One Battle After Another’, Leonardo DiCaprio ofron një performancë bindëse dhe të ngarkuar emocionalisht, duke portretizuar një njeri të shtyrë deri në kufijtë e tij përballë vështirësive të mëdha”, tha Chandi.

Ai shtoi se gjatë gjithë karrierës së tij, DiCaprio ka sfiduar kufijtë e mundësive të aktrimit, duke sjellë gama emocionale, integritet artistik dhe përkushtim të palëkundur në çdo rol.

Filmi, i shkruar, drejtuar dhe prodhuar nga Paul Thomas Anderson, ndjek historinë e Bob Ferguson, një ish-rebel që përballet me harresën dhe pasivitetin e jetës së tij.

Kur armiku i tij i betuar, i interpretuar nga Sean Penn, rikthehet pas 16 vitesh dhe vajza e tij zhduket, Ferguson nis një udhëtim të dëshpëruar për ta gjetur. Ngjarjet e detyrojnë babanë dhe vajzën të përballen me trauma të vjetra që nuk i kanë kapërcyer kurrë.

Në kast përfshihen Regina Hall, Teyana Taylor, Alana Haim dhe Benicio del Toro. Filmi është xhiruar me VistaVision 35 mm, duke i dhënë një estetikë klasike dhe vizuale të fuqishme, kryesisht në Kaliforni dhe El Paso, Teksas.

Performanca ka marrë vlerësime nga kritika,filmi ka pasur sukses komercial, duke grumbulluar mbi 200 milionë dollarë në mbarë botën.

Festivali Ndërkombëtar i Filmit në Palm Springs, i themeluar më 1990, është bërë një nga eventet më të rëndësishme kinematografike.

Edicioni i ardhshëm zhvillohet nga 2 deri më 11 janar 2026, ndërsa ceremonia e ndarjes së çmimeve do të mbahet më 3 janar në Qendrën e Konventave të Palm Springs. Nderimi i DiCaprios pritet të jetë një nga momentet më të spikatura të festivalit, duke theksuar edhe njëherë statusin e tij si një nga aktorët më të vlerësuar të gjeneratës së tij. /A.Z/UBT News/